1, 2. (a) Isaysay kon kay ano nga seryoso nga desisyon an pagpabawtismo. (b) Ano an kinahanglan siguruhon han usa antes magpabawtismo, ngan kay ano?

BATAN-ON ka ba nga naruruyag magpabawtismo? Kon oo, ito an pinakadaku nga pribilehiyo nga mahimo mo makarawat. Pero sugad han gin-unabi ha nahiuna nga artikulo, seryoso nga desisyon an pagpabawtismo. Nagsisimbolo ito han imo dedikasyon—usa nga seryoso nga saad kan Jehova nga mag-aalagad ka ha iya ha kadayonan pinaagi ha pag-una han iya kaburut-on. Salit, sadang ka magpabawtismo kon hamtong ka na ha paghimo hito nga desisyon, hingyap mo gud nga buhaton ito, ngan nasasabtan mo an kahulogan han dedikasyon.

² Ano man kon diri ka sigurado kon andam ka na magpabawtismo? O bangin karuyag mo na magpabawtismo pero an imo mga kag-anak naghuhunahuna nga kinahanglan mo pa maghulat tubtob nga magin adulto ka na ngan damu na an eksperyensya ha Kristiano nga pagkinabuhi? Anoman an kahimtang, ayaw panluya. Lugod, gamita ini  nga higayon nga mag-uswag ka basi diri mag-iha, mabawtismohan ka. Samtang ginbubuhat mo ito, hunahunaa kon paonan-o ka maghihimo hin mga tumong may kalabotan ha imo (1) gintotoohan, (2) ginbubuhat, ngan (3) apresasyon.

3, 4. Ano nga leksyon an hibabaroan han mga batan-on ha ehemplo ni Timoteo?

³ Hunahunaa ini nga mga pakiana: Kay ano nga natoo ako nga may-ada Dios? Ano an nakakombinse ha akon nga an Biblia giniyahan nga Pulong han Dios? Kay ano nga natoo ako nga an pagsunod ha mga suruklan han Dios mas maopay kay ha pagsunod ha kalibotanon nga pagkinabuhi? Diri katuyoan hini nga mga pakiana nga magruhaduha ka. Lugod, mabulig ini ha imo nga masunod an sagdon ni apostol Pablo: ‘Pamatud-i niyo ha iyo kalugaringon an kaburut-on han Dios nga maopay, hingpit, ngan nakakalipay ha iya.’ (Roma 12:2) Kay ano nga kinahanglan mo ini buhaton?

⁴ Tagda an usa nga ehemplo ha Biblia. Hi Timoteo maaram gud han Kasuratan. ‘Tikang ha iya katawo,’ gintutdoan hiya han iya nanay ngan lola. Bisan pa hini, gin-aghat ni Pablo hi Timoteo: “Padayon nga buhata an mga butang nga imo hinbaroan ngan nakombinse ka nga toohan.” (2 Tim. 3:14, 15) Sumala ha usa nga reperensya, an orihinal nga pulong para ha “nakombinse” nagpapasabot hin “pagin sigurado nga tinuod an usa nga butang.” Nagkinabuhi hi Timoteo uyon ha kamatuoran. Ginkarawat niya an kamatuoran, diri tungod kay ginsidngan hiya han iya nanay ngan lola nga buhaton ito, pero tungod kay napamatud-an niya ito ngan kombinsido hiya hito.—Basaha an Roma 12:1.

5, 6. Kay ano nga importante nga mahibaro ka paggamit han imo “abilidad ha paghunahuna” samtang bata pa?

⁵ Kumusta ka man? Bangin maiha ka na nga maaram han mga kamatuoran ha Biblia. Kon sugad, kay ano nga diri usisahon hin maopay an mga rason han imo mga gintotoohan? Magpaparig-on ito han imo pagtoo ngan mabulig ha imo nga diri madara han impluwensya han imo mga kaedad, propaganda hini nga kalibotan, o bisan han imo mga pagbati.

