1. Kay ano nga an mga surugoon ni Jehova naabat danay nga nag-uusahan la hira?

USAHAY, kadam-an ha aton an nasusubo kay inaabat naton nga nag-uusahan la kita. Ha iba, ito nga pag-abat madagmit la mawara. Ha iba naman, bangin ito mag-iha. Mahimo kita umabat nga nag-uusahan la kita bisan kon napapalibotan kita hin damu nga tawo. An pipira nakukurian nga magkaada kasangkayan ha ira bag-o nga kongregasyon. An iba naman tikang ha pamilya nga duok ha usa kag usa, salit nasusubo hira kon nahibubulag hira ha ira pamilya. An pipira naman namimingaw gud ha pakig-upod ha ira namatay na nga hinigugma. Ngan an iba nga Kristiano, labi na adton bag-o pa la ha kamatuoran, naabat nga nag-uusahan la hira kon ginsasalikway o ginkukontra hira han ira diri Saksi nga mga kapamilya ngan kasangkayan.

2. Ano nga mga pakiana an aton babatunon?

² Maaram hi Jehova han ngatanan mahitungod ha aton ngan naiintindihan kita niya. Maaram hiya kon nasusubo kita tungod han pag-abat nga nag-uusahan la kita, ngan karuyag kita niya buligan nga malamposan ito. Paonan-o kita ginbubuligan ni Jehova? Ano an mahimo naton buhaton basi mabuligan an aton kalugaringon? Ngan paonan-o naton mabubuligan an aton mga kakongregasyon nga naabat nga nag-uusahan la hira? Hisgotan naton an baton hito nga mga pakiana.

3. Paonan-o iginpakita ni Jehova nga interesado gud hiya kan Elias?

³ Karuyag gud ni Jehova nga magin malipayon an ngatanan niya nga magsiringba. Hirani hiya ha kada tagsa ha aton, ngan napapansin niya kon nasusubo gud kita o nanluluya. (Sal. 145:18, 19) Tagda an atensyon nga iginpakita ni Jehova ha iya propeta nga hi  Elias. Inin matinumanon nga lalaki nabuhi ha makuri nga panahon ha kasaysayan han Israel. Gintitimaraot gud an mga magsiringba ni Jehova, ngan labi nga gin-iikaparatay hi Elias han gamhanan nga mga kaaway nga nakontra ha Dios. (1 Hadi 19:1, 2) Naghunahuna liwat hi Elias nga hiya na la an propeta nga nag-aalagad kan Jehova, ngan posible nga mas nakapaluya pa gud ini ha iya. (1 Hadi 19:10) Ginbuligan dayon ni Jehova hi Elias. Nagsugo hiya hin anghel basi pasarigon an iya propeta nga diri hiya nag-uusahan​—damu pa an mga Israelita nga matinumanon nga nag-aalagad ha Dios!​—1 Hadi 19:5, 18.

4. Paonan-o iginpapakita han Marcos 10:29, 30 an gugma ni Jehova ha iya mga surugoon nga diri na nakakakarawat han bulig han ira mga kapamilya o kasangkayan?

⁴ Maaram hi Jehova nga kon ginpipili naton nga mag-alagad ha iya, an pipira ha aton kinahanglan maghimo hin damu nga sakripisyo. An usa nga bangin mawara ha aton amo an bulig han aton diri Saksi nga mga kapamilya ngan kasangkayan. Makausa, bangin tungod han kabaraka, nagpakiana hi apostol Pedro kan Jesus: “Ginbayaan namon an ngatanan nga butang ngan sinunod ha imo; ano man an makakarawat namon?” (Mat. 19:27) Mahigugmaon nga ginpasarig ni Jesus an iya mga disipulo nga magkakaada hira hin daku nga espirituwal nga pamilya. (Basaha an Marcos 10:29, 30.) Ngan nagsasaad hi Jehova, an Ulo han aton espirituwal nga pamilya, nga bubuligan niya adton naruruyag mag-alagad ha iya. (Sal. 9:10) Tagda an pipira nga praktikal nga butang nga imo mahihimo basi makarawat an bulig ni Jehova kon nasusubo ka tungod han pag-abat nga nag-uusahan ka la.

5. Kay ano nga maopay gud an paghunahuna pirme kon paonan-o ka ginbubuligan ni Jehova?

⁵ Hunahunaa pirme kon paonan-o ka ginbubuligan ni Jehova. (Sal. 55:22) Makakabulig ito ha imo nga magkaada pirme timbang nga panhunahuna ha imo sitwasyon. An solo nga sister nga hi Carol, * nga waray kapamilya nga Saksi, nagsiring: “An paghinumdom ngan pagpamalandong kon paonan-o ako ginbuligan ni Jehova ha akon mga problema nakakabulig gud ha akon nga diri umabat nga nag-uusahan la ako. Ngan nagpapasarig ito ha akon nga pirme ako bubuligan ni Jehova.”

