1. Ha ano iginpariho ni David hi Jehova, sugad han nakarekord ha Salmo 18:46?

 NAGKIKINABUHI kita ha kalibotan nga may diri ginlalaoman nga mga problema nga makakapakuri ha aton—o makakagbag-o pa ngani hin bug-os—han aton kinabuhi. Mapasalamaton gud kita nga makakaaro kita hin bulig kan Jehova nga Dios! Ha naglabay nga artikulo, napahinumdoman kita nga hi Jehova an buhi nga Dios ngan andam hiya bumulig pirme ha aton. Kon nakakarawat naton an iya bulig, ito nga eksperyensya nagpapasarig ha aton nga “hi Jehova buhi!” (Basaha an Salmo 18:46.) Pero katapos ni David iyakan ito, gintawag niya nga “akon Bato” an Dios. Kay ano nga iginpariho niya hi Jehova, nga buhi nga Dios, ha waray kinabuhi nga butang—ha usa nga bato?

2. Kay ano nga dapat kita magin interesado han gintawag ni David hi Jehova nga “akon Bato”?

² Hini nga artikulo, hihisgotan naton kon kay ano nga iginpariho hi Jehova ha usa nga bato ngan kon ano an igintututdo ha aton hito nga metapora mahitungod ha iya. Mahibabaroan liwat naton kon paonan-o kita makakasarig ha iya sugad nga aton Bato. Ha urhi, hihisgotan naton an mga paagi kon paonan-o ta masusubad an sugad-bato nga mga kalidad ni Jehova.

KON KAY ANO NGA HI JEHOVA USA NGA BATO

3. Ha ano agsob nga ginagamit han Biblia an pulong nga “bato”? (Kitaa an piktyur.)

³ Ginagamit han Biblia an termino nga “bato” basi buligan kita nga masabtan an pipira han mga kalidad ni Jehova. Agsob ito makita ha mga teksto nga nagdadayaw ha iya sugad nga Dios nga waray katupong. An siyahan nga pagkaunabi kan Jehova sugad nga “an Bato” mababasa ha Deuteronomio 32:4. Ha pag-ampo ni Hana, hiya nagsiring nga “waray bato nga pariho ha imo, amon Dios.” (1 Sam. 2:2) Gintawag ni Habakuk hi Jehova nga “akon Bato.” (Hab. 1:12) Gintawag han nagsurat han Salmo 73 an Dios  nga “an bato han akon kasingkasing.” (Sal. 73:26) Ngan gintawag pa ngani ni Jehova an iya kalugaringon sugad nga bato. (Isa. 44:8) Hisgotan naton an tulo nga sugad-bato nga kalidad ni Jehova nga iginpakita ngan hibaroi kon paonan-o naton hi Jehova mahihimo nga “aton Bato.”​—Deut. 32:31.

4. Paonan-o hi Jehova usa nga arayopan? (Salmo 94:22)

⁴ Hi Jehova usa nga arayopan. Sugad la nga an daku nga bato mahimo magin tagoan han usa tikang ha peligroso nga bagyo, hi Jehova nagpapanalipod ha aton kon naatubang kita hin mga sitwasyon nga naninelikado kita. (Basaha an Salmo 94:22.) Iya kita ginpuproteksyonan tikang ha permanente nga kadaot. Ngan nagsasaad pa ngani hiya: Ha tiarabot iya wawad-on an bisan ano nga nakakapabaraka o nakakapaantos ha aton.​—Ezek. 34:​25, 26.

5. Paonan-o hi Jehova mahimo naton magin sugad-bato nga Arayopan?

⁵ An usa nga paagi nga ginhihimo naton nga sugad-bato nga Arayopan hi Jehova amo an pag-ampo ha iya. Kon nag-aampo kita kan Jehova, iginhahatag niya ha aton “an kamurayawan han Dios” nga nagbabantay ha aton kasingkasing ngan hunahuna. (Fil. 4:​6, 7) Pansina an eksperyensya ni Artem, usa nga brother nga napriso tungod han iya pagtoo. Pauroutro hiya nga gin-imbistigar han imbistigador nga nagmaltrato ngan nagtarhog ha iya. “Naiistres gud ako ha kada panahon nga gin-iimbistigar ako. . . . Pirme ako nag-aampo kan Jehova. Naghangyo ako ha iya nga buligan ako nga magpabilin nga kalmado ngan magkaada kinaadman,” siring ni Artem. “Waray gud maglampos ha akon an mga taktika han imbistigador. . . . Ha bulig ni Jehova sugad hin natindog ako ha luyo han bato nga pader.”

