1. Ano an dapat ta buhaton basi makatalwas ha adlaw ni Jehova?

 KON gin-uunabi han Biblia an “adlaw ni Jehova,” nagtutudlok ito ha panahon han pagbungkag ni Jehova ha iya mga kaaway ngan pagtalwas ha iya katawohan. Ha naglabay, nagsirot hi Jehova hin pipira nga nasud. (Isa. 13:1, 6; Ezek. 13:5; Zep. 1:8) Ha aton panahon, an “adlaw ni Jehova” magtitikang ha pag-atake ha Babilonya nga Gamhanan ngan matatapos ha Armagedon. Basi matalwas hito nga “adlaw,” dapat mag-andam kita yana. Hi Jesus nagtutdo nga diri la kay kinahanglan ta mag-andam para ha “daku nga kasakitan” kondi “padayon nga magin andam” liwat hito.—Mat. 24:21; Luc. 12:40.

2. Kay ano nga makakabulig ha aton an 1 Tesalonica?

² Ha siyahan nga surat ni apostol Pablo ha mga taga-Tesalonica, naggamit hiya hin damu nga ilustrasyon basi buligan an mga Kristiano nga padayon nga magin andam para ha daku nga adlaw han paghukom ni Jehova. Maaram hi Pablo nga an adlaw ni Jehova diri maabot hito nga panahon. (2 Tes. 2:1-3) Pero gin-aghat la gihap niya an kabugtoan nga mag-andam para hito nga adlaw nga baga hin tiabot na ito kinabuwasan, ngan puydi ta liwat sundon an iya sagdon. Hisgotan ta an iya pagsaysay han masunod: (1) kon paonan-o maabot an adlaw ni Jehova, (2) kon hin-o an diri makakatalwas hito nga adlaw, ngan (3) kon paonan-o kita makakapangandam basi matalwas.

3. Paonan-o an adlaw ni Jehova maabot sugad hin kawatan ha gab-i? (Kitaa liwat an piktyur.)

³ “Sugad . . . hin kawatan ha gab-i.” (1 Tes. 5:2) Ini an siyahan han tulo nga ilustrasyon nga gin-gamit ha paghulagway han pag-abot  han adlaw ni Jehova. An mga kawatan agsob nga madagmit gumios ngan nanbibiktima ha gab-i kay diri andam an mga tawo. Tigda liwat nga maabot an adlaw ni Jehova, salit makakalasan an kadam-an nga tawo. Bisan an tinuod nga mga Kristiano bangin makalasan tungod ha kadagmit han mga panhitabo. Pero diri pariho ha magraot, kita diri mabubungkag.

4. Ha ano nga paagi an adlaw ni Jehova maipapariho ha kasakit han pagbatî?

⁴ “Sugad han kasakit ha pagbatî han burod nga babaye.” (1 Tes. 5:3) An burod nga babaye diri maaram kon san-o gud hiya magbabatî. Pero sigurado hiya nga mahitatabo ito. Kon magbatî na hiya, posible gud nga tigda ito, masakit, ngan diri mapugngan. Sugad man, diri kita maaram han adlaw ngan oras kon san-o magtitikang an adlaw ni Jehova. Pero sigurado kita nga maabot ito ngan an paghukom han Dios ha magraot magigin tigda ngan diri hira makakapalagiw.

5. Ha ano nga paagi an daku nga kasakitan maipapariho ha maagahon?

⁵ Pariho ha maagahon. An ikatulo nga ilustrasyon ni Pablo nag-uunabi gihap hin mga kawatan nga nangangawat ha gab-i. Pero hini nga higayon, baga hin iginpariho niya an adlaw ni Jehova ha maagahon. (1 Tes. 5:4) An mga kawatan nga nangangawat ha gab-i bangin duro gud kaokupado salit diri nira napapansin an paglabay han oras. Bangin hira maabtan han lamrag han sunod nga adlaw ngan mabubuhayhag an ira ginbubuhat. Ha pariho nga paagi, an daku nga kasakitan magbubuhayhag han mga tawo nga nagpapabilin ha kasisidman, sugad hin mga kawatan, pinaagi ha pagpadayon ha mga buhat nga nakakapasubo ha Dios. Diri pariho ha ira, puydi kita magin andam pinaagi ha paglikay ha panggawi nga nakakapasubo kan Jehova ngan pagbuhat han “ngatanan nga klase han pagkamaopay ngan pagkamatadong ngan kamatuoran.” (Efe. 5:8-12) Sunod, naggamit hi Pablo hin  duha nga konektado nga mga ilustrasyon basi ihulagway adton diri makakatalwas.

