1-2. Ano an imbitasyon ni Jehova ha iya maunungon nga mga magsiringba?

 ANO an papel ni Jehova ha imo kinabuhi? Bangin sumiring ka, ‘Hi Jehova an akon Amay, akon Dios, ngan akon Sangkay.’ Bangin may nahunahuna ka liwat nga iba pa nga pulong ha paghulagway kan Jehova. Pero ginhuhunahuna mo ba liwat hiya sugad nga nag-iimbitar ha imo?

² Iginpariho ni Hadi David an pakigsangkay ni Jehova ha Iya maunungon nga mga magsiringba ha relasyon han nag-iimbitar ngan ha iya mga bisita. Hiya nagpakiana: “O Jehova, hin-o an puydi magin bisita ha imo tolda? Hin-o an puydi umukoy ha imo baraan nga bukid?” (Sal. 15:1) Tikang hinin giniyahan nga mga pulong, nahibaroan ta nga mahimo kita magin mga bisita ni Jehova—magin iya kasangkayan. Diri ba makaruruyag gud ito nga imbitasyon tikang kan Jehova?

KARUYAG NI JEHOVA NGA MAGIN MGA BISITA KITA NIYA

3. Hin-o an siyahan nga bisita ni Jehova, ngan ano an gin-abat nira ha kada tagsa?

³ Antes larangon ni Jehova an ngatanan nga butang, nag-uusahan la hiya. Pero makausa, gin-imbitar niya an iya suhag nga Anak ha iya simboliko nga tolda. Ngan nalipay gud hi Jehova ha pagbuhat hito. An Biblia nagsusumat nga hi Jehova ‘nalilipay gud’ ha iya Anak. Tungod hito, an iya siyahan nga bisita, ‘nalipay ha atubangan ni Jehova ha ngatanan nga panahon.’—Prob. 8:30.

4. Hin-o pa an nagin mga bisita ni Jehova ha iya tolda?

⁴ Katapos, ginlarang ni Jehova an mga anghel, gin-imbitar hira nga magin iya liwat mga bisita. Gintatawag han Biblia an  mga anghel nga mga “anak han Dios” ngan iginpapakita hito nga malipayon hira kaupod ni Jehova. (Job 38:7; Dan. 7:10) Ha sulod hin maiha nga panahon, an pakigsangkay han Dios limitado la hadton kaupod niya ha langit. Ha urhi, ginlarang niya an mga tawo, ngan hira liwat mahimo magin iya mga bisita. An pipira hito nga bisita amo hira Enoc, Noe, Abraham, ngan Job. Adton tinuod nga magsiringba iginhulagway sugad nga mga sangkay han Dios, o an mga naglakat “upod han tinuod nga Dios.”​—Gen. 5:24; 6:9; Job 29:4; Isa. 41:8.

5. Ano an aton mahibabaroan ha tagna nga mababasa ha Ezekiel 37:​26, 27?

⁵ Tikang pa hadto, padayon nga gin-iimbitar ni Jehova an iya kasangkayan nga magin iya mga bisita. (Basaha an Ezekiel 37:​26, 27.) Pananglitan, ha tagna ni Ezekiel nahibaroan ta nga karuyag gud han Dios nga magkaada duok nga relasyon ha iya an iya maunungon nga mga magsiringba. Nagsasaad hiya nga maghihimo hiya “ha ira hin kasabotan para ha kamurayawan.” Ito nga tagna nagtutudlok ha panahon nga adton may langitnon nga paglaom ngan adton may tunan-on nga paglaom magkakaurosa na ha iya simboliko nga tolda sugad nga “usa nga panon.” (Juan 10:16) Nahitatabo na ito yana!

GIN-AATAMAN KITA HAN DIOS HAIN MAN KITA

6. Paonan-o an usa nagigin bisita ha tolda ni Jehova, ngan diin makikita an Iya tolda?

⁶ Ha panahon han Biblia, an tolda usa nga lugar nga puydi pahuwayan ngan nakakaprotektar tikang ha sirak ngan uran. An bisita hito nga tolda makakalaom nga aatamanon hiya hin maopay. Kon igdedikar naton an aton kinabuhi kan Jehova, magigin mga bisita kita niya ha iya simboliko nga tolda. (Sal. 61:4) Nagpapahimulos kita ha abunda nga espirituwal nga pagkaon ngan ha pakig-upod ha iba nga nagin mga bisita liwat ni Jehova. An Iya simboliko nga tolda diri kay aada la ha usa nga lugar. Bangin nakakadto ka na ha iba nga nasud, ngan tinambong ha usa nga espesyal nga kombensyon, diin nakilala mo an iba pa nga malipayon nga aadto ha sulod ha tolda han Dios. An tolda ni Jehova aadto hain man an iya matinumanon nga mga surugoon.​—Pah. 21:3.

7. Kay ano nga makakasiring kita nga an magtinumanon nga namatay mga bisita la gihap ha tolda ni Jehova? (Kitaa liwat an piktyur.)

