1, 2. (a) Ano an nakakapalipay ha katawohan han Dios yana? (b) Paonan-o an Kristiano nga mga kag-anak ngan tigurang makakabulig ha mga batan-on nga masabtan an kahulogan han bawtismo?

“KILALA ko ikaw tikang ha kabata,” siring han usa nga tigurang ha 12 anyos nga hi Christopher, “ngan nalilipay ako nga karuyag mo na magpabawtismo. May-ada la ako pakiana, ‘Kay ano nga nakadesisyon ka hito?’” Angayan an pakiana han tigurang. Syempre, nalilipay gud kita nga kada tuig yinukot nga batan-on ha bug-os nga kalibotan an nagpapabawtismo. (Ekles. 12:1) Pero karuyag siguruhon han mga kag-anak ngan mga tigurang ha kongregasyon nga personal nga desisyon han mga batan-on an pagpabawtismo ngan nasasabtan nira an kahulogan hito.

² Iginpapakita han Pulong han Dios nga an dedikasyon ngan  bawtismo an tinikangan han pagkinabuhi nga an mga Kristiano makakaeksperyensya hin mga bendisyon ni Jehova ngan hin mga pagkontra ni Satanas. (Prob. 10:22; 1 Ped. 5:8) Salit an Kristiano nga mga kag-anak naggagahin hin panahon ha pagtutdo ha ira mga anak han nahiuupod han pagin disipulo han Kristo. Pero kon diri Kristiano an mga kag-anak han usa nga batan-on, an mga tigurang mahigugmaon nga mabulig ha iya nga kwentahon an magagasto han pagin disipulo. (Basaha an Lucas 14:27-30.) Sugad la nga kinahanglan an pagplano basi mahuman an pagtukod hin bilding, kinahanglan liwat an pagpangandam basi makag-alagad kan Jehova nga matinumanon “tubtob ha kataposan.” (Mat. 24:13) Pero ano an makakabulig ha mga batan-on nga magin determinado nga mag-alagad kan Jehova ha ira bug-os nga kinabuhi? Hisgotan naton.

3. (a) Ano an igintututdo ha aton han mga pulong ni Jesus ngan ni Pedro mahitungod ha pagkaimportante han bawtismo? (Mat. 28:19, 20; 1 Ped. 3:21) (b) Ano nga mga pakiana an aton hihisgotan, ngan kay ano?

³ Batan-on ka ba nga naruruyag magpabawtismo? Kon oo, maopay gud ito nga tumong! Daku nga pribilehiyo an pagin bawtismado nga Saksi ni Jehova. Dugang pa, an bawtismo ginkikinahanglan ha mga Kristiano, ngan importante ini nga pitad basi matalwas. (Mat. 28:19, 20; 1 Ped. 3:21) Tungod kay hingyap mo gud nga tumanon an imo saad kan Jehova, karuyag mo magin andam para hinin importante nga pitad. Salit maopay gud nga tagdon inin tulo nga pakiana nga mabulig ha imo nga hibaroan kon andam ka na magpabawtismo: (1) Hamtong na ba ako ha paghimo hito nga desisyon? (2) Hingyap ko gud ba nga magpabawtismo? (3) Nasasabtan ko ba an kahulogan han pagdedikar kan Jehova? Hisgotan naton ini nga mga pakiana.

4, 5. (a) Kay ano nga an bawtismo diri la para ha mga adulto? (b) Ano an iginpapasabot han pagin hamtong han usa nga Kristiano?

⁴ An Biblia diri nasiring nga an bawtismo para la ha mga adulto o ha mga aada na ha legal nga edad. Mababasa naton ha Proberbios  20:11: “Bisan an bata nagpapakilala ha iya ngahaw pinaagi han iya mga binuhatan, kon an iya buhat uray ba, ngan kon ito maopay ba.” Salit bisan kon bata pa, an usa mahimo na makasabot han kahulogan han pagbuhat hin husto ngan han pagdedikar ha iya Maglalarang. Kon sugad, an bawtismo importante ngan angayan nga pitad para ha batan-on nga nagpapakita na hin pagkahamtong ngan nagdedikar na kan Jehova.—Prob. 20:7.

