1. Ano an kahadlok ha Dios, ngan kay ano nga kinahanglan nga magkaada hito an mga nahigugma kan Jehova?

AN MGA Kristiano nahigugma ha Dios, ngan nahahadlok liwat hira ha iya. Para ha iba, baga hin nagkakasumpaki ito. Pero, diri an klase han kahadlok nga nakakalisang an aton gin-uunabi. Aton hihisgotan an espesyal nga klase han kahadlok. An mga tawo nga may-ada hini nga kahadlok may hilarom ngan sinsero nga respeto ha Dios. Diri nira karuyag mapasubo an ira Amay ha langit kay nadiri hira nga madaot an ira pakigsangkay ha iya.​—Sal. 111:10; Prob. 8:13.

2. Sumala ha ginsiring ni Hadi David ha Salmo 86:11, ano an duha nga butang nga aton paghihisgotan?

² Basaha an Salmo 86:11. Samtang ginhuhunahuna mo ito nga mga pulong, makakasiring ka nga nasasabtan han matinumanon nga hi Hadi David an importansya han kahadlok ha Dios. Hihisgotan naton kon paonan-o naton maiaaplikar an ginsiring ni David ha iya pag-ampo. Una, uusisahon naton an pipira nga rason kon kay ano nga kinahanglan kita magkaada hilarom nga respeto ha ngaran han Dios. Ikaduha, hihisgotan naton kon paonan-o naton maipapakita kada adlaw nga may hilarom kita nga respeto ha ngaran han Dios.

3. Ano nga eksperyensya an posible nga nakabulig kan Moises basi may-ada hiya pirme hilarom nga respeto ha ngaran han Dios?

³ Hunahunaa an inabat ni Moises han napungko hiya ha guhang ha daku nga bato ngan iya nakita ha bisyon an himaya ni Jehova  nga nalabay. Posible nga ito an pinakaurusahon nga naeksperyensyahan han usa nga tawo antes pa kumanhi hi Jesus ha tuna! Nabatian ni Moises ini nga mga pulong nga sigurado nga ginyakan han usa nga anghel: “Hi Jehova, hi Jehova, usa nga Dios nga maloloy-on ngan mapinairon, diri madagmit masina ngan hura hin maunungon nga gugma ngan kamatuoran, nagpapakita hin maunungon nga gugma ha yinukot, nagpapasaylo han sayop ngan pagtalapas ngan sala.” (Ex. 33:17-23; 34:5-7) Posible nga nahinumdoman ni Moises ito nga eksperyensya han gin-gamit niya an ngaran nga Jehova. Diri urusahon nga ha urhi hi Moises nagpahamangno ha katawohan han Dios nga Israel nga “kahadlokan ini nga mahimayaon ngan urusahon gud nga ngaran.”​—Deut. 28:58.

4. Ano an makakabulig ha aton nga magkaada hilarom nga respeto kan Jehova?

⁴ Kon aton ginhuhunahuna an ngaran nga Jehova, kinahanglan hunahunaon liwat naton kon ano nga klase hin persona hi Jehova. Kinahanglan hunahunaon naton an iya mga kalidad, sugad han iya gahum, kinaadman, hustisya, ngan gugma. An pagpamalandong hito ngan han iba pa nga mga kalidad mag-aaghat ha aton nga magkaada hilarom nga respeto ha iya.​—Sal. 77:11-15.

5-6. (a) Ano an kahulogan han ngaran han Dios? (b) Sumala ha Exodo 3:13, 14 ngan Isaias 64:8, ha ano nga mga paagi ginpapahinabo ni Jehova an mga butang?

⁵ Ano an aton nahibabaroan ha kahulogan han ngaran han Dios? Damu nga eskolar an nauyon nga an ngaran ni Jehova baga hin nangangahulogan nga “Hiya Nagpapahinabo nga Magin.” Ito nga kahulogan nagpapahinumdom ha aton nga waray makakapugong kan Jehova ha pagtuman han iya kaburut-on, ngan mapapahinabo niya an mga butang. Paonan-o?

⁶ Ginpapahinabo ni Jehova an mga butang pinaagi ha pagin bisan ano nga ginkikinahanglan basi matuman an iya katuyoan. (Basaha an Exodo 3:13, 14.) Haros pirme kita gin-aaghat nga pamalandungon iton urusahon gud nga aspekto han iya personalidad. Mahimo liwat mapahinabo ni Jehova nga an iya diri perpekto nga mga surugoon magin bisan ano nga ginkikinahanglan basi makag-alagad ha iya ngan matuman an iya katuyoan. (Basaha an Isaias 64:8.) Hito nga mga  paagi, ginpapahinabo ni Jehova nga matuman an iya kaburut-on. Waray makakapugong ha iya ha pagtuman han iya mga katuyoan.​—Isa. 46:10, 11.