⁶ An paghibaro ha paggamit han imo “abilidad ha paghunahuna” samtang bata pa mabulig ha imo nga mabaton an imo mga kaedad kon magpakiana hira: ‘Kay ano nga sigurado ka nga may-ada Dios? Kay ano nga gintutugotan han mahigugmaon nga Dios an karaotan? Kay ano nga masisiring nga an Dios pirme naeksister?’ Kon andam ka, an sugad nga mga pakiana diri magpapaluya han imo pagtoo. Lugod mag-aaghat ito ha imo nga dugang nga magsaliksik durante han imo personal nga pag-aram.

7-9. Isaysay kon paonan-o an online nga mga serye han giya ha pag-aram nga “Ano Ba ang Itinuturo ng Bibliya?” makakabulig ha imo nga magin kombinsido ha imo gintotoohan.

⁷ An maduruto nga pag-aram ha Biblia mabulig ha imo nga mabaton an mga pakiana, mawara an mga pagruhaduha, ngan magin kombinsido ha imo mga gintotoohan. (Buh. 17:11) Gintaganahan kita hin damu nga garamiton nga mabulig ha imo basi mahimo ito. Nakabulig ha damu an pag-aram ha brosyur nga The Origin of Life—Five Questions Worth Asking ngan an libro nga Is There a Creator Who Cares About You? Dugang pa, damu nga batan-on an nalilipay ngan nagpapahimulos ha mga serye han “Ano Ba ang Itinuturo ng Bibliya?” nga makikita ha jw.org/tl, ha tab nga TURO NG BIBLIYA. An tagsa hini nga giya ha pag-aram gindisenyo ha pagbulig ha imo nga magin kombinsido ha imo gintotoohan mahitungod ha usa nga topiko ha Biblia.

⁸ Tungod kay pamilyar ka na ha Biblia, bangin mabaton mo dayon an pipira nga pakiana nga makikita hito nga giya ha pag-aram. Pero kay ano nga sigurado ka han imo baton? An giya ha pag-aram nag-aaghat ha imo nga  mangatadongan uyon ha mga teksto ngan isurat an rason han imo gintotoohan. Mabulig ini ha imo nga maisasaysay ha iba an imo mga gintotoohan. An online nga mga serye han “Ano Ba ang Itinuturo ng Bibliya?” nakakabulig ha damu nga batan-on nga magin marig-on ha ira mga gintotoohan. Kon maaakses mo ito, kay ano nga diri ito gamiton ha imo personal nga pag-aram?

⁹ An pagin kombinsido ha imo mga gintotoohan importante nga pitad para ha bawtismo. Usa nga tin-edyer nga sister an nagsiring: “Antes ako magdesisyon nga magpabawtismo, gin-adman ko an Biblia ngan nakombinse ako nga ini an tinuod nga relihiyon. Ngan kada adlaw, nagigin mas kombinsido ako hito.”

10. Kay ano nga makatadunganon nga laoman nga an usa nga bawtismado nga Kristiano magbubuhat uyon ha iya gintotoohan?

¹⁰ An Biblia nasiring: “An pagtoo nga waray mga buhat patay.” (San. 2:17) Kon kombinsido ka han imo gintotoohan, makatadunganon nga laoman nga ipapakita mo ito ha imo mga buhat. Ano nga klase hin mga buhat? An Biblia nag-uunabi hin “baraan nga panggawi ngan . . . mga buhat tungod han debosyon ha Dios.”—Basaha an 2 Pedro 3:11.

11. Isaysay an mga pulong nga “baraan nga panggawi.”

¹¹ Basi maipakita an “baraan nga panggawi,” kinahanglan limpyo ka ha moral. Kumusta man an imo panggawi? Pananglitan, hunahunaa an naglabay nga unom ka bulan. Paonan-o mo iginpakita nga an imo “abilidad ha pagsabot” nabansay ha pagkilala han husto ngan han sayop? (Heb. 5:14) May espisipiko ba nga mga kahimtang nga nalamposan mo an mga pagsulay o waray ka magpaimpluwensya ha imo mga kaupod? Maopay ka ba nga susbaranan ha eskwelahan may kalabotan ha panggawi? Marig-on ka ba han imo gintotoohan imbes nga umuyon ha imo mga kaklase basi la diri tamayon? (1 Ped. 4:3, 4) Syempre, kita ngatanan diri perpekto. Bisan adton maiha na nga surugoon ni Jehova usahay naaawod ngan nakukurian pagsangyaw. Pero, an usa nga dedikado kan Jehova nalilipay gud pagsumat ha iba han ngaran han Dios, ngan iginpapakita niya ini ha iya mga buhat.

