1. Ano an inaabat ni Jehova kon an usa han iya mga surugoon nabalik ha iya?

SUGAD han aton nahisgotan ha nauna nga artikulo, iginpariho ni Jehova an iya kalugaringon ha maopay nga paraataman nga nahigugma gud ha tagsa niya nga karnero. Ngan ginbibiling niya an bisan usa hito nga nawawara. Ginsidngan ni Jehova an mga Israelita nga binaya ha iya: “Balik ha akon, ngan mabalik ako ha iyo.” Maaram kita nga ito la gihapon an iya inaabat kay nagsiring hiya: “Diri ako nagbabag-o.” (Mal. 3:6, 7) Hi Jesus nagsiring nga daku gud an kalipay ni Jehova ngan han mga anghel kon an bisan usa han Iya mga surugoon nga nawara nabalik ha Iya.​—Luc. 15:10, 32.

2. Ano an aton hihisgotan hini nga artikulo?

² Hisgotan naton an tulo nga ilustrasyon ni Jesus nga nagtututdo hin importante nga mga leksyon kon paonan-o mabubuligan adton diri na nag-aalagad kan Jehova. Hihisgotan naton an pipira nga kalidad nga kinahanglan naton basi mabuligan an nawawara nga mga karnero nga bumalik ha iya. Ngan makikita naton kon kay ano nga bawi gud an pangalimbasog nga mabuligan an mga diri aktibo.

3-4. Kay ano nga ginbiling gud hin maopay han babaye nga gin-unabi ha Lucas 15:8-10 an iya nawawara nga drakma?

³ Kinahanglan gud an pangalimbasog para mabilngan adton naruruyag bumalik kan Jehova. Ha parabola nga nakarekord ha Ebanghelyo ni Lucas, gin-istorya ni Jesus kon paonan-o an usa nga babaye nagpinamiling han usa nga importante nga butang nga nawara​—usa nga drakma nga sinselyo. An importante nga bahin hini nga istorya amo an iya paniguro nga maagian an sinselyo.​—Basaha an Lucas 15:8-10.

⁴ Iginsaysay ni Jesus an inabat han babaye han nabilngan niya an iya presyoso nga drakma. Ha panahon ni Jesus, an pipira nga Judio nga mga nanay usahay nahatag hin usa ka set hin napulo nga drakma nga sinselyo ha usa nga anak nga babaye ha adlaw han iya kasal. Bangin ito nga sinselyo usa han napulo nga drakma nga iginhatag ha iya han iya nanay. Naghunahuna an babaye nga an sinselyo nahulog ha salog. Salit nagdagkot hiya hin lampara ngan nagpinamiling,  pero waray niya ito makita. Bangin an iya lampara diri sugad kalamrag para makita an gutiay nga silber nga sinselyo. Ha urhi, ginsilhigan niya hin maopay an bug-os nga balay. Ha mga tapotapo nga iya nasilhig nakadto an iya presyoso nga drakma, nga nag-iinggat tungod han lamrag han lampara. Naggaan gud an iya pag-abat! Gintawag niya an iya kasangkayan ngan mga amyaw basi isumat an maopay nga balita.

5. Kay ano nga bangin makuri an pagpamiling hadton mga binaya ha kongregasyon?

⁵ Sugad han aton nahibaroan ha ilustrasyon ni Jesus, kinahanglan gud an pangalimbasog para maagian an usa nga butang nga nawara. Ha pariho nga paagi, bangin kinahanglan naton mangalimbasog basi maagian adton mga binaya ha kongregasyon. Bangin mga tuig na an naglabay tikang han waray na hira makig-upod ha aton. Bangin pa ngani binalhin hira ha usa nga lugar diin an kabugtoan diri nakilala ha ira. Pero hini nga takna, sigurado nga may mga diri aktibo nga naruruyag gud bumalik kan Jehova. Karuyag nira mag-alagad kan Jehova kaupod han iya tinuod nga mga magsiringba, pero kinahanglan nira an aton bulig.

