KITA ngatanan natoo nga ginigiyahan ni Jehova an iya katawohan ngan gintataganahan hira han ira espirituwal nga panginahanglan hinin “kataposan nga mga adlaw.” (2 Tim. 3:1) Pero nadepende ha tagsa ha aton kon masunod kita. Maipapariho ta an aton sitwasyon ha mga Israelita ha kamingawan. Kinahanglan nira sumunod ha mga tunog han trumpeta.

Ginpahimo ni Jehova hi Moises hin duha nga trumpeta nga pinilpig nga silber basi gamiton ha “pagtawag ha komunidad ngan ha pagpahibaro nga mananangtang han mga tolda ngan malarga.” (Num. 10:2) Kinahanglan huypan han mga saserdote an mga trumpeta ha iba-iba nga paagi basi magpahibaro ha katawohan kon ano an iginpapabuhat ha ira. (Num. 10:3-8) Yana, an katawohan han Dios nakakakarawat hin mga giya ha iba-iba nga paagi. Tagda an tulo hini nga mga paagi nga nagpapahinumdom ha aton mahitungod han tunog han mga trumpeta ha kadaan nga panahon. An katawohan han Dios yana gin-iimbitar ha dagku nga mga katirok, an pinili nga mga paramangno nakakakarawat hin mga pagbansay, ngan an tanan nga kongregasyon nakakakarawat hin mga pagbag-o ha teokratiko nga mga kahikayan.

Kon karuyag ni Jehova nga magkatirok “an bug-os nga komunidad” ha entrada ha este nga parte han tabernakulo, huhuypan han mga saserdote an duha nga trumpeta. (Num. 10:3) An tanan nga tribo ha upat nga dibisyon, nga nagkakampo ha palibot han tabernakulo, nakakabati hiton klaro nga tunog. An mga nagkakampo hirani ha entrada posible nga nakakaabot dayon didto ha sulod la hin mga minutos. An iba mas hirayo ngan bangin kinahanglan nira hin mas daku nga panahon ngan pangalimbasog basi makaabot didto. Hirani man hira o hirayo, karuyag ni Jehova nga magkatirok an ngatanan ngan makabati han iya mga instruksyon.

Yana, diri na kita nagkakatirok ha tabernakulo, pero gin-iimbitar kita ngadto ha mga katirok han katawohan han Dios. Kaapi hini an regional nga mga kombensyon ngan iba pa nga espesyal nga katirok, diin nakarawat kita hin importante nga mga instruksyon ngan giya. Ha bug-os nga kalibotan, an katawohan ni Jehova nagpapahimulos hin pariho nga programa. Salit, an mga nakarawat han imbitasyon nga umatender nagigin bahin han usa nga daku ngan malipayon nga grupo. An iba kinahanglan magbiyahe hin mas hirayo. Bisan pa hito, an mga naatender nauyon nga bawi gud an ira mga pangalimbasog.

Kumusta man an mga grupo nga hirayo ha bisan ano nga dagku nga katirok? Tungod han moderno nga teknolohiya, damu ha ira an nakakapahimulos ha pariho nga programa ngan inaabat pa ngani nira nga bahin hira han dagku nga mga katirok. Pananglitan, ha usa nga pagbisita han representante han headquarters, iginkonektar han sanga nga opisina ha Benin an usa nga programa ngadto ha Arlit, Niger, usa nga bungto nga may minahan ha Sahara Desert. Bainte uno nga kabugtoan ngan interesado  an nagkatirok. Bisan kon aadto hira ha hirayo nga lugar, inabat nira nga kaupod hira han 44,131 nga nagkatirok. Usa nga brother an nagsiring: “Damu gud nga salamat ha pagkonektar ha amon hini nga programa. Iginpakita hito utro ha amon nga daku gud an iyo gugma ha amon.”

Kon usa la nga trumpeta an ginhuhuypan han Israelita nga mga saserdote, “an mga lider la, an mga ulo han yinukot,” an kinahanglan kumadto ha tolda nga katirokan. (Num. 10:4) Didto, makarawat hira hin impormasyon ngan pagbansay tikang kan Moises. Makakabulig ito ha ira ha pagtuman han ira mga responsabilidad ha ira mga tribo. Kon usa ka hito nga mga lider, diri mo ba bubuhaton an tanan mo nga mahihimo basi makakadto ngan magpahimulos?

