1, 2. (a) Ano nga pahamangno an nagtalwas hin damu nga kinabuhi? (Kitaa an retrato hini nga pahina.) (b) Ano nga giya an mahimo magtalwas ha katawohan han Dios?

“STOP, LOOK, LISTEN” (Undang, Pagkita, Pamati). Ito nga mga pulong nagtalwas hin damu nga kinabuhi. Sobra 100 ka tuig na an naglabay, mababasa ito ha dagku nga karatola nga iginbutang ha may tarabokan ha mga riles ha Norte Amerika. Kay ano? Basi umundang an mga sarakyan kon may naagi nga tren. Oo, an pagsunod hito nga pahamangno nagtalwas hin damu nga kinabuhi.

² Labaw pa ha pagbutang hin mga karatola an ginhihimo ni Jehova basi panalipdan an iya katawohan. Hiya mismo an naggigiya ha ira basi talwas nga makaabot ha ira destinasyon, an kinabuhi nga waray kataposan. Dugang pa, pariho hiya hin mahigugmaon nga paraataman hin mga karnero nga naggigiya ngan nagpapahamangno ha mga karnero basi malikyan an peligroso nga dalan.—Basaha an Isaias 30:20, 21.

3. Paonan-o an katawohan nahingada ha dalan nga nagtutugway ha kamatayon?

³ Tikang pa ha tinikangan, nagtatagana na hi Jehova hin espisipiko nga mga instruksyon o giya. Pananglitan, ha hardin han Eden, naghatag hi Jehova hin matin-aw nga instruksyon nga maggigiya ha mga tawo nga magkaada kinabuhi nga waray kataposan ngan magin malipayon. (Gen. 2:15-17) Kon ginsunod nira Adan ngan Eva an giya, waray unta hira mag-antos ngan mamatay nga waray paglaom. Pero imbes nga sumugot, namati hi Eva ha sagdon nga baga hin tikang ha hayop. Namati liwat hi Adan ha ginsiring ni Eva, nga usa nga tawo. Pariho nira ginsalikway an giya han ira mahigugmaon nga Amay. Salit an katawohan nahingada ha peligroso nga dalan nga nagtutugway ha kamatayon.

4. (a) Kay ano nga kinahanglan an dugang nga giya katapos han Baha? (b) Paonan-o an bag-o nga mga kahimtang nagpapakita han panhunahuna han Dios?

⁴ Durante ha panahon ni Noe, naghatag an Dios hin giya para ha katalwasan. Katapos han Baha, naghatag hi Jehova hin espisipiko nga sugo may kalabotan ha dugo. Kay ano? Tungod kay nagbag-o an mga kahimtang. Igintugot na ni Jehova nga kaunon han mga tawo an karne han hayop. Salit kinahanglan an bag-o nga giya: “An unod nga may kinabuhi, nga amo an dugo, diri niyo kaunon.” (Gen. 9:1-4) Matin-aw nga iginpapakita hini nga sugo an panhunahuna han Dios may kalabotan ha kinabuhi—panag-iya niya ito. Sugad nga Maglalarang ngan Humaratag-han-Kinabuhi, hiya an may katungod nga maghimo hin mga balaud may kalabotan ha kinabuhi. Pananglitan, nagsugo hiya ha mga tawo nga diri patayon an ira igkasi-tawo. Para ha Dios, sagrado an kinabuhi ngan dugo, ngan sisirotan niya an bisan hin-o nga nagamit hito ha sayop nga paagi.—Gen. 9:5, 6

5. Ano an aton hihisgotan, ngan kay ano?

⁵ Hisgotan naton an pipira nga ehemplo kon paonan-o padayon nga ginigiyahan han Dios an iya katawohan ha sulod hin mga siglo. Magpaparig-on ini han aton determinasyon nga sundon an paggiya ni Jehova ngadto ha bag-o nga kalibotan.

6. Kay ano nga kinahanglan sundon han katawohan han Dios an mga balaud nga ginhatag pinaagi kan Moises, ngan ano nga disposisyon an kinahanglan ipakita han mga Israelita?