6. Paonan-o an 1 Pedro 5:9, 10 makakadasig hadton mga naabat nga nag-uusahan la hira?

 ⁶ Hunahunaa kon paonan-o ginbubuligan ni Jehova an kabugtoan nga naabat nga nag-uusahan la. (Basaha an 1 Pedro 5:9, 10.) Hi Hiroshi, nga usa nga brother nga nag-uusahan la nga Saksi ha iya pamilya ha sulod hin damu na ka tuig, nagsiring: “Ha kongregasyon, makikita naton nga an ngatanan may problema. An paghibaro nga ginhihimo naton ngatanan an aton pinakamaopay ha pag-alagad kan Jehova nakakadasig ha amon nga waray mga kapamilya nga aada ha kamatuoran.”

7. Paonan-o nakakabulig ha imo an pag-ampo?

⁷ Magkaada pirme maopay nga rutina ha espirituwal. Kinahanglan isumat mo kan Jehova kon ano gud an imo inaabat. (1 Ped. 5:7) “Usa han pinakaimportante nga butang nga nakabulig ha akon nga malamposan an akon pag-abat nga nag-uusahan la ako amo an pag-ampo hin sinsero gud kan Jehova,” siring ni Massiel. Han nagdesisyon inin batan-on nga sister nga mag-alagad kan Jehova, inabat niya nga nag-uusahan la hiya kay diri Saksi an iya pamilya. Hi Massiel dugang nga nagsiring, “Usa gud hiya nga Amay ha akon, ngan nag-aampo ako ha iya hin damu ka beses kada adlaw; iginsusumat ko ha iya kon ano gud an akon inaabat.”

8. Paonan-o an pagbasa ngan pagpamalandong han Pulong han Dios nakakabulig ha imo?

⁸ Basaha an Pulong han Dios hin regular, ngan pamalandonga an espisipiko nga mga asoy nga nagpapabug-at han gugma ni Jehova ha imo. Hi Bianca, nga usa nga sister nga kinahanglan mag-ilob ha nakakapanluya nga mga ginsisiring han iya pamilya, nagsaysay: “An pagbasa ngan pagpamalandong han mga asoy han Biblia ngan mga istorya han kinabuhi han mga surugoon ni Jehova nga nakaeksperyensya hin pariho han akon sitwasyon nakakabulig gud ha akon.” An iba nga Kristiano nagmimemorya hin mga teksto nga nakakaliaw gud, sugad han Salmo 27:10 ngan Isaias 41:10. An iba namamati han mga audio rekording han mga publikasyon nga ira gin-aadman para ha mga katirok o han ira pagbasa han Biblia, ngan nagsiring hira nga nakakaiban ito han ira kasubo.

9. Paonan-o ka nagpapahimulos ha pag-atender ha mga katirok?

⁹ Pangalimbasog nga umatender hin regular ha mga katirok. Makakapahimulos ka ha makaparig-on nga programa, ngan makikilala mo liwat an mga kabugtoan. (Heb. 10:24, 25) Hi Massiel, nga gin-unabi kanina, nagsiring: “Bisan kon awdanon gud ako, nagdesisyon ako nga umatender ha tagsa nga katirok han kongregasyon ngan magkomento. Nakabulig ini ha akon nga abaton ko nga parte ako han kongregasyon.”

10. Kay ano nga importante nga makigsangkay kita ha matinumanon nga mga Kristiano?

¹⁰ Pakigsangkay ha matinumanon nga mga Kristiano. Pamiling hin kasangkayan ha kongregasyon nga may mahibabaroan ka tikang ha ira,  bisan hadton diri mo mga kaedad o iba an kultura. An Biblia nagpapahinumdom ha aton nga an kinaadman “aada ha mga lagas.” (Job 12:12) Damu liwat an mahibabaroan han mga edaran ha matinumanon nga mga batan-on. Hi David mas bata gud kan Jonathan, pero waray ito makaulang ha ira nga magin duok nga magsangkay. (1 Sam. 18:1) Hira David ngan Jonathan nagbinuligay ha ira pag-alagad kan Jehova bisan pa ha magkuri nga mga sitwasyon. (1 Sam. 23:16-18) Hi Irina, nga usa nga sister nga nag-uusahan la yana nga Saksi ha iya pamilya, nagsiring: “An aton kabugtoan mahimo gud magin aton espirituwal nga mga kag-anak o mga bugto. Mahimo hira gamiton ni Jehova basi mapun-an an aton panginahanglan.”

