1. Ano an maopay gud nga hinungdan nga nalilipay kita?

NALILIPAY gud kita kon nababatian naton an pag-uswag nga naieksperyensyahan han katawohan ni Jehova! Han naglabay nga tuig, sobra 10,000,000 an aton gindumarahan hin regular nga pag-aram ha Biblia. Nagpapakita gud ini nga iginpapasanag han katawohan han Dios an ira sugâ! Ngan hunahunaa liwat an minilyon nga mga interesado nga tinambong ha Memoryal. Ha pagbuhat hito, nahibaro hira mahitungod han gugma nga iginpakita han Dios han igintagana niya an lukat.​—1 Juan 4:9.

2, 3. (a) Ano an diri nakakaulang ha aton nga sumanag “sugad hin mga sugâ”? (b) May kalabotan ha ginsiring ni Jesus ha Mateo 5:14-16, ano an aton hihisgotan?

² Ha bug-os nga kalibotan, iba-iba an linggwahe han katawohan ni Jehova. Pero diri ito nakakaulang ha aton nga urosa nga dayawon an aton Amay nga hi Jehova. (Pah. 7:9) Anoman an aton linggwahe o taga-diin man kita, mahimo kita sumanag sugad nga “mga sugâ ha kalibotan.”​—Fil. 2:15.

³ An aton pag-uswag sugad nga katawohan han Dios, an aton pagkaurosa, ngan an aton pagin mabinantayon naghihimaya kan Jehova. Hini nga artikulo, aton hihisgotan kon paonan-o naton maipapasanag an aton  sugâ hinin tulo nga bahin.​—Basaha an Mateo 5:14-16.

4, 5. (a) Labot la ha pagsangyaw, paonan-o pa naton maipapasanag an aton sugâ? (b) Ano an maopay nga mga resulta han aton pagin buotan? (Kitaa an retrato ha tinikangan hini nga artikulo.)

⁴ “Diri magigin matinumanon ngan maunungon ha Ginoo an bisan hin-o durante hinin nabibilin nga mga adlaw . . . kon diri niya sasalingabuton an higayon nga maipasanag an iya sugâ.” Ito an ginsiring han artikulo nga “Light in the Darkness” ha Hunyo 1, 1925 nga The Watch Tower. Katapos, an artikulo nagsaysay: “Kinahanglan buhaton niya ito pinaagi ha pagsumat ha mga tawo ha kalibotan han maopay nga sumat, ngan pinaagi ha pagkinabuhi uyon ha matadong nga mga suruklan ni Jehova.” Matin-aw, usa nga paagi nga iginpapasanag naton an aton sugâ amo an pagsangyaw han maopay nga sumat ngan paghimo hin mga disipulo. (Mat. 28:19, 20) Dugang pa, mahihimaya naton hi Jehova pinaagi han aton mag-opay nga pamatasan. Naoobserbaran han mga tagbalay ngan mga nalabay an aton panggawi. An aton makisangkayon nga hiyom ngan sinsero nga pangumusta nagsusumat kon ano kita nga klase hin tawo ngan kon ano nga klase nga Dios an aton ginsisingba.

⁵ Hi Jesus nagsiring ha iya mga disipulo: “Pagsulod niyo ha balay, kumustaha an tagbalay.” (Mat. 10:12) Ha mga lugar diin agsob magsangyaw hi Jesus ngan an iya mga apostol, kustomre ha mga tawo an pag-abiabi ha ira balay hin diri nira kakilala. Yana, diri ito kustomre ha damu nga lugar. Bisan pa hito, an imo pagin buotan ngan pagin makisangkayon samtang iginsasaysay mo an imo katuyoan ha pagbisita kasagaran nga nakakagwara han pagsuspetsa o kaaringit han tagbalay. An makisangkayon nga hiyom kasagaran nga amo an pinakamaopay nga introduksyon. Napamatud-an han kabugtoan nga mapulsanon liwat ito kon nakikigbahin hira ha pagsangyaw ha publiko gamit hin cart han literatura. Samtang nakikigbahin ka hito nga paagi han pag-alagad, bangin maobserbaran mo nga kasagaran nga nagigin positibo an reaksyon han mga tawo kon nahiyom ka ha ira ngan ginkukumusta hira. Mahimo ito mag-aghat ha ira nga dumaop ngan kumuha han aton publikasyon. An imo pagin buotan mahimo liwat makabulig nga makagtikang ka hin pakiistorya ha ira.