6. Ha ano nga paagi nakaturog an kadam-an nga tawo? (1 Tesalonica 5:6, 7)

⁶ “An mga nangangaturog.” (Basaha an 1 Tesalonica 5:6, 7.) Adton diri makakatalwas ha adlaw ni Jehova iginpariho ni Pablo ha mga tawo nga nangangaturog. Waray hira sarabotan ha nahitatabo ha palibot o ha paglabay han panahon. Salit diri hira maaram kon may importante nga nahitatabo o kon ano an ira bubuhaton. An kadam-an nga tawo yana nakaturog ha espirituwal. (Roma 11:8) Diri hira natoo ha ebidensya nga nabubuhi na kita ha “kataposan nga mga adlaw” ngan hirani na an daku nga kasakitan. Kon may dagku nga panhitabo ha kalibotan, an iba nga nangangaturog ha espirituwal bangin magpakita hin gutiay nga interes ha aton mensahe parte ha Ginhadian. Pero damu an nabalik pagkaturog imbes nga magpabilin nga nagmamata. Bisan an iba nga natoo ha adlaw han paghukom naghuhunahuna nga maiha pa ito. (2 Ped. 3:3, 4) Kondi maaram kita nga an giniyahan nga sagdon nga magpabilin nga nagmamata nagigin mas importante gud ha kada adlaw nga nalabay.

7. Kay ano nga maipapariho ha hubog nga mga tawo adton bubungkagon han Dios?

⁷ “An mga naghuhubog.” Adton bubungkagon han Dios iginpariho han apostol ha mga parahubog. An mga tawo nga hubog diri dayon nagios kon may nahitatabo ha ira palibot, ngan diri hira nakakadesisyon hin maopay. Ha pariho nga paagi, an magraot diri nagios ha mga pahamangno han Dios. Ginpipili nira an pagkinabuhi nga magriresulta han ira kabungkagan. Pero an mga Kristiano ginsusugo nga tipigan an ira maopay nga panhunahuna. (1 Tes. 5:6) Iginhulagway ini han usa nga eskolar han Biblia sugad nga ‘kalmado nga panhunahuna nga nagtuturotimbang ngan husto nga nag-uusisa han mga butang ngan hito nga paagi nakakahimo kita hin husto nga desisyon.’ Kay ano nga dapat kita magpabilin nga kalmado? Basi diri kita mahidabi ha mga isyu ha politika o ha komunidad. Samtang nagtitikahirani an adlaw ni Jehova, magtitikagrabe an presyur nga may dapigan hini nga mga isyu. Pero diri kita angay mabaraka kon ano an aton bubuhaton. An espiritu han Dios makakabulig ha aton nga magkaada kalmado nga hunahuna ngan makahimo hin maaramon nga mga desisyon.—Luc. 12:11, 12.

8. Paonan-o iginpapakita han 1 Tesalonica 5:8 an mga kalidad nga mabulig ha aton nga magpabilin nga nagmamata ngan tipigan an aton maopay nga panhunahuna? (Kitaa liwat an piktyur.)

⁸ “Isul-ot an kutamaya . . . ngan an . . . helmet.” Iginpapariho kita ni Pablo ha mga sundalo nga alerto ngan nakasul-ot hin pan-girra nga bado. (Basaha an 1 Tesalonica 5:8.) An sundalo ginlalaoman nga pirme magin andam ha pakiggirra. Sugad liwat kita hito. Nagpapabilin kita nga andam para ha adlaw ni Jehova pinaagi ha pagsul-ot han kutamaya han pagtoo ngan gugma ngan han helmet han paglaom. Daku an maibubulig ha aton hini nga mga kalidad.

