1-2. Pariho kan Lot, ano nga problema an gin-aatubang han mga Kristiano yana?

 MAY kalabotan ha mga suruklan ha moral hini nga kalibotan, gin-aabat naton an pariho han gin-abat han matadong nga hi Lot. “Nasakit [hiya] hinduro tungod han mapasiparahon nga panggawi han matinalapason nga katawohan,” kay maaram hiya nga an aton langitnon nga Amay nangangalas ha maraot nga panggawi. (2 Ped. 2:7, 8) An kahadlok ngan gugma ha Dios nagpagios kan Lot nga diri subaron an hamubo nga moralidad han mga tawo nga nakapalibot ha iya. Kita liwat napapalibotan han mga tawo nga gutiay la an respeto o waray gud respeto ha mga suruklan ni Jehova ha moral. Bisan pa hito, makakapabilin kita nga limpyo ha moral kon titipigan ta an aton gugma ha Dios ngan magkakaada angayan nga kahadlok ha iya.—Prob. 14:2.

² Para mabuhat ito, hi Jehova nagtatagana hin mahigugmaon nga pagdasig pinaagi han libro han Proberbios. An ngatanan nga Kristiano, lalaki ngan babaye, batan-on ngan lagas, makakapahimulos gud ha maaramon nga sagdon dida hito.

3. Sumala ha Proberbios 17:3, ano an usa nga rason kon kay ano nga kinahanglan ta protektaran an aton kasingkasing? (Kitaa liwat an piktyur.)

³ An usa nga importante nga rason nga protektaran an aton simboliko nga kasingkasing tungod kay gin-uusisa ito ni Jehova. Nagpapasabot ini nga nakikita niya an diri nakikita han iba ngan nakilala hiya kon hin-o gud kita. (Basaha an Proberbios 17:3.) Hihigugmaon kita niya kon pupun-on ta an aton hunahuna han iya kinaadman nga naghahatag hin kinabuhi. (Juan 4:14) Salit diri kita madadaot han maraot nga moralidad ngan kabuwaan ni Satanas ngan han iya kalibotan. (1 Juan 5:18, 19) Kon nagigin mas  duok kita kan Jehova, naghihilarom an aton gugma ngan respeto ha iya. Tungod kay diri ta karuyag nga masakitan an aton Amay, mangangalas kita bisan ha paghunahuna pa la nga magbuhat hin sala. Kon nasusulay kita ha pagbuhat hin sayop, pakianhan ta an aton kalugaringon, ‘Kay ano nga tutuyoon ko nga pasakitan an Usa nga nagpakita ha akon hin daku gud nga gugma?’—1 Juan 4:9, 10.

4. Paonan-o an kahadlok kan Jehova nagprotektar ha usa nga sister nga diri magpadara ha pagsulay?

⁴ Hi Marta, usa nga sister ha Croatia nga ginsulay nga magbuhat hin imoralidad, nagsiring: “Nakurian ako paghunahuna hin tama ngan pagpugong han hingyap nga ma-enjoy an temporaryo nga kalipay tungod han pagbuhat hin sala. Pero an kahadlok kan Jehova nagprotektar ha akon.” b Paonan-o? Hi Marta nagsiring nga iya ginpamalandong an mga resulta han pagbuhat hin imoralidad. Mahihimo ta liwat ito. An pinakamaraot nga resulta, mapapasubo ta hi Jehova ngan diri na kita magigin kaapi ha mga magsisingba ha iya ha waray kataposan.—Gen. 6:5, 6.

5. Ano an imo mahibabaroan ha eksperyensya ni Leo?

⁵ Kon may kahadlok kita kan Jehova, diri gud kita makikigsangkay hadton nagbubuhat hin magraot. Hi Leo, nga taga-Congo, nahibaro hito nga leksyon. Upat ka tuig katapos han iya bawtismo, nagkaada hiya maraot nga kasangkayan. Naghunahuna hiya nga basta diri hiya mismo an nagbubuhat hin magraot, diri hiya nakakasala kan Jehova. Pero waray pag-iha, naimpluwensyahan nira hiya nga maghubog ngan magbuhat hin imoralidad. Katapos, ginhunahuna niya an igintutdo han iya Kristiano nga mga kag-anak ngan an kalipay niya hadto han nag-aalagad pa hiya. Ano an resulta? Nakapanhunahuna hiya hin maopay. Ha bulig han mga tigurang, binalik hiya kan Jehova. Yana, malipayon hiya nga nag-aalagad sugad nga tigurang ngan espesyal payunir.