6. Paonan-o nangalimbasog an usa nga lagas nga mag-asawa nga magpabilin nga aktibo ha ministeryo?

⁶ Usa nga lagas nga mag-asawa ha Inglatera an haros diri na nakakaupod ha pagsangyaw ha balay-balay tungod han ira maluya nga kahimsog. Salit nagdesisyon hira nga ipasanag an ira sugâ ha gawas mismo han ira balay. Nagdidispley hira hin mga publikasyon nga basado ha Biblia ha usa nga lamesa durante ha mga oras nga ginkukuha han mga kag-anak an ira mga anak ha eskwelahan nga hirani ha ira. Tungod kay nainteres ha aton mga publikasyon, damu an kumuha han libro nga Ang mga Tanong ng mga Kabataan​—Mga Sagot na Lumulutas, Tomo 1 ngan 2, pati hin mga brosyur. Usa nga payunir nga sister ha ira kongregasyon an umupod ha ira hito nga paagi han pagsangyaw. An iya pagin makisangkayon ngan an sinsero nga hingyap han mag-asawa nga buligan an iba nag-aghat ha usa nga kag-anak nga kumarawat hin pag-aram ha Biblia.

7. Ano an mahimo mo buhaton basi mabuligan an mga pinalagiw ngada ha iyo lugar?

⁷ Hinin naglabay la nga mga tuig, damu an pinalagiw tikang ha ira nasud ngadto ha iba nga nasud. Ano an mahimo mo buhaton basi mabuligan an mga pinalagiw ngada ha iyo lugar nga mahibaro mahitungod kan Jehova ngan han iya katuyoan? Siyahan, mahimo ka mag-aram hin pangumusta gamit an mga linggwahe han mga tawo nga binalhin ha iyo lugar. Makakabulig ha imo an app nga JW Language ha pagbuhat hito. Mahimo ka liwat mag-aram hin simple nga mga pulong nga posible nga makapainteres ha ira. Katapos mahimo mo ipakita ha ira an jw.org, pati an iba-iba nga video ngan publikasyon ha ira linggwahe.​—Deut. 10:19.

8, 9. (a) Ano nga praktikal nga bulig an aton nakakarawat ha aton midweek nga katirok? (b) Paonan-o mabubuligan han mga kag-anak an ira mga anak nga makigbahin ha mga katirok?

⁸ Mahigugmaon nga igintatagana ni Jehova an  Katirok ha Pagkinabuhi Ngan Ministeryo basi magin mas epektibo kita ha aton pagsangyaw nga buruhaton. An praktikal nga mga instruksyon nga aton nakakarawat hini nga katirok nabulig ha aton nga mas magkaada kompyansa ha pagbalik-bisita ngan ha pagdumara hin pag-aram ha Biblia.

⁹ Damu nga bisita nga natambong an nakakaobserbar nga nakikigbahin ha katirok an aton mga anak. Mga kag-anak, buligi an iyo mga anak nga maipasanag an ira sugâ pinaagi ha pagtutdo ha ira nga magkomento ha ira kalugaringon nga mga pulong. An ira simple ngan kinasingkasing nga komento usahay nakakabulig nga karawaton han mga interesado an kamatuoran.​—1 Cor. 14:25.

10. Paonan-o nakakabulig an pagsingba han pamilya ha pagparig-on han pagkaurosa han pamilya?

¹⁰ Usa pa nga paagi ha pagpasanag han imo sugâ amo an pangalimbasog nga maparig-on an pagkaurosa han imo pamilya ngan han iyo kongregasyon. An usa nga paagi nga mahihimo ito han mga kag-anak amo an pag-eskedyol hin regular nga Pagsingba han Pamilya. Damu nga pamilya an nagkikita hin JW Broadcasting durante han ira pagsingba han pamilya, ngan katapos ira ginhihisgotan kon paonan-o nira maiaaplikar an mga punto nga ira hinbaroan. Kon nagdudumara hin pagsingba han pamilya, sadang hinumdoman han kag-anak nga an giya nga ginkikinahanglan han usa nga gutiay pa nga anak iba ha kanan tin-edyer na nga anak. Buligi an tagsa nga membro han imo pamilya nga hibaroan kon paonan-o nira maiaaplikar an iyo gin-aadman basi magpahimulos an ngatanan.​—Sal. 148:12, 13.

11-13. Paonan-o makakabulig an ngatanan nga mas magkaurosa an kongregasyon ngan maaghat an iba nga ipasanag an ira sugâ?

