Diosnon nga Kalidad—Mas Birilhon kay han mga Diamante
An mga diamante maiha na nga gintatagad nga birilhon nga hiyas. An iba hito minilyon ka dolyar an kantidad. Pero posible ba nga para ha Dios may mas birilhon pa kay han diamante o iba pa nga marahalon nga bato?
Hi Haykanush, usa nga diri-bawtismado nga magwarali nga taga-Armenia, nakaagi hin pasaporte hirani ha iya balay. Ha sulod han pasaporte may credit card ngan kwarta nga daku an kantidad. Iginsumat niya ito ha iya bana, nga usa liwat nga diri-bawtismado nga magwarali.
An mag-asawa may problema ha pinansyal ngan may utang; pero nagdesisyon hira nga iuli an kwarta ha adres nga nakada ha pasaporte. Diri makatoo an tag-iya hito ngan an iya pamilya. Iginsaysay ni Haykanush ngan han iya bana nga an ira pagin tangkod resulta han ira pag-aplikar han ira hinbabaroan ha Biblia. Inabat nira nga kinahanglan nira magin tangkod, ngan ginsalingabot nira ini nga higayon nga sumatan ito nga pamilya mahitungod ha mga Saksi ni Jehova ngan magbilin ha ira hin mga literatura.
Karuyag han pamilya nga tagan hi Haykanush hin kwarta sugad nga pahalipay, pero waray niya ito karawata. Kinabuwasan, an asawa kumadto ha balay nira Haykanush ngan sugad nga pagpakita han pagpasalamat ha ira pamilya, nag-insister hiya nga karawaton ni Haykanush an usa nga diamante nga singsing.
Pariho hito nga pamilya, damu an diri makatoo ha pagin tangkod ni Haykanush ngan han iya bana. Pero nahipapausa ba hito hi Jehova? Paonan-o niya gintatagad an ira pagin tangkod? Bawi ba an ira pangalimbasog nga magin tangkod?
MGA KALIDAD NGA MAS BIRILHON KAY HAN MATERYAL NGA MGA BUTANG
Diri makuri batunon an mga pakiana nga gin-unabi ha igbaw. Tungod kay maaram an mga surugoon han Dios nga mas birilhon kan Jehova an pagpakita han diosnon nga mga kalidad kay han mga diamante, bulawan, o iba pa nga materyal nga butang. Oo, iba an panhunahuna han kadam-an nga tawo ha panhunahuna ni Jehova ha kon ano an birilhon ngan kon ano an diri. (Isa. 55:8, 9) Pero para ha iya mga surugoon, birilhon gud an pagpakita han mga kalidad ni Jehova.
Mahibabaroan naton ini tikang ha ginsisiring han Biblia mahitungod ha pagsabot ngan kinaadman. An Proberbios 3:13-15 nasiring: “Malipayon an tawo nga nakaagi han kinaadman, ngan an tawo nga nakakuha han sarabotan. Kay an pakakuha hini maoroopay kay han pakakuha han salapi, ngan an pulos hini kay han pino nga bulawan. Hiya labi kabirilhon kay han mga rubi: ngan waray han mga butang nga imo mauungara mahitatanding ha iya.” Matin-aw, ginpapabilhan gud ni Jehova an sugad nga mga kalidad kay ha bisan ano nga materyal nga bahandi.
Pero ano liwat an panhunahuna ni Jehova may kalabotan ha pagin tangkod?
Hi Jehova mismo tangkod; ‘diri hiya makakagbuwa.’ (Tito 1:2) Ngan gin-giyahan niya hi apostol Pablo nga magsurat ha Hebreo nga mga Kristiano ha siyahan nga siglo: “Padayon nga ig-ampo kami, kay natapod kami nga limpyo an amon konsensya, ngan karuyag namon gumawi hin tangkod ha ngatanan nga butang.”—Heb. 13:18.
Hi Jesu-Kristo nagpakita hin maopay nga susbaranan ha pagin tangkod. Pananglitan, hinumdumi han nagsiring an Hitaas nga Saserdote nga hi Caifas: “Ginpapasumpa ko ikaw ha atubangan han buhi nga Dios nga magsumat ka han kamatuoran kon ikaw an Kristo, an Anak han Dios!” Tangkod nga nagsumat hi Jesus nga hiya an Mesias, bisan kon puydi ito magin hinungdan nga akusaran hiya han Sanhedrin nga nagpapasipara ngan mahimo magresulta ha iya kamatayon.—Mat. 26:63-67.
Kumusta man kita? Magigin tangkod pa ba kita kon may mga sitwasyon diin an diri pagsumat han ngatanan o pagbaliko ha mga pulong mahimo maghatag ha aton hin materyal nga bentaha?
DIRI MASAYON AN PAGIN TANGKOD
Oo, diri masayon an pagin tangkod hinin kataposan nga mga adlaw diin damu an “mahigugmaon ha ira la kalugaringon, mahigugmaon ha kwarta.” (2 Tim. 3:2) An problema ha pinansyal o kawaray kasigurohan ha trabaho nakakaapekto gud ha pagin tangkod. Damu an naghuhunahuna nga husto la an pangawat, panlimbong, o iba pa nga diri tangkod nga buhat. Kalyap gud an panhunahuna nga kon materyal na nga butang an nahidadabi, imposible an pagin tangkod. May mga Kristiano pa ngani nga naimpluwensyahan hini ngan nawara an ira maopay nga reputasyon ha kongregasyon tungod han ira hingyap nga magkaada materyal nga bentaha.—1 Tim. 3:8; Tito 1:7.