6. Ano an duha nga simboliko nga babaye an hihisgotan ta yana?

 ⁶ Hisgotan ta an Proberbios kapitulo 9, diin mababasa naton an parte han kinaadman ngan kalurongan, nga ginsisimbolohan han duha nga babaye. (Ikompara an Roma 5:14; Galacia 4:24.) Samtang ginbubuhat ta ito, tigamni nga an kalibotan ni Satanas mahilig gud ha seksuwal nga imoralidad ngan pornograpiya. (Efe. 4:19) Salit importante nga padayon ta nga kultibaron an kahadlok ha Dios ngan likyan an maraot. (Prob. 16:6) Salit kita ngatanan, lalaki man o babaye, makakapahimulos ha igintututdo hini nga kapitulo. Iginhulagway an duha nga babaye sugad nga nag-iimbitar ha waray eksperyensya—hadton “waray maopay nga panhunahuna.” An tagsa ha ira sugad hin nasiring, ‘Pakadi ha balay ngan kaon.’ (Prob. 9:1, 5, 6, 13, 16, 17) Pero daku an kaibahan ha magigin resulta ha tagsa nga makarawat han imbitasyon.

7. Sumala ha Proberbios 9:13-18, ano an mahitatabo hadton nakarawat han imbitasyon han lurong nga babaye? (Kitaa liwat an piktyur.)

⁷ Hunahunaa an imbitasyon han “lurong nga babaye.” (Basaha an Proberbios 9:13-18.) Diri hiya nag-aalang pag-imbitar hadton waray maopay nga panhunahuna, ‘Pakadi’ ngan kaon. Ano an resulta? “Aadto didto an mga patay.” Bangin mahinumdoman mo an pariho nga simboliko nga mga pulong ha nahiuna nga bahin han Proberbios. Ginpahamangnoan kita parte han “makihilawason nga babaye” ngan “imoral nga babaye.” Ginsidngan kita: “An iya balay naunlod ngadto ha kamatayon.” (Prob. 2:11-19) An Proberbios 5:3-10 may pahamangno parte ha usa pa nga “makihilawason nga babaye” nga an “mga tiil nalusad ngadto ha kamatayon.”

8. Ano nga desisyon an kinahanglan ta buhaton?

⁸ Adton nakakabati ha “lurong nga babaye” kinahanglan magdesisyon: Kakarawaton ba nira an imbitasyon o diri? Bangin kita liwat kinahanglan magdesisyon. Kon ginsusulay kita ha pagbuhat hin seksuwal nga imoralidad o pagkita hin pornograpiya, sugad han iginpapakita ha media ngan ha Internet, ano an imo bubuhaton?

9-10. Ano an pipira nga rason nga angay ta likyan an seksuwal nga imoralidad?

⁹ May mag-opay gud nga rason nga angay ta likyan an pagbuhat hin seksuwal nga imoralidad. Iginhulagway an “lurong nga babaye” sugad nga nasiring: “Matam-is an kinawat nga tubig.” Ano an “kinawat nga tubig”? Ha Biblia, an pag-sex han mag-asawa iginpapariho ha makarepresko nga tubig. (Prob. 5:15-18) Puydi ma-enjoy han bana ngan asawa an pakig-sex kon legal hira nga mag-asawa. Pero daku an kaibahan han “kinawat nga tubig.” Mahimo ito magtudlok ha igindidiri nga seksuwal nga imoralidad. An mga nagbubuhat  hin imoralidad agsob nga igintatago ito ha iba, pariho ha usa nga kawatan. An “kinawat nga tubig” baga hin matam-is kon an mga nagbubuhat hito naghuhunahuna nga waray mahibabaro han ira ginbubuhat. Makasurubo gud ito! Nakikita ni Jehova an ngatanan. Waray na gud mas mapait pa kay ha mawad-an han iya pag-uyon, salit waray gud “matam-is” hiton makasurubo nga panhitabo. (1 Cor. 6:9, 10) Pero may-ada pa iba nga resulta.