⁶ Ha panahon ni Moises, naghatag hi Jehova hin matin-aw nga mga giya may kalabotan ha husto nga panggawi ngan pagsingba. Kay ano? Tungod kay nagbag-o an mga kahimtang. Ha sulod hin sobra duha ka siglo, an mga tulin ni Jacob nagkinabuhi sugad nga mga uripon ha Ehipto diin kalyap gud an pagsingba ha patay, mga imahen, ngan pagsunod ha mga katutdoan ngan buruhaton nga nagpapasipara ha Dios. Pakagawas han katawohan han Dios tikang ha pagkauripon ha Ehipto, kinahanglan an bag-o nga mga giya. Magigin usa hira nga nasud nga an Balaud gud la ni Jehova an ginsusunod. May pipira nga reperensya nga nasiring nga an Hebreo nga pulong para ha “balaud” may koneksyon ha termino nga nagpapasabot hin “pagtugway, paggiya, pagtutdo.” An Mosaiko nga Balaud nagpanalipod ha mga Israelita tikang ha maraot nga moral ngan buwa nga pagsingba han iba nga nasud. Han an mga Israelita namati ha Dios, ginbendisyonan niya hira. Han ginbalewaray nira hiya, nag-antos hira hin makasurubo nga mga resulta.—Basaha an Deuteronomio 28:1, 2, 15.

7. (a) Isaysay kon kay ano nga hi Jehova naghatag hin mga instruksyon ha iya katawohan. (b) Paonan-o an Balaud nagin parapanalipod ha Israel?

⁷ May iba pa nga rason kon kay ano nga kinahanglan an bag-o nga mga instruksyon. An Balaud nagtutudlok ha importante nga panhitabo ha katumanan han kaburut-on ni Jehova—an pag-abot han Mesias, hi Jesu-Kristo. Iginpahinumdom han Balaud an pagkadiri-hingpit han  mga Israelita. Ginpabug-atan liwat hito nga kinahanglan gud nira hin lukat, usa nga hingpit nga halad nga magtatabon han ira mga sala. (Gal. 3:19; Heb. 10:1-10) Dugang pa, an Balaud nakabulig nga mapanalipdan an tulin nga pagtitikangan han Mesias ngan makilala hiya kon umabot na hiya. Oo, an Balaud nagin sugad hin temporaryo nga paragtutdo, o “parapanalipod,” nga naggigiya ngadto han Kristo.—Gal. 3:23, 24.

8. Kay ano nga kinahanglan magpagiya kita ha mga prinsipyo han Mosaiko nga Balaud?

⁸ Sugad nga mga Kristiano, makakapahimulos liwat kita ha mga instruksyon nga iginhatag ha nasud han Israel. Paonan-o? Mahimo kita umundang ngan magkita ha mga prinsipyo nga ginbasaran han Balaud. Bisan kon diri kita sakop hito nga mga balaud, mahimo naton ito tagdon sugad nga giya ha aton adlaw-adlaw nga pagkinabuhi ngan pagsingba ha aton baraan nga Dios, hi Jehova. Iginpasurat niya ito ha Biblia basi kita mahibaro, magiyahan han mga prinsipyo, ngan mapabilhan an hitaas nga mga suruklan ha moral para ha mga Kristiano. Pananglitan, pamatii an ginsiring ni Jesus: “Hinbatian niyo an ginsiring: ‘Diri ka mag-adulteryo.’ Pero nasiring ako ha iyo nga an bisan hin-o nga padayon nga nagkikinita ha usa nga babaye ngan may malaw-ay nga hingyap ha iya, nag-aadulteryo na ha iya kasingkasing.” Salit kinahanglan naton likyan diri la an pag-adulteryo kondi pati na an imoral nga panhunahuna ngan hingyap.—Mat. 5:27, 28.

9. Ano nga mga kahimtang an nagin hinungdan nga kinahanglan an bag-o nga giya tikang ha Dios?

⁹ Pag-abot ni Jesus sugad nga Mesias, kinahanglan maghatag hi Jehova hin bag-o nga giya ngan dugang nga detalye may kalabotan han Iya katuyoan. Kinahanglan ini tungod kay nagbag-o na liwat an mga kahimtang. Han 33 C.E., iginsalikway ni Jehova an nasud han Israel ngan ginpili an Kristiano nga kongregasyon nga magin iya katawohan.

10. Kay ano nga an Kristiano nga kongregasyon gintagan hin bag-o nga mga balaud, ngan ano an kaibahan hito ha iginhatag ha mga Israelita?