¹¹ Paonan-o makakabulig an mga batan-on nga maparig-on an pagkaurosa han kongregasyon ngan maaghat an iba nga ipasanag an ira sugâ? Kon usa ka nga batan-on, mahimo mo himoon nga tumong an pagpakita hin interes ha mga edaran na nga kabugtoan. Mahimo mo hira hangyoon nga istoryahan ka hin eksperyensya han ira damu ka tuig na nga pag-alagad. Mapaparig-on ka gud hito, ngan mas mag-aaghat ini ha imo ngan ha ira nga ipasanag an sugâ han kamatuoran. Ngan batan-on man kita o edaran, mahimo kita mangalimbasog nga abiabihon an mga natambong ha aton mga katirok ha Kingdom Hall. Mabulig ito nga maparig-on an aton pagkaurosa ngan mahimo ito mag-aghat ha mga bisita nga ipasanag liwat an ira sugâ. Mahimo mo hira kumustahon upod an makisangkayon nga hiyom, ngan buligan pa ngani nga makabiling hin malilingkoran. Ipakilala hira ha iba basi magin komportable hira.

 ¹² Kon gintokahan ka ha pagdumara han katirok para ha pagsangyaw, daku an imo mahihimo ha pagbulig ha mga edaran nga makigbahin ha ministeryo. Mahimo niyo hira itoka ha teritoryo nga angayan para ha ira. Ha pipira nga kahimtang, mahimo niyo hira ipadis ha burobata nga bugto nga makakag-asikaso ha ira. Mahimo liwat kamo magpakita hin konsiderasyon hadton limitado na an nahihimo tungod han ira kahimsog ngan kahimtang. Oo, an iyo pagin masinabuton ngan pagin makonsiderasyon makakabulig ha mga batan-on ngan edaran, eksperyensyado ngan bag-ohan, nga magin madasigon ha pagsangyaw han maopay nga sumat.​—Leb. 19:32.

¹³ An salmista naaghat nga magsiring: “Hin kamaopay ngan hin kairindig an magburugto nga nagkakatarampo ha pagurusa!” (Basaha an Salmos 133:1, 2.) Tungod han pagkaurosa han mga Israelita, nagpahimulos gud hira ha maopay nga impluwensya han iba nga nagsisingba kan Jehova. Ito nga pagkaurosa puropariho ha mahamot ngan nakakarepresko nga pandihog nga lana. Puydi mo ba himoon nga tumong nga magin maopay nga impluwensya ha iba basi maparig-on an pagkaurosa han kongregasyon? Kon ginbubuhat mo na ito, angay ka kumendasyonan. Mahimo ka ba ‘magpahaluag,’ karuyag sidngon, pauswagon pa an pagbuhat hito ngan himoon ito hin mas regular?​—2 Cor. 6:11-13.

14. Paonan-o mo maipapasanag an imo sugâ ha imo mga amyaw?

¹⁴ Mahimo liwat naton dugangan an aton pangalimbasog nga pasanagon ha aton mga amyaw an sugâ han kamatuoran ha Biblia. An imo pagin buotan mahimo makabulig ha ira nga madani ha kamatuoran. Pakianhi an imo kalugaringon: ‘Ano an pagkita ha akon han akon mga amyaw? Gintitipigan ko ba nga malimpyo an amon balay ngan palibot? Nakakabulig ba ito nga magin maopay pagkit-on an amon lugar? Mabinuligon ba ako ha iba?’ Kon nakikiistorya ka ha imo mga igkasi-Saksi, mahimo mo hira pakianhan kon paonan-o an ira pagin buotan ngan maopay nga pamatasan nakaapekto ha ira mga paryente, amyaw, katrabaho, o kaeskwela. Ha pagbuhat hito, posible gud nga makabati ka hin positibo nga mga eksperyensya.​—Efe. 5:9.

15. Kay ano nga importante gud nga padayon kita nga magbantay?

¹⁵ An aton disposisyon may daku nga epekto ha aton pangalimbasog nga mas maipasanag an aton sugâ. Hi Jesus pauroutro nga nag-aghat ha iya mga disipulo: “Padayon kamo nga magbantay.” (Mat. 24:42; 25:13; 26:41) Matin-aw, kon ginhuhunahuna naton nga maiha pa an “daku nga kasakitan” o diri ito maabot ha aton panahon, diri kita maabat hin pagkaapurado may kalabotan ha pagsangyaw nga buruhaton. (Mat. 24:21) Imbes nga sumanag hin malamrag, hinay-hinay nga magsisirom an aton sugâ ngan mahimo pa ngani ito maparong.

