Waray ginsisiring an Biblia. Pero nagsusumat ito hin makapainteres nga mga detalye nga bangin nakaapekto han ira desisyon.

Ginsidngan hi Maria hin usa nga anghel nga magbuburod hiya ngan manganganak. Han iginsumat han anghel ito nga mensahe, hira Maria ngan Jose naukoy ha Nazaret, an bungto ha Galilea nga gintikangan ni Jose. (Luc. 1:26-31; 2:4) Ha urhi, han binalik hira tikang ha Ehipto, inuli hira ha Nazaret. Nagtubo hi Jesus didto ngan nagin Nazareno. (Mat. 2:19-23) Salit kon gin-uunabi hira Jesus, Jose, ngan Maria, nahuhunahuna naton an Nazaret.

Hi Maria may paryente nga Elizabeth an ngaran nga naukoy ha Juda. Hi Elizabeth asawa han saserdote nga hi Zacarias ngan nanay ni Juan Bawtista. (Luc. 1:5, 9, 13, 36) Ginbisita ni Maria hi Elizabeth ha Juda ngan inukoy hiya didto hin tulo ka bulan. Katapos, binalik hi Maria ha Nazaret. (Luc. 1:39, 40, 56) Salit medyo pamilyar hi Maria ha teritoryo han Juda.

Inabot an panahon nga ginsugot ni Jose an sugo nga “magparehistro.” Salit nagbiyahe hi Jose tikang ha Nazaret ngadto ha Bethlehem, nga “syudad ni David” ngan an igintagna nga lugar diin matatawo an Mesias. (Luc. 2:3, 4; 1 Sam. 17:15; 20:6; Mic. 5:2) Katapos ni Maria ig-anak hi Jesus didto, waray hiya agdaha ni Jose nga himoon an hilawig nga biyahe tipabalik ha Nazaret upod an katatawo pa la nga bata. Nagpabilin hira ha Bethlehem, nga mga siyam ka kilometro tikang ha Jerusalem. Salit magigin kombinyente ha ira nga dad-on an minasus-an ha templo ngan maghalad uyon ha igin-oobligar han Balaud.—Lev. 12:2, 6-8; Luc. 2:22-24.

Antes hito, ginsumatan han anghel han Dios hi Maria nga an iya anak makakakarawat han “trono ni David” ngan ‘magmamando sugad nga Hadi.’ Posible ba nga nahunahuna nira Jose ngan Maria nga importante nga matawo hi Jesus ha syudad ni David? (Luc. 1:32, 33; 2:11, 17) Bangin nahunahuna nira nga maaramon an pagpabilin didto ngan maghulat han sunod nga karuyag ipabuhat han Dios ha ira.

Diri kita maaram kon ano na hira kaiha ha Bethlehem han kinadto an pipira nga astrologo. Pero hito nga panahon, ito nga pamilya naukoy ha usa nga balay, ngan an ira anak usa na nga “bata” ngan diri minasus-an. (Mat. 2:11) Baga hin inukoy hira ha Bethlehem hin maiha-iha imbes nga bumalik ha Nazaret.

Nagsugo hi Herodes nga pamatayon “an ngatanan nga bata nga lalaki ha Bethlehem . . . nga dos anyos an edad tipaubos.” (Mat. 2:16) Tungod kay hi Jose ginpahamangnoan han Dios mahitungod hini nga sugo, hira ni Maria pinalagiw ngadto ha Ehipto kaupod hi Jesus ngan nag-ukoy didto tubtob nga namatay hi Herodes. Ha urhi, gindara ni Jose an iya pamilya ha Nazaret. Kay ano nga waray hira bumalik ha Bethlehem? Basi malikyan an madarahog nga anak ni Herodes nga hi Arquelao nga aadto ha Judea, ngan basi masunod an pahamangno han Dios. Ha Nazaret, talwas nga mapapadaku niya hi Jesus sugad nga tinuod nga magsiringba han Dios.—Mat. 2:19-22; 13:55; Luc. 2:39, 52.

Posible nga namatay hi Jose antes ni Jesus abrihan an oportunidad nga mabuhi an iba ha langit. Salit babanhawon hi Jose ha tuna. Damu an makakakita ha iya ngan mahibabaro hin dugang nga mga detalye kon kay ano nga hiya ngan hi Maria nagpabilin ha Bethlehem katapos ig-anak hi Jesus.