Yana, an mga tigurang ha kongregasyon diri “mga lider”; diri liwat hira nagmamayor-mayor ha panon han Dios nga ira gin-aataman. (1 Ped. 5:1-3) Pero ginhihimo gud nira an ira pinakamaopay basi atamanon an panon. Salit, nagios dayon hira kon gin-iimbitar para ha dugang nga pagbansay, sugad han Kingdom Ministry School. Hini nga pag-eskwela, nahibabaro an mga tigurang nga magin mas epektibo ha pag-asikaso han mga buruhaton ha kongregasyon. Nagriresulta ini ha pagkaada marig-on gud nga espirituwalidad han ngatanan. Bisan kon waray ka makaeskwela ha usa hito nga mga eskwelahan, posible gud nga nagpapahimulos ka kay ginagamit han mga nakaeskwela hito an ira nahibaroan ha pagbulig ha kongregasyon.

Usahay, an Israelita nga mga saserdote nagpapatunog ha trumpeta hin nagbuburobag-o nga tunog. Nagpapahibaro ito nga karuyag ni Jehova nga bumalhin an bug-os nga kampo. (Num. 10:5, 6) Kon ginbabalhin han katawohan an kampo, ginhihimo nira ito ha organisado gud nga paagi, pero daku ito nga buruhaton para ha ngatanan. May mga panahon nga posible nga nag-alang pagbalhin an iba nga Israelita. Kay ano?

Bangin inabat han pipira nga an panawagan nga bumalhin haros pirme na la ngan patigda-tigda gud la. “Usahay an dampog nagpapabilin la tikang ha pagsirom tubtob ha kaaga.” Ha iba nga higayon, “duha . . . ka adlaw, usa ka bulan, o mas maiha pa” an lat-ang han pagbalhin. (Num. 9:21, 22) Ngan pira gud ka beses nagbalhin hin kampo? An Numeros kapitulo 33 nag-uunabi hin mga 40 nga lugar nga ginkampohan han mga Israelita.

Usahay, an mga Israelita nagkakampo ha lokasyon nga may landong. Posible nga makaruruyag gud ito ha “kamingawan nga haluag ngan makaharadlok.” (Deut. 1:19) Salit posible nga masulay hira nga maghunahuna nga an ira pagbalhin magriresulta ha diri maopay nga kahimtang.

Kon magtikang na bumaya an kampo, an iba nga tribo kinahanglan magin mapailubon ha paghulat han ira turno ha pagbaya. An ngatanan nakabati han nagbuburobag-o nga tunog han trumpeta, pero diri hira durungan nga mabaya. Iton nagbuburobag-o nga tunog han trumpeta sinyales nga an mga tribo nga nagkakampo ha este, an Juda, Isacar, ngan Zebulon, kinahanglan bumaya. (Num. 2:3-7; 10:5, 6) Pakalarga nira, an mga saserdote magpapatunog utro hin nagbuburobag-o nga tunog han trumpeta sugad nga sinyales ha dibisyon nga may tulo nga tribo nga nagkakampo ha sur. Padayon nga bubuhaton ito han mga saserdote tubtob nga makalarga an bug-os nga kampo.

Bangin nakukurian ka ha pagkarawat ha pipira nga mga pagbag-o ha organisasyon. Bangin ginhunahuna mo nga sobra kadamu an mga pagbag-o ngan diri mo ito ginlalaoman. O bangin komportable ka na ha partikular nga mga kahikayan ngan ginhingyap mo nga unta waray ito bag-oha. Bangin naobserbaran mo nga makuri an pagpailob samtang nag-a-adjust ka ha mga pagbag-o. Bisan pa hito, kon nangangalimbasog kita nga sumunod kon masabtan naton nga ito an angay buhaton, posible nga makita naton nga ginbibendisyonan kita ni Jehova.

Ha panahon ni Moises, gin-giyahan ni Jehova an minilyon nga kalalakin-an, kababayin-an, ngan kabataan ha kamingawan. Kon waray an iya pag-ataman ngan giya, diri hira mabubuhi. Yana, ginigiyahan kita ni Jehova hinin peligroso nga kataposan nga mga adlaw. Iya kita ginbubuligan nga magin duok ha iya ngan magpabilin nga marig-on an aton pagtoo. Salit, hinaot kita ngatanan magin determinado nga sumunod ha klaro nga tunog han mga trumpeta pariho han matinumanon nga mga Israelita!