An tatay ni Rehoboam amo hi Solomon, nga naghadi ha Israel hin 40 ka tuig. (1 Hadi 11:42) Namatay hi Solomon han 997 B.C.E. Katapos hito, nagbiyahe hi Rehoboam tipanorte tikang ha Jerusalem ngadto ha Sikem basi dihogan sugad nga hadi. (2 Kron. 10:1) Nahahanduraw mo ba hiya nga nahahadlok nga bangin diri niya masubad an mga ginbuhat ni Solomon, nga kilala tungod han iya talagsahon nga kinaadman? Posible ba nga nahunahuna ni Rehoboam nga diri mag-iiha masasarihan an iya abilidad ha pagsulbad hin magkuri nga problema?

Posible gud nga nakita ni Rehoboam nga tensyonado an kahimtang ha Israel. Waray pag-iha, an katawohan nagpadara hin mga representante basi igsumat ha iya kon ano gud an ira karuyag nga mahitabo: “Ginhimo han imo amay an amon yugo nga makuri: busa yana himoon mo an makuri nga pagpaalagad han imo amay, ngan an iya mabug-at nga yugo nga iya iginbutang ha amon, nga magarogaan, ngan kami magaalagad ha imo.”​—2 Kron. 10:3, 4.

Posible nga nakurian pagdesisyon hi Rehoboam. Kon tutumanon niya an karuyag han katawohan, bangin kinahanglan nga ibanan niya, han iya pamilya, ngan hadton aada ha palasyo an pipira nga magarbo nga butang nga ira napapahimulosan ngan ibanan an iya gin-aaro ha katawohan. Ha luyo nga bahin, kon diri niya ihatag an karuyag han katawohan bangin magrebelde hira. Ano an iya bubuhaton? Ha tinikangan, ginkonsulta han bag-o nga hadi an katigurangan nga magsaragdon hadto ni Solomon. Kondi ha urhi, nangaro hi Rehoboam hin sagdon ha burobata nga kalalakin-an, adton mga kaedad niya. Ginsunod niya an ira sagdon ngan nagdesisyon nga pakurian an katawohan. Hiya nagsiring: “An akon amay naghimo han iyo yugo nga mabug-at, kondi akon dudugangan ini: an akon amay naglamba ha iyo hin mga latigo, kondi ako maglalamba ha iyo hin mga orangorang.”​—2 Kron. 10:6-14.

Ano nga leksyon an aton mahibabaroan? Matin-aw, kasagaran nga maaramon an pagsunod han sagdon han mga edaran ngan hamtong ha espirituwal. Tungod kay eksperyensyado na hira, bangin nakikita nira nga  daan an mahimo magin resulta han usa nga desisyon salit makakahatag hira hin maopay nga sagdon.​—Job 12:12.

Gintirok ni Rehoboam an iya kasundalohan basi makig-away ha mga tribo nga nagrebelde ha iya. Pero ginpugngan hira ni Jehova pinaagi kan propeta Semaya, nga nasiring: “Diri kamo makadto, o makiaway ha iyo kabugtoan an mga anak ni Israel: bumalik an tagsa ka tawo ha iya balay; kay ini nga butang akon.”​—1 Hadi 12:21-24. *

Diri makikig-away? Posible nga nabaraka gud hito hi Rehoboam! Ano an huhunahunaon han mga tawo ha hadi nga ha tinikangan nagtarhog nga ‘lalambahon hira hin mga orang-orang’ pero ha urhi ginpasagdan la inin dayag nga pagrebelde? (Ikompara an 2 Kronikas 13:7.) Bisan pa hito, an hadi ngan an iya mga kasundalohan “namati . . . han polong ni Jehova, ngan namalik ngan nagkalakat ha ira dalan, sumala han polong ni Jehova.”

Ano an igintututdo hito ha aton? Maaramon an pagsugot ha Dios bisan kon bangin tamayon kita han mga tawo tungod han aton pagbuhat hito. An pagin masinugtanon ha Dios nagriresulta han iya pag-uyon ngan bendisyon.​—Deut. 28:2.

Ginbendisyonan ba hi Rehoboam tungod han iya pagsugot? Han ginbayaan niya an iya plano nga makig-away ha bag-o pa la nga naestablisar nga nasud, nagpokus hiya ha pagtukod hin mga syudad ha teritoryo han Juda ngan Benjamin nga iya pa gihapon ginmamandoan. Ginhimo niya an pipira nga syudad nga “labaw hin kakusug.” (2 Kron. 11:5-12) Ngan an mas importante, nagin masinugtanon hiya ha mga balaud ni Jehova ha sulod hin pipira ka panahon. Han an napulo-ka-tribo nga ginhadian han Israel nga ginmamandoan ni Jeroboam nagsingba ha mga dios-dios, damu an tikang didto nga nagbiyahe ngadto ha Jerusalem basi sumuporta kan Rehoboam ngan ha tinuod nga pagsingba. (2 Kron. 11:16, 17) Salit mas naparig-on an pagkahadi ni Rehoboam tungod han iya pagsugot.

