1. Sumala ha 1 Pedro 5:2, ano an pribilehiyo han mga tigurang?

 AN Kristiano nga mga tigurang gintaporan ha pag-ataman han presyoso nga mga karnero ni Jehova. Ginpapabilhan hinin maduruto nga kalalakin-an an pribilehiyo nga serbihan an ira kabugtoan, ngan naniningkamot hira nga magin ‘mga paraataman hin panon nga nag-aataman gud.’ (Jer. 23:4; basaha an 1 Pedro 5:2.) Mapasalamaton gud kita nga may sugad nga kalalakin-an ha aton mga kongregasyon!

2. Ano nga mga problema an bangin atubangon han pipira nga tigurang?

² Ha pagtuman han mga tigurang ha ira mga responsabilidad, naatubang hira hin damu nga problema. Pananglitan, daku nga buruhaton an pag-ataman han kongregasyon. Kinahanglan kilalahon ni Tony, nga tigurang ha United States, an iya limitasyon may kalabotan ha kadamu han buruhaton nga iya ginkakarawat. Nagsiring hiya: “Pagtikang han COVID-19 nga pandemya, nangalimbasog ako nga mas damu an buhaton ha pag-organisar han mga katirok ngan ministeryo. Pero anoman kadamu an akon buhaton, pirme la gihapon mas damu an buruhaton. Salit waray na ako panahon ha pagbasa han Biblia, pag-aram, ngan pag-ampo.” Hi Ilir, nga tigurang ha Kosovo, inatubang hin iba nga problema. Han nakadto hiya ha lugar nga may girra, nakurian hiya pagsugot han mga instruksyon han organisasyon. Nagsiring hiya: “Nasarihan an akon kaisog han gintokahan ako han sanga nga opisina nga buligan an kabugtoan nga aadto ha delikado nga lugar. Nahadlok ako, ngan para ha akon diri praktikal an instruksyon.” Hi Tim naman, nga misyonero ha Asia, nakurian ha ngatanan nga kinahanglan niya himoon kada adlaw. Hiya nagsiring: “May mga panahon nga nakapoy gud an akon hunahuna ngan emosyon.” Ano an makakabulig ha mga tigurang nga naatubang hin puropariho nga mga problema?

3. Paonan-o an tanan makakapahimulos ha ehemplo ni Hukom Gideon?

 ³ An mga tigurang mahibabaro ha ehemplo ni Hukom Gideon. (Heb. 6:12; 11:32) Ginproteksyonan ngan gin-ataman niya an katawohan han Dios. (Huk. 2:16; 1 Cron. 17:6) Pariho kan Gideon, an mga tigurang gintokahan ha pag-ataman han katawohan han Dios ha makuri gud nga panahon. (Buh. 20:28; 2 Tim. 3:1) Puydi kita mahibaro ha pagin mapainubsanon, masinugtanon, ngan pagkilala ni Gideon han iya limitasyon. Nasarihan an iya pagin mapailubon han gintutuman niya an iya mga toka. Tigurang man kita o diri, puydi kita magin mas maapresyaron ha aton mga tigurang. Puydi ta suportahan inin maduruto nga kabugtoan.—Heb. 13:17.

4. Paonan-o hi Gideon nagpakita hin pagin mapainubsanon?

⁴ Hi Gideon mapainubsanon. b Han ginsidngan hiya han anghel ni Jehova nga ginpili hiya basi talwason an Israel tikang ha gamhanan nga mga Midianita, inin mapainubsanon nga lalaki nagsiring: “An akon panimalay an pinakaubos ha Manases, ngan ako an pinakaminos ha panimalay han akon tatay.” (Huk. 6:15) Iya gin-abat nga diri hiya kwalipikado hito nga toka, pero mas maaram hi Jehova. Ha bulig ni Jehova, naglampos hi Gideon ha pagbuhat han iya toka.

5. Paonan-o posible masarihan an pagin mapainubsanon han usa nga tigurang?

⁵ Ginhihimo han mga tigurang an ira pinakamaopay basi maipakita nga mapainubsanon hira ha tanan nga butang. (Mic. 6:8; Buh. 20:18, 19) Diri nira iginhahambog an ira mga abilidad o mga nahihimo; diri liwat nira ginmiminos an ira kalugaringon tungod han ira mga kapakyasan. Pero usahay bangin makurian an usa nga tigurang nga magin mapainubsanon. Pananglitan, bangin kumarawat hiya hin damu nga toka pero makurian ha pagtuman hito. O bangin may magreklamo ha iya paagi han pagbuhat han usa nga toka o dayawon hiya ha iya paagi han pagtuman han iba pa nga toka. Ano an mahibabaroan han mga tigurang kan Gideon nga mabulig ha ira ha sugad nga mga sitwasyon?

6. Ano an mahibabaroan han mga tigurang kan Gideon parte ha pagin mapainubsanon? (Kitaa liwat an piktyur.)

⁶ Pangaro hin bulig. An tawo nga mapainubsanon nakilala han iya limitasyon. Iginpakita ito ni Gideon kay nangaro hiya hin bulig ha  iba. (Huk. 6:27, 35; 7:24) Ito liwat an ginbubuhat han maaramon nga mga tigurang. Hi Tony, nga gin-unabi na, nagsiring: “Tungod han akon gindak-an, may tendensya ako nga karawaton an mas damu nga buruhaton kay ha kaya ko himoon. Salit nagdesisyon ako nga iupod ha amon pagsingba han pamilya an topiko nga pagin mapainubsanon ngan gin-aro an opinyon han akon asawa. Ginkita ko liwat utro ha jw.org an video nga Bansaya, Tapuri, Ngan Buligi an Iba, Sugad han Ginbuhat ni Jesus.” Naghangyo na hi Tony ha iba nga buligan hiya ha iya mga buruhaton. Ano an resulta? Nagsiring hi Tony: “Napapanginano an mga buruhaton ha kongregasyon, ngan mas may panahon ako ha pagparig-on han akon espirituwalidad.”

7. Kon may reklamo ha mga tigurang, paonan-o nira masusubad hi Gideon? (Santiago 3:13)

⁷ Ayaw kasina kon may reklamo parte ha imo. Usa pa nga pagsari ha mga tigurang amo an kon may reklamo parte ha ira. Hini nga sitwasyon, makakabulig liwat an ehemplo ni Gideon. Tungod kay maaram hiya nga diri hiya perpekto, nagpabilin hiya nga kalmado han ginkompronta hiya han mga Efraimita. (Huk. 8:1-3) Waray hi Gideon bumaton nga nasisina. Nagpakita hiya hin pagin mapainubsanon pinaagi ha pagpamati han ira mga kabaraka, ngan mataktika nga ginpakalma niya an sitwasyon. Ginsusubad han maaramon nga mga tigurang hi Gideon pinaagi ha pagpamati hin maopay ngan pagpabilin nga kalmado kon may reklamo parte ha ira. (Basaha an Santiago 3:13.) Hito nga paagi, nabulig hira nga magkaada kamurayawan ha kongregasyon.

8. Ano an kinahanglan magin reaksyon han mga tigurang kon gindadayaw hira? Paghatag hin ehemplo.

⁸ Ihatag kan Jehova an kadayawan. Han gindayaw hi Gideon tungod han pagdaog ha Midian, iginhatag niya kan Jehova an kadayawan. (Huk. 8:22, 23) Paonan-o masusubad han mga tigurang hi Gideon? Dapat ihatag nira kan Jehova an kadayawan ha ira mga nahihimo. (1 Cor. 4:6, 7) Pananglitan, kon an usa nga tigurang ginkukumendasyonan tungod han iya abilidad ha pagtutdo, puydi hiya magyakan nga an Pulong han Dios an gintitikangan han instruksyon ngan tikang ha organisasyon ni Jehova an pagbansay nga aton nakakarawat. Ha panapanahon, puydi pamalandungon han mga tigurang kon an paagi ba han ira pagtutdo nag-aaghat ha iba nga dayawon hira imbes nga hi Jehova. Hunahunaa an eksperyensya han tigurang nga hi Timothy. Han bag-o pa la hiya nga tigurang, nalilipay hiya pagpahayag. Nagsiring hiya: “Nagamit ako hin hilaba ngan madetalye nga mga introduksyon ngan ilustrasyon. Agsob ako dayawon han iba tungod hini. Pero an mga mamarati nakapokus na lugod ha akon imbes nga ha Biblia o kan Jehova.” Nasantop ni Timothy nga kinahanglan niya bag-uhon an paagi han iya pagtutdo basi diri mahingada ha iya an atensyon. (Prob. 27:21) Ano an nagin resulta? Hiya nagsiring: “Yana an kabugtoan nasiring ha akon nga an akon pahayag nakabulig ha ira nga malamposan an usa nga problema, mailob an usa nga pagsari, o mas magin duok kan Jehova. Mas nalilipay ako hito nga mga komento kay ha mga pagdayaw nga akon nakarawat hadto.”

9. Paonan-o nasarihan an pagin masinugtanon ngan maisugon ni Gideon? (Kitaa an piktyur ha kobre.)

⁹ Katapos pilion hi Gideon nga magin hukom, nasarihan an iya pagin masinugtanon ngan maisugon. Gintagan hiya hin delikado nga toka nga bungkagon an halaran han iya tatay para kan Baal. (Huk. 6:25, 26) Ha urhi, katapos magtirok hin mga sundalo, duha ka beses nga ginsugo hi Gideon nga ibanan an ira kadamu. (Huk. 7:2-7) Ha kataposan, ginsidngan hiya nga sulungon an kampo han kaaway ha katutnga han gab-i.—Huk. 7:9-11.

10. Paonan-o posible masarihan an pagin masinugtanon han usa nga tigurang?

 ¹⁰ An mga tigurang dapat magin “andam ha pagsugot.” (San. 3:17) An masinugtanon nga tigurang andam magpasakop ha ginsisiring han Kasuratan ngan ha instruksyon tikang ha organisasyon han Dios. Ha pagbuhat hito, nagpapakita hiya hin maopay nga ehemplo ha iba. Pero bangin masarihan an iya pagin masinugtanon. Pananglitan, bangin makurian hiya pagsunod ha damu nga instruksyon nga iya nakakarawat. Ha pipira nga kahimtang, bangin mahunahuna niya kon praktikal gud ba o maaramon an usa nga instruksyon. O bangin tagan hiya hin toka nga puydi hiya maaresto. Paonan-o masusubad han mga tigurang an pagin masinugtanon ni Gideon ha sugad nga mga sitwasyon?

11. Ano an makakabulig ha mga tigurang nga magin masinugtanon?

¹¹ Pamati hin maopay ha instruksyon ngan sunda ito. An Dios nagsumat kan Gideon kon paonan-o bubungkagon an halaran han iya tatay, kon diin maghihimo hin bag-o nga halaran para kan Jehova, ngan kon ano nga hayop an ihahalad. Waray kwestyona ni Gideon an instruksyon—ginsunod gud niya ito. Yana, an mga tigurang nakakakarawat hin mga instruksyon tikang ha organisasyon ni Jehova pinaagi hin mga surat, mga pahibaro, ngan espisipiko nga mga giya para ha aton espirituwal ngan pisikal nga kaopayan. Hinigugma ta an aton mga tigurang tungod han ira matinumanon nga pagsunod ha mga instruksyon han organisasyon. An bug-os nga kongregasyon nagpapahimulos.—Sal. 119:112.

12. Paonan-o maiaaplikar han mga tigurang an Hebreo 13:17 kon may bag-o nga kahikayan an organisasyon?

¹² Magin andam ha pagbag-o. Hinumdumi nga ginsidngan ni Jehova hi Gideon nga paulion an haros tanan niya nga kasundalohan. (Huk. 7:8) Bangin naghunahuna hiya: ‘Kinahanglan gud ba ini nga pagbag-o? Maglalampos ba ini?’ Bisan pa hito, sinugot hi Gideon. An mga tigurang yana nagsusubad kan Gideon pinaagi ha pagsunod ha mga pagbag-o nga iginpapatuman han organisasyon. (Basaha an Hebreo 13:17.) Pananglitan, han 2014 ginbag-o han Nagmamando nga Lawas an paagi han pagbayad para ha pagpanukod hin mga Kingdom Hall ngan Assembly Hall. (2 Cor. 8:12-14) An mga kongregasyon diri na kinahanglan magbayad han gin-utang nga kwarta para ha pagtukod. Lugod, gagamiton han organisasyon an mga kontribusyon tikang ha ngatanan nga kongregasyon ha bug-os nga kalibotan basi magtukod hin teokratiko nga mga pasilidad diin man ito ginkikinahanglan, anoman an makakaya han kongregasyon ha pagdonar. Han nahibaroan ni José an pagbag-o, nagruhaduha hiya kon maglalampos ba ito. Naghunahuna hiya: ‘Waray bisan usa nga Kingdom Hall an matutukod. Diri sugad hito an pamaagi ha amon lugar.’ Ano an nakabulig kan José nga suportahan an kahikayan? Hiya nagsiring: “An mga pulong ha Proberbios 3:5, 6 nagpahinumdom ha akon nga sumarig kan  Jehova. Ngan maopay gud an mga resulta! Diri la kita basta nagtutukod hin mas damu nga Kingdom Hall, nahibabaro liwat kita pagdonar ha iba-iba nga paagi basi magkaada pagkasarahid.”

13. (a) Ha ano nakombinse hi Gideon? (b) Paonan-o hi Gideon masusubad han mga tigurang? (Kitaa liwat an piktyur.)

¹³ Maisugon nga buhata an kaburut-on ni Jehova. Ginsunod ni Gideon hi Jehova bisan kon nahahadlok hiya ngan delikado an pagbuhat hito. (Huk. 9:17) Katapos pasarigon ni Jehova, nakombinse gud hi Gideon nga bubuligan hiya han Dios ha pagprotektar han Iya katawohan. An mga tigurang nga naukoy ha mga lugar nga igindidiri an aton buruhaton nagsusubad kan Gideon. Maisugon hira nga nangunguna ha mga katirok ngan ha ministeryo bisan kon naninelikado hira nga arestuhon, imbistigaran, mawad-an hin trabaho, o kastiguhon. c Ha daku nga kasakitan, an mga tigurang magkikinahanglan hin kaisog ha pagsunod ha mga instruksyon nga ira makakarawat—bisan kon delikado ito. Bangin mahitungod ini ha kon paonan-o ipapasamwak an mensahe nga sugad hin uran nga yelo ngan kon paonan-o matatalwas ha pag-atake han Gog han Magog.—Ezek. 38:18; Pah. 16:21.

14. Paonan-o nasarihan an pagpailob ni Gideon?

¹⁴ An toka ni Gideon sugad nga hukom nagkinahanglan hin daku nga kusog. Han pinalagiw an mga Midianita ha araway ha katutnga han gab-i, ginlanat hira ni Gideon tikang ha Walog han Jezreel tubtob ha Salog Jordan, nga posible napapalibotan hin kakahoyan. (Huk. 7:22) Umundang ba hi Gideon ha Jordan? Waray! Bisan kon kinakapoy, hiya ngan an iya 300 nga sundalo tinabok ngan nagpadayon paglanat. Ha urhi, naabtan nira ngan ginpirde an mga Midianita.—Huk. 8:4-12.

15. San-o puydi masarihan an pagpailob han mga tigurang?

¹⁵ Usahay an mga tigurang bangin kapuyon gud ha pisikal, mental, o emosyonal tungod ha pagpanginano ha kongregasyon ngan ha ira pamilya.  Ha sugad nga mga kahimtang, paonan-o nira masusubad hi Gideon?

16-17. Ano an nakabulig kan Gideon nga makailob, ngan ha ano makakasarig an mga tigurang? (Isaias 40:28-31) (Kitaa liwat an piktyur.)

¹⁶ Sarig nga papakusgon ka ni Jehova. Sinarig hi Gideon nga papakusgon hiya ni Jehova, ngan ginbuhat gud ito ni Jehova. (Huk. 6:14, 34) Makausa, ginlanat ni Gideon ngan han iya kasundalohan an duha nga Midianita nga hadi; hira nagdadalagan la pero an mga hadi posible nga nakasakay ha mga kamelyo. (Huk. 8:12, 21) Pero ha bulig han Dios, nagdaog an mga Israelita. Makakasarig liwat an mga tigurang kan Jehova, nga ‘diri gud nanluluya o ginugol-an.’ Ihahatag niya ha ira an kusog kon kinahanglan nira ito.—Basaha an Isaias 40:28-31.

¹⁷ Pansina an eksperyensya ni Matthew, nga membro han Hospital Liaison Committee. Ano an nakakabulig ha iya nga makailob? Hi Matthew nagsiring: “Naeksperyensyahan ko nga tinuod an Filipos 4:13. Damu ka beses nga kon kinakapoy ngan ginugol-an ako, sinsero ako nga nag-aampo, nga nakikimalooy ha Dios nga tagan an akon lawas ngan hunahuna han kusog nga akon kinahanglan basi masuportahan an akon kabugtoan. Hito nga mga takna, gin-aabat ko nga ginpapakusog ako han espiritu ni Jehova, nga nabulig ha akon nga makailob.” Pariho kan Gideon, an aton maunungon nga mga tigurang bangin umatubang hin mga problema samtang mahigugmaon nga gin-aataman an panon. Syempre, kinahanglan kilalahon nira an limitasyon han ira lawas ngan emosyon ngan buhaton kon ano la an ira kaya. Pero makakasarig hira nga pamamatian ni Jehova an ira mga hangyo para hin bulig ngan papakusgon hira basi makailob.—Sal. 116:1; Fil. 2:13.

18. Ha pagrepaso, paonan-o masusubad han mga tigurang hi Gideon?

¹⁸ An mga tigurang may mahibabaroan nga napapanahon ngan praktikal nga mga leksyon kan Gideon. Dapat nira ipakita an pagin mapainubsanon ha kadamu han buruhaton nga ira ginkakarawat ngan ha ira reaksyon kon may nagdadayaw o nagrireklamo parte ha ira. Dapat nira ipakita an pagin masinugtanon ngan maisugon, labi na nga nagtitikahirani an kataposan hini nga sistema. Ngan dapat hira sumarig nga anoman nga mga problema an ira atubangon, mapapakusog hira han Dios. Sigurado nga gin-aapresyar ta inin maduruto nga mga paraataman ngan ‘padayon nga ginhihigugma an sugad nga klase hin mga tawo.’—Fil. 2:29.