⁷ Kumusta naman adton matinumanon nga namatay? Mga bisita la ba gihap hira ha tolda ni Jehova? Oo! Kay ano nga makakasiring kita hito? Kay nahinunumdoman gud hira ni  Jehova, para ha iya buhi la gihap hira. Hi Jesus nagsiring: “Mahitungod ha pagbuhi han mga patay, bisan hi Moises nag-unabi hito ha asoy may kalabotan ha tunukon nga tanom, han gintawag niya hi Jehova nga ‘an Dios ni Abraham ngan Dios ni Isaac ngan Dios ni Jacob.’ Dios hiya, diri han mga patay, kondi han mga buhi, kay para ha iya hira ngatanan buhi.”​—Luc. 20:​37, 38.

MGA KAPULSANAN NGAN MGA RESPONSABILIDAD

8. Ano an aton napapahimulsan ha pagin bisita ha tolda ni Jehova?

⁸ Sugad la nga an literal nga tolda napapahuwayan ngan nakakaprotektar tikang ha sirak ngan uran, an tolda ni Jehova naghahatag ha iya mga bisita hin proteksyon tikang ha espirituwal nga kadaot ngan kawaray-paglaom. Kon magpapabilin kita nga duok kan Jehova, hi Satanas waray mahihimo nga nagpapadayon nga kadaot ha aton. (Sal. 31:23; 1 Juan 3:8) Ha bag-o nga kalibotan, padayon nga puproteksyonan ni Jehova an iya matinumanon nga kasangkayan diri la tikang ha espirituwal nga kadaot kondi pati liwat ha kamatayon.​—Pah. 21:4.

9. Ano an ginlalaoman ni Jehova nga bubuhaton han iya mga bisita?

⁹ Daku gud nga dungog nga magin bisita ha tolda ni Jehova—nga mapahimulsan an personal nga nagpapadayon nga relasyon ha iya. Ano an dapat naton buhaton kon karuyag naton nga padayon kita niya nga magin bisita? Kon gin-iimbitar ka ha usa nga balay, karuyag mo mahibaroan kon ano an mga ginlalaoman han nag-imbitar ha imo. Pananglitan, bangin naglalaom hiya nga huhukason mo an imo sapatos antes sumulod, ngan andam ka nga sundon ito. Ha pariho nga paagi, karuyag gud naton mahibaroan kon ano an mga ginkikinahanglan ni Jehova hadton naruruyag nga padayon nga magin bisita niya ha iya tolda. An aton gugma kan Jehova nagpapagios ha aton nga buhaton an ngatanan nga aton makakaya basi “bug-os nga mapalipay hiya.” (Col. 1:10) Ngan samtang ginhuhunahuna naton hi Jehova sugad nga aton Sangkay, nasasantop ta nga hiya liwat an aton Dios ngan Amay, nga angay kumarawat han aton pagrespeto. (Sal. 25:14) Dapat diri gud naton ito hingalimtan ngan pirme magkaada hilarom nga respeto ha iya. Mabulig ito ha aton nga malikyan an panggawi nga makakapasubo ha iya. Sigurado nga ginhihingyap naton nga ‘maglakat nga mapainubsanon’ kaupod han aton Dios.​—Mic. 6:8.

HI JEHOVA WARAY GINPAUROG HA KAMINGAWAN

10-11. Paonan-o an paagi han pagtratar ni Jehova ha mga Israelita ha kamingawan han Sinai nagpapakita nga waray hiya ginpapaurog?

¹⁰ Hi Jehova waray ginpapaurog ha iya mga bisita. (Roma 2:11) May mahibabaroan kita ha pagin waray ginpapaurog ni Jehova ha paagi han iya pagtratar ha mga Israelita ha kamingawan han Sinai.

¹¹ Katapos talwason ni Jehova an iya katawohan ha pagkauripon ha Ehipto, nagpili hiya hin mga saserdote basi mag-alagad ha tabernakulo. An mga Levita gintokahan basi bumulig ha mga buruhaton may kalabotan ha baraan nga tolda. Mas gin-ataman ba ni Jehova adton nag-alagad ha tabernakulo o an mga nag-ukoy hirani hito? Waray! Hi Jehova waray gud ginpapaurog.

12. Paonan-o iginpakita ni Jehova nga waray hiya ginpaurog ha paagi han iya pagtratar ha iya bag-o nga naporma nga nasud? (Exodo 40:38) (Kitaa liwat an piktyur.)