6. Kay ano nga pirme kita makakasarig kan Jehova? (Isaias 26:​3, 4)

⁶ Hi Jehova masasarigan. Pariho hin daku nga bato nga diri nababantad, hi Jehova pirme aada para ha aton. Makakasarig kita ha iya kay hiya an “Bato ha kadayonan.” (Basaha an Isaias 26:​3, 4.) Pirme hiya buhi basi tumanon an iya mga saad, pamatian an aton mga pag-ampo, ngan ihatag an bulig nga aton kinahanglan. Makakasarig liwat kita kan Jehova kay maunungon hiya ha mga nag-aalagad ha iya. (2 Sam. 22:26) Diri gud niya hingangalimtan an aton ginbubuhat, ngan pirme hiya magbabalos ha aton.​—Heb. 6:10; 11:6.

7. Ano an aton maieksperyensyahan kon nasarig kita kan Jehova? (Kitaa liwat an piktyur.)

⁷ Ginhihimo naton hi Jehova nga aton Bato kon nasarig kita hin bug-os ha iya. Nasarig kita nga pinaagi ha pagin masinugtanon ha iya bisan ha magkuri nga panahon, magpapahimulos kita. (Isa. 48:​17, 18) Samtang naieksperyensyahan naton an iya bulig, an aton pagsarig ha iya nadudugangan. Salit mas magigin andam kita ha pag-atubang ha mga problema nga hi Jehova la an makakabulig ha aton. Agsob nga ha mga kahimtang nga waray kita maaaroan hin bulig, nasasantop naton nga hi Jehova gud la an masasarigan. “An panahon nga priso ako amo an panahon nga nagkaada ako pinakaduok nga relasyon ha Dios,” siring ni Vladimir. “Nahibaro ako nga mas sumarig kan Jehova kay nag-uusahan la ako ngan diri ko kontrolado an kahimtang.”

8. (a) Kay ano nga makakasiring kita nga hi Jehova diri nagbabag-o? (b) Paonan-o kita nagpapahimulos nga an Dios amo an aton Bato? (Salmo 62:​6, 7)

 ⁸ Hi Jehova marig-on o diri nagbabag-o. Hi Jehova pariho ha usa nga daku hinduro nga bato, o bukid, nga diri nagbabag-o. An iya personalidad ngan katuyoan diri nagbabag-o. (Mal. 3:6) Han nagrebelde hira Adan ngan Eva kan Jehova, waray niya bag-oha an iya katuyoan para ha katawohan. Sugad han iginsurat ni apostol Pablo, “diri [ni Jehova] igninigar an iya kalugaringon.” (2 Tim. 2:13) Nagpapasabot ini nga anoman an mahitabo o buhaton han iba, diri gud babag-uhon ni Jehova an iya mga kalidad, katuyoan, o mga suruklan. Tungod kay hi Jehova diri gud nagbabag-o, maaram kita nga iya kita bubuligan ha magkuri nga panahon ngan iya tutumanon an iya mga saad ha tiarabot.​—Basaha an Salmo 62:​6, 7.

9. Ano an imo nahibaroan ha eksperyensya ni Tatyana?

⁹ Ginhihimo naton hi Jehova nga aton Bato pinaagi ha pagpokus ha kon ano hiya nga klase hin Persona ngan pinaagi ha paghunahuna pirme nga an iya katuyoan diri nagbabag-o. Mabulig ito ha aton nga magpabilin nga kalmado ngan maunungon ha iya ha panahon han mga problema. (Sal. 16:8) Ito an nahitabo han sister nga hi Tatyana, nga na-house arrest tungod han iya pagtoo. “Nag-uusahan la ako,” siring niya. “Ha siyahan, makuri gud adto. Agsob ako manluya.” Pero han nakita niya nga an iya problema konektado kan Jehova ngan ha iya katuyoan, nakabulig ito ha iya nga magin kalmado ngan magkaada kusog basi magpabilin nga matinumanon. Hiya nagsiring: “Nakabulig ini ha akon nga masabtan nga aadi ako hini nga sitwasyon tungod kay hinigugma ko hi Jehova ngan karuyag ko hiya mapalipay. Nakabulig ito ha akon nga diri magpokus ha akon kalugaringon.”