12. Ano an pipira han “mga buhat tungod han debosyon ha Dios,” ngan ano an sadang mo magin panhunahuna hito?

¹² Ano an “mga buhat tungod han debosyon ha Dios”? Nag-uupod ini han imo mga buruhaton ha kongregasyon, sugad han pagtambong ha mga katirok ngan pakigbahin ha ministeryo. Nag-uupod liwat ito han espirituwal nga mga buruhaton nga diri nakikita han iba, sugad han imo personal nga pag-ampo ngan pag-aram. An usa nga nagdedikar kan Jehova diri maghuhunahuna nga mabug-at ini nga mga buruhaton. Lugod, aabaton niya an inabat ni Hadi David nga nagsiring: “Nalilipay ako hin pagsugot han imo kaburut-on, Oh Dios nakon; ngan an imo balaud aadi ha sakob han akon kasingkasing.”—Sal. 40:8.

13, 14. Ano nga tagana an mabulig ha imo nga maipakita an “mga buhat tungod han debosyon ha Dios,” ngan paonan-o an pipira nga batan-on nagpapahimulos hini nga tagana?

¹³ Basi mabuligan ka ha paghimo hin mga tumong, an libro nga Ang mga Tanong ng mga Kabataan—Mga Sagot na Lumulutas, Tomo 2 may-ada mga worksheet ha pahina 308 ngan 309. Puydi mo isurat ha worksheet an imo baton ha mga pakiana sugad han: “Mationan-o kaespisipiko an imo mga pag-ampo, ngan iginpapakita ba han imo mga pag-ampo nga hinigugma mo hi Jehova?” “Ano nga mga topiko an imo gin-aadman ha personal nga pag-aram?” “Nakikigbahin ka ba ha ministeryo bisan kon waray an imo mga kag-anak?” An worksheet may-ada liwat espasyo basi masuratan mo han imo mga tumong may kalabotan ha pag-ampo, personal nga pag-aram, ngan ministeryo.

¹⁴ Damu nga batan-on nga naruruyag magpabawtismo  an nabuligan gud hini nga worksheet. An batan-on nga hi Tilda nagsiring: “Gin-gamit ko an worksheet ha paghimo hin mga tumong. Usa-usa nga ginkab-ot ko ito, ngan paglabay hin mga usa ka tuig, andam na ako magpabawtismo.” An batan-on nga hi Patrick nagpahimulos liwat hini nga worksheet. “Maaram na ako han akon mga tumong,” siring niya, “pero han ginsurat ko ito, mas nangalimbasog ako pagkab-ot hito.”

15. Isaysay kon kay ano nga an dedikasyon kinahanglan personal nga desisyon.

¹⁵ Usa han pakiana ha worksheet amo ini: “Padayon ka ba nga mag-aalagad kan Jehova bisan kon umundang an imo mga kag-anak ngan kasangkayan ha pag-alagad ha iya?” Tigamni nga sugad nga dedikado ngan bawtismado nga Kristiano, ikaw mismo an maatubang kan Jehova. An imo pag-alagad ha iya diri nakadepende ha iba—bisan pa ngani ha imo mga kag-anak. An imo baraan nga panggawi ngan mga buhat tungod han debosyon ha Dios nagpapamatuod nga nagkikinabuhi ka na uyon ha kamatuoran ngan andam na para ha bawtismo.

16, 17. (a) Ano an sadang magpagios ha usa nga magin Kristiano? (b) Paonan-o mahimo iilustrar an apresasyon para ha lukat?