Pero kadam-an han mga Kristiano an nagsusubad kan Jesus. Maaram hira nga an diosnon nga mga kalidad mas importante kay ha bisan ano nga karikohan o mga bentaha. Salit an Kristiano nga mga batan-on diri nanlilimbong basi la makakuha hin maopay nga grado ha eskwelahan. (Prob. 20:23) Oo, an usa nga tangkod diri pirme makakalaom hin balos, diri pariho kan Haykanush. Bisan pa hito, an pagin tangkod husto ha mga mata han Dios, ngan nabulig ito ha aton nga matipigan an limpyo nga konsensya, nga amo an mas birilhon.
Iginpakita ini ha ehemplo ni Gagik. Hiya nagsiring: “Antes ako magin Kristiano, nagtatrabaho ako ha usa nga daku nga kompanya nga an tag-iya naglilikay pagbayad hin buhis salit gutiay la nga kita han kompanya an iya iginpapareport. Sugad nga manidyer, ginlalaoman ako nga ‘makikigsabot’ ha nangungolekta han buhis pinaagi ha pagsuhol ha iya basi diri kwestyunon an panlimbong han amon kompanya. Tungod hito, nagkaada ako reputasyon han pagin diri tangkod. Han nahibaro ako han kamatuoran, umundang ako hito nga trabaho bisan kon daku an akon sweldo. Lugod, nagtukod ako han akon kalugaringon nga negosyo. Ngan ha tinikangan pa la, iginparehistro ko na ito ngan ginbaydan ko an ngatanan ko nga buhis.”—2 Cor. 8:21.
Hi Gagik nagsiring: “Inubos hin haros katunga an akon kita, salit nakurian ako pagtagana ha akon pamilya. Pero mas malipayon ako yana. Malimpyo an akon konsensya ha atubangan ni Jehova. Maopay ako nga ehemplo ha akon duha nga anak, ngan nagin kwalipikado ako nga magkaada mga pribilehiyo ha kongregasyon. Yana, kilala na ako han mga nangungolekta han buhis ngan han akon mga kustomer sugad nga tangkod nga tawo.”
HI JEHOVA AN SUROK HAN BULIG
Hinigugma ni Jehova adton mga naghahatag hin kadayawan ha iya katutdoan pinaagi ha pagpakita han iya mag-opay gud nga kalidad, upod na an pagin tangkod. (Tito 2:10) Gin-giyahan niya hi Hadi David nga isurat ini nga pasarig: “Nagin bata ako, ngan yana lagas na ako; kondi waray pa ako makakita nga an mga magtadong pagpasibay-an, bisan ngani waray pa an iya mga katulinan pagpakilimos hin tinapay.”—Sal. 37:25.
Ginpamatud-an ito han eksperyensya ni Ruth. Imbes nga bayaan an iya lagas na nga ugangan nga hi Noemi, nagmaunungon hiya kan Noemi. Bumalhin hi Ruth ha Israel, diin mahimo hiya makagsingba ha tinuod nga Dios. (Rut 1:16, 17) Ha Israel, nagin tangkod hiya ngan mauyatom, maduruto nga naninirok han mga salin uyon ha kahikayan han Balaud. Pariho han naeksperyensyahan ni David, waray pabay-i ni Jehova hira Ruth ngan Noemi. (Rut 2:2-18) Ngani, labaw pa ha materyal nga panginahanglan an iginhatag ni Jehova kan Ruth. Ginpili niya hi Ruth nga magin kaapoy-apoyan ni Hadi David ngan han iginsaad nga Mesias pa ngani!—Rut 4:13-17; Mat. 1:5, 16.
May mga surugoon ni Jehova nga bangin nakukurian gud nga magkaada igo nga kwarta para ha ira mga panginahanglan. Pero Prob. 12:24; Efe. 4:28.
imbes nga manlimbong, nangangalimbasog hira nga magmaduruto ha pagtrabaho. Salit iginpapakita nira nga mas ginpapabilhan nira an maopay gud nga mga kalidad han Dios, upod na an pagin tangkod, kay han bisan ano nga materyal nga butang.—Pariho kan Ruth, iginpapakita han mga Kristiano ha bug-os nga kalibotan nga natoo hira nga bubuligan hira ni Jehova. Bug-os gud an ira pagtoo ha Usa nga nagsaad hini: “Diri ko gud ikaw babayaan ngan diri ko gud ikaw papabay-an.” (Heb. 13:5) Pauroutro nga iginpapakita ni Jehova nga mabubuligan niya adton mga pobre nga tangkod ha ngatanan nga panahon, ngan karuyag gud niya nga buligan hira. Pirme niya gintutuman an iya saad nga itatagana niya an ira mga panginahanglan.—Mat. 6:33.
Oo, bangin ginpapabilhan han mga tawo an diamante ngan an iba pa nga materyal nga butang. Pero sigurado kita nga mas ginpapabilhan han aton langitnon nga Amay an aton pagin tangkod ngan an aton pagpakita han iya iba pa nga kalidad nga mas birilhon gud kay ha bisan ano nga marahalon nga bato!
An pagin tangkod nabulig ha aton nga matipigan an limpyo nga konsensya ngan magkaada kagawasan ha pagyakan ha ministeryo