10. Paonan-o hi Jehova mahimo magin aton Bato yana?

¹⁰ Ha diri na maiha, makakaeksperyensya kita hin magkuri gud nga kahimtang, salit labi na gud nga kinahanglan naton sumarig kan Jehova hito nga panahon. Yana na an panahon nga parig-unon an aton pagsarig nga magtatagana hiya anoman an aton kinahanglan basi makailob nga matinumanon. Paonan-o ta ito mahihimo? Basaha an mga rekord ha Biblia ngan an mga eksperyensya han mga Saksi ha moderno nga panahon. Hibaroi kon paonan-o iginpakita han Dios an sugad-bato nga mga kalidad basi buligan an iya mga surugoon. Hunahunaa hin maopay ito nga mga rekord. An pagbuhat hito makakabulig ha imo nga himoon nga imo Bato hi Jehova.

SUBARA AN SUGAD-BATO NGA MGA KALIDAD NI JEHOVA

11. Kay ano nga karuyag naton subaron an sugad-bato nga mga kalidad ni Jehova? (Kitaa liwat an kahon nga “ Goal Para ha Batan-on nga mga Brother.”)

¹¹ Nahisgotan naton kon paonan-o ginpapamatud-an ni Jehova nga pariho hiya hin bato. Yana hihisgotan naman naton kon paonan-o kita makakasubad han iya sugad-bato nga mga kalidad. Kon mas mangangalimbasog kita, mas mapaparig-on naton an aton kabugtoan. Pananglitan, gintagan ni Jesus hi Simon hin ngaran nga Cefas (iginhubad nga “Pedro”), nga nangangahulogan hin “Usa ka Pidaso nga Bato.” (Juan 1:42) Nagpapakita  ini nga liliawon ni Pedro ngan paparig-unon an pagtoo han kongregasyon. An mga tigurang ha kongregasyon iginhulagway sugad nga “lambong han daku gud nga bato.” Nag-iilustrar ini kon paonan-o nira ginpuproteksyonan an aada ha kongregasyon. (Isa. 32:2) Syempre, an kongregasyon nagpapahimulos kon an ngatanan—brother ngan sister—nagsusubad han sugad-bato nga mga kalidad ni Jehova.​—Efe. 5:1.

12. Ihulagway an mga paagi nga mahimo kita magin arayopan han iba.

¹² Magin arayopan. Usahay, mahimo kita makag-offer ha aton kabugtoan hin literal nga arayopan tungod han mga kalamidad, kasamok, o girra. Samtang an mga kahimtang ha “kataposan nga mga adlaw” nagtitikaraot, sigurado nga magkakaada kita mas damu nga oportunidad ha paghatag ha aton kabugtoan han mga butang nga ira kinahanglan. (2 Tim. 3:1) Mahimo liwat naton ihatag ha aton kabugtoan an pagliaw ngan gugma nga ira kinahanglan. An usa nga paagi nga mahihimo naton ito pinaagi ha pagpaabat ha ira nga welcome hira ha Kingdom Hall. Karuyag naton nga an kongregasyon magin lugar han paghigugma ngan pagparig-on. Nagkikinabuhi kita ha mapintas, waray gugma, ngan nakakaistres nga kalibotan. Salit kon an aton kabugtoan natambong ha mga katirok, karuyag naton buhaton an ngatanan nga aton mahihimo basi marepreskohan hira, abaton an gugma ngan seguridad.

13. Paonan-o mahimo magin arayopan an mga tigurang han iba ha panahon han magkuri nga kahimtang? (Kitaa liwat an piktyur.)

¹³ An mga tigurang mahimo magin arayopan hadton aada ha kongregasyon nga nakakaeksperyensya hin literal o simboliko nga mga bagyo. Ha panahon han mga kalamidad ngan medikal nga emergency, an mga tigurang nag-oorganisa dayon hin bulig para ha kabugtoan. Naghahatag liwat hira hin espirituwal nga bulig. An kabugtoan diri nag-aalang pakiistorya ha tigurang nga buotan, may empatiya, ngan andam mamati. Ito nga mga kalidad nabulig ha iba nga abaton nga  hinigugma hira, salit mas masayon para ha ira nga iaplikar an bisan ano nga giya nga basado ha Biblia nga mahimo ihatag han tigurang.​—1 Tes. 2:​7, 8, 11.

