1. Sugad han nakarekord ha Eclesiastes 7:20, ano nga kamatuoran an iginpahayag ni Hadi Solomon?

 HI Hadi Solomon nagsurat: “Waray matadong nga tawo ha tuna nga pirme nagbubuhat hin maopay ngan diri gud nakakasala.” (Ecles. 7:20) Tinuod gud ito! Kita ngatanan makasasala. (1 Juan 1:8) Salit kinahanglan naton ngatanan an pagpasaylo han Dios ngan han aton mga igkasi-tawo.

2. Ano an imo inabat han ginpasaylo ka hin duok nga sangkay?

² Sigurado nga may nahinunumdoman ka nga panahon nga nakasakit ka hin duok nga sangkay. Karuyag mo nga maibalik an iyo pagkamagsangkay, salit sinsero ka nga nangaro hin pasaylo. Ano an imo inabat han bug-os ka nga ginpasaylo han imo sangkay? Nakaginhawa ka ba? Oo, ngan nagin malipayon liwat!

3. Ano an aton hihisgotan hini nga artikulo?

³ Karuyag naton nga magin pinakaduok nga Sangkay hi Jehova, pero usahay may mayayakan kita o mabubuhat nga makakapasakit ha iya. Pero kay ano nga makakasiguro kita nga karuyag gud kita pasayloon ni Jehova? Ha ano nga paagi naiiba gud an pagpasaylo ni Jehova ha aton pagpasaylo? Ngan hin-o an ginpapasaylo han Dios?

4. Kay ano nga makakasiguro kita nga hi Jehova andam magpasaylo?

⁴ An Pulong han Dios nagpapasarig ha aton nga hi Jehova andam magpasaylo. Han iginhulagway ni Jehova an iya kalugaringon kan Moises ha Bukid Sinai, nagsiring hiya pinaagi hin anghel: “Hi Jehova, hi Jehova, usa nga Dios nga maloloy-on ngan mapinairon, diri madagmit masina ngan hura hin maunungon nga gugma ngan kamatuoran, nagpapakita hin maunungon  nga gugma ha yinukot, nagpapasaylo han sayop ngan pagtalapas ngan sala.” (Ex. 34:6, 7) Hi Jehova buotan ngan maloloy-on nga Dios nga andam pirme magpasaylo ha mga nakasala nga nagbabasol.—Neh. 9:17; Sal. 86:15.

5. Sumala ha Salmo 103:13, 14, ano an ginbubuhat ni Jehova tungod kay kilala gud niya an mga tawo?

⁵ Sugad nga aton Maglalarang, maaram hi Jehova han ngatanan mahitungod ha aton. Hunahunaa la! Maaram hiya han tagsa nga detalye mahitungod han tagsa nga tawo dinhi ha tuna. (Sal. 139:15-17) Salit nakikita niya an ngatanan nga kaluyahan nga napanunod naton ha aton mga kag-anak. Maaram pa ngani hiya han ngatanan naton nga eksperyensya nga nagkaada epekto ha aton personalidad. Ano an ginbubuhat ni Jehova tungod kay kilala gud kita niya? Nagpapakita hiya hin kalooy ha aton.—Sal. 78:39; basaha an Salmo 103:13, 14.

6. Paonan-o ginpamatud-an ni Jehova nga karuyag gud niya magpasaylo?

⁶ Ginpamatud-an ni Jehova nga karuyag gud niya magpasaylo. Nasasabtan niya nga tungod han ginbuhat han siyahan nga tawo nga hi Adan, kita ngatanan nakapanunod han sumpa nga sala ngan kamatayon. (Roma 5:12) Waray kita mahihimo nga paagi nga matalwas an aton kalugaringon o an iba tikang hito nga sumpa. (Sal. 49:7-9) Pero an aton mahigugmaon nga Dios nagpakita hin pagpaid ngan may ginhimo hiya basi makatalwas kita. Ano an iya ginbuhat? Sugad han iginpapakita han Juan 3:16, iginpadara ni Jehova an iya bugtong nga Anak basi mamatay para ha aton. (Mat. 20:28; Roma 5:19) Hi Jesus an sinaliwan ha aton—ha pag-antos han sirot nga kamatayon—basi talwason an bisan hin-o nga nagpapakita hin pagtoo ha iya. (Heb. 2:9) Nasakitan gud hi Jehova ha pakakita ha iya hinigugma nga Anak nga mamatay ha masakit ngan makaarawod nga paagi! Sigurado nga diri tutugotan ni Jehova nga mamatay an iya Anak kon diri Niya karuyag nga pasayloon kita.

7. Ano an pipira nga ehemplo ha Biblia han mga indibiduwal nga hura nga ginpasaylo ni Jehova?

⁷ Damu an mga ehemplo ha Biblia han mga indibiduwal nga hura nga ginpasaylo ni Jehova. (Efe. 4:32) Hin-o an imo nahuhunahuna? Bangin nahuhunahuna mo hi Hadi Manases. Iton maraot nga tawo nakasala kan Jehova ha makangingirhat nga mga paagi. Nanguna hiya  ha buwa nga pagsingba. Ginpamatay niya an iya mismo mga anak ngan iginhalad hira ha pagano nga mga dios. Nagbutang pa ngani hiya hin inukit nga imahen han buwa nga dios ha sagrado nga templo ni Jehova. An Biblia nasiring mahitungod ha iya: “Damu an iya ginbuhat nga maraot ha pagkita ni Jehova, basi pasinahon hiya.” (2 Cron. 33:2-7) Pero han sinsero nga nagbasol hi Manases, hura nga ginpasaylo hiya ni Jehova. Ginbalik pa ngani hiya han Dios ha iya posisyon sugad nga hadi. (2 Cron. 33:12, 13) Bangin mahunahuna mo liwat hi Hadi David, nga nakahimo hin seryoso nga mga sala kan Jehova, upod na an pag-adulteryo ngan pagpatay. Pero han sinsero nga nagbasol hi David ngan gin-amin an iya sala, ginpasaylo liwat hiya ni Jehova. (2 Sam. 12:9, 10, 13, 14) Oo, makakasiguro kita nga hi Jehova karuyag gud magpasaylo. Ngan sugad han aton mahibabaroan, an iya pagpasaylo naiiba gud ha pagpasaylo han mga tawo.

8. Paonan-o an waray kapariho nga posisyon ni Jehova sugad nga Hukom nakakaapekto han iya abilidad ha pagpasaylo?

⁸ Hi Jehova “an Hukom han bug-os nga tuna.” (Gen. 18:25) An maopay nga hukom kinahanglan may-ada hilarom nga pagsabot han balaud. Sigurado nga sugad hito hi Jehova kay labot la nga hiya an aton Hukom, hiya liwat an aton Parahatag hin balaud. (Isa. 33:22) Waray bisan hin-o labot kan Jehova an may sugad kahilarom nga pagsabot han tama ngan sayop. Ano pa an kinahanglan ha maopay nga hukom? Kinahanglan maaram hiya han ngatanan nga impormasyon ha usa nga kaso antes hiya magdesisyon. May kalabotan hini, waray kapariho an pagin kwalipikado ni Jehova sugad nga Hukom.

9. Ano nga impormasyon an may-ada hi Jehova kon nagdidesisyon hiya kon magpapasaylo ba o diri?

⁹ Diri pariho han mga hukom nga tawo, hi Jehova maaram pirme han ngatanan nga impormasyon han bisan ano nga kaso nga iginpipresenta ha iya. (Gen. 18:20, 21; Sal. 90:8) Diri hiya nakadepende ha nakikita o nababatian han mga tawo. Bug-os niya nga nasasabtan nga an ginbubuhat han usa nga tawo impluwensyado han mga kalidad ngan batasan nga iya napanunod ha iya mga kag-anak, han edukasyon nga iya nakarawat, han lugar diin hiya naukoy, ngan han kahimtang han iya emosyon ngan hunahuna. Nababasa liwat ni Jehova an kasingkasing. Naiintindihan gud niya an mga motibo, intensyon, ngan hingyap han tagsa nga tawo. Waray maitatago kan Jehova. (Heb. 4:13) Salit an pagpasaylo ni Jehova pirme iginbabase ha iya bug-os nga kahibaro ha usa nga sitwasyon.

10. Kay ano nga makakasiring kita nga an mga paghukom ni Jehova pirme matadong ngan patas? (Deuteronomio 32:4)

¹⁰ An mga paghukom ni Jehova pirme matadong ngan patas. Waray gud hiya pinaurog. An iya pagpasaylo diri nakadepende ha hitsura, karikohan, pagin prominente, o mga abilidad han usa nga tawo. (1 Sam. 16:7; San. 2:1-4) Waray makakapresyur o makakahukip kan Jehova. (2 Cron. 19:7) An iya mga desisyon diri gud apektado han kaaringit o pagin sentimental. (Ex. 34:7) Waray ruhaduha, hi Jehova an pinakamaopay nga Hukom kay nasasabtan niya an ngatanan mahitungod ha aton ngan han aton sitwasyon.—Basaha an Deuteronomio 32:4.

11. Ha ano nga paagi waray kapariho an pagpasaylo ni Jehova?

¹¹ Ginkilala han mga parasurat han Hebreo nga Kasuratan nga naiiba gud an pagpasaylo ni Jehova. Ha pipira nga kahimtang, naggamit  hira hin Hebreo nga pulong nga sumala ha usa nga reperensya, “ginagamit la basi ihulagway an paagi han pagpasaylo han Dios ha mga makasasala, ngan diri gud ginagamit basi ihulagway an limitado nga paagi han pagpasaylo han usa nga tawo ha iba.” Hi Jehova la an may gahum nga bug-os nga pasayloon an usa nga nakasala nga nagbabasol. Ano an resulta kon nagpapasaylo ha aton hi Jehova?

12-13. (a) Ano an napapahimulsan han usa kon ginpasaylo na hiya ni Jehova? (b) Tubtob san-o nagpapadayon an kapulsanan han pagpasaylo ni Jehova?

¹² Kon ginkakarawat naton nga ginpasaylo na kita ni Jehova, nagpapahimulos kita hin “mga panahon han pagrepresko,” upod na an murayaw nga hunahuna ngan limpyo nga konsensya. Ito nga pagpasaylo diri puydi magtikang ha tawo kondi kinahanglan magtikang “kan Jehova mismo.” (Buh. 3:19) Kon nagpapasaylo ha aton hi Jehova, bug-os niya nga iginbabalik an iya pakigsangkay ha aton nga sugad hin waray gud kita makasala.

¹³ Kon ginpasaylo na kita ni Jehova, diri na gud niya kita aakusaran o sisirotan utro tungod hito nga sala. (Isa. 43:25; Jer. 31:34) Iginbubulag ni Jehova an aton mga sala pariho han “kahirayo han ginsisirangan han adlaw ha gintutunoran hito.” b (Sal. 103:12) Kon ginhuhunahuna naton kon ano kadaku an pagpasaylo ni Jehova, naabat kita hin duro nga pagpasalamat ngan matinalahuron nga kahadlok. (Sal. 130:4) Pero hin-o an papasayloon ni Jehova?

14. Ano an nahibaroan naton mahitungod ha desisyon ni Jehova ha pagpasaylo?

¹⁴ Nahibaroan naton nga an desisyon ni Jehova ha pagpasaylo diri iginbabase ha kadaku o kaguti han sala. Nahibaroan liwat naton nga gin-gagamit ni Jehova an iya kahibaro sugad nga aton Maglalarang, Parahatag hin balaud, ngan Hukom ha pagdesisyon kon magpapasaylo ba hiya. Ano nga mga butang an ginkukonsiderar ni Jehova?

15. Sumala ha Lucas 12:47, 48, ano an usa nga butang nga ginkukonsiderar ni Jehova?

¹⁵ Usa nga butang nga ginkukonsiderar ni Jehova amo an kon maaram ba an nakasala nga sayop an iya ginbubuhat. Ginklaro ini ni Jesus, sugad han nakarekord ha Lucas 12: 47, 48. (Basaha.) An usa nga tawo nga tinuyo nga nagpaplano nga magbuhat hin maraot ngan maaram gud nga an iya ginbubuhat diri nakakapalipay kan Jehova nakakahimo hin seryoso nga sala. An sugad nga tawo naninelikado nga diri mapasaylo. (Mar. 3:29; Juan 9:41) Pero kinahanglan aminon naton nga usahay maaram kita nga sayop an aton ginbuhat. May paglaom pa ba kita nga mapasaylo? Oo! Kay may usa pa nga ginkukonsiderar hi Jehova.

16. Ano an pagbasol, ngan kay ano nga importante ito kon karuyag naton nga pasayloon kita ni Jehova?

¹⁶ Usa pa nga ginkukonsiderar ni Jehova amo an kon sinsero ba nga nagbabasol an nakasala. Ano an karuyag sidngon han pagbasol? An pagbasol nangangahulogan hin “pagbag-o han hunahuna, disposisyon, o katuyoan han usa.” Nag-uupod ito han ideya nga an usa nga tawo nakukonsensya ngan nasusubo gud ha magraot nga butang nga iya ginhimo o tungod kay waray niya buhata an tama nga mga butang nga angay unta niya buhaton. An tawo nga nagbabasol nasusubo gud diri la tungod han mga sayop nga iya nahimo kondi tungod liwat han maluya nga espirituwalidad nga nagresulta hito nga mga sayop. Hinumdumi nga an mga hadi nga hira Manases ngan David pariho nakabuhat hin seryoso nga mga sala; pero ginpasaylo hira ni Jehova kay sinsero hira nga nagbasol. (1 Hadi 14:8) Oo, papasayloon la kita ni Jehova kon may nakikita hiya nga ebidensya nga nagbabasol kita. Pero diri igo nga masubo kita mahitungod han mga sala nga aton nahimo. Kinahanglan andam kita nga gumios. c Ngan usa pa ini nga ginkukonsiderar ni Jehova.

17. Ano an kakombirte, ngan kay ano importante ito basi malikyan naton nga mautro an aton mga sala hadto? (Isaias 55:7)

¹⁷ An kakombirte usa pa nga importante nga butang nga ginkukonsiderar ni Jehova. An kakombirte nangangahulogan nga an usa nga tawo “nagbabag-o” pinaagi ha pagbaya ha iya maraot nga pagkinabuhi ngan pagsunod ha mga suruklan ni Jehova. (Basaha an Isaias 55:7.) An indibiduwal kinahanglan magbag-o han iya panhunahuna basi magiyahan hiya han  panhunahuna ni Jehova. (Roma 12:2; Efe. 4:23) Kinahanglan magin determinado hiya nga isalikway an iya daan nga panhunahuna ngan mga buhat. (Col. 3:7-10) Syempre, an aton pagtoo ha halad han Kristo amo an tinuod nga basihan basi pasayloon kita ni Jehova ngan limpyohan kita tikang ha sala. Papasayloon kita ni Jehova basado hito nga halad kon nakikita niya nga sinsero kita nga naniningkamot nga bag-uhon an aton panggawi.—1 Juan 1:7.

18. Ano na an aton nahisgotan mahitungod ha pagpasaylo ni Jehova?

¹⁸ Repasuhon ta kadali an pipira nga importante nga punto nga aton na nahisgotan. Hi Jehova gud an pinakamaopay magpasaylo ha uniberso. Kay ano nga makakasiring kita hito? Siyahan, andam hiya pirme magpasaylo. Ikaduha, bug-os kita niya nga kilala. Maaram gud hiya han pagkahimo ha aton, ngan hiya an pinakamaaram kon tinuod kita nga nagbabasol. Ngan ikatulo, kon nagpapasaylo hi Jehova, ginpapara niya an sala. Nabulig ini ha aton nga magkaada limpyo nga konsensya ngan makarawat an iya pag-uyon.

19. Bisan kon diri kita perpekto ngan makakasala la gihapon, kay ano nga mahimo kita magin malipayon?

¹⁹ Syempre, samtang diri pa kita perpekto, makakasala la gihapon kita. Pero maliliaw kita ha ginsiring han Insight on the Scriptures, Volume 2, pahina 771: “Maloloy-on hi Jehova ngan maaram hiya nga may kaluyahan an iya mga surugoon. Salit diri nira kinahanglan pirme umabat hin kasubo tungod han ira mga sayop nga resulta han ira napanunod nga pagkadiri-perpekto. (Sal 103:8-14; 130:3) Kon ginhihimo nira an pinakamaopay nga maglakat ha dalan han Dios, mahimo hira magin malipayon. (Fil 4:4-6; 1Ju 3:19-22).” Makaparig-on gud ito!

20. Ano an aton hihisgotan ha sunod nga artikulo?

²⁰ Mapasalamaton kita nga hi Jehova andam magpasaylo ha aton kon tinuod kita nga nagbabasol ha mga sala nga aton nahimo. Pero paonan-o naton masusubad an pagpasaylo ni Jehova? Ha ano nga mga paagi puropariho an aton pagpasaylo ha pagpasaylo ni Jehova, pero ha ano nga mga paagi ito naiiba? Kay ano nga importante nga masabtan naton ito nga kaibahan? Babatunon han sunod nga artikulo ito nga mga pakiana.