9. Paonan-o kita ginpuproteksyonan han aton pagtoo?

⁹ An kutamaya nagpuproteksyon ha kasingkasing han sundalo. Ginpuproteksyonan han pagtoo ngan gugma an aton simboliko nga kasingkasing. Mabulig ito ha aton nga padayon nga mag-alagad ha Dios ngan sumunod kan Jesus. An pagtoo nagpapasarig ha aton nga babalosan kita ni Jehova kay ginbibiling naton hiya ha bug-os naton nga kasingkasing. (Heb. 11:6) Magpapagios ito ha aton nga magpabilin nga maunungon ha aton Lider nga hi Jesus bisan kon kinahanglan ta mag-ilob hin kakurian. Mapaparig-on ta an aton pagtoo para mailob an mga kakurian  pinaagi ha paghibaro ha ehemplo han mga indibiduwal ha moderno nga panahon nga nagtipig han integridad bisan pa han pagtimaraot o kakurian ha pinansyal. Ngan malilikyan ta an lit-ag han materyalismo pinaagi ha pagsubad hadton nagpasimple han kinabuhi basi unahon an buruhaton han Ginhadian. b

10. Paonan-o an gugma ha Dios ngan ha mga tawo nabulig ha aton nga makailob?

¹⁰ An gugma importante liwat basi magpabilin nga nagmamata ngan matipigan an aton maopay mga panhunahuna. (Mat. 22:37-39) An gugma ha Dios nabulig ha aton nga padayon nga magsangyaw bisan pa han problema nga bangin atubangon ta tungod hito. (2 Tim. 1:7, 8) Tungod kay hinigugma ta liwat adton diri nag-aalagad kan Jehova, nagpapadayon kita ha pagsangyaw ngan pagkobre han aton teritoryo, ngan nagsasangyaw pa ngani pinaagi ha telepono ngan surat. Diri kita nawawad-an hin paglaom nga maabot an panahon nga magbabag-o an mga tawo ngan magbubuhat han tama.—Ezek. 18:27, 28.

11. Paonan-o nabulig ha aton an gugma ha aton kabugtoan? (1 Tesalonica 5:11)

¹¹ Hinigugma ta liwat an aton mga igkasi-Kristiano. Iginpapakita ta an sugad nga gugma pinaagi ha ‘pagdasig ngan pagparig-on ha usa kag usa.’ (Basaha an 1 Tesalonica 5:11.) Pariho ha mga sundalo nga magkaupod ha pakig-away, gindadasig naton an usa kag usa. Syempre, an usa nga sundalo bangin aksidente nga makasakit ha igkasi-sundalo samtang nakikig-away, pero diri gud niya ito tutuyoon. Ha pariho nga paagi, diri ta gud tutuyoon nga masakitan an kabugtoan o bumulos ha ira. (1 Tes. 5:13, 15) Iginpapakita liwat naton an aton gugma pinaagi ha pagrespeto ha mga nangunguna ha kongregasyon. (1 Tes. 5:12) Han ginhimo ni Pablo ini nga surat, an kongregasyon ha Tesalonica waray pa mag-usa ka tuig. An mga tigurang didto posible nga kulang hin eksperyensya ngan bangin nakakasayop. Pero angay la gihap hira respetuhon. Samtang nagtitikahirani an daku nga kasakitan, bangin kinahanglan nga mas sumarig kita ha instruksyon han mga tigurang ha aton kongregasyon. Bangin diri na kita makakarawat hin  instruksyon tikang ha world headquarters ngan ha sanga nga opisina; salit yana, importante nga mahibaro kita paghigugma ngan pagrespeto ha aton mga tigurang. Anoman an mahitabo, tipigan ta an maopay nga panhunahuna, nga diri nagpupokus ha ira mga kaluyahan, kondi ha kamatuoran nga ginigiyahan ni Jehova inin matinumanon nga kalalakin-an pinaagi han Kristo.

12. Paonan-o ginpuproteksyonan han aton paglaom an aton panhunahuna?

¹² Sugad la nga an helmet nagpuproteksyon ha ulo han sundalo, an aton paglaom ha katalwasan nagpuproteksyon ha aton panhunahuna. Tungod han marig-on nga paglaom, maaram kita nga waray pulos an igintatanyag hini nga kalibotan. (Fil. 3:8) An aton paglaom nabulig ha aton nga magpabilin nga kalmado ngan marig-on. Ito gud an gin-abat nira Wallace ngan Laurinda, nga nag-aalagad ha Africa. Ha sulod la hin tulo ka semana, an tagsa ha ira namatayan hin kag-anak. Tungod han COVID-19 nga pandemya, waray hira makauli ha ira mga pamilya. Hi Wallace nagsiring: “An paglaom nga pagkabanhaw nakabulig ha akon nga hunahunaon, diri an ira sitwasyon ha ira ultimo nga mga adlaw hini nga kalibotan, kondi an ira sitwasyon ha ira siyahan nga mga adlaw ha bag-o nga kalibotan. Ini nga paglaom nagpapakalma ha akon kon nasusubo ako o namimingaw.”