¹² An tagsa nga Israelita mahimo magin duok nga sangkay ni Jehova, nag-aalagad man hira ha tabernakulo o diri ngan naukoy man hira ha hirayo o hirani hito. Pananglitan, ginsiguro ni  Jehova nga an bug-os nga nasud makakakita han milagroso nga harigi nga kalayo ngan harigi nga dampog nga nakapwesto ha bawbaw han tabernakulo. (Basaha an Exodo 40:38.) Kon an dampog nabalhin na ha bag-o nga direksyon, bisan adton pinakahirayo ha tabernakulo makakakita hito, makakag-impaki han ira mga gamit, makakagdismantol han ira mga tolda, ngan makakadungan hira ha bug-os nga nasud. (Num. 9:​15-23) An ngatanan makakabati han makusog nga tunog han duha nga silber nga trumpeta nga nagpapasabot ha ngatanan nga kinahanglan na nira lumarga. (Num. 10:2) Klaro nga an pag-ukoy hirani ha tabernakulo diri nagpapasabot han pagkaada mas duok nga pakigsangkay kan Jehova. Lugod, an ngatanan nga aada ha bag-o nga ginporma nga nasud ni Jehova mahimo magin bisita Niya ngan makakasarig han Iya instruksyon ngan proteksyon. Yana liwat, hain man kita nga parte han kalibotan naukoy, makakapahimulos kita han gugma, pag-ataman, ngan proteksyon ni Jehova.

MODERNO NGA MGA EHEMPLO NGA HI JEHOVA WARAY GINPAPAUROG

13. Ano an usa nga paagi nga ginpapakita ni Jehova yana nga waray hiya ginpapaurog?

¹³ An pipira han katawohan han Dios yana naukoy hirani ha world headquarters o ha branch office han mga Saksi ni Jehova. Ngani, an iba nag-aalagad dida hini nga mga pasilidad. Salit an sugad ha ira nakakabulig ha damu nga buruhaton nga ginhihimo hini nga mga lokasyon ngan personal nga nakakaupod an mga nangunguna. An pipira nag-aalagad sugad nga nagbibiyahe nga mga paramangno o ha iba pa nga klase han espesyal nga bug-os-panahon nga pag-alagad. Kon usa ka han kadam-an nga waray makapribilehiyo hin sugad, makakasarig ka nga bisita ka la gihapon ni Jehova, ngan hinigugma niya an ngatanan niya nga bisita. Ngan an tagsa ha ira personal gud nga gin-aataman niya. (1 Ped. 5:7) An ngatanan han katawohan han Dios nakakakarawat han espirituwal nga pagkaon, instruksyon, ngan proteksyon nga ira kinahanglan.

14. Ano pa an usa nga ehemplo nga hi Jehova waray ginpapaurog?

 ¹⁴ An usa pa nga ehemplo nga hi Jehova waray ginpapaurog amo an iya pagsiguro nga an ngatanan nga tawo ha bug-os nga kalibotan makabasa ha Biblia. An Baraan nga Kasuratan orihinal nga iginsurat ha tulo nga linggwahe: Hebreo, Aramaico, ngan Griego. Adton nakakabasa ba han orihinal nga mga linggwahe han Biblia may-ada mas duok nga relasyon kan Jehova kay hadton diri? Syempre, diri gud.​—Mat. 11:25.

15. Ano an nagpapamatuod nga hi Jehova waray ginpapaurog? (Kitaa liwat an piktyur.)

¹⁵ Diri kita gin-iimbitar ni Jehova sugad nga iya kasangkayan tungod la kay mga edukado gud kita o maaram kita magyakan han orihinal nga mga linggwahe han Biblia. Imbes nga ihatag ni Jehova an iya kinaadman ha mga edukado gud la, ginsiguro niya nga magkaada hito an ngatanan nga tawo ha bug-os nga kalibotan, edukado man hira o diri. An iya giniyahan nga Pulong, an Biblia, naihubad na ha yinukot nga linggwahe; salit an katawohan ha bug-os nga kalibotan makakapahimulos han mga katutdoan hito ngan mahibabaro kon paonan-o hira magigin mga sangkay niya.​—2 Tim. 3:​16, 17.

MAGPABILIN NGA “GINKAKARAWAT” NI JEHOVA

16. Sumala ha Buhat 10:​34, 35, paonan-o kita makakapabilin nga ginkakarawat ni Jehova?

¹⁶ Daku gud nga pribilehiyo nga i-welcome kita ni Jehova ha iya simboliko nga tolda sugad nga iya mga bisita. Ha ngatanan nga nag-iimbitar nga aton makikilala, hiya an pinakabuotan, pinakamahigugmaon, ngan pinakamaabiabihon. Dugang pa, waray hiya ginpapaurog, ginwi-welcome niya kita ngatanan hain man kita nga lugar, anoman an aton pagkatawo, edukasyon, lahi, tribo, edad, ngan lalaki man kita o babaye. Pero ginkakarawat la ni Jehova sugad nga iya mga bisita adton mga nagsusunod ha iya.​—Basaha an Buhat 10:​34, 35.

17. Diin kita makakabiling hin dugang nga impormasyon parte ha pagin bisita ha tolda ni Jehova?

¹⁷ Sugad han nakarekord ha Salmo 15:​1, hi David nagpakiana: “O Jehova, hin-o an puydi magin bisita ha imo tolda? Hin-o an puydi umukoy ha imo baraan nga bukid?” An salmista gin-giyahan ha pagbaton hito nga mga pakiana. Hihisgotan ha sunod nga artikulo an pipira nga espisipiko nga butang nga kinahanglan ta buhaton basi magpabilin nga inuuyonan ni Jehova.