Ginsisimbolohan nira an langitnon nga kasundalohan nga nakigbahin ha pagbungkag han Jerusalem ngan makikigbahin liwat ha pagbungkag han maraot nga sistema ni Satanas ha Armagedon. Kay ano nga makatadunganon inin bag-o nga pagsabot?

Katapos makita ni Esekiel an magraot nga ginbubuhat han apostata nga Jerusalem antes ito bungkagon han 607 B.C.E., nakakarawat hiya hin bisyon mahitungod han mga panhitabo nga magtutugway han kabungkagan hito. Nakakita hiya hin unom nga kalalakin-an nga may ipamaratay nga hinganiban. Nakakita liwat hiya hin tawo ha butnga nira nga ‘nakabisti hin lino’ ngan may dara nga “kanan parasurat [o, sekretaryo] surudlan hin tinta.” (Esek. 8:6-12; 9:2, 3) Ginsugo ini nga tawo: “Kadto na latasa an bungto, . . . ngan butangi hin tigaman an mga agtang han mga tawo nga nanhayhay ngan nga nagsinggit tungod han ngatanan nga kangil-aran nga ginbuhat dida ha butnga hini.” Katapos, ginsugo an kalalakin-an nga may ipamaratay nga hinganiban nga pamatayon an ngatanan nga aada ha bungto nga waray tigaman. (Esek. 9:4-7) Ano an igintututdo ha aton hini nga bisyon, ngan hin-o an tawo nga may surudlan hin tinta han sekretaryo?

Iginhatag ini nga tagna han 612 B.C.E., ngan nagkaada ini siyahan nga katumanan han ginbungkag an Jerusalem han kasundalohan han Babilonya—nga nahitabo paglabay la hin lima ka tuig. Bisan kon gintugotan ni Jehova an pagano nga Babilonya nga bungkagon an Jerusalem, nagserbi la hira sugad nga iya parapamatay. (Jer. 25:9, 15-18) Gin-gamit hira ni Jehova basi sirotan an iya apostata nga katawohan. Pero diri ngatanan bubungkagon. An magtadong diri pamamatayon kaupod han magraot. Mahigugmaon nga naghatag hi Jehova hin probisyon basi talwason an mga Judio nga nadiri ha mangil-ad nga nahitatabo ha bungto.

Hi Esekiel waray makigbahin ha pamutang han tigaman o ha pagbungkag mismo. Lugod, an mga anghel an nagpadapat han paghukom. Salit pinaagi hini nga tagna, sugad hin iginpapakita ha aton an mga nahitatabo ha langit. Ginsugo ni Jehova an iya mga anghel diri la basi tirukon an magraot para bungkagon kondi basi liwat ibulag an magtadong para talwason. *

Hadto, iginsasaysay naton nga an tawo nga may surudlan hin tinta han sekretaryo nagsisimbolo ha dinihogan nga nanhibilin sugad nga moderno nga katuman hini nga bisyon. Ginhuhunahuna liwat naton nga an mga nakarawat han mensahe nga iginsasangyaw gintigamnan na para ha katalwasan. Pero hinin bag-o la nga mga tuig, nagin matin-aw nga kinahanglan bag-uhon ini nga pagsaysay. Sumala ha ginsisiring ha Mateo 25:31-33, hi Jesus an naghuhukom ha katawohan. Hihimoon niya an ultimo nga paghukom durante han daku nga kasakitan. Hito nga panahon, ibubulag niya an sugad-karnero nga mga tawo basi talwason ngan an sugad-kanding nga mga tawo basi bungkagon.

Uyon hinin bag-o nga pagsabot, ano an aton mahibabaroan tikang ha bisyon ni Esekiel? Tagdon naton an lima hito:

1. Antes mabungkag an Jerusalem, nag-alagad hi Esekiel sugad nga magbarantay kaupod ni Jeremias, pariho han ginhimo ni Isaias. Yana, ginagamit ni Jehova an gutiay nga grupo—an iya dinihogan nga mga surugoon—basi pakaunon an iya mga magsiringba ngan pahamangnoan an mga tawo antes magtikang an daku nga kasakitan. An ngatanan nga surugoon han panimalay han Kristo nakikigbahin liwat ha pagpahamangno.—Mat. 24:45-47.

2. Sugad la nga hi Esekiel waray makigbahin ha aktuwal nga pamutang hin tigaman para ha katalwasan, an katawohan han Dios yana diri liwat makikigbahin hito. Iginsusumat la nira an mensahe ni Jehova  nga bahin han ira pagsangyaw nga buruhaton, nga ginigiyahan han mga anghel.—Pah. 14:6.

3. Ha panahon ni Esekiel, waray literal nga gintigamnan ha agtang. Ito liwat an kahimtang yana. Ano an kinahanglan himoon han katawohan basi makarawat an simboliko nga tigaman para ha katalwasan? Kinahanglan nira karawaton an mensahe nga iginsasangyaw yana, isul-ot an Kristiano nga personalidad, idedikar an ira kalugaringon kan Jehova, ngan maunungon nga suportaran an kabugtoan han Kristo. (Mat. 25:35-40) Adton nagbubuhat hini makakakarawat han tigaman para ha katalwasan durante han daku nga kasakitan.

4. Ha moderno nga katumanan, an tawo nga may surudlan hin tinta han sekretaryo nagsisimbolo kan Jesu-Kristo, an magbubutang han tigaman hadton mga matatalwas. Makakarawat han daku nga grupo an ira tigaman kon hukman na hira sugad nga karnero durante han daku nga kasakitan. Pinaagi hini, makakarawat nira an kinabuhi nga waray kataposan dinhi ha tuna.—Mat. 25:34, 46. *

5. Ha moderno nga katumanan, an unom nga kalalakin-an nga may ipamaratay nga hinganiban nagsisimbolo ha langitnon nga kasundalohan nga ginpapangunahan mismo ni Jesus. Diri na mag-iiha, ira bubungkagon an mga nasud ngan wawad-on an ngatanan nga karaotan.—Esek. 9:2, 6, 7; Pah. 19:11-21.

An paghibaro hinin importante nga mga leksyon nagpaparig-on han aton pagsarig nga diri bubungkagon ni Jehova an magtadong upod han magraot. (2 Ped. 2:9; 3:9) Ginpapahinumdoman liwat kita hini han pagkaimportante han pagsangyaw nga buruhaton yana. An ngatanan kinahanglan makabati han pahamangno antes umabot an kataposan!—Mat. 24:14.