Natawo ako han Mayo 19, 1940, ha bungto han Amioûn, Lebanon. Paglabay hin pipira ka tuig, binalhin an amon pamilya ha syudad han Tripoli, diin nagdaku ako ha usa nga mahigugmaon ngan malipayon nga pamilya nga nakilala ngan nahigugma kan Jehova nga Dios. Ako an putó ha lima nga magburugto​—tulo nga babaye ngan duha nga lalaki. Para ha akon mga kag-anak, ikaduha la an pagpakabuhi. An amon kinabuhi nakapokus ha pag-aram ha Biblia, pagtambong ha Kristiano nga mga katirok, ngan pagbulig ha iba nga makilala an Dios.

May mga dinihogan nga Kristiano ha amon kongregasyon. An usa ha ira hi Michel Aboud, nga amo an nagdudumara ha gintatawag hadto nga Pag-aram ha Libro han Kongregasyon. Nahibaro hiya han kamatuoran ha New York ngan nagtikang pagsangyaw ha Lebanon han 1921. Diri ko gud nahingangalimtan an iya daku nga respeto ngan bulig ha duha nga batan-on nga naggradwar ha Gilead School​—hira Anne ngan Gwen Beavor. Nagin mga sangkay namon hira. Paglabay hin damu ka tuig, nalipay ako han nagkita kami ni Anne ha United States. Katapos, nagkita liwat kami ni Gwen nga may asawa na, hi Wilfred Gooch, ngan nag-aalagad hira ha Bethel ha London, England.

Diri damu an Saksi ha Lebanon han bata pa ako. Pero madasigon nga iginsangyaw namon an amon mga nahibabaroan ha Biblia bisan pa han pagkontra han pipira nga mga lider han relihiyon. Diri ko gud nahingangalimtan an pipira nga nahitabo ha amon.

Usa ka adlaw, nagsasangyaw kami ni Ate Sana ha usa nga apartment nga bilding. Tapos, may padi nga kinadto ha andana nga amon ginsasangyawan. Sigurado nga may nagpakadto ha iya. Gin-insulto han padi hi Ate. Nagin bayolente hiya ngan iginduso niya hi Ate ha hagdan, salit nagkaada hiya mga bun-og. May tumawag hin pulis, ngan inabot hira ngan ginsiguro nira nga mabuligan hi Ate. Gindara nira an padi ha estasyon han pulis, ngan nadiskobrehan nira nga may-ada hiya pusil. Ginpakianhan hiya han hepe: “Ano ka gud ba? Lider hin relihiyon o lider hin gang?”

Usa pa nga panhitabo nga nahinunumdoman ko, han an amon kongregasyon nagplete hin bus basi magsangyaw kami ha usa nga bungto nga hirayo ha syudad. Malipayon gud kami, pero an padi hito nga lugar nahibaro han amon ginbubuhat, ngan nagtirok hiya hin mga tawo. Ginsamok nira kami, ginbato pa ngani, ngan nasamaran hi Tatay. Nahinunumdoman ko pa nga dugoon an iya nawong. Binalik hiya ha bus upod hi Nanay, ngan nababaraka ako nga sinunod ha ira pati an iba pa nga kabugtoan. Pero diri ko gud hingangalimtan nga samtang ginlilimpyohan ni Nanay an samad ni Tatay, hiya nagsiring: “Jehova, alayon pasayloa hira. Diri hira maaram han ira ginbubuhat.”

An usa pa nga panhitabo, han binisita kami ha amon mga paryente ha amon bungto nga natawhan. Ha balay ni Lolo, nakadto an usa nga prominente nga lider han relihiyon, an obispo. Maaram ito nga obispo nga an akon mga kag-anak mga Saksi ni Jehova. Karuyag niya nga insultuhon ako bisan kon hito nga panahon sais anyos pa la ako. “Ikaw,” siring niya, “kay ano nga diri ka pa nagpapabawtismo?” Nagsiring ako nga bata pa ako, ngan basi mabawtismohan kinahanglan ko mag-aram hin dugang pa mahitungod ha Biblia ngan magin marig-on an akon pagtoo. Waray niya maruyagi an akon baton, salit ginsidngan niya hi Lolo nga waray ako respeto.

Pero gutiay la an sugad hito nga magraot namon nga eksperyensya. Ha kabug-osan, an mga taga-Lebanon mga makisangkayon ngan maabiabihon. Salit, damu an amon nakakaistorya mahitungod ha Biblia ngan damu ha ira an nagpapa-Bible study.

Han naeskwela pa ako, may batan-on nga brother nga taga-Venezuela nga binisita ha Lebanon. Nagtinambong hiya ha amon kongregasyon ngan nagin mag-uyab hira ni Ate Wafa. Ha urhi, nagpakasal hira ngan nag-ukoy ha Venezuela. Ha mga surat ni Ate Wafa, ginkinombinse niya hi Tatay nga bumalhin an amon bug-os nga pamilya ngadto ha Venezuela kay namimingaw gud hiya amon. Ha urhi, nakombinse niya kami nga bumalhin!

 Inabot kami ha Venezuela han 1953 ngan nag-ukoy kami ha Caracas, hirani ha palasyo han presidente. Sugad nga bata, eksayted gud ako nga makita an presidente kon nalabay samtang sakay han iya marahalon nga awto. Pero nakurian an akon mga kag-anak nga mag-adjust ha bag-o nga nasud, linggwahe, kultura, pagkaon, ngan klima. Ngani han nagtitikang pa la hira maka-adjust, may makasurubo gud nga nahitabo.

Nagkasakit hi Tatay. Nakalasan gud kami hini kay makusog hiya ngan mahimsog. Waray ngani kami nahinunumdoman nga nagkasakit hiya hadto. Katapos, nadayagnos hiya nga may kanser ha pancreas, ngan gin-operahan hiya. Makasurubo, paglabay hin usa ka semana namatay hiya.

Diri gud namon maisaysay an kasubo nga amon inabat. Hito nga panahon 13 anyos pa la ako. Waray gud namon mahunahuna nga mamamatay hi Tatay, ngan inabat namon nga diri na kami magigin malipayon. Ha sulod hin mga panahon, nakurian hi Nanay ha pagkarawat nga waray na hi Tatay. Kondi nasantop namon nga kinahanglan kami magpadayon. Ngan ha bulig ni Jehova, nakaya namon iton makasurubo nga kahimtang. Han naggradwar ako ha hayskul ha Caracas han 16 anyos ako, karuyag ko gud makabulig ha akon pamilya.

Hito nga panahon, nagpakasal hi Ate Sana kan Rubén Araujo, nga naggradwar ha Gilead School ngan binalik ha Venezuela. Katapos, binalhin hira ha New York. Han an akon pamilya nagdesisyon nga umiskwela ako ha kolehiyo, didto ako umiskwela ha New York ngan nag-ukoy kanda Ate Sana. Han nakadto ako ha ira, daku gud an ira naibulig nga mag-asawa basi mag-uswag ako ha espirituwal. Damu liwat an hamtong nga kabugtoan ha Brooklyn Spanish nga amon kongregasyon. Ngan nalipay gud ako nga nakilala ko an duha ha ira, hira Milton Henschel ngan Frederick Franz; pariho hira nag-aalagad ha Brooklyn Bethel.

Han hirani na matapos an siyahan nga tuig han akon pag-eskwela ha kolehiyo ha New York, nagtikang ako manhunahuna mahitungod han akon ginbubuhat ha akon kinabuhi. Nagbasa ako hin mga artikulo ha Barantayan mahitungod han mga Kristiano nga may-ada mga tumong ha pag-alagad kan Jehova, ngan ginpamurubuot ko gud ito hin maopay. Nakita ko nga malipayon gud an mga payunir ngan an mga Bethelite ha amon kongregasyon, ngan karuyag ko nga magin pariho ha ira. Pero hito nga panahon diri pa ako bawtismado. Maaram ako nga kinahanglan ko idedikar an akon kinabuhi kan Jehova. Ngan ito an akon ginbuhat. Katapos, nagpabawtismo ako han Marso 30, 1957.

Han nabawtismohan na ako, naghunahuna ako hin usa pa nga tumong nga karuyag ko makab-ot​—an pagpayunir. Karuyag ko gud ito, pero naghunahuna ako nga makukurian ako hito. Paonan-o ko madudungan an akon pagpayunir ngan an akon pag-eskwela? Damu ka beses nga nagsuratay kami han akon pamilya. Iginsaysay ko ha ira an akon desisyon nga diri na ako maeskwela, mauli ako ha Venezuela, ngan magpapayunir.

Inuli ako ha Caracas han Hunyo 1957. Pero nakita ko nga diri maopay an kahimtang han akon pamilya. Kinahanglan nira hin bulig ha pinansyal.  Paonan-o ako makakabulig? Gintanyagan ako hin trabaho ha usa nga bangko, pero karuyag ko gud magpayunir. Ngani, ito an rason nga inuli ako. Determinado ako nga buhaton ito nga duha. Ha sulod hin pipira ka tuig, nagtrabaho ako ha bangko hin full-time, pero payunir liwat ako. Sobra gud ako ka-busy pero malipayon gud liwat ako!

Nagin mas malipayon pa gud ako han nakilala ko hi Sylvia ngan nagpakasal kami. Mahusay hiya nga German nga sister ngan nahigugma gud kan Jehova. An ira pamilya binalhin ha Venezuela. Ha urhi, nagkaada kami duha nga anak, hi Michel (Mike), ngan hi Samira. Ako liwat an nag-ataman kan Nanay. Linungon hiya ha amon. Bisan kon kinahanglan ko umundang ha pagpayunir tungod ha akon mga obligasyon ha akon pamilya, nagpabilin ako nga madasigon ha pagsangyaw. Kon bakasyon, nag-o-auxiliary payunir kami ni Sylvia.

Naeskwela pa an akon mga anak han naeksperyensyahan ko an gin-unabi ha tinikangan hini nga artikulo. Aminado ako nga komportable gud an akon kinabuhi ngan daku an respeto ha akon han akon mga katrabaho ha bangko. Pero karuyag ko gud nga hunahunaon ako han mga tawo sugad nga surugoon ni Jehova. Waray ko makalimti an akon ginhinunahuna hito nga adlaw. Salit gin-istoryahan namon nga mag-asawa an amon kahimtang ha pinansyal. Kon magri-resign ako ha akon trabaho ha bangko, makakakarawat ako hin daku nga kwarta. Tungod kay waray man kami utang, nahunahuna namon nga kon papasimplihon namon an amon kinabuhi may-ada kami igo nga kwarta nga makakasuporta han amon mga panginahanglan.

Diri masayon an pagbuhat hito, pero ginsuportaran gud ako han akon hinigugma nga asawa ngan ni Nanay. Salit makakagpayunir utro ako. Nalipay gud ako hito! Plantsado na an ngatanan. Pero waray pag-iha, may nahibaroan kami nga balita nga diri gud namon ginlalaoman.

Usa ka adlaw, ginkompirma han amon doktor nga burod hi Sylvia. Waray gud namon ito laumi! Nalipay gud kami hito; pero, nahunahuna ko an akon desisyon​—an pagpayunir. Makakagpayunir pa daw la ako? Ginkondisyon dayon namon an amon hunahuna ngan emosyon, ngan eksayted na gud kami nga makita an bag-o nga membro han amon pamilya. Pero ano an mahitatabo ha akon nakaplastar na hin maopay nga mga plano?

Katapos namon pag-istoryahan an amon mga tumong, nagdesisyon kami nga ipadayon  an amon siyahan nga plano​—an akon pagpayunir. Natawo an amon anak nga hi Gabriel han Abril 1985. Bisan pa hito, nag-resign ako ha bangko ngan nagregular payunir utro han Hunyo 1985. Ha urhi, nakapribilehiyo ako nga magin membro han Komite han Sanga. Pero waray ha Caracas an sanga nga opisina, salit kinahanglan ko pa magbiyahe hin duha o tulo ka adlaw kada semana, nga may kahirayoon nga mga 80 ka kilometro.

An sanga nga opisina nahimumutang ha bungto han La Victoria, salit nagdesisyon kami nga bumalhin ngadto basi magin hirani kami ha Bethel. Daku gud ito nga pagbag-o para ha amon. Bilib gud ako ha akon pamilya ngan nagpapasalamat gud ako ha ira. Daku nga bulig ha akon an ira disposisyon. Hi Ate Baha an nag-aataman na kan Nanay. Hi Mike may asawa na, pero hira Samira ngan Gabriel kaupod la gihapon namon ha balay. Salit han binalhin kami ha La Victoria, nahirayo hira ha ira kasangkayan ha Caracas. An akon liwat hinigugma nga hi Sylvia kinahanglan mag-adjust ha gutiay nga bungto tungod kay tikang kami ha matawo nga kapital nga syudad. Ngan kami ngatanan kinahanglan mag-adjust pag-ukoy ha mas gutiay nga balay. Oo, damu nga sakripisyo an amon ginhimo basi makabalhin kami tikang ha Caracas ngadto ha La Victoria.

Kondi, nagbag-o na liwat an amon kahimtang. Nag-asawa hi Gabriel, ngan hi Samira naglugaring na. Katapos, kami ni Sylvia gin-imbitar nga mag-alagad ha Bethel han 2007, usa nga pribilehiyo nga napapahimulosan namon tubtob yana. Hi Mike, an amon suhag nga anak, usa na nga tigurang ngan payunir pati an iya asawa nga hi Monica. Hi Gabriel usa liwat nga tigurang, ngan nag-aalagad hiya ha Italy kaupod an iya asawa nga hi Ambra. Hi Samira, labot la nga payunir hiya, remote volunteer liwat hiya ha Bethel.

Oo, damu nga dagku nga desisyon an akon ginhimo. Pero waray gud ako ginbabasolan. Ito la gihap an akon hihimoon nga mga desisyon. Gin-aapresyar ko gud an damu nga espirituwal nga toka ngan pribilehiyo nga akon nakarawat ha pag-alagad kan Jehova. Ha sulod hin mga tuig, nakita ko nga importante gud an pagpabilin nga duok kan Jehova. Guti man o daku nga desisyon an kinahanglan naton himoon, makakahatag hiya ha aton han kamurayawan “nga labaw ha ngatanan nga pagsabot.” (Fil. 4:6, 7) Malipayon kami ni Sylvia ha amon sagrado nga pag-alagad ha Bethel ngan inaabat namon nga ginbendisyonan ni Jehova an amon mga desisyon tungod kay gin-una namon pirme hiya ha amon kinabuhi.