11. Ano an kinahanglan mo buhaton basi magkaada duok nga kasangkayan?

¹¹ Bangin diri masayon an pakigsangkay, labi na kon awdanon ka. Hi Ratna, nga usa nga awdanon nga sister nga nahibaro han kamatuoran bisan pa han pagkontra, nagsiring, “Dapat ko akseptaron nga kinahanglan ko an bulig ngan suporta han akon espirituwal nga pamilya.” Usahay makuri an pagsumat ha iba han imo inaabat, pero magigin duok mo nga sangkay an usa kon may abrido kamo nga komunikasyon. Karuyag han imo kasangkayan nga parig-unon ngan buligan ka, pero kinahanglan mag-istorya ka ha ira basi mahibaroan nira kon paonan-o ka mabubuligan.

12. Paonan-o an ministeryo makakabulig ha imo nga magkaada mag-opay nga kasangkayan?

¹² Usa han pinakamaopay nga paagi ha pagkaada kasangkayan amo an pakigbahin ha ministeryo kaupod han mga igkasi-Kristiano. Hi Carol, nga gin-unabi kanina, nagsiring: “Nagkaada ako damu nga mag-opay nga kasangkayan pinaagi ha pakig-upod ha mga sister ha pagministeryo ngan ha iba pa nga teokratiko nga mga buruhaton. Ginbubuligan ako ni Jehova ha sulod na hin damu ka tuig pinaagi hini nga kasangkayan.” Diri gud karag an aton mga pangalimbasog nga makigsangkay ha matinumanon nga mga Kristiano. Ginagamit ni Jehova an sugad nga kasangkayan basi buligan ka kon nasusubo ka gud, pananglitan, kon inaabat mo nga nag-uusahan ka la.​—Prob. 17:17.

13. Ano an responsabilidad han ngatanan ha kongregasyon?

¹³ An ngatanan nga kabugtoan may responsabilidad ha pagbulig nga magin mamurayawon an kongregasyon ngan ha pagpakita hin gugma ha ngatanan basi waray bisan hin-o nga umabat nga nag-uusahan la hiya. (Juan 13:35) Daku gud an mahihimo han aton ginbubuhat ngan ginyayakan! Tagda an siring han usa nga sister: “Han nahibaroan ko an kamatuoran, nagin pamilya ko an kongregasyon. Diri unta ako magigin Saksi ni Jehova kon waray han ira bulig.” Paonan-o mo mabubuligan adton waray kapamilya nga Saksi nga abaton nira nga parte hira han kongregasyon?

14. Ano an mahimo mo buhaton basi magin sangkay an mga bag-o ha kongregasyon?

¹⁴ Pag-una ha pakigsangkay. Mahimo kita magtikang pinaagi ha mahigugmaon nga pag-abiabi ha mga bag-o ha kongregasyon. (Roma 15:7) Pero diri naton karuyag nga basta la mangumusta ha ira. Karuyag naton nga magin duok naton hira nga kasangkayan. Salit magin buotan ngan pagpakita hin sinsero nga interes ha ira. Pangalimbasog nga maintindihan an mga problema nga ira gin-aagian, pero likayi an pagpakiana mahitungod ha pribado nga mga butang. An iba bangin nakukurian ha pagpahayag han ira inaabat, salit paghirot nga diri hira piriton nga mag-istorya. Lugod, may pagkabuotan nga aghata hira nga mag-istorya pinaagi ha paggamit hin mataktika nga mga pakiana ngan pamati hin mapailubon ha ira mga baton. Pananglitan, mahimo ka magpakiana kon paonan-o nira nahibaroan an kamatuoran.

15. Paonan-o an hamtong nga mga Kristiano makakabulig ha iba ha kongregasyon?

 ¹⁵ An ngatanan ha kongregasyon mag-uuswag ha espirituwal kon nagpapakita ha ira hin interes an hamtong nga mga Kristiano, labi na an mga tigurang. Hi Melissa, nga ginpadaku ha kamatuoran han iya nanay, nagsiring: “Mapasalamaton gud ako ha mga brother nga nagin sugad hin mga tatay ko, nga naghahatag hin panahon ngan nagpapakita hin personal nga interes ha akon ha sulod hin damu na ka tuig. Kon kinahanglan ko hin kaistorya, may-ada mamamati ha akon.” Hi Mauricio, nga usa nga batan-on nga brother nga umabat nga ginbayaan hiya han waray na mag-alagad kan Jehova an nag-Bible study ha iya, nagsiring: “Daku gud an naibulig han personal nga interes ha akon han mga tigurang. Pirme hira nakikiistorya ha akon. Ira ako gin-uupdan ha pagministeryo, ginsusumatan nira ako ha ira nahibaroan ha ira personal nga pag-aram han Biblia, ngan nakikig-uyag pa ngani hira ha akon.” Hira Melissa ngan Mauricio bug-os-panahon nga nag-aalagad na kan Jehova.