⁵ Ano an iginpapasabot han pagin hamtong? Diri la ini nangangahulogan hin pisikal nga pagtubo o pagin edaran. An Biblia nasiring nga an hamtong nga tawo amo adton “nagbabansay han ira abilidad ha pagsabot pinaagi ha paggamit hito basi makakilala han husto ngan sayop.” (Heb. 5:14) Salit an hamtong nga tawo maaram kon ano an husto ha mga mata ni Jehova ngan determinado gud hiya nga buhaton ito. Sugad nga resulta, diri hiya masayon maimpluwensyahan ha pagbuhat hin maraot; diri man liwat hiya kinahanglan diktahan ha pagbuhat hin husto. Makatadunganon la nga laoman nga an bawtismado nga batan-on padayon nga masunod ha mga suruklan ni Jehova bisan kon hirayo hiya ha iya mga kag-anak ngan ha iba pa nga mga adulto.—Itanding an Filipos 2:12.

6, 7. (a) Ihulagway an mga pagsari nga gin-atubang ni Daniel ha Babilonya. (b) Paonan-o ginpamatud-an ni Daniel nga hamtong hiya?

⁶ Maipapakita gud ba han usa nga batan-on an sugad nga pagkahamtong? Hisgotan naton an ehemplo ni Daniel nga mababasa ha Biblia. Posible nga tin-edyer hiya han nahibulag ha iya kag-anak ngan gindara nga bihag ha Babilonya. Nagkinabuhi hiya upod an mga tawo nga iba gud an panhunahuna ha husto ngan sayop. Nagin pagsari liwat ha iya an espesyal nga pagtratar ha iya ha Babilonya. Ngani, usa hi Daniel han pipira nga batan-on nga ginpili basi magserbi ha hadi! (Dan. 1:3-5, 13) Posible nga may mga oportunidad hiya ha Babilonya nga bangin waray ha Israel.

⁷ Ano an ginbuhat ni Daniel? Gintugotan ba niya an nakakadani nga mga butang ha Babilonya nga magbag-o han iya pagkatawo o magpaluya han iya pagtoo? Waray gud! An Biblia nasiring nga samtang nakadto ha Babilonya, hi Daniel “nagtinguha ha iya kasingkasing nga diri hiya maghuhugaw ha iya ngahaw” han mga butang nga may kalabotan ha buwa nga pagsingba. (Dan. 1:8) Nagpakita hi Daniel hin makatirigamnan nga pagkahamtong!

8. Ano an imo hibabaroan ha ehemplo ni Daniel?

⁸ Ano an imo hibabaroan ha ehemplo ni Daniel? An hamtong nga batan-on marig-on ha iya mga gintotoohan. Diri hiya pariho ha kamelyon nga nagbuburobag-o an kolor basi magpahiuyon ha iya palibot. Diri hiya nagios sugad nga sangkay han Dios ha Kingdom Hall pero sangkay han kalibotan ha eskwelahan. Imbes nga ig-anod-anod, nagpapabilin hiya nga marig-on bisan pa han magkuri nga pagsari ha iya pagtoo.—Basaha an Efeso 4:14, 15.

9, 10. (a) Kay ano nga mapulsanon para ha batan-on nga hunahunaon kon paonan-o hiya ginios han nasarihan an iya pagtoo hinin bag-o la? (b) Ano an kahulogan han bawtismo?

⁹ Syempre waray tawo nga hingpit, batan-on man o adulto nakakasala ha panapanahon. (Ekles. 7:20) Pero kon karuyag mo magpabawtismo, maopay nga hunahunaon kon mationan-o ka kadeterminado nga sundon an mga sugo ni Jehova. Pakianhi an imo kalugaringon, ‘Naipakita ko na ba nga masinugtanon ako kan Jehova ha sulod hin pipira ka panahon?’ Hunahunaa kon paonan-o ka ginios han nasarihan an imo pagtoo hinin bag-o la. Naipapakita mo na ba nga maaram ka  han husto ngan sayop? Ano man kon pariho kan Daniel, gintatratar ka nga espesyal ha kalibotan ni Satanas? Padayon mo ba nga ‘nasasabtan an kaburut-on ni Jehova’ bisan kon an iya kaburut-on nasumpaki ha imo karuyag?—Efe. 5:17.

