“Han nakiaway ha akon an akon patod, nasina gud ako ha iya ngan gintilo ko hiya. Karuyag ko hiya patayon.”​—Paul.

“Ha balay, madali gud ako masina. Ginlalamba ko an mga muwebles, uyagan, o bisan ano nga makaptan ko.”​—Marco.

Bangin diri man kita sugad hito. Pero usahay nakukurian kita pagkontrol ha aton kalugaringon. Tungod ini kay nakapanunod kita hin makasasala nga mga tendensya ha una nga tawo nga hi Adan. (Roma 5:12) An pipira, pariho kanda Paul ngan Marco, nakukurian pagkontrol han ira kasina. An iba nakukurian pagkontrol han ira panhunahuna. Pananglitan, ginhihinunahuna nira an mga butang nga nakakapahadlok o nakakapaluya ha ira. An iba bangin nakukurian ha pag-ato han hingyap nga magbuhat hin seksuwal nga imoralidad, maghubog, o magdroga.

Mahimo madaot an kinabuhi hadton diri nagkukontrol han ira panhunahuna, mga hingyap, ngan buhat. Pero puydi naton ito malikayan. Paonan-o? Pinaagi ha pagkultibar han pagpugong ha kalugaringon. Basi mabuhat naton ito, hisgotan ta an tulo nga pakiana: (1) Ano an pagpugong ha kalugaringon? (2) Kay ano nga importante gud ito? (3) Paonan-o ta makukultibar ini nga kalidad nga usa nga bahin han “bunga han espiritu”? (Gal. 5:22, 23) Katapos, aton hisgotan kon ano an aton mahimo buhaton kon usahay waray kita pagpugong ha kalugaringon.

An usa nga may pagpugong ha kalugaringon diri nagpapadara ha iya tigda nga inaabat o nahuhunahuna. Lugod, diri hiya nagyayakan o nagbubuhat ha paagi nga nakakapasubo ha Dios.

Iginpakita ni Jesus ha aton kon ano an iginpapasabot han pagpugong ha kalugaringon. An Biblia nasiring: “Han gin-iinsulto hiya, waray hiya bumulos hin pag-insulto. Han nag-aantos hiya, waray hiya manarhog, lugod igintapod niya an iya kalugaringon ha Dios nga naghuhukom ha matadong nga paagi.” (1 Ped. 2:23) Iginpakita ni Jesus an sugad nga pagpugong ha kalugaringon han gin-insulto hiya han mga kaaway samtang nakaraysang hiya ha pasakitan nga kahoy. (Mat. 27:39-44) Antes hito, nagpakita hiya hin daku nga pagpugong ha kalugaringon han nangalimbasog an nakontra nga mga lider han relihiyon nga lit-agon hiya pinaagi han iya mga pulong. (Mat. 22:15-22) Ngan maopay gud nga susbaranan an iya iginpakita han namurot hin bato an nasisina nga mga Judio basi ilabay ha iya! Imbes nga bumulos, “nagtago hi Jesus ngan ginawas ha templo.”​—Juan 8:57-59.

Makukopya ba naton an ehemplo ni Jesus? Oo. Hi apostol Pedro nagsurat: “An Kristo nag-antos para ha iyo, nga nagbilin hin susbaranan basi sundon niyo hin maopay an iya mga pitad.” (1 Ped. 2:21) Bisan kon diri kita perpekto, masusunod naton hin maopay an susbaranan ni Jesus ha pagpugong ha kalugaringon. Kay ano nga importante gud nga buhaton naton ito?

Kinahanglan magkaada kita pagpugong ha kalugaringon basi mapalipay hi Jehova. Bisan kon maiha na kita nga matinumanon nga nag-aalagad ha iya, mahimo mawara an aton pakigsangkay ha iya kon diri ta ginkukontrol an aton ginbubuhat ngan ginyayakan.

Hunahunaa hi Moises, nga “pinakamaaghop ha ngatanan nga tawo ha bawbaw han tuna” hadto nga panahon. (Num. 12:3) Ha sulod hin mga dekada nagpailob hi Moises ha mga reklamo han mga Israelita, pero usa ka adlaw waray hiya makakontrol. Nasina hiya han nagreklamo utro hira tungod han kawaray-tubig. Nag-isog hiya ha ira pinaagi ha pagsiring: “Pamati, kamo nga mga rebelde! Kinahanglan ba kami magpagawas hin tubig para ha iyo tikang hini nga daku nga bato?”​—Num. 20:2-11.

Waray makontrol ni Moises an iya kalugaringon. Waray niya ihatag kan Jehova an kadayawan sugad nga amo an milagroso nga naghatag han tubig. (Sal. 106:32, 33) Sugad nga resulta, waray hiya tuguti ni Jehova nga makasulod ha Tuna nga Iginsaad. (Num. 20:12) Ha ultimo nga mga adlaw han iya kinabuhi, posible nga nagbasol gud hi Moises nga waray niya kontrola an iya kasina.​—Deut. 3:23-27.