¹⁰ An seksuwal nga imoralidad mahimo magresulta hin kaarawdan, pag-abat hin kawaray-pulos, diri ginlalaoman nga pagburod, ngan pagkabungkag han pamilya. Salit maaramon nga diri karawaton an imbitasyon han lurong nga babaye. Labot pa han espirituwal nga kamatayon, damu nga imoral nga tawo an nagkakasakit nga nagriresulta hin temprano nga literal nga kamatayon. (Prob. 7:23, 26) An kataposan han bersikulo 18 han kapitulo 9 nasiring: “An iya mga bisita aadto ha kahiladman han Lubnganan.” Pero kay ano nga damu an nakarawat han iya imbitasyon nga nagriresulta hin trahedya?—Prob. 9:13-18.

11. Kay ano nga nakakadaot gud an pagkita hin pornograpiya?

¹¹ An usa nga komon nga bitik amo an pornograpiya. An iba naghuhunahuna nga diri nakakadaot an pagkita hin pornograpiya. Ha kabaliktaran, an pornograpiya nakakadaot, nakakawara han dignidad, ngan nakakaadik. An maglaw-ay nga piktyur nagpapabilin ha hunahuna; makuri ito makalimtan. Labot pa hito, an pornograpiya diri nagpapatay han sayop nga mga hingyap, kondi nagpapalarab la lugod hito. (Col. 3:5; San. 1:14, 15) Oo, damu han nagkikita hin pornograpiya an nakakabuhat hin imoralidad.

12. Paonan-o naton iginpapakita nga ginlilikyan ta an mga piktyur nga nakakapukaw hin imoral nga hingyap?

¹² Sugad nga mga Kristiano, ano an dapat ta buhaton kon tigda nga makakita kita hin malaw-ay nga piktyur? Dapat lumingiw kita dayon. Mabubuligan kita nga buhaton ito kon hihinumdoman ta nga an aton presyoso nga panag-iya amo an aton relasyon kan Jehova. Ha totoo la, bisan an mga piktyur nga diri man malaw-ay bangin makapukaw hin imoral nga mga hingyap. Kay ano nga dapat ta ito likyan? Kay diri naton karuyag maghimo hin bisan gutiay nga pitad ngadto ha pakabuhat hin pag-adulteryo ha aton kasingkasing. (Mat. 5:28, 29) Hi David nga usa nga tigurang ha Thailand nagsiring: “Napakiana ako ha akon kalugaringon: ‘Bisan kon diri maglaw-ay ito nga piktyur, malilipay ba hi Jehova kon magkikinita ako hito?’ An sugad hini nga pangatadongan nabulig ha akon nga gumios hin maaramon.”

13. Ano an nabulig ha aton nga gumios hin maaramon?

¹³ An pagkultibar hin angayan nga kahadlok nga mapasubo hi Jehova nabulig ha aton nga gumios hin maaramon. An kahadlok ha Dios amo an “tinikangan,” o pundasyon, “han kinaadman.” (Prob. 9:10) Igin-ilustrar ini ha positibo nga paagi ha tinikangan han Proberbios kapitulo 9, diin mababasa ta an mahitungod ha usa pa nga simboliko nga babaye nga gintawag nga “tinuod nga kinaadman.”

14. Ano an naiiba nga imbitasyon ha Proberbios 9:1-6?

¹⁴ Basaha an Proberbios 9:1-6. Mababasa ta dinhi an usa nga imbitasyon tikang kan Jehova, an aton Maglalarang ngan gintitikangan han ngatanan nga kinaadman. (Prob. 2:6; Roma 16:27) Dinhi, gin-uunabi an daku nga balay nga may pito nga harigi. Nag-iilustrar ini nga hi Jehova mahinatagon ngan ginkakarawat niya an ngatanan nga naruruyag pag-aplikar han iya kinaadman.

15. Ano an igin-aaghat ha aton han Dios?

¹⁵ Hi Jehova mahinatagon ngan hura nga nagtatagana. Ini nga mga kalidad nakikita ha “tinuod nga kinaadman,” nga igin-iilustrar sugad  nga babaye ha Proberbios kapitulo 9. An rekord nag-uunabi nga ginpreparar hin maopay hinin simboliko nga babaye an iya karne, ginbutangan hin halo an iya bino, ngan gin-andam an lamesa ha iya balay. (Prob. 9:2, ftn.) Dugang pa, sumala ha bersikulo 4 ngan 5: “Nasiring hiya [an tinuod nga kinaadman] ha tawo nga waray maopay nga panhunahuna: ‘Kadi, kaona an akon tinapay.’” Kay ano nga dapat naton karawaton an imbitasyon hini nga babaye? Karuyag ni Jehova nga magin maaramon ngan talwas an iya mga anak. Diri niya karuyag nga mag-antos kita tungod han sayop nga desisyon, sugad han kasubo ngan padayon nga kakonsensya. Salit “nagtitipig hiya hin praktikal nga kinaadman para ha magtadong.” (Prob. 2:7) Kon may-ada kita angayan nga kahadlok kan Jehova, karuyag naton nga lipayon hiya. Namamati kita ha iya maaramon nga sagdon, ngan nalilipay kita nga sundon ito.—San. 1:25.

