HI Don, nga usa nga Saksi ni Jehova ha Canada, nangangalimbasog gud nga makaistorya an mga naukoy ha kalye. May kalabotan ha usa hito nga mga indibiduwal, hi Don nagsiring: “Hi Peter an usa han pinakamahugaw nga akon nakita nga naukoy ha kalye. Maraot an iya batasan ngan naghihimo hiya hin paagi basi likyan hiya han mga tawo. Agsob nga diri niya ginkakarawat an bulig han iba.” Bisan pa hito, ha sulod hin sobra 14 ka tuig, mapailubon nga nagpakita hi Don hin pagkabuotan hinin lalaki nga naukoy ha kalye.

Makausa, nagpakiana hi Peter kan Don: “Kay ano nga ginsisinamok mo ako? Ginpapabay-an man la ako han iba. Ano an labot mo ha akon?” Mataktika nga gumamit hi Don hin tulo nga teksto basi maabot an kasingkasing ni Peter. Siyahan, ginpakianhan niya hi Peter kon maaram ba hiya nga may ngaran an Dios ngan ginhangyo hi Peter nga basahon ito mismo ha Biblia ha Salmos 83:18. Sunod, basi ipakita kon kay ano nga buotan hiya kan Peter, iginpabasa niya kan Peter an Roma 10:13, 14, nga nagsasaysay nga “an kada tagsa nga natawag ha ngaran ni Jehova matatalwas.” Ha kataposan, ginbasa ni Don an Mateo 9:36 ngan ginhangyo hi Peter nga basahon niya ito mismo. Ito nga teksto nasiring: “Pakakita [ni Jesus] han damu nga tawo, nalooy hiya ha ira kay sugad hira hin gin-anitan ngan ginpabay-an nga mga karnero nga waray paraataman.” Hito nga takna, nagtangis hi Peter ngan nagpakiana: “Usa ba ako hini nga mga karnero?”

Nagtikang hi Peter paghimo hin mga pagbag-o. Kinarigo hiya, gin-arotan an iya barangas, ngan ginsul-ot an mag-opay nga bado nga iginhatag ni Don. Tikang hadto, pirme na malimpyo pagkit-on hi Peter.

Hi Peter may gintipigan nga dayari. An siyahan nga bahin hito nagpapakita hin kasub-anan ngan kawaray-paglaom, pero ha urhi nga mga bahin hito, nag-iba an mensahe hito. Ini an mababasa ha usa han iya mga sinurat: “Hinbaroan ko yana nga adlaw an ngaran han Dios. Salit kon nag-aampo ako, nag-aampo na ako kan Jehova. Makalilipay gud hibaroan  an iya ngaran. Nasiring hi Don nga puydi ko magin Sangkay hi Jehova; pirme hiya andam mamati ha akon anoman an akon isiring.”

An ultimo nga surat ni Peter iginsurat niya para ha iya kabugtoan. Hiya nasiring:

“Diri maopay an akon inaabat yana. Diri na ada ako mag-iiha tungod kay lagas na ako. Pero bisan kon tubtob na la dinhi an akon kinabuhi, maaram ako nga makikita ko utro an akon sangkay [hi Don] ha Paraiso. Kon mabasa niyo ini, pinahuway na ako. Pero kon may makita kamo ha akon lubong nga baga hin diri niyo kilala, pakiistorya ha iya, ngan alayon basaha inin gutiay nga asul nga libro [an ginagamit ha pag-aram ha Biblia nga “An Kamatuoran nga Nagtutugway Ngadto ha Kinabuhi nga Waray Katapusan” nga iya nakarawat han naglabay nga mga tuig]. * Nasiring ito nga makikita ko utro an akon sangkay ha Paraiso. Natoo gud ako hito. An iyo hinigugma nga bugto, Peter.”

Katapos han lubong, an bugto nga babaye ni Peter nga hi Ummi nagsiring: “Mga duha ka tuig an naglabay, nakiistorya ha akon hi Peter. Ha sulod hin maiha nga panahon, hito la nga higayon inabat ko nga malipayon hiya. Humiyom pa ngani hiya.” Nagsiring hi Ummi kan Don: “Babasahon ko an libro kay anoman nga nakapabag-o ha akon bugto sigurado nga naiiba gud ito.” Umuyon liwat hi Ummi nga paghisgotan an libro nga Ano Gud ba an Igintututdo han Biblia? kaupod hin usa nga Saksi ni Jehova.

Mahimo liwat naton kitaon diri la an panggawas nga hitsura ngan ipakita an tinuod nga gugma ngan magin mapailubon ha ngatanan nga klase hin tawo. (1 Tim. 2:3, 4) Kon bubuhaton naton ito, mahimo naton mabuligan an mga tawo, nga pariho kan Peter, bangin diri makaruruyag pagkit-on pero may maopay nga kasingkasing. Makakasiguro kita nga papatuboon han Dios, nga “nagtatan-aw han kasingkasing,” an kamatuoran ha mga may husto nga disposisyon.​—1 Sam. 16:7; Juan 6:44.