Ano an leksyon? Bisan kon maiha na kita ha kamatuoran, diri kita angay magyakan ha paagi nga waray respeto hadton nakakapaaringit ha aton o hadton kinahanglan tadungon. (Efe. 4:32; Col. 3:12) Oo, samtang nagtitikalagas kita, usahay mas nakukurian kita nga magin pasensyoso. Pero hinumdumi hi Moises. Diri gud naton karuyag madaot an aton hilawig nga rekord han pagkamatinumanon tungod la kay waray kita makapugong ha aton kalugaringon. Ano an mahihimo naton basi makultibar inin importante gud nga kalidad?

Pag-ampo para hin baraan nga espiritu. Kay ano? Kay an pagpugong ha kalugaringon usa nga bahin han bunga han espiritu han Dios, ngan nahatag hi Jehova hin espiritu ha nangangaro ha iya. (Luc. 11:13) Pinaagi han iya espiritu, mahimo kita tagan ni Jehova hin kusog nga aton kinahanglan. (Fil. 4:13) Mahimo liwat kita niya buligan nga makultibar an iba pa nga bahin han bunga han espiritu, sugad han gugma, nga mabulig nga magin mas masayon an pagpakita han pagpugong ha kalugaringon.—1 Cor. 13:5.

Likayi an bisan ano nga magpapakuri ha imo ha pagpakita hin pagpugong ha kalugaringon. Pananglitan, likayi an mga website ngan kaliawan nga nagpapakita hin sayop nga mga buhat. (Efe. 5:3, 4) Ha pagkamatuod, kinahanglan naton likayan an bisan ano nga makakasulay ha aton. (Prob. 22:3;  1 Cor. 6:12) Pananglitan, an usa nga madali la masulay ha pagbuhat hin imoral mahimo magdesisyon nga bug-os nga likayan an romantiko nga mga libro o pelikula.

Bangin makurian kita pag-aplikar hini nga sagdon. Pero kon maniningkamot kita, mahatag hi Jehova hin kusog nga aton kinahanglan basi makontrol an aton kalugaringon. (2 Ped. 1:5-8) Bubuligan kita niya nga makontrol an aton panhunahuna, panyakan, ngan buhat. Sugad nga pamatuod hito, hira Paul ngan Marco nga gin-unabi kanina, nahibaro pagkontrol han ira pagin bayolente. Tagda liwat an usa nga bugto nga haros pirme nasisina ha iba nga drayber kon nagdadrayb hiya, nakikigrasonay pa ngani hiya. Ano an iya ginbuhat mahitungod hito? “Nag-aampo gud ako kada adlaw. Nag-aram ako hin mga artikulo parte ha pagpugong ha kalugaringon ngan nagmemorya hin mga teksto ha Biblia nga makakabulig ha akon. Bisan kon mga tuig ko na ini nga ginpapaningkamotan, ginpapahinumdom ko la gihapon an akon kalugaringon kada aga nga karuyag ko magpabilin nga kalmado. Ngan temprano ako nga nalakat tipakadto ha akon mga appointment basi diri ako nag-aapura.”

Usahay, diri kita makakagpakita hin pagpugong ha kalugaringon. Kon mahitabo ito, bangin maawod gud kita nga mag-ampo kan Jehova. Pero ito an panahon nga kinahanglan gud naton mag-ampo. Salit pag-ampo dayon kan Jehova. Pakimalooy ha iya nga pasayloon ka, pangaro han iya bulig, ngan magin determinado nga diri na utruhon ito nga sayop. (Sal. 51:9-11) Diri igbabalewaray ni Jehova an imo sinsero nga pag-ampo para hin kalooy. (Sal. 102:17) Hi apostol Juan nagpapahinumdom ha aton nga an dugo han Anak han Dios “naglilimpyo ha aton ha ngatanan nga sala.” (1 Juan 1:7; 2:1; Sal. 86:5) Hinumdumi nga ginsusugo ni Jehova an iya mga surugoon nga pauroutro nga magpasaylo. Salit makakasarig kita nga ito liwat an iya bubuhaton para ha aton.​—Mat. 18:21, 22; Col. 3:13.

Waray malipay hi Jehova han waray makagpakita hi Moises hin pagpugong ha kalugaringon ha kamingawan. Bisan pa hito, ginpasaylo hiya ni Jehova. Ngan an Pulong han Dios nag-uunabi kan Moises sugad nga matinumanon gud nga tawo nga angay subaron. (Deut. 34:10; Heb. 11:24-28) Waray tuguti ni Jehova hi Moises nga makasulod ha Tuna nga Iginsaad, pero tutugotan niya hi Moises nga mabuhi ha Paraiso nga tuna ngan tatagan hin paglaom nga mabuhi ha waray kataposan. Mahimo liwat kita magkaada sugad nga paglaom kon padayon nga maniningkamot kita ha pagkultibar han importante gud nga kalidad nga pagpugong ha kalugaringon.​—1 Cor. 9:25.