6. Paonan-o makakabulig ha pagbiling hadton mga diri aktibo an ngatanan ha kongregasyon?

⁶ Hin-o an mahimo bumulig ha pagpamiling ha mga diri aktibo? Kita ngatanan​—mga tigurang, payunir, kapamilya, ngan mga magwarali ha kongregasyon—​makakabulig ha pagpamiling ha ira. May sangkay ka ba o paryente nga diri aktibo? May nakilala ka ba nga diri aktibo ha imo pagsangyaw ha balay-balay o samtang nagsasangyaw ka ha publiko? Isaysay ha iya nga kon karuyag niya nga bisitahon hiya, malilipay ka nga ihatag an iya adres o numero han telepono ha lokal nga mga tigurang.

7. Ano an imo nahibaroan ha ginsiring han tigurang nga hi Thomas?

⁷ An mga tigurang an may nangunguna nga responsabilidad ha pagbiling ha mga diri aktibo nga karuyag bumalik kan Jehova. Paonan-o ini nira mahihimo? Tagda an siring han tigurang nga hi Thomas * nga taga-Spain. Nabuligan niya an sobra 40 nga Saksi nga bumalik ha kongregasyon. Hi Thomas nagsiring: “Siyahan, nagpapakiana ako ha iba-iba nga bugto kon maaram hira kon diin na naukoy an diri aktibo nga mga indibiduwal. O nagpapakiana ako ha mga magwarali kon may nahinunumdoman ba hira nga diri na natambong ha mga katirok. Kadam-an ha kongregasyon an eksayted bumulig tungod kay inaabat nira nga api hira ha pagbiling. Ha urhi, kon nabisita ako ha diri aktibo nga kabugtoan, nagpapakiana ako mahitungod ha ira mga anak ngan iba pa nga paryente. Gin-uupod hadto han pipira nga diri aktibo an ira mga anak ngadto ha mga katirok, ngan bangin ini nga ira mga anak nagin magwarali. Hira liwat puydi mabuligan nga bumalik kan Jehova.”

8. Ha ilustrasyon mahitungod han nawara nga anak ha Lucas 15:17-24, paonan-o gintratar han tatay an iya mabinasulon nga anak?

⁸ Ano nga mga kalidad an kinahanglan nga may-ada kita basi mabuligan naton adton naruruyag bumalik kan Jehova? Tagda an pipira nga leksyon nga aton mahibabaroan ha ilustrasyon ni Jesus may kalabotan ha rebelyoso nga anak nga binaya ha ira balay. (Basaha an Lucas 15:17-24.) Iginsaysay ni Jesus kon paonan-o ha urhi nakapamurubuot an anak ngan nagdesisyon nga bumalik ha ira balay. Dinalagan an tatay basi tapoon an iya anak ngan hugot nga ginhangkopan hiya basi hibaroan han anak nga hinigugma hiya. Nakukonsensya gud an anak ngan inabat niya nga diri hiya angay tawagon nga anak. Inabat an tatay hin empatiya para ha iya anak, nga nagsumat han tanan niya nga inaabat. Katapos, naghimo an tatay hin praktikal nga mga butang basi ipakita ha iya anak nga kinakarawat hiya utro ha ira panimalay, diri sugad nga sinuholan  nga trabahante, kondi sugad nga hinigugma nga membro han pamilya. Basi pamatud-an ito, nag-andam an tatay hin panagtawo ngan iya gintagan an iya mabinasulon nga anak hin maopay gud nga bado.

9. Ano nga mga kalidad an kinahanglan nga may-ada kita basi mabuligan naton nga bumalik kan Jehova an mga diri aktibo? (Kitaa an kahon nga “ Kon Paonan-o Mabubuligan Adton mga Naruruyag Bumalik.”)

⁹ Hi Jehova pariho han tatay hito nga ilustrasyon. Hinigugma niya an aton diri aktibo nga kabugtoan ngan karuyag niya nga bumalik hira ha iya. Pinaagi ha pagsubad kan Jehova, mabubuligan naton hira nga bumalik. Basi mabuhat ini, kinahanglan naton magpakita hin pagpailob, empatiya, ngan gugma. Kay ano nga kinahanglan naton ipakita ito nga mga kalidad, ngan paonan-o naton ito mahihimo?