¹⁰ Ha siyahan nga siglo, an katawohan han Dios nga nagin sakop ha Kristiano nga mga kahikayan nakakarawat hin bag-o nga mga instruksyon may kalabotan ha pagsingba ngan panggawi. Inin maunungon nga mga surugoon han Dios nagin sakop han bag-o nga kasabotan. An Mosaiko nga balaud iginhatag ha literal nga nasud han Israel. Ha luyo nga bahin, an espirituwal nga Israel magkukompwesto han mga tawo tikang ha damu nga nasud ngan iba-iba nga gintikangan. Oo, “an Dios waray pinaurog, kondi ha tagsa nga nasud an tawo nga nahahadlok ha iya ngan nagbubuhat han matadong ginkakarawat niya.” (Buh. 10:34, 35) Ginsusunod nira an “balaud han Kristo” nga iginbasar ha mga prinsipyo nga iginsurat, diri ha bato, kondi ha ira kasingkasing. Ini nga balaud naggigiya ha mga Kristiano ngan nagpapahimulos hira hito diin man hira naukoy.—Gal. 6:2.

11. Ha ano nga duha nga bahin han Kristiano nga pagkinabuhi nagigin mapulsanon gud “an balaud han Kristo”?

¹¹ An espirituwal nga Israel nagpapahimulos gud ha giya han Dios pinaagi han iya Anak. Katapos gud la maestablisar an bag-o nga kasabotan, hi Jesus naghatag hin duha nga importante nga sugo. An siyahan may kalabotan ha pagsangyaw nga buruhaton. An ikaduha nagpokus ha panggawi han mga sumurunod ni Jesus ngan kon paonan-o nira tatrataron an igkasi-tumuroo. Ini nga mga instruksyon iginhatag ha ngatanan nga Kristiano; salit naaplikar ini ha ngatanan nga tinuod nga magsiringba yana, ha langit man o ha tuna an ira paglaom.

12. Ano an nagbag-o may kalabotan ha pagsangyaw nga buruhaton?

¹² Tagda an pagsangyaw han maopay nga sumat nga iginsugo ni Jesus ha iya mga sumurunod.  Nagbag-o an pamaagi han pagsangyaw ngan an kahaluag han teritoryo. Han naglabay nga mga siglo, an mga tawo tikang ha iba-iba nga nasud ginkakarawat kon nakadto hira ha Israel basi mag-alagad kan Jehova. (1 Hadi 8:41-43) Ito an kahimtang antes ihatag ni Jesus an sugo nga aton makikita ha Mateo 28:19, 20. (Basaha.) Ginsugo niya an iya mga disipulo nga ‘kumadto’ ha ngatanan nga tawo. Ha adlaw han Pentekostes 33 C.E., nagin matin-aw nga karuyag ni Jehova nga maisangyaw an maopay nga sumat ha bug-os nga kalibotan. Hito nga adlaw, mga 120 nga disipulo han bag-o nga kongregasyon an napuno han baraan nga espiritu ngan nagtikang pagyakan hin iba-iba nga linggwahe ha mga Judio ngan ha mga nakombirte. (Buh. 2:4-11) Katapos, kinahanglan liwat nira sangyawan an mga Samaritano. Ngan han 36 C.E., ginsangyawan liwat nira an diri turi nga mga Hentil. Iginpapakita hini nga kinahanglan nira sangyawan an ngatanan nga tawo ha bug-os nga kalibotan!

13, 14. (a) Ano an igintututdo ha aton han “bag-o nga sugo” ni Jesus? (b) Ano an aton hibabaroan ha ehemplo ni Jesus?

¹³ Yana, hisgotan aton kon paonan-o naton sadang trataron an aton mga igkasi-tumuroo. Hi Jesus naghatag hin “bag-o nga sugo.” (Basaha an Juan 13:34, 35.) Ini nga sugo nagtututdo ha aton nga sadang naton higugmaon an usa kag usa, ngan magin andam nga isakripisyo an aton kinabuhi para ha kabugtoan. Ini nga sugo waray iupod ha Mosaiko nga Balaud.—Mat. 22:39; 1 Juan 3:16.

¹⁴ Hi Jesus an pinakamaopay nga susbaranan ha pagpakita hin gugma nga andam magsakripisyo. Ito nga gugma an nagpagios ha iya nga magin andam mamatay para ha iya mga disipulo. Ngan naglalaom hiya nga bubuhaton liwat ito han ngatanan niya nga sumurunod. Salit sadang kita magin andam ha pag-ilob ha mga kakurian ngan mamatay pa ngani para ha aton kabugtoan.—1 Tes. 2:8.

15, 16. Ano nga bag-o nga mga kahimtang an naieksperyensyahan naton yana, ngan paonan-o kita ginigiyahan han Dios?