¹⁶ Usa nga lalaki nga maaram gud ha Mosaiko nga Balaud an nagpakiana kan Jesus: “Ano an pinakaimportante nga sugo ha Balaud?” Hi Jesus binaton: “Higugmaa hi Jehova nga imo Dios ha bug-os mo nga kasingkasing, ha bug-os mo nga kalag, ngan ha bug-os mo nga hunahuna.” (Mat. 22:35-37) Iginpapakita ni Jesus nga gugma kan Jehova an sadang magin rason han pagpabawtismo. Usa han pinakamaopay nga paagi basi mapahilarom an imo gugma kan Jehova amo an pagpamalandong ha iya pinakabirilhon nga regalo—an halad-lukat han iya Anak. (Basaha an 2 Corinto 5:14, 15; 1 Juan 4:9, 19.) An pagpamalandong ha lukat ngan ha kapulsanan hito para ha imo magpapagios ha imo nga apresyaron gud ito.

¹⁷ An imo apresasyon ha lukat mahimo iilustrar hini nga paagi: Handurawa nga nalulumos ka ngan may tawo nga nagtalwas ha imo. Mauli ka na la ba, magliliwan, ngan kakalimtan an ginbuhat hito nga tawo para ha imo? Diri gud! Sigurado nga aabaton mo nga utang mo ha iya an imo kinabuhi! Mas daku an aton utang kan Jehova nga Dios ngan kan Jesus. Kon waray an lukat, kita ngatanan sugad hin nalulumos ha sala ngan kamatayon. Pero tungod hinin daku gud nga kapahayagan han gugma, nagkaada kita presyoso nga paglaom nga mabuhi hin waray kataposan ha paraiso nga tuna!

18, 19. (a) Kay ano nga diri ka sadang mahadlok pagdedikar kan Jehova? (b) Paonan-o an pag-alagad kan Jehova nabulig nga magin malipayon an imo kinabuhi?

 ¹⁸ Gin-aapresyar mo ba an ginbuhat ni Jehova para ha imo? Kon sugad, angayan la nga idedikar mo an imo kinabuhi ha iya ngan magpabawtismo. Hinumdumi nga an pagdedikar kan Jehova amo an pagsaad ha iya nga bubuhaton mo an iya kaburut-on ha kadayonan, anoman an mahitabo. Sadang ka ba mahadlok ha paghimo hito nga saad? Diri gud! Tigamni nga karuyag ni Jehova an pinakamaopay para ha imo, ngan hiya “an nagbabalos ha mga sinsero nga nag-aalagad ha iya.” (Heb. 11:6) An imo pagdedikar kan Jehova ngan pagpabawtismo diri magpapakuri ha imo. Lugod, maghahatag ito ha imo hin makalilipay gud nga kinabuhi. Usa nga 24 anyos nga brother nga nagpabawtismo antes pa magtin-edyer an nagsiring: “Bangin mas hilarom na an akon pagsabot kon adulto na ako nagpabawtismo, pero an akon desisyon nga magdedikar kan Jehova nagpanalipod ha akon tikang ha kalibotanon nga mga tumong.”

¹⁹ Diri pariho kan Jehova, hi Satanas hakog ngan waray pagtagad ha imo. Hi Satanas waray maihahatag nga maopay ha mga nadapig ha iya. Waray hiya maopay nga sumat ngan waray bisan ano nga paglaom. Salit paonan-o niya maihahatag an usa nga butang nga waray hiya? Maraot la nga kabubuwason an maihahatag ha imo ni Satanas, pariho han iya dadangatan!—Pah. 20:10.

20. Ano an mahimo buhaton han usa nga batan-on basi magin andam hiya pagdedikar ngan pagpabawtismo? (Kitaa liwat an kahon nga “ Bulig Basi Mag-uswag Ka ha Espirituwal.”)

²⁰ Matin-aw, an pagdedikar han imo kinabuhi kan Jehova amo an husto nga buhaton. Andam ka na ba nga himoon ito? Kon oo, ayaw pag-alang. Pero kon inaabat mo nga diri ka pa andam, iaplikar an mga suhestyon hini nga artikulo basi magin kwalipikado ka ha tidaraon. Hi Pablo nagsurat ha mga taga-Filipos: “Anoman nga pag-uswag an aton nahimo, padayon kita nga maglakat hin husto ha amo gihapon nga paagi.” (Fil. 3:16) Kon susundon mo ito nga sagdon, diri mag-iiha maruruyag ka nga idedikar an imo kinabuhi kan Jehova ngan magpabawtismo.