16-17. Ha ano nga praktikal nga mga paagi mabubuligan naton an iba?

¹⁶ Bumulig ha praktikal nga mga paagi. (Gal. 6:10) “Kaurogan na nga an imo la kinahanglan amo an pakitaan ka hin simple nga buhat han pagkabuotan ha husto nga panahon,” siring ni Leo, nga usa nga misyonero ha lugar nga hirayo ha iya pamilya. “Usa ka adlaw naaksidente ako ha awto. Pag-abot ko ha balay, istres gud ako. Pero may mag-asawa nga nag-imbitar ha akon para hin simple nga pangaon. Diri ko na nahinunumdoman an amon ginkaon, pero nahinunumdoman ko nga may pagkabuotan nga namati hira ha akon. Tungod hito, nag-opay gud an akon pag-abat!”

¹⁷ Kita ngatanan nalilipay ha teokratiko nga mga katirok, sugad han mga asembleya ngan kombensyon, kay nakakaupod naton an kabugtoan ngan nagkakairistorya kita parte ha programa. Pero hi Carol, nga gin-unabi kanina, nagsiring, “Labi nga naabat ako hin duro nga kasubo kon asembleya ngan kombensyon.” Kay ano? “Bisan kon napapalibotan ako hin ginatos o yinukot pa ngani nga kabugtoan,” siring niya, “kaurogan na nga kaupod nira an ira pamilya. Kon nakikita ko hira, inaabat ko gud nga nag-uusahan la ako.” An iba nakukurian pag-atender ha kombensyon o ha asembleya ha siyahan nga higayon tikang han namatay an ira asawa. May kakilala ka ba nga sugad hito an naieksperyensyahan? Puydi mo ba hiya imbitaron nga umupod  ha imo pamilya ha sunod nga asembleya o kombensyon?

18. Paonan-o naton maiaaplikar an 2 Corinto 6:11-13 kon nag-aabiabi kita?

¹⁸ Pakig-upod ha iba. Pangalimbasog nga makig-upod ha iba-iba nga kabugtoan, labi na hadton bangin naabat nga nag-uusahan la hira. Karuyag naton ‘abrihan hin haluag an [aton] kasingkasing,’ labi na ha mga sugad ha ira. (Basaha an 2 Corinto 6:11-13.) “Pirme gud kami nalilipay kon gin-iimbitar kami han kabugtoan nga bumisita ha ira ngan ha ira pamilya o umupod ha ira ha pagbakasyon,” siring ni Melissa, nga gin-unabi kanina. May-ada ka ba kakongregasyon nga mahimo mo abiabihon?

19. Ha ano nga mga sitwasyon labi nga makakabulig ha aton mga igkasi-Kristiano kon makikig-upod kita ha ira?

¹⁹ Bangin may mga panahon nga labi nga apresyaron han aton mga igkasi-Kristiano kon makikig-upod kita ha ira. An iba bangin nakukurian kon kaupod nira an ira mga kapamilya nga diri Saksi ha panahon han mga selebrasyon nga diri Kasuratanhon. An iba naman bangin nasusubo gud ha partikular nga mga petsa, sugad han anibersaryo han kamatayon han usa nira nga hinigugma. Kon naggagahin kita hin panahon nga makaupod an kabugtoan nga nakakaeksperyensya hin sugad hito, iginpapakita naton nga ‘tinuod nga nanginginano’ kita ha ira.​—Fil. 2:20.

20. Paonan-o makakabulig ha aton an ginsiring ni Jesus ha Mateo 12:48-50 kon inaabat naton nga nag-uusahan la kita?

²⁰ Damu an rason kon kay ano nga naabat danay an usa nga Kristiano nga nag-uusahan la hiya. Pero kinahanglan diri naton hingalimtan nga nakikita gud ito ni Jehova. Iginhahatag niya an aton kinahanglan, kaurogan na pinaagi han aton mga kabugtoan. (Basaha an Mateo 12:48-50.) Iginpapakita naman naton kan Jehova an aton apresasyon ha iya mahigugmaon nga kahikayan kon ginbubuhat naton an aton pinakamaopay ha pagsuporta han aton espirituwal nga pamilya. Anoman an aton abaton ha panapanahon, diri gud kita nag-uusahan kay pirme naton kaupod hi Jehova!