16. Paonan-o an kahadlok ha Dios nakabulig kan Alain nga makahimo hin maaramon nga desisyon, ngan ano an resulta?

¹⁶ Pansina kon paonan-o an kahadlok ha Dios nakabulig kan Alain nga makahimo hin maaramon nga desisyon. Ini nga tigurang ngan titser nagsiring: “Para ha akon mga katrabaho, an maglaw-ay nga salida usa la nga klase hin edukasyon parte ha sex.” Pero waray malimbongi hi Alain. Hiya nagsiring: “Tungod han kahadlok ha Dios, marig-on ako nga nagdumiri ha pagkita hito nga mga salida. Iginsumat ko liwat ha akon mga katrabaho an rason.” Ginsusunod niya an sagdon han “tinuod nga kinaadman” nga ‘lumakat hin diretso ha dalan han pagsabot.’ (Prob. 9:6) Naimpres gud an pipira nga igkasi-titser ni Alain tungod han iya pagin marig-on, salit nag-aaram na hira yana ha Biblia ngan natambong ha mga katirok.

17-18. Ano nga mga bendisyon an napapahimulsan hadton nakarawat han imbitasyon han “tinuod nga kinaadman,” ngan ano an ira ginpapamulat? (Kitaa liwat an piktyur.)

¹⁷ Gin-gamit ni Jehova an ehemplo han duha nga simboliko nga babaye basi ipakita ha aton kon paonan-o kita magkakaada makalilipay nga kabubuwason. Adton nakarawat han imbitasyon han maaringasa ngan “lurong nga babaye” nakapokus ha pag-enjoy han “matam-is” ngan patago nga mga kalipayan. Ha totoo la, nagkikinabuhi hira nga diri ginhuhunahuna an mga resulta hito. Mahingangadto hira ha “kahiladman han lubnganan.”—Prob. 9:13, 17, 18.

¹⁸ Daku gud an kaibahan hadton nakarawat han imbitasyon han “tinuod nga kinaadman”! An iya mga bisita nag-i-enjoy yana hin hura nga espirituwal nga pagkaon nga igin-andam hin maopay ngan masustansya. (Isa. 65:13) Pinaagi kan propeta Isaias, hi Jehova nagsiring: “Pamati kamo hin maopay ha akon, ngan kaon hin maopay nga pagkaon, ngan malilipay gud kamo ha  matambok gud nga pagkaon.” (Isa. 55:1, 2) Nahibabaro kita nga higugmaon an ginhihigugma ni Jehova ngan kangalasan an iya ginkakangalasan. (Sal. 97:10) Ngan nalilipay kita nga imbitaron an iba nga magpahimulos ha “tinuod nga kinaadman.” Sugad hin ginsusugo kita nga “magtawag tikang ha higtaas nga mga lugar ha bawbaw han syudad: ‘Pakadia an bisan hin-o nga waray eksperyensya.’” Diri la para yana an mga benepisyo ha aton ngan ha mga nakarawat han imbitasyon. Nagpapadayon ito ngan naghahatag ha aton hin higayon nga “mabuhi” ha waray kataposan samtang ‘naglalakat kita hin diretso ha dalan han pagsabot.’—Prob. 9:3, 4, 6.

19. Uyon ha Eclesiastes 12:13, 14, ano an dapat ta magin determinasyon? (Kitaa liwat an kahon nga “ An Kahadlok ha Dios Mapulsanon ha Aton.”)

¹⁹ Basaha an Eclesiastes 12:13, 14. Hinaot padayon nga panalipdan han kahadlok ha Dios an aton kasingkasing ngan buligan kita nga magpabilin nga limpyo ha moral ngan espirituwal hinin maraot nga kataposan nga mga adlaw. Iton angayan nga kahadlok magpapagios ha aton nga padayon nga imbitaron an pinakadamu nga tawo tubtob nga posible nga bilngon an “tinuod nga kinaadman” ngan magpahimulos hito.