“HELO! Kumusta ka?”

Sigurado nga agsob mo gamiton an sugad nga pangumusta. Bangin gin-uupdan mo pa ngani an imo pangumusta hin paglamano o paghangkop. An mga paagi han pangumusta bangin magkaiba-iba ha tagsa nga lugar, pero haros pariho an katuyoan han pangumusta. Ngani, kon an usa diri nangungumusta o ginbabalewaray niya an pangumusta han iba, mahimo hunahunaon han mga tawo nga diri hiya mahigugmaon o maraot an iya batasan.

Pero diri ngatanan hiara ha pangumusta ha iba. May pipira nga nag-aalang ha pangumusta tungod han kaawod o kawaray-kompyansa. An iba nakukurian ha pangumusta ha mga tawo nga iba an lahi, kultura, o kahimtang ha kinabuhi. Pero ha totoo la, bisan an simple nga pangumusta mahimo magkaada positibo gud nga resulta.

Pakianhi an imo kalugaringon: ‘Ano an nahihimo han pangumusta? Ngan ano an igintututdo ha akon han Pulong han Dios mahitungod ha pangumusta?’

Han gin-abiabi ni apostol Pedro an siyahan nga Hentil nga hi Cornelio ha Kristiano nga kongregasyon, nagsiring hiya: “An Dios waray pinaurog.” (Buh. 10:34) Ha urhi, nagsurat hi Pedro nga “karuyag [han Dios] nga magbasol an ngatanan.” (2 Ped. 3:9) Bangin hunahunaon naton nga aplikado la ito nga mga teksto hadton nag-aaram han kamatuoran. Pero gin-aghat liwat ni Pedro an mga Kristiano: “Pasidunggi niyo an ngatanan nga klase hin tawo, higugmaa an ngatanan nga kabugtoan.” (1 Ped. 2:17) Kon sugad, diri ba angayan la nga kumustahon naton an iba anoman an ira lahi, kultura, o kahimtang ha kinabuhi? Pagpakita ito nga ginpapasidunggan ngan hinigugma naton hira.

Gin-aghat ni apostol Pablo an mga membro han kongregasyon: “Karawata niyo an usa kag usa, sugad la han pagkarawat han Kristo ha aton.” (Roma 15:7) Espisipiko nga gin-unabi ni Pablo an kabugtoan nga nagin “makaparig-on nga bulig” ha iya. Yana, labi nga ginkikinahanglan han kabugtoan an pagparig-on samtang naieksperyensyahan naton an duro nga pag-atake ni Satanas ha katawohan han Dios.​—Col. 4:11, ftn.; Pah. 12:12, 17.

An pangumusta nabulig nga abaton han usa nga ginkakarawat hiya, pero iginpapakita han mga rekord ha Biblia nga may iba pa ito nga kapulsanan.

Han inabot na an takna nga ibabalhin na an kinabuhi han Anak han Dios ha tagoangkan ni Maria, nagsugo hi Jehova hin anghel basi kaistoryahon hi Maria. An anghel nagsiring ha iya: “Maopay nga adlaw Maria, nalilipay gud ha imo hi Jehova.” “Nagupong gud” hi Maria; diri hiya maaram kon kay ano nga nakikiistorya ha iya an anghel. Han naobserbaran ito han anghel, hiya nagsiring: “Ayaw kahadlok Maria, kay nalilipay gud ha imo an Dios.” Iginsaysay niya kan Maria nga katuyoan han Dios nga ipanganak niya an Mesias. Imbes nga padayon nga magupong, mapainubsanon nga binaton hi Maria: “Iini ako, an kan Jehova uripon nga babaye! Matuman unta ha akon an imo ginsiring.”​—Luc. 1:26-38.

Usa gud nga pribilehiyo para ha anghel nga magin mensahero ni Jehova; pero waray niya hunahunaa nga magigin minos hiya kon makikiistorya hiya ha diri perpekto nga tawo. Nagtikang hiya pinaagi ha paghatag hin katalahoran. Ano an aton mahibabaroan ha iya ehemplo? Sadang kita magin andam ha paghatag hin katalahoran o pangumusta ha iba ngan pagdasig ha ira. Bisan ha simple nga mga pulong, mabubuligan naton an iba ngan mapapasarig naton hira nga bahin gud hira han katawohan han Dios.

Damu an nakilala ni Pablo ha mga kongregasyon ha Asia Minor ngan Europa. An iya mga surat nagsusulod hin espisipiko nga pangumusta. Mababasa naton ito ha kapitulo 16 han Roma. Nagpadara hi Pablo hin mga pangumusta ha iya mga igkasi-Kristiano. Gin-unabi niya hi Febe sugad nga “aton bugto nga babaye,” ngan gin-aghat  an kabugtoan nga ‘abiabihon hiya sugad nga igkasi-tumuroo ha Ginoo ha paagi nga angay ha mga baraan, ngan tagan hiya han anoman nga bulig nga iya kinahanglan.’ Ginkumusta ni Pablo hira Prisca ngan Aquila ngan nagsiring nga “diri la [hiya] an nagpapasalamat ha ira kondi pati liwat an ngatanan nga kongregasyon han mga nasud.” Ginkumusta liwat niya an kabugtoan nga diri gud naton kilala yana​—“an [iya] hinigugma nga hi Epeneto” pati na hira “Trifena ngan Trifosa, mga babaye nga maduruto nga nagbubuhat han buruhaton han Ginoo.” Oo, naggahin gud hi Pablo hin panahon ha pangumusta han iya kabugtoan.​—Roma 16:1-16.

Hunahunaa la an kalipay nga ira inabat ha paghibaro nga pirme hira ginhihinumdom. Sigurado nga nagpahilarom gud ito han ira gugma kan Pablo ngan ha tagsa ha ira! Sigurado nga nadasig liwat an iba nga Kristiano han nabatian nira iton mahigugmaon nga pangumusta, ngan nakabulig ito ha ira nga magin marig-on ha pagtoo. Oo, an pangumusta nga nagpapakita hin sinsero nga interes ha iba ngan an paghatag hin kumendasyon nagpaparig-on han pagkamagsarangkay ngan nagriresulta ha pagkaurosa han mag-unungon nga surugoon han Dios.

Han dinuong ha pantalan han Puteoli an barko nga ginsakyan ni Pablo ngan han tipakadto hiya ha Roma, an mga Kristiano ha Roma nagbiyahe tipa-sur basi tapoon hiya. Hirayo pa, nakita na hira ni Pablo, ngan tungod hito “nagpasalamat hiya ha Dios ngan nadasig.” (Buh. 28:13-15) Usahay, bangin paghiyom la o pagkaway an aton mahihimo sugad nga pangumusta ha iba. Pero bisan ha sugad la nga paagi, mahimo na maparig-on an usa nga bangin nadidepres o nasusubo.

Kinahanglan maghatag an disipulo nga hi Santiago hin mapwersa nga sagdon ha mga Kristiano. Kay ano? Kay an pipira ha ira nag-aadulteryo ha espirituwal pinaagi ha pakigsangkay ha kalibotan. (San. 4:4) Pero obserbari kon paonan-o gintikangan ni Santiago an iya surat:

“Tikang kan Santiago, nga uripon han Dios ngan han Ginoo nga hi Jesu-Kristo, para ha ngatanan nga 12 ka tribo nga nagpatlaag ha iba-iba nga lugar: Nangungumusta ako ha iyo ngatanan.” (San. 1:1) Sigurado nga nagin masayon para ha iya mga magbarasa nga karawaton an iya sagdon han nakita nira ha iya pangumusta nga hira ngatanan parapriho ha atubangan han Dios. Oo, an sinsero nga pangumusta mahimo makabulig nga maistoryahan bisan an seryoso nga mga butang.

Basi magin epektibo an pangumusta, kinahanglan sinsero ito ngan nagpapakita hin tinuod nga gugma. Ini an sadang himoon bisan kon baga hin ginbabalewaray ito. (Mat. 22:39) Usa nga sister ha Ireland an inabot ha Kingdom Hall mga pipira na la ka minuto antes magtikang an katirok. Samtang nagdadagmit hiya pagsulod, liningi ha iya an usa nga brother, hiniyom, ngan nagsiring: “Helo. Nalilipay gud ako nga makita ka.” Dumiretso la an sister ha lingkoran.

Paglabay hin pipira ka semana, ginkaistorya niya an brother ngan ginsumatan nga hito nga mga panahon may problema hiya ha ira balay. “Masurub-on gud ako hito nga gab-i nga haros waray ako gana tumambong ha Kingdom Hall,” siring han sister. “Haros nakalimtan ko na an mga ginhisgotan ha katirok, pero waray ko hingalimti an imo pangumusta. Inabat ko gud nga importante an akon presensya. Salamat.”

Diri maaram ito nga brother kon ano kadaku an epekto han iya simple nga pangumusta. “Han ginsumatan niya ako kon paonan-o nakaapekto ha iya an akon halipot nga ginsiring, nalipay gud ako nga nangalimbasog ako nga buhaton ito,” siring han brother. “Maopay liwat an akon inabat tungod hito.”

Hi Solomon nagsurat: “Ipilak an imo tinapay ngada ha katubigan; kay imo ini hiaagian ha katapus han damu nga adlaw.” (Ekles. 11:1) Kon maaram kita han kapulsanan han pangumusta ngan pirme kita nangungumusta ha iba, labi na ha aton mga igkasi-Kristiano, napaparig-on naton an iba pati na an aton kalugaringon. Salit ayaw gud minosa an gahum han pangumusta.