¹⁰ Kay ano nga importante ini nga mga pakiana? Mabulig ini ha imo nga masabtan nga seryoso gud an pagpabawtismo. Sugad han gin-unabi na, an bawtismo nagsisimbolo han imo seryoso nga saad kan Jehova nga hihigugmaon mo hiya ngan mag-aalagad ha iya ha bug-os mo nga kasingkasing. (Mar. 12:30) An tagsa nga nagpapabawtismo sadang magin determinado nga tumanon an iya saad.—Basaha an Eklesiastes 5:4, 5.

11, 12. (a) Ano an sadang siguruhon han usa nga naruruyag magpabawtismo? (b) Ano an sadang mo buhaton basi masiguro nga husto an imo panhunahuna ha kahikayan ni Jehova mahitungod ha bawtismo?

¹¹ An Biblia nasiring nga an katawohan ni Jehova, upod na an mga batan-on mag-aalagad ha iya hin ‘kinaburut-on.’ (Sal. 110:3) Salit kinahanglan siguruhon han usa nga naruruyag magpabawtismo nga hingyap gud niya ito. Bangin kinahanglan mo usisahon hin maopay an imo motibo, labi na kon ginpadaku ka ha kamatuoran.

¹² Samtang nalabay an mga tuig, bangin nakikita mo nga damu an nagpapabawtismo upod na an pipira han imo kasangkayan ngan bangin an imo kabugtoan pa ngani. Kon ito an imo kahimtang, diri mo sadang hunahunaon nga kinahanglan mo na magpabawtismo tungod la kay aada ka na ha husto nga edad o tungod kay nagpabawtismo na an imo mga kaedad. Ano an sadang mo buhaton basi masiguro nga husto an imo panhunahuna ha kahikayan ni Jehova mahitungod ha bawtismo? Pamalandonga kon kay ano nga importante gud an pagpabawtismo. Ngani, hibabaroan mo hini nga artikulo ngan ha masunod an pipira han mag-opay nga hinungdan.

13. Paonan-o mo masisiguro kon kinasingkasing gud ba an imo desisyon nga magpabawtismo?

¹³ May mga paagi basi hibaroan mo kon kinasingkasing gud ba an imo desisyon nga magpabawtismo. Pananglitan, makikita ha imo mga pag-ampo an imo kinasingkasing nga hingyap nga mag-alagad kan Jehova. Kon agsob ngan espisipiko an imo mga pag-ampo, mahimo ito magpasabot nga duok ka gud kan Jehova. (Sal. 25:4) Kasagaran nga ginbabaton ni Jehova an aton mga pag-ampo pinaagi han Biblia. An aton pangalimbasog nga pag-adman an Biblia nagpapakita liwat nga karuyag naton magin duok kan Jehova ngan kinasingkasing nga mag-alagad ha iya. (Jos. 1:8) Salit pakianhi an imo kalugaringon: ‘Mationan-o kaespisipiko an akon mga pag-ampo? Mationan-o karegular an akon personal nga pag-aram ha Biblia?’ Ngan kon may-ada kamo Pagsingba han Pamilya, pakianhi an imo kalugaringon: ‘Kinaburut-on ba nga nakikigbahin ako hito nga kahikayan han pamilya?’ An imo baton hini nga mga pakiana mabulig ha imo nga hibaroan kon hingyap mo gud ba nga magpabawtismo.

14. Isaysay an kaibahan han dedikasyon ngan bawtismo.

¹⁴ An pipira bangin nawuwurok ha kaibahan han dedikasyon ngan bawtismo. Pananglitan, may mga batan-on nga nasiring nga nagdedikar na hira kan Jehova pero diri pa andam magpabawtismo. Husto ba ito? An pagdedikar nagpapasabot nga nagsasaad ka kan Jehova nga mag-aalagad ka ha iya ha waray kataposan. An pagpabawtismo nagpapakita ha iba nga nagdedikar ka na kan Jehova. Salit an  bawtismo kapahayagan ha publiko nga nagdedikar ka na kan Jehova pinaagi ha pag-ampo. Antes ka magpabawtismo, kinahanglan siguruhon mo nga nasasabtan mo an kahulogan han dedikasyon.

15. Ano an kahulogan han dedikasyon?

¹⁵ Salit, kon igindedikar mo na an imo kinabuhi kan Jehova, diri na ikaw an tag-iya han imo kinabuhi. Nagsaad ka kan Jehova nga uunahon mo pagbuhat an iya kaburut-on imbes nga an imo karuyag. (Basaha an Mateo 16:24.) Kinahanglan naton tumanon an anoman nga aton iