1. (a) Ano nga paglaom an iginhahatag ha aton ni Jehova? (b) Ano an karuyag sidngon han ‘paglaom kan Jehova’? (Kitaa an footnote nga “An Iginpapasabot.”)

 HI Jehova naghahatag hin makaruruyag nga paglaom ha ngatanan nga nahigugma ha iya. Diri na maiha, wawad-on niya an sakit, kabido, ngan kamatayon. (Pah. 21:3, 4) Bubuligan niya “an mga maaghop” nga naglalaom ha iya nga himoon nga paraiso an tuna. ( Sal. 37:9-11) Ngan hihimoon niya nga posible para ha tagsa ha aton nga magkaada duok gud nga relasyon ha iya nga magigin mas maopay kay han aton napapahimulosan yana. Makalilipay gud ito nga paglaom! Pero ano an aton basihan ha pagtoo nga matutuman an mga saad han Dios? Pirme gud gintutuman ni Jehova an iya mga saad. Salit may maopay kita nga rason nga ‘maglaom kan Jehova.’ b (Sal. 27:14) Iginpapakita naton ini pinaagi ha paghulat hin mapailubon ngan malipayon nga tumanon han aton Dios an iya katuyoan.—Isa. 55:10, 11.

2. Ano an ginbuhat na ni Jehova?

² Ginpamatud-an na ni Jehova nga gintutuman niya an iya mga saad. Kitaa an usa nga maopay gud nga ehemplo. Ha libro han Pahayag, nagsaad hi Jehova nga ha aton panahon, titirukon niya an mga tawo nga tikang ha tagsa nga nasud ngan tribo ngan pinulongan, ngan pag-uurusahon niya hira ha putli nga pagsingba. Yana, iton espesyal nga katawohan kilala sugad nga “daku nga grupo.” (Pah. 7:9, 10) Bisan kon ini nga grupo ginkukompwesto hin kalalakin-an, kababayin-an, ngan kabataan nga iba-iba an lahi, yinaknan, ngan kahimtang ha kinabuhi, usa hira nga mamurayawon ngan nagkakaurosa nga pamilya ha bug-os nga kalibotan. (Sal. 133:1; Juan 10:16) An mga kaapi han daku nga  grupo madasigon liwat nga mga parasangyaw. Andam hira pirme nga isumat an ira paglaom hin mas maopay nga kalibotan ha bisan hin-o nga mamamati. (Mat. 28:19, 20; Pah. 14:6, 7; 22:17) Kon bahin ka han daku nga grupo, sigurado nga presyoso gud ha imo an paglaom hin mas maopay nga mga butang.

3. Ano an karuyag ni Satanas?

³ Karuyag han Yawa nga mawara an imo paglaom. Karuyag ka niya patoohon nga diri ka hinigugma ni Jehova ngan diri Niya tutumanon an Iya mga saad. Kon maglampos hi Satanas nga wad-on an aton paglaom, manluluya kita ngan bangin umundang pa ngani ha pag-alagad kan Jehova. Sugad han aton mahibabaroan, nangalimbasog an Yawa nga wad-on an paglaom ni Job ngan paundangon hiya ha pag-alagad kan Jehova.

4. Ano an aton hihisgotan hini nga artikulo? (Job 1:9-12)

⁴ Hini nga artikulo, uusisahon naton an mga taktika nga gin-gamit ni Satanas basi pwersahon hi Job nga bayaan an iya integridad. (Basaha an Job 1:9-12.) Hihisgotan liwat naton kon ano an aton mahibabaroan ha ehemplo ni Job ngan kon kay ano nga kinahanglan naton hinumdoman nga hinigugma kita han Dios ngan tutumanon Niya an Iya mga saad.

5-6. Ano an nahitabo kan Job ha sulod hin halipot nga panahon?

⁵ Maopay gud an kinabuhi ni Job. May-ada hiya duok nga pakigsangkay kan Jehova. May-ada hiya daku ngan nagkakaurosa nga pamilya, ngan riko gud hiya. (Job 1:1-5) Pero ha usa la ka adlaw, nawara kan Job an haros ngatanan. Siyahan, nawara an iya karikohan. (Job 1:13-17) Katapos, namatay an ngatanan niya nga hinigugma nga anak. Hunahunaa hin madaliay ito nga trahedya. Grabe gud an kasubo han mga kag-anak kon namamatay an usa han ira mga anak. Salit imadyina la an kalas ngan duro nga kasubo ni Job ngan han iya asawa han nahibaroan nira nga an napulo nira nga anak nagkamatay ngatanan. Diri urusahon nga gin-gisi ni Job an iya bado tungod han pagtaguminatay ngan hinapa hiya ha tuna!—Job 1:18-20.