13. Ano an puydi ta buhaton basi makarawat an baraan nga espiritu?

¹³ “Ayaw pagparonga an kalayo han espiritu.” (1 Tes. 5:19) Hi Pablo nagsiring nga an baraan nga espiritu pariho hin kalayo ha sulod naton. Kon may-ada kita han espiritu han Dios, madasigon gud kita ha kon ano an tama ngan may kusog nga magbuhat para kan Jehova. (Roma 12:11) Ano an puydi ta buhaton basi makarawat an baraan nga espiritu? Puydi kita mag-ampo nga magkaada hito, mag-aram han giniyahan nga Pulong han Dios, ngan makig-upod ha organisasyon nga ginigiyahan han iya espiritu. An pagbuhat hito mabulig ha aton nga makultibar an “bunga han espiritu.”—Gal. 5:22, 23.

14. Ano an kinahanglan ta likyan basi padayon nga makarawat an espiritu han Dios? (Kitaa liwat an piktyur.)

¹⁴ Katapos ihatag ha aton han Dios an iya baraan nga espiritu, dapat maghirot kita nga diri  ‘parungon an kalayo han espiritu.’ Iginhahatag la han Dios an iya espiritu hadton nagtitipig hin limpyo nga hunahuna ngan panggawi. Diri niya padayon nga ihahatag ha aton an iya espiritu kon maghihinunahuna kita hin maghugaw nga butang ngan magbubuhat uyon hito. (1 Tes. 4:7, 8) Basi padayon nga makarawat an baraan nga espiritu, dapat diri ta liwat ‘tamayon an mga tagna.’ (1 Tes. 5:20) Hini nga bersikulo, “an mga tagna” nagtutudlok ha mga mensahe nga iginhahatag han Dios pinaagi han iya espiritu, upod na an parte ha adlaw ni Jehova ngan an pagkaimportante gud han aton panahon. Diri kita naghuhunahuna nga ito nga adlaw, o an Armagedon, diri mahitatabo ha aton panahon. Lugod, ginpapadagmit naton an pag-abot hito, o ginhuhunahuna ta ito pirme, pinaagi ha pagpabilin nga busy ha “mga buhat han debosyon ha Dios” kada adlaw.—2 Ped. 3:11, 12.

15. Paonan-o ta malilikyan nga malimbongan han sayop nga impormasyon ngan propaganda han mga demonyo? (1 Tesalonica 5:21)

¹⁵ Diri na maiha, an mga nakontra ha Dios magdideklara: “Kamurayawan ngan kasigurohan!” (1 Tes. 5:3) Mapupuno an tuna han mga propaganda nga giniyahan han mga demonyo salit malilimbongan an kadam-an. (Pah. 16:13, 14) Kumusta man kita? Diri kita malilimbongan kon ‘sisiguruhon ta an ngatanan nga butang.’ (Basaha an 1 Tesalonica 5:21.) An Griego nga pulong nga iginhubad nga “siguroha” gin-gamit may kalabotan ha pagtesting ha presyoso nga mga metal. Salit angay ta siguruhon kon tinuod ba an aton nababatian o nababasa. Importante ito ha mga taga-Tesalonica hadto, ngan magigin mas importante ito ha aton samtang nagtitikahirani an daku nga kasakitan. Imbes nga basta la tumuod ha ginsisiring han iba, gin-gagamit ta an aton abilidad ha paghunahuna basi ikompara an aton nababasa o nababatian ha kon ano an ginsisiring han Biblia ngan han organisasyon ni Jehova. Kon ginbubuhat ta ito, diri kita malilimbongan han bisan ano nga propaganda o taktika han mga demonyo.—Prob. 14:15; 1 Tim. 4:1.

16. Ano an aton sigurado nga paglaom, ngan ano an aton determinasyon?

¹⁶ Sugad nga grupo, maaram kita nga an katawohan ni Jehova makakatalwas ha daku nga kasakitan. Pero sugad nga indibiduwal, diri kita maaram kon ano an mahitatabo ha aton. (San. 4:14) Kondi makatalwas man kita ha daku nga kasakitan o mamatay antes hito, babalosan kita hin kinabuhi nga waray kataposan kon magpapabilin kita nga matinumanon. An mga dinihogan makakaupod han Kristo ha langit. An iba nga mga karnero maukoy ha paraiso nga tuna. Hinaot magpokus kita ngatanan ha aton makalilipay nga paglaom ngan padayon nga magin andam para ha adlaw ni Jehova!