14. Paonan-o naton maipapakita nga masasarigan kita?

¹⁴ Magin masasarigan. Karuyag naton sumarig an iba nga mabulig kita ha ira, labi na ha magkuri nga panahon. (Prob. 17:17) Paonan-o kita magkakaada reputasyon ha pagin masasarigan? Mahimo kita mangalimbasog nga ipakita pirme an diosnon nga mga kalidad, sugad han pagtuman han aton mga saad ngan pagbuhat han aton pinakamaopay nga magin eksakto ha oras. (Mat. 5:37) Mahimo liwat kita mag-offer hin praktikal nga bulig kon may nanginginahanglan. Dugang pa, ginsisiguro naton nga matuman hin bug-os an aton mga asaynment uyon ha mga instruksyon nga aton nakarawat.

15. Paonan-o an kongregasyon nagpapahimulos kon an mga tigurang masasarigan?

¹⁵ Paonan-o an kongregasyon nagpapahimulos kon an mga tigurang masasarigan? An mga magwarali naabat nga ginbubuligan gud hira kon masayon la nira makontak an mga tigurang, sugad han ira paramangno han grupo ha pagsangyaw. An mga magwarali naabat liwat nga hinigugma hira kon maaram hira nga an mga tigurang andam ha pagbulig ha ira. Ngan kon iginbabasar  han mga tigurang an ira sagdon ha Biblia ngan ha aton mga publikasyon imbes ha ira kalugaringon nga mga opinyon, an kabugtoan mas nasarig ha ira. An kabugtoan may dugang nga rason nga sumarig ha mga tigurang nga diri nagsusumat ha iba han kompidensyal nga mga butang ngan nagtutuman han ira mga saad.

16. Paonan-o kita nagpapahimulos ngan an iba kon marig-on kita o diri nagbabag-o?

¹⁶ Magin marig-on o diri nagbabag-o. Mahimo kita magin maopay nga impluwensya ha iba kon marig-on kita ha kon ano an tama ngan kon naghihimo kita hin mga desisyon nga basado gud la ha mga prinsipyo ha Biblia. Samtang nag-uuswag kita ha pagtoo ngan ha husto nga kahibaro, mas magigin marig-on kita ha kamatuoran. Makikilala naton an buwa nga mga katutdoan ngan mga ideya nga diri uyon ha panhunahuna ni Jehova, ngan diri kita maiimpluwensyahan hito. (Efe. 4:14; San. 1:​6-8) An aton pagtoo kan Jehova ngan ha iya mga saad nabulig ha aton nga magpabilin nga kalmado kon nakakakarawat hin magraot nga balita. (Sal. 112:​7, 8) Mahimo liwat kita bumulig hadton bangin may gin-aatubang nga mga problema.​—1 Tes. 3:​2, 3.

17. Paonan-o an mga tigurang makakabulig ha iba nga magin kalmado ngan magkaada marig-on nga pagtoo?

¹⁷ An mga tigurang dapat magin kontrolado an pamatasan, maopay an panhunahuna, organisado, ngan makatadunganon. Ini nga kalalakin-an nabulig ha iba nga magin kalmado ngan magkaada marig-on nga pagtoo ngan nagpaparig-on han kongregasyon pinaagi ha ‘pagkapot hin marig-on ha masasarigan nga pulong.’ (Tito 1:9; 1 Tim. 3:​1-3) Pinaagi han ira ehemplo ngan pag-shepherding, an mga tigurang nabulig ha mga magwarali nga magin regular ha mga katirok, pagsangyaw, ngan personal nga pag-aram. Kon an kabugtoan may mga problema nga nakakapabaraka ha ira, iginpapahinumdom ha ira han mga tigurang nga sumarig kan Jehova ngan magpokus ha iya mga saad.

18. Kay ano nga karuyag naton dayawon hi Jehova ngan magin mas duok ha iya? (Kitaa liwat an kahon nga “ Usa nga Paagi Basi Magin Mas Duok kan Jehova.”)

¹⁸ Katapos naton mahisgotan an makaruruyag nga mga kalidad ni Jehova, makakasiring kita han ginsiring ni Hadi David: “Hinaot dayawon hi Jehova nga akon Bato.” (Sal. 144:1) Pirme gud kita makakasarig kan Jehova. Ha bug-os naton nga kinabuhi, bisan tubtob ha kalagas, may rason kita nga makasiring: “Hiya an akon Bato,” nga nasarig nga pirme hiya mabulig ha aton nga mag-uswag ha espirituwal.​—Sal. 92:​14, 15.