10. Kay ano nga kinahanglan naton magin mapailubon basi mabuligan an usa nga makarekober ha espirituwal?

¹⁰ Kinahanglan kita magin mapailubon kay nagkikinahanglan hin panahon basi matambal an usa ha espirituwal. Damu han mga diri aktibo hadto an nagsiring nga ginios la hira katapos han pauroutro nga pagbisita ha ira han mga tigurang ngan han iba pa ha kongregasyon. An sister nga hi Nancy nga taga-Asia, nagsurat: “Daku gud an naibulig ha akon han usa nga duok nga sangkay ha kongregasyon. Hinigugma niya ako sugad hin magurang nga bugto. Iginpahinumdom niya ha akon an makalilipay nga mga panahon nga nagkaupod kami hadto. Mapailubon gud hiya nga namamati samtang ginsusumat ko an akon inaabat, ngan diri hiya nag-aalang paghatag hin sagdon ha akon. Tinuod gud hiya nga sangkay, nga andam bumulig ha bisan ano nga panahon.”

11. Kay ano nga kinahanglan magpakita kita hin empatiya basi mabuligan adton mga nasakitan?

¹¹ An empatiya pariho hin epektibo nga medisina; makakabulig ito nga magin maopay an pag-abat han usa. An pipira nga diri aktibo nasakitan  gud ha ginbuhat han usa ha kongregasyon mga tuig na an naglabay ngan nasisina la gihapon hira. Tungod hini, waray hira hingyap nga bumalik kan Jehova. An iba bangin naghuhunahuna nga gintratar hira hin diri patas. Bangin kinahanglan nira hin mamamati ha ira ngan makakaintindi han ira inaabat. (San. 1:19) Hi María nga nagin diri aktibo hadto, nagsiring, “Kinahanglan ko hin mamamati ha akon, magliliaw ha akon, ngan maghahatag ha akon hin maopay nga sagdon ngan bulig.”

12. Ha ano nga paagi an gugma ni Jehova puropariho hin pisi?

¹² An Biblia nasiring nga an gugma ni Jehova ha iya katawohan puropariho hin higot, o pisi. Ha ano nga paagi? Hunahunaa ini nga ilustrasyon: Imadyina nga nalulumos ka ha mabalud nga kadagatan ngan may nag-itsa ha imo hin life jacket. Sigurado nga aapresyaron mo ito kay makakabulig ito ha imo nga lumutaw. Pero diri ka masasalbar pinaagi la han life jacket. Mahagkot an tubig; diri ka mabubuhi kon diri ka makasakay ha lifeboat. Kinahanglan may mag-itsa ha imo hin pisi ngan bumulig ha imo nga makasakay ha lifeboat. Hi Jehova nagsiring mahitungod ha mga Israelita nga binaya ha iya: “Padayon nga ginbutong ko hira, pinaagi han mga higot han gugma.” (Hos. 11:4) Sugad liwat hito an inaabat han Dios yana ha mga humunong ha pag-alagad ha iya ngan nalulumos ha mga problema ngan kabaraka. Karuyag niya nga hibaroan nira nga hinigugma niya hira, ngan karuyag niya nga bumalik hira ha iya. Ngan mahimo ka gamiton ni Jehova basi ipakita an iya gugma ha ira.

13. Paonan-o an eksperyensya ni Pablo nagpapakita nga an aton gugma makakabulig ha iba nga bumalik kan Jehova?

¹³ Importante nga pasarigon naton an mga diri aktibo nga hinigugma hira ni Jehova ngan hinigugma liwat naton hira. Hi Pablo nga gin-unabi  ha nauna nga artikulo, nagin diri aktibo hin sobra 30 ka tuig. Hiya nagsiring: “Usa ka aga, samtang tilakat ako ha balay, gintapo ako hin buotan nga lagas nga sister ngan nakiistorya hiya ha akon ha mahigugmaon nga paagi. Nakatangis ako sugad hin bata. Ginsidngan ko hiya nga baga hin ginpadara hiya ni Jehova basi kaistoryahon ako. Dida hito nga takna nakadesisyon ako nga bumalik kan Jehova.”