¹⁵ Ginpili ni Jesus “an matinumanon ngan maaramon nga uripon” basi magtagana ha iya katawohan hin espirituwal nga pagkaon ha husto nga panahon. (Mat. 24:45-47) Ito nga pagkaon may importante nga mga giya uyon ha pagbag-o han mga kahimtang.

¹⁶ Nagkikinabuhi na kita ha gintatawag ha Biblia nga “kataposan nga mga adlaw,” ngan diri na mag-iiha maieksperyensyahan naton an kasakitan nga waray pa gud mahitabo. (2 Tim. 3:1; Mar. 13:19) Dugang pa, hi Satanas ngan an iya mga demonyo iginlabog nganhi ha tuna, nga nagin hinungdan han duro nga pag-antos han mga tawo. (Pah. 12:9, 12) Ginsusunod liwat naton an sugo ni Jesus nga magsangyaw ha bug-os nga kalibotan, ngan nakakaabot na gud ito yana ha mas damu nga tawo ngan linggwahe!

17, 18. Paonan-o naton sadang tagdon an giya nga iginhahatag ha aton?

¹⁷ Kinahanglan naton pahimulosan an mga garamiton ha pagsangyaw nga igintatagana han organisasyon han Dios. Ginagamit mo ba ito? Alerto ka ba pagsunod ha giya nga iginhahatag ha aton mga katirok may kalabotan ha epektibo nga paggamit hito nga mga garamiton? Gintatagad mo ba nga tikang ha Dios ini nga mga giya?

¹⁸ Basi padayon nga bendisyonan han Dios, kinahanglan naton sundon an ngatanan nga giya nga igintatagana ha Kristiano nga kongregasyon. An aton pagkamasinugtanon yana mabulig ha aton nga sundon an mga instruksyon durante han “daku nga kasakitan,” an panahon nga mabubungkag an bug-os nga maraot nga sistema ni Satanas. (Mat. 24:21) Katapos, kinahanglan naton an bag-o nga giya para ha pagkinabuhi ha bag-o nga kalibotan nga waray na an impluwensya ni Satanas.

19, 20. Ano nga bag-o nga mga linukot nga basahon an aabrihan, ngan ano an magigin resulta?

¹⁹ Ha panahon ni Moises, an bag-o nga mga  instruksyon kinahanglan han nasud han Israel ngan ha urhi han Kristiano nga kongregasyon ilarom ha “balaud han Kristo.” Sugad man, an Biblia nagsusumat ha aton nga aabrihan an mga linukot nga basahon basi maghatag ha aton hin mga instruksyon ha pagkinabuhi ha bag-o nga kalibotan. (Basaha an Pahayag 20:12.) Posible nga nakasurat dida hini an mga ginkikinahanglan ni Jehova ha katawohan hito nga panahon. Pinaagi ha pag-aram hini, an ngatanan nga katawohan, pati na an mga ginbanhaw, mahibabaro han kaburut-on han Dios para ha ira. Ini nga mga linukot nga basahon sigurado nga mabulig ha aton nga mas masabtan an panhunahuna ni Jehova. Tungod kay ginigiyahan han nag-uuswag nga pagsabot ha Pulong han Dios pati na han ipapahayag ha bag-o nga mga linukot nga basahon, sigurado nga hihigugmaon, rirespetuhon, ngan papasidunggan han mga umurukoy ha Paraiso an ira igkasi-tawo. (Isa. 26:9) Handurawa la an damu nga butang nga aton hibabaroan ngan itututdo ha iba pinaagi ha paggiya han aton Hadi nga hi Jesu-Kristo!

²⁰ An ngatanan nga masugot ha “nakasurat ha mga linukot nga basahon” magkakaada kinabuhi nga waray kataposan. Isusurat ni Jehova hin permanente ha “basahon han kinabuhi” an ngaran hadton magpapabilin nga matinumanon ha iya durante han ultimo nga pagsari. Mahimo maisurat an aton ngaran dida hito! Salit kon MAUNDANG kita basi pag-adman an Pulong han Dios, MAGKIKITA basi masabtan an kahulogan hito, ngan MAMAMATI pinaagi ha pagsunod ha giya han Dios yana, makakasarig kita nga matatalwas kita ha daku nga kasakitan ngan padayon nga mahibabaro mahitungod ha aton maaramon ngan mahigugmaon nga Dios, hi Jehova.—Ekles. 3:11; Roma 11:33.