Nabasa mo ba hin maopay an bag-o nga mga gowa han An Barantayan? Kitaa kon mababaton mo an masunod nga mga pakiana:

Ano an upat nga butang nga mahimo naton buhaton basi mapauswag an aton pagkanta?

Sadang kita tumindog hin tadong ngan alsahon an aton songbook. Sadang liwat kita mahibaro kon paonan-o an husto nga pagginhawa. Kon iginbubuka naton hin daku an aton baba ngan nagkakanta nga may kompyansa, nakakagkanta kita ha mas daku nga tingog.​—w17.11, p. 5.

Ano an makatirigamnan may kalabotan ha mga lokasyon ngan mga dalan tipakadto ha mga syudad nga arayopan ha Israel?

May-ada unom nga syudad nga arayopan nga nahimumutang ha iba-iba nga bahin han Israel, ngan an mga dalan tipakadto hito ginmimintinar hin maopay. Salit, adton diri tinuyo nga nakamatay masayon la nga nakakapalagiw ngadto.​—w17.11, p. 14.

Kay ano nga an regalo han Dios ha aton nga halad-lukat ni Jesus amo an pinakamaopay nga regalo?

Nagtatagbaw ito han aton hingyap nga mabuhi ha waray kataposan ngan han aton panginahanglan nga makagawas ha sala ngan kamatayon. Tungod han gugma han Dios ha mga anak ni Adan, igintagana niya hi Jesus para ha aton samtang makasasala pa kita.​—wp17.6, p. 6-7.

Paonan-o an Salmos 118:22 nagtutudlok ha pagkabanhaw ni Jesus?

Iginsalikway hi Jesus sugad nga Mesias ngan ginpatay hiya. Basi hiya magin an “pandugtong nga bato ha eskina,” kinahanglan banhawon hiya.​—w17.12, p. 9-10.

An katulinan ba nga pagtitikangan han Mesias may koneksyon ha katungod ha pagkasuhag?

Usahay, ha suhag nga anak nga lalaki nagtikang an nagin katulinan ni Jesus​—pero diri ha ngatanan nga higayon. An anak ni Jesse nga hi David diri amo an suhag; pero an Mesias nagtikang ha tulin ni David.​—w17.12, p. 14-15.

Ano an pipira nga prinsipyo may kalabotan ha kahimsog nga mababasa ha Biblia?

Uyon ha Mosaiko nga Balaud, sadang ibulag ha publiko an may nakakatapon nga sakit. An mga tawo kinahanglan maghunaw kon kinapot hira hin patay nga lawas. An Balaud nagsusugo nga an baya han tawo sadang iglubong hirayo ha gin-uukyan han tawo. Igin-oobligar han Balaud nga turion an minasus-an ha ikawalo ka adlaw; maaramon ito kay an abilidad han dugo ha pagbagtik nagigin normal paglabay hin usa ka semana tikang han iya katawo.​—wp18.1, p. 7.

Kay ano nga diri sayop an pagkaada angayan nga gugma ha kalugaringon?

Kinahanglan naton higugmaon an aton igkasi-tawo sugad ha aton kalugaringon. (Mar. 12:31) Kinahanglan “higugmaon han mga bana an ira asawa pariho han ira paghigugma ha ira kalugaringon nga lawas.” (Efe. 5:28) Pero mahimo kita magkaada sayop nga paghigugma ha aton kalugaringon.​—w18.01, p. 23.

Ano nga mga pitad an mahimo naton buhaton basi mag-uswag ha espirituwal?

Kinahanglan naton pag-adman an Pulong han Dios ngan pamalandungon ito ngan iaplikar an aton hinbabaroan. Kinahanglan liwat naton iandam an aton hunahuna ngan kasingkasing ha pagkarawat han giya han baraan nga espiritu ngan karawaton an bulig han iba ngan magin mapasalamaton hito.​—w18.02, p. 26.

Kay ano nga an astrolohiya ngan panhimalad diri husto nga mga paagi ha paghibaro han tidaraon?

May iba-iba nga rason, pero an nangunguna nga rason amo an pagkondenar han Biblia hito nga mga buhat.​—wp18.2, p. 4-5.

Paonan-o naton sadang tagdon an pagkarawat hin imbitasyon para hin pangaon?

Kon kumarawat kita hin imbitasyon, kinahanglan naton tumanon an aton iginsaad. (Sal. 15:4) Diri naton ito sadang nga basta na la ikansela. Bangin nangalimbasog gud an tagbalay ha pagpangandam hin pagkaon.​—w18.03, p. 18.

Ano nga mga leksyon an mahibabaroan han pinili nga kalalakin-an tikang kan Timoteo?

Hinigugma gud ni Timoteo an mga tawo ngan gin-una niya an espirituwal nga mga butang. Maduruto hiya ha sagrado nga pag-alagad ngan igin-aplikar niya an iya mga hinbaroan. Padayon niya nga ginbansay an iya kalugaringon ngan sinarig ha espiritu ni Jehova. Mahimo masubad han mga tigurang ngan han iba an iya ehemplo.​—w18.04, p. 13-14.