14. Sumala ha ilustrasyon ha Lucas 15:4, 5, ano an ginbuhat han paraataman han naagian niya an nawara nga karnero?

¹⁴ Kinahanglan han mga diri aktibo an aton padayon nga bulig. Pariho han nawara nga anak ha ilustrasyon ni Jesus, bangin may hilarom hira nga kasakit ha emosyon nga maiha matambal. Ngan posible nga maluya hira ha espirituwal tungod han ira naeksperyensyahan ha kalibotan ni Satanas. Kinahanglan naton hira buligan nga magrig-on an ira pagtoo kan Jehova. Ha ilustrasyon mahitungod han nawara nga karnero, igin-istorya ni Jesus kon paonan-o ginpas-an han paraataman an karnero ngan ginkugos ito basi ibalik ha panon. Naggahin na hin panahon ngan kusog an paraataman basi bilngon an nawara nga karnero. Pero nakita niya nga kinahanglan niya ito kuguson tipabalik ha toril kay waray ito kusog nga maglugaring pagbalik ha panon.​—Basaha an Lucas 15:4, 5.

15. Paonan-o naton mabubuligan an mga diri aktibo nga karuyag bumalik kan Jehova? (Kitaa an kahon nga “ Usa nga Presyoso Gud nga Garamiton.”)

¹⁵ Bangin kinahanglan kita maggahin hin panahon ngan kusog ha pagbulig ha mga diri aktibo nga malamposan an mga problema nga nagpapakuri ha ira ha pagbalik kan Jehova. Pero pinaagi han espiritu ni Jehova, han iya Pulong, ngan han mga publikasyon nga igintatagana pinaagi han kongregasyon, mabubuligan naton hira nga magin  marig-on utro ha espirituwal. (Roma 15:1) Paonan-o ta ini mahihimo? Usa nga eksperyensyado nga tigurang an nagsiring, “Kadam-an han mga diri aktibo nga nagdesisyon nga mag-alagad utro kan Jehova kinahanglan dumarahan hin pag-aram ha Biblia.” * Salit kon hangyoon ka nga dumarahan hin pag-aram an usa nga diri aktibo, malipayon nga karawata ito nga toka kon mahihimo mo. An tigurang nagsiring liwat, “An magwarali nga nagdudumara han pag-aram kinahanglan magin maopay nga sangkay, usa nga matataporan ngan masusumatan han inaabat han diri aktibo.”

16. Paonan-o kita nahibaro nga mabulig ha aton an mga anghel?

¹⁶ Damu nga eksperyensya an nagpapakita nga an mga anghel nabulig ha aton nga mabilngan an mga diri aktibo nga naruruyag bumalik kan Jehova. (Pah. 14:6) Pananglitan hi Silvio nga taga-Ecuador, sinsero nga nag-ampo nga mabuligan hiya nga makabalik ha kongregasyon. Samtang nag-aampo pa hiya, may nag-door bell. Duha nga tigurang an nakada ha purtahan. Hito nga pagbisita, nalipay hira ha paghatag han bulig nga iya kinahanglan.

17. Ano nga balos an aton nakakarawat ha pagbulig ha magluya ha espirituwal?

¹⁷ Maabat kita hin daku nga kalipay ha pagbulig ha mga magluya ha espirituwal nga bumalik kan Jehova. Tagda an siring ni Salvador, nga payunir nga naghatag hin espesyal nga atensyon ha mga diri aktibo: “Usahay, nakakatangis ako tungod ha kalipay. Nalilipay gud ako nga gintalwas ni Jehova tikang ha kalibotan ni Satanas an usa han iya hinigugma nga mga karnero ngan nagkaada ako pribilehiyo nga makigkooperar ha Iya hini nga buruhaton.”​—Buh. 20:35.

18. Kon usa ka nga diri aktibo, ha ano ka makakasiguro?

¹⁸ Kon diri ka na nakikig-upod ha katawohan ni Jehova, makakasiguro ka nga hinigugma ka la gihapon niya. Karuyag niya nga bumalik ka ha iya. Kinahanglan may himoon ka nga mga pitad basi makabalik ha iya. Pero pariho han tatay ha ilustrasyon ni Jesus, ginhuhulat gud ni Jehova an imo pagbalik, ngan malilipay hiya ha pagkarawat ha imo.