⁶ Katapos, gintagan ni Satanas hi Job hin maul-ol hinduro nga sakit nga nakawara han iya dignidad. (Job 2:6-8; 7:5) Hadto, ginrirespeto gud hi Job ha iya komunidad. Napakadto ha iya an mga tawo basi mangaro hin sagdon. (Job 31:18) Yana ginlilikyan na nira hiya. Iginsalikway hiya han iya kabugtoan, han iya duok nga kasangkayan, ngan bisan han iya mga surugoon ha panimalay!—Job 19:13, 14, 16.

7. (a) Ano an ginhunahuna ni Job nga rason han iya pag-antos, pero ano an waray niya buhata? (b) Ano nga pagsari an bangin maeksperyensyahan han usa nga Kristiano nga puropariho han makikita ha piktyur?

⁷ Karuyag patoohon ni Satanas hi Job nga nag-aantos hiya kay nawara na an pag-uyon ni Jehova ha iya. Pananglitan, naggamit hi Satanas hin makusog nga hangin basi bungkagon an balay diin urosa nga nangangaon an napulo nga anak ni Job. (Job 1:18, 19) Nagpahulog liwat hiya hin kalayo tikang ha langit basi pamatayon diri la an mga karnero ni Job kondi pati liwat an mga surugoon ni Job nga nag-aataman hito. (Job 1:16) An hangin ngan kalayo tikang ha langit; salit naghunahuna hi Job nga hi Jehova nga Dios an gintikangan hito. Ngan sugad nga resulta, tinoo hiya nga bangin napasubo niya hi Jehova. Bisan pa hito, nagdumiri hiya nga isumpa an iya langitnon nga Amay. Siring ni Job nga ha paglabay han mga tuig, damu an iya nakarawat nga mag-opay nga butang tikang kan Jehova. Tungod hito, naghunahuna hiya nga kon malipayon hiya ha pagkarawat han maopay, kinahanglan magin andam liwat hiya ha pagkarawat han maraot. Salit nagsiring hiya: “Padayon unta nga dayawon an ngaran ni Jehova.” (Job 1:20, 21; 2:10) Bisan kon nawara an  karikohan ni Job, namatay an iya mga anak, ngan nagkasakit hiya, nagpabilin hiya nga matinumanon kan Jehova. Pero diri pa tapos ha iya hi Satanas.

8. Ano nga taktika an sunod nga gin-gamit ni Satanas kan Job?

⁸ Naggamit hi Satanas hin usa pa nga taktika kan Job; gin-aghat niya an tulo nga nagpapakunokuno nga sangkay ni Job basi ipaabat ha iya nga waray hiya pulos. Siring nira nga nag-aantos hi Job kay damu an iya nabuhat nga sala. (Job 22:5-9) Naningkamot liwat hira nga patoohon hiya nga bisan kon diri hiya magbuhat hin maraot, waray gud pulos an anoman niya nga pangalimbasog nga lipayon an Dios. (Job 4:18; 22:2, 3; 25:4) Ha iba nga pagkayakan, ginpapahunahuna nira kan Job nga diri hiya hinigugma han Dios, nga diri hiya aatamanon han Dios, ngan waray pulos an pag-alagad ha Iya. An ira mga ginsiring posible nga nagpaabat kan Job nga waray na paglaom an iya sitwasyon.

9. Ano an nakabulig kan Job nga magin maisugon ngan marig-on?

⁹ Imadyina ini nga eksena. Hi Job nagliliningkod ha abo, ngan diri nawawara an iya inaabat nga kaul-ol. (Job 2:8) Pauroutro nga ginpapakaraot hiya han iya mga kaupod ngan gindadaot an iya reputasyon. An iya mga problema sugad hin mga bato nga mabug-at pas-anon, ngan ginkukumot an iya kasingkasing ha kasubo tungod ha kamatay han iya mga anak. Ha siyahan, mamingaw la hi Job. (Job 2:13–3:1) Kon ginhuhunahuna han mga kaupod ni Job nga an iya pagmingaw nagpapasabot nga tatalikdan niya an iya Maglalarang, sayop gud hira. Makausa, hi Job—nga posible gin-aalsa an iya ulo ngan nagkikita ha iya nagpapakunokuno nga kasangkayan—nagsiring: “Tubtob nga mamatay ako, diri ko isasalikway an akon integridad!” (Job 27:5) Ano an nakabulig kan Job nga magin maisugon gud ngan marig-on bisan pa han ngatanan niya nga gin-antos? Bisan han nanluluya na  gud hiya, waray gud hiya mawad-i hin paglaom nga tatapuson han iya mahigugmaon nga Dios an iya pag-antos. Maaram hiya nga bisan kon mamatay hiya, babanhawon hiya ni Jehova.—Job 14:13-15.

10. Ano an igintututdo ha aton han rekord mahitungod kan Job?

¹⁰ Igintututdo ha aton han rekord mahitungod kan Job nga diri kita mapupwersa ni Satanas nga bayaan hi Jehova ngan maaram hi Jehova han ngatanan nga nahitatabo ha aton. Makakabulig liwat ha aton an eksperyensya ni Job nga mas masabtan an mga isyu nga nahidadabi. Hisgotan ta an pipira nga espisipiko nga leksyon nga aton mahibabaroan kan Job.

11. Kon padayon kita nga masarig kan Jehova, ha ano kita makakasiguro? (Santiago 4:7)

¹¹ Ginpamatud-an ni Job nga kon padayon kita nga masarig kan Jehova, maiilob naton an bisan ano nga pagsari ngan malampuson nga maaatohan hi Satanas. Ano an magigin resulta? Ginpapasarig kita han Kasuratan nga an Yawa mapalagiw ha aton.—Basaha an Santiago 4:7.

12. Paonan-o an paglaom nga pagkabanhaw nagparig-on kan Job?

¹² Kinahanglan kita magkaada marig-on nga pagtoo ha paglaom nga pagkabanhaw. Sugad han gin-unabi ha nauna nga artikulo, agsob gamiton ni Satanas an kahadlok ha kamatayon basi aghaton kita nga isalikway an aton integridad. Ha kahimtang ni Job, nagsiring hi Satanas nga hihimoon ni Job an bisan ano, ikukompromiso pa ngani an iya integridad, basi matalwas an iya kinabuhi. Sayop hi Satanas. Bisan han naghunahuna hi Job nga mamamatay na hiya, waray hiya magkompromiso. An iya pagsarig ha pagkamaopay ni Jehova ngan an iya marig-on nga paglaom nga maabot an panahon nga tatadungon ni Jehova an mga butang nakabulig ha iya nga makailob. May pagtoo hi Job nga kon diri man tadungon ni Jehova an mga butang samtang buhi hiya, babanhawon Niya hi Job ha tiarabot. Tinuod kan Job an paglaom nga pagkabanhaw. Kon tinuod ha aton ito nga paglaom, diri naton isasalikway an aton integridad bisan kon mameligro kita nga mamatay.

13. Kay ano nga kinahanglan naton tagan hin atensyon an mga taktika nga gin-gamit ni Satanas kan Job?

¹³ Kinahanglan gud naton tagan hin atensyon an mga taktika nga gin-gamit ni Satanas kan Job kay puropariho liwat hito an gin-gagamit niya ha aton yana. Pansina an akusasyon ni Satanas: “Ihahatag han usa nga tawo [diri la ni Job] an ngatanan niya nga gintatag-iya basi panalipdan an iya kinabuhi.” (Job 2:4, 5) Karuyag sidngon ni Satanas nga diri gud naton hinigugma hi Jehova nga Dios ngan tatalikdan naton hiya kon ito la an makakatalwas ha aton kinabuhi. Nagsiring liwat hi Satanas nga diri kita hinigugma han Dios ngan diri Niya mapapansin an aton mga pangalimbasog nga lipayon Hiya. Tungod kay napahamangnoan na nga daan, kita nga naglalaom kan Jehova diri nalilimbongan han mga taktika ni Satanas.

14. Ano an mahimo ibuhayhag han mga pagsari mahitungod ha aton? Iilustrar.

¹⁴ Kinahanglan naton hunahunaon an mga pagsari sugad nga oportunidad nga mahibaro parte ha aton kalugaringon. An mga pagsari nga naeksperyensyahan ni Job nakabulig ha iya nga mahibaroan an pipira nga kaluyahan ngan tadungon ito. Pananglitan, iya nahibaroan nga kinahanglan niya magin mas mapainubsanon. (Job 42:3) Pariho ha iya, damu liwat an aton mahibabaroan parte ha aton kalugaringon kon nakakaeksperyensya kita hin pagsari. An brother nga hi Nikolay, c nga ginpriso bisan kon may grabe nga mga sakit, nagsiring: “An prisohan sugad hin X-ray, nga nagpapakita han sulod nga pagkatawo han usa nga Kristiano.” Kon  mahibaroan ta na an aton mga kaluyahan, mahimo kita gumios para tadungon ito.

15. Hin-o an aton angay pamatian, ngan kay ano?

¹⁵ Kinahanglan naton mamati kan Jehova, diri ha aton mga kaaway. Namati hin maopay hi Job han nakiistorya ha iya hi Jehova. Nangatadongan an Dios kan Job, nga sugad hin nasiring: ‘Nakikita mo ba an akon gahum ha paglarang? Maaram ako han ngatanan nga nahitatabo ha imo. Pagkita mo ba diri ko ikaw kaya atamanon?’ Binaton hi Job hin mapainubsanon ngan may hilarom nga apresasyon ha pagkamaopay ni Jehova. Siring niya: “An akon mga talinga nakabati mahitungod ha imo, pero yana an akon mga mata nakita gud ha imo.” (Job 42:5) Han ginyakan ito ni Job, posible nga nalingkod la gihapon hiya ha mga abo, an iya lawas puno hin hubag, ngan nagtataguminatay hiya ha iya mga anak. Bisan pa hito, ginpasarig ni Jehova hi Job han Iya gugma ngan pag-uyon.—Job 42:7, 8.

16. Sumala ha Isaias 49:15, 16, ano an angay naton hinumdoman kon nakakaeksperyensya kita hin mga pagsari?

¹⁶ Yana liwat, mahimo kita insultuhon han mga tawo ngan trataron nga sugad hin waray kita pulos. Mahimo hira mangalimbasog nga dauton an aton reputasyon sugad nga indibiduwal o sugad nga organisasyon ngan ‘magyakan han ngatanan nga klase han buwa ngan magraot nga mga butang kontra’ ha aton. (Mat. 5:11) Ha rekord parte kan Job, nahibaroan naton nga nasarig hi Jehova nga magpapabilin kita nga maunungon ha iya kon nakakaeksperyensya kita hin mga pagsari. Hinigugma kita ni Jehova ngan diri gud niya babayaan adton naglalaom  ha iya. (Basaha an Isaias 49:15, 16.) Ayaw pamati ha bisan ano nga pakaraot han mga kaaway han Dios! Hi James, usa nga brother ha Turkey nga an pamilya nakaeksperyensya hin duro nga mga pagsari, nagsiring: “Nahunahuna namon nga an pagpamati ha mga buwa parte ha katawohan han Dios magpapaluya la ha amon. Salit nagpokus kami ha amon paglaom ha Ginhadian ngan nagpabilin nga aktibo ha pag-alagad kan Jehova. Sugad nga resulta, nagpabilin kami nga malipayon.” Pariho kan Job, namamati kita kan Jehova! Diri nawawara an aton paglaom bisan pa han mga buwa han aton mga kaaway.

17. Ano an imo mahibabaroan ha ehemplo han matinumanon nga kalalakin-an ngan kababayin-an nga gin-unabi ha Hebreo kapitulo 11?

¹⁷ Hi Job usa la han mga surugoon ni Jehova nga nagpabilin nga maisugon ngan marig-on ha panahon han duro nga mga pagsari. Ha surat ni apostol Pablo ha mga Hebreo, damu pa an iya gin-unabi, ngan gintawag niya hira nga ‘daku nga dampog han mga saksi.’ (Heb. 12:1) Hira ngatanan nakaeksperyensya hin duro nga mga pagsari; pero nagpabilin hira nga matinumanon kan Jehova ha bug-os nira nga kinabuhi. (Heb. 11:36-40) Karag la ba an ira pagpailob ngan pangalimbasog? Syempre diri! Bisan kon waray nira makita an katumanan han ngatanan nga saad han Dios han buhi pa hira, padayon hira nga naglaom kan Jehova. Ngan tungod kay sigurado hira nga nakarawat nira an pag-uyon ni Jehova, nasarig hira nga makikita nira an katumanan han mga saad. (Heb. 11:4, 5) An ira ehemplo makakaparig-on han aton determinasyon nga padayon nga maglaom kan Jehova.

18. Ano an imo determinasyon? (Hebreo 11:6)

¹⁸ Yana nabubuhi kita ha kalibotan nga mas nagtitikaraot pa gud. (2 Tim. 3:13) Diri pa tapos hi Satanas ha pagsari ha katawohan han Dios. Anoman nga mga problema an aada ha unhan, hinaot magin determinado kita nga magin maduruto para kan Jehova, kay sigurado kita nga “naglalaom kita ha buhi nga Dios.” (1 Tim. 4:10) Hinumdumi nga an bendisyon nga iginhatag han Dios kan Job nagpapamatuod “nga hi Jehova malumo hinduro magpalangga ngan maloloy-on.” (San. 5:11) Hinaot kita liwat magpabilin nga maunungon kan Jehova, kay sigurado nga babalosan niya an “mga sinsero nga namimiling ha iya.”—Basaha an Hebreo 11:6.