Kondi han nagin marig-on na an pagkahadi ni Rehoboam, may ginhimo hiya nga diri ginlalaoman. Ginbayaan niya an mga balaud ni Jehova ngan nagsingba ha buwa nga mga dios! Kay ano? Ginbuhat ba niya ito tungod han impluwensya han iya nanay nga usa nga Amonitanhon? (1 Hadi 14:21) Anoman an iya rason, sumunod ha iya an bug-os nga nasud. Salit gintugotan ni Jehova hi Hadi Sisak han Ehipto nga sakupon an damu nga syudad han Juda bisan kon ginparig-on ito ni Rehoboam!​—1 Hadi 14:22-24; 2 Kron. 12:1-4.

Nagtikagrabe pa an sitwasyon han inabot hi Sisak basi atakehon an Jerusalem, diin nagmamando hi Rehoboam. Hito nga higayon, iginsumat ni propeta Semaya kan Rehoboam ngan ha iya mga prinsipe an mensahe han Dios: “Iyo ako binayaan, tungud hini binayaan ko man kamo dida ha kamot ni Sisak.” Ano an reaksyon ni Rehoboam hito nga disiplina? Ginkarawat niya ito! An Biblia nasiring: “An mga prinsipe ha Israel ngan an hadi nagpaubus ha ira ngahaw; ngan hira nagsiring: Hi Jehova matadong.” Salit gintalwas ni Jehova hi Rehoboam ngan an Jerusalem.​—2 Kron. 12:5-7, 12.

Katapos hito, padayon nga nagmando hi Rehoboam ha sur nga ginhadian. Antes hiya mamatay, gintagan niya hin mga regalo an iya damu nga anak nga kalalakin-an. Posible nga ginbuhat niya ito basi diri hira magrebelde ha ira bugto nga hi Abiha, an manurunod han iya pagkahadi. (2 Kron. 11:21-23) Pinaagi hini, iginpakita ni Rehoboam an pagin maaramon, nga waray niya maipakita hadto.

Bisan kon may nahimo hi Rehoboam nga mag-opay nga butang, waray niya makarawat an pag-uyon ni Jehova. An Biblia nagsiring: “Hiya nagbuhat hadton maraut.” Kay ano? “Tungud kay waray niya ihilig an iya kasingkasing ha pagpangita kan Jehova.”​—2 Kron. 12:14.

Ano an aton mahibabaroan tikang kan Rehoboam? May mga higayon nga sumugot hiya ha Dios. Ngan may mag-opay hiya nga ginhimo para ha katawohan ni Jehova. Pero waray hiya duok nga relasyon kan Jehova o sinsero nga hingyap nga lipayon hiya. Tungod hito, nagbuhat hiya han maraot ngan nagsingba ha buwa nga mga dios. Bangin maghunahuna ka: ‘Han ginsunod ni Rehoboam an disiplina han Dios, ginbuhat gud ba niya ito tungod han iya sinsero nga pagbasol  ngan hingyap nga lipayon an Dios o tungod la han impluwensya han iba?’ (2 Kron. 11:3, 4; 12:6) Ha urhi, nagbuhat hiya utro hin maraot. Iba gud hiya ha iya lolo nga hi Hadi David! Oo, nakahimo hin mga sala hi David pero makikita gud ha iya an gugma kan Jehova, debosyon ha tinuod nga pagsingba, ngan tinuod nga pagbasol ha iya mga sala.​—1 Hadi 14:8; Sal. 51:1, 17; 63:1.

May hibabaroan gud kita nga leksyon tikang ha asoy mahitungod kan Rehoboam. Kinahanglan naton magtagana para ha aton pamilya ngan magin maduruto ha pag-alagad kan Jehova. Pero diri ito igo. Basi makarawat an iya pag-uyon, kinahanglan naton hiya singbahon ha paagi nga iya nalilipayan ngan magkaada marig-on nga relasyon ha iya.

Posible naton ito mabuhat kon mangangalimbasog kita nga magkaada hilarom nga gugma kan Jehova. Sugad la nga ginsusungohan naton an kalayo basi padayon ito nga maglaga, kinahanglan liwat naton tipigan nga naglalaga an aton gugma ha Dios pinaagi ha regular nga pag-aram han iya Pulong, pagpamalandong han aton ginbabasa, ngan padayon nga pag-ampo. (Sal. 1:2; Roma 12:12) Ngan an aton gugma kan Jehova magpapagios ha aton nga lipayon hiya ha ngatanan naton nga ginbubuhat. Mag-aaghat liwat ito ha aton nga sinsero nga magbasol kon makasala kita. Sugad nga resulta, diri kita magigin pariho kan Rehoboam, lugod magpapabilin kita nga matinumanon ha tinuod nga pagsingba.​—Jud. 20, 21.