7. Paonan-o naton mapapahilarom an aton apresasyon ha aton langitnon nga Amay?

⁷ Mapapahilarom naton an aton apresasyon ha aton Amay ha langit pinaagi ha pagpamalandong han iya mga ginbuhat ngan han iya ginpahinabo nga mahimo naton. Pananglitan, kon aton ginpapamalandong an tanan nga linarang, naiimpres gud kita han tanan nga ginbuhat ni Jehova. (Sal. 8:3, 4) Ngan kon ginpapamalandong naton kon paonan-o niya kita ginbubuligan basi mabuhat an iya kaburut-on, naghihilarom an aton respeto ha iya. Urusahon gud an ngaran nga Jehova! Nag-uupod ito han tanan mahitungod han aton Amay, han tanan nga iya ginbuhat, ngan han tanan nga iya bubuhaton.​—Sal. 89:7, 8.

8. Sumala ha Deuteronomio 32:2, 3, ano an karuyag ni Jehova nga buhaton han iya mga surugoon ha iya ngaran?

⁸ Antes gud la sumulod an mga Israelita ha Tuna nga Iginsaad, igintutdo ni Jehova kan Moises an mga pulong han usa nga kanta. (Deut. 31:19) Katapos, kinahanglan liwat itutdo ni Moises ha mga tawo an kanta. (Basaha an Deuteronomio 32:2, 3.) Kon aton papamalandungon an bersikulo 2 ngan 3, klaro nga diri karuyag ni Jehova nga itago an iya ngaran, nga ginhuhunahuna nga baga hin sobra kabaraan salit diri ito angay luwason. Karuyag niya nga mahibaroan han tanan an iya ngaran! Daku gud nga pribilehiyo ha mga Israelita nga mabatian hi Moises nga nagtututdo ha ira parte kan Jehova ngan ha Iya harangdon nga ngaran! An igintutdo ha ira ni Moises nagparig-on han ira pagtoo ngan nakarepresko ha ira, pariho han tarahiti nga nagsasaribo ha mga tanom. Paonan-o naton masisiguro nga pariho hito an aton paagi han pagtutdo?

9. Paonan-o kita makakabulig ha pagbaraan han ngaran ni Jehova?

⁹ Kon nagsasangyaw kita ha balay-balay o ha publiko, mahimo naton gamiton an Biblia basi ipakita ha mga tawo an personal nga ngaran han Dios nga Jehova. Mahimo kita magtanyag ha ira hin maopay nga literatura, ekselente nga mga video, ngan materyal ha aton website nga nagpapasidungog kan Jehova. Ha trabaho, eskwelahan, o kon nagbibiyahe, mahimo kita mamiling hin oportunidad basi ipakiistorya an mahitungod han aton hinigugma nga Dios ngan kon ano nga klase hiya nga Dios. Kon iginsusumat naton ha aton nakakaistorya an mahigugmaon nga katuyoan ni Jehova para ha tawo ngan ha tuna, naghahatag kita ha ira hin impormasyon mahitungod kan Jehova nga bangin bag-o gud ha ira. Samtang aton ginsusumat ha iba an kamatuoran parte han aton mahigugmaon nga Amay, nabulig kita ha pagbaraan han ngaran han Dios. Ginbubuligan naton an mga tawo nga masabtan nga natutdoan hira han kabuwaan ngan pakaraot kan Jehova. An aton igintututdo tikang ha Biblia amo an pinakamakarepresko nga butang nga mahibabaroan han mga tawo.​—Isa. 65:13, 14.

10. Kay ano nga diri eksakto an pagtutdo la ha mga estudyante han Biblia han mga sugo ngan suruklan han Dios?

¹⁰ Kon nagdudumara kita hin pag-aram ha Biblia, karuyag ta buligan an aton mga estudyante nga mahibaroan ngan gamiton an ngaran ni Jehova. Karuyag liwat naton hira buligan nga bug-os nga makilala hi Jehova. Mahihimo ba naton ito kon basta la kita magtututdo hin mga instruksyon, suruklan han Dios, ngan surundon ha panggawi? An maopay nga estudyante mahimo mahibaro han mga balaud han Dios ngan maimpres pa ngani. Pero susundon ba niya hi Jehova tungod han iya gugma ha Iya? Hinumdumi, maaram hi Eva han balaud han Dios, pero diri niya tinuod nga hinigugma an Dios, ngan sugad liwat hito hi Adan. (Gen. 3:1-6) Salit labaw pa kay ha pagtutdo la ha iba han magtadong nga sugo ngan suruklan han Dios an kinahanglan buhaton.

11. Kon nagtututdo han mga balaud ngan suruklan han Dios, paonan-o ta mabubuligan an aton mga estudyante nga higugmaon an Parahatag han balaud?

 ¹¹ An mga sugo ngan suruklan ni Jehova pirme makakaopay ha aton. (Sal. 119:97, 111, 112) Pero bangin diri sugad hito an hunahunaon han mga estudyante kon diri nira nasasabtan nga gugma an nagpagios kan Jehova ha paghatag hito nga mga balaud. Salit puydi ta pakianhan an aton mga estudyante: “Ha imo pagkita, kay ano nga ginsusugo han Dios an iya mga surugoon nga buhaton ini o diri ini buhaton? Ano an iginsusumat hito ha aton parte ha iya sugad nga Persona?” Kon ginbubuligan ta an aton mga estudyante nga hunahunaon hi Jehova ngan magkaada tinuod nga gugma ha iya harangdon nga ngaran, mas posible nga maabot naton an ira kasingkasing. Hihigugmaon nira diri la an mga balaud kondi pati an Parahatag han balaud. (Sal. 119:68) Magririg-on an ira pagtoo ngan mabubuligan hira nga makaya an magkuri nga pagsari nga maabot.​—1 Cor. 3:12-15.

12. Paonan-o napakyas hi David ha pagtipig hin bug-os nga kasingkasing, ngan ano an resulta?

¹² An mga pulong nga “pag-usaha an akon kasingkasing” nga ginsurat ni Hadi David ha Salmo 86:11 importante gud liwat. Ha bug-os niya nga kinabuhi, nakita niya kon ano kasayon mabahin an kasingkasing. Ha usa nga higayon, nakadto hiya ha iya atop ngan nakita niya nga nakarigo an asawa han usa nga lalaki. Hito nga takna, an kasingkasing ba ni David bug-os o nababahin? Maaram hiya han balaud ni Jehova: “Ayaw paghingyapa an asawa han imo igkasi-tawo.” (Ex. 20:17) Pero, matin-aw nga padayon hiya nga nagkinita. An iya kasingkasing nabahin ha iya hingyap ha babaye nga hi Bat-seba ngan ha iya hingyap nga lipayon hi Jehova. Bisan kon maiha na nga nahigugma ngan nahahadlok hi David kan Jehova, nagpadara hiya ha iya makikalugaringon nga hingyap. Tungod hito, nakabuhat hiya hin maraot gud nga mga butang. Napasiparahan niya an ngaran ni Jehova. Nakaghatag liwat hi David hin daku gud nga kadaot ha inosente nga mga tawo, pati na ha iya pamilya.​—2 Sam. 11:1-5, 14-17; 12:7-12.

13. Paonan-o kita nahibaro nga an kasingkasing ni David nagin bug-os utro?

¹³ Gindisiplina ni Jehova hi David, ngan nagkaada utro hiya maopay nga relasyon ha Iya. (2 Sam. 12:13; Sal. 51:2-4, 17) Ginhinumdom ni David an mga problema ngan kasakit nga nagin resulta han ginpabay-an niya nga mabahin an iya kasingkasing. An iya mga pulong ha Salmo 86:11 mahimo liwat ihubad hin: “Tagi ako hin kasingkasing nga diri nababahin.” Ginbuligan ba ni Jehova hi David nga magin bug-os, o diri nababahin, an iya kasingkasing? Oo, kay ha urhi gintawag hi  David ha Pulong ni Jehova sugad nga tawo nga an “kasingkasing . . . bug-os kan Jehova nga iya Dios.”​—1 Hadi 11:4; 15:3.

14. Ano an kinahanglan naton ipakiana ha aton kalugaringon, ngan kay ano?

¹⁴ An ehemplo ni David nagpaparig-on ngan nagpapahamangno liwat ha aton. An iya pakabuhat hin seryoso nga sala pahamangno ha mga surugoon han Dios yana. Bag-ohan man kita ha pag-alagad o maiha na, kinahanglan pakianhan ta an aton kalugaringon, ‘Gin-aatohan ko ba an mga ginhihimo ni Satanas basi bahinon an akon kasingkasing?’

15. Paonan-o an kahadlok ha Dios nagpuprotektar ha aton kon may nakikita kita nga makakapukaw hin seksuwal nga hingyap?

¹⁵ Pananglitan, kon may nakikita ka ha TV o ha Internet nga makakapukaw hin seksuwal nga hingyap, ano an imo ginbubuhat? Bangin mangatadongan ka nga an retrato o pelikula diri man gud pornograpiya. Pero posible ba nga paagi ito ni Satanas basi mabahin an imo kasingkasing? (2 Cor. 2:11) Ito nga imo nakita maipapariho ha gutiay nga metal nga may tarom nga ginagamit ha pagtunga hin daku nga kahoy. Una, iya ipapadulot ha kahoy an manipis ngan matarom nga parte han metal. Katapos, samtang iya ginpupukpok an metal, an kahoy nabubuka. An mga retrato ba nga nakakapukaw hin seksuwal nga hingyap maipapariho ha manipis nga parte hito nga metal? An pagkita hini nga mga butang nga baga hin diri nakakadaot puydi magin hinungdan nga ha urhi makasala an usa kan Jehova. Salit ayaw tuguti nga makasulod ha imo kasingkasing an bisan ano nga maraot nga butang! Tipigi ito nga bug-os basi magkaada ito kahadlok ha ngaran ni Jehova!

16. Kon naatubang kita hin pagsulay, ano an angay naton igpakiana ha aton kalugaringon?

¹⁶ Labot pa han mga retrato nga nakakapukaw hin seksuwal nga hingyap, damu pa an ginagamit ni Satanas basi sulayon kita. Ano an aton bubuhaton? Masayon la mangatadongan nga diri man ini sobra karaot. Pananglitan, bangin maghunahuna kita: ‘Diri man ako madi-disfellow kon buhaton  ko ini, salit diri gud ito sugad kaseryoso.’ Sayop gud ito nga pangatadongan. Maopay nga pakianhan ta an aton kalugaringon: ‘Ini ba nga pagsulay ginagamit ni Satanas basi bahinon an akon kasingkasing? Kon magpapadara ako ha sayop nga hingyap, mapapasiparahan ko ba an ngaran ni Jehova? Ini ba nga buhat magpapahirani o magpapahirayo ha akon ha Dios?’ Pamalandonga an sugad nga mga pakiana. Pag-ampo hin kinaadman basi tangkod nga mabaton ito. (San. 1:5) An pagbuhat hito makakaprotektar gud ha imo. Makakabulig ito ha imo nga marig-on nga isalikway an pagsulay, sugad han ginbuhat ni Jesus han nagsiring hiya: “Iwas, Satanas!”​—Mat. 4:10.

17. Kay ano nga diri maopay an nababahin nga kasingkasing? Iilustrar.

¹⁷ Diri maopay an nababahin nga kasingkasing. Imadyina an team ha isport nga may mga membro nga diri nagkakaurosa. An iba, karuyag hin kadayawan para la ha ira kalugaringon, an iba diri nasunod ha regulasyon han uyag, ngan an pipira diri narespeto ha coach. An sugad hito nga team diri gud magdadaog. Ha kabaliktaran, an team nga nagkakaurosa posible gud nga maglampos. An imo kasingkasing mahimo magin pariho hiton malampuson nga team kon an imo panhunahuna, hingyap, ngan emosyon nagkakaurosa ha pag-alagad kan Jehova. Tigamni nga karuyag gud ni Satanas nga mabahin an imo kasingkasing. Karuyag niya nga an imo panhunahuna, hingyap, ngan emosyon magin diri uyon ha mga suruklan ni Jehova. Pero, kinahanglan magin bug-os an imo kasingkasing basi makag-alagad kan Jehova. (Mat. 22:36-38) Ayaw gud tuguti hi Satanas nga bahinon an imo kasingkasing!

18. Uyon ha Micas 4:5, ano an imo determinasyon?

¹⁸ Pag-ampo kan Jehova sugad han ginbuhat ni David: “Pag-usaha an akon kasingkasing basi magkaada ako kahadlok ha imo ngaran.” Himoa an bug-os mo nga mahihimo basi maiaplikar ito nga pag-ampo. Kada adlaw, magin determinado nga an imo mga desisyon, gudtiay o dagku, nagpapakita hin hilarom nga respeto ha baraan nga ngaran ni Jehova. Pinaagi ha pagbuhat hito, sugad nga usa han mga Saksi ni Jehova, makakabulig ka nga magkaada maopay nga impresyon an mga tawo hito nga ngaran. (Prob. 27:11) Ngan kita ngatanan makakasiring liwat han ginsiring ni propeta Micas: “Maglalakat kita ha ngaran ni Jehova nga aton Dios ha kadayonan, oo ha kadayonan.”​—Mic. 4:5.