16, 17. Ano an mahimo mo buhaton basi makapabilin ka nga mabinantayon?

¹⁶ Samtang nagtitikaraot an kahimtang hini nga kalibotan, kita ngatanan kinahanglan padayon nga magbantay. Kombinsido gud kita nga maabot an kataposan uyon ha eksakto nga panahon nga igintanda ni Jehova. (Mat. 24:42-44) Samtang waray pa ito, kinahanglan kita magin mapailubon ngan magin mas mabinantayon. Basaha an Pulong han Dios kada adlaw, ngan “magin mabinantayon may kalabotan ha mga pag-ampo.” (1 Ped. 4:7) Mahibaro tikang ha maopay nga susbaranan han kabugtoan nga nagin malipayon ha pagpabilin nga mabinantayon ngan ha pagpasanag han ira sugâ. Usa nga maopay nga eksperyensya amo an mababasa ha artikulo nga “Setenta ka Tuig nga Pagkapot ha Saya han Usa nga Judio,” ha Abril 15, 2012 nga gowa han An Barantayan, pahina 18-21.

¹⁷ Magpabilin nga sagipo ha pag-alagad kan Jehova. Pagbuhat hin maopay ha iba, ngan pakig-upod ha kabugtoan. Maghahatag ito ha imo hin daku nga kalipay, ngan aabaton mo nga baga hin malaksi lumabay an panahon. (Efe. 5:16) Han naglabay nga usa ka gatos ka tuig, nagin sagipo gud an aton kabugtoan ngan damu an ira nahimo. Pero mas damu an aton nahihimo yana ilarom han paggiya ni Jehova. Iginpapasanag naton an aton sugâ  ha paagi nga diri gud naton mahahanduraw hadto.

18, 19. Paonan-o an mga tigurang makakabulig ha aton nga magin mabinantayon ngan aktibo ha pag-alagad? Paghatag hin ehemplo.

¹⁸ Makaparig-on gud hibaroan nga diri ulang an aton pagin diri perpekto basi makag-alagad kita kan Jehova ha paagi nga iya nalilipayan. Basi mabuligan ka may kalabotan hito, apresyara an iya tagana nga “regalo nga kalalakin-an,” nga amo an mga tigurang ha kongregasyon. (Basaha an Efeso 4:8, 11, 12.) Kon may bumisita ha imo nga mga tigurang, salingabota an higayon nga mahibaro tikang ha ira kinaadman ngan magpahimulos ha ira sagdon.

¹⁹ Duha nga tigurang ha Inglatera an bumulig ha usa nga mag-asawa nga nangaro ha ira hin bulig tungod han ira problema. Inabat han asawa nga diri nangunguna an iya bana ha espirituwal nga rutina han ira pamilya. Aminado an bana nga diri hiya maopay magtutdo ngan waray hiya mag-eskedyol hin regular nga pagsingba han pamilya. Ginhisgotan han mga tigurang ha mag-asawa an ehemplo ni Jesus. Gin-ataman ni Jesus an iya mga disipulo ngan ginhunahuna an ira panginahanglan. Gin-aghat han mga tigurang an bana nga subaron hi Jesus. Ira liwat gin-aghat an asawa nga magin pasensyoso. Gintagan liwat han mga tigurang an mag-asawa hin praktikal nga mga suhestyon kon paonan-o magbibinuligay basi magkaada hira pagsingba han pamilya kaupod an ira duha nga anak. (Efe. 5:21-29) Ha urhi, ginkumendasyonan han mga tigurang an bana ha iya mga pangalimbasog. Gin-aghat nira hiya nga padayon pa nga mangalimbasog ngan sumarig ha baraan nga espiritu basi mabuligan hiya nga magin maopay nga ulo han pamilya. An gugma ngan suporta han mga tigurang nakabulig hini nga pamilya nga maipasanag an ira sugâ.

20. Ano an imo malalaoman samtang iginpapasanag mo an imo sugâ?

²⁰ An salmista nagkanta: “Bulahan an tagsatagsa nga nahadluk kan Jehova, nga naglalakat ha iya mga agian.” (Sal. 128:1) Kon iginpapasanag mo an imo sugâ​—pinaagi ha pag-aghat ha iba nga magsingba kan Jehova, pagbuhat han imo mahihimo basi maparig-on an pagkaurosa, ngan pagpabilin nga mabinantayon—​magigin mas malipayon ka. Makikita han iba an imo mag-opay nga buhat, ngan damu an mapapagios nga himayaon an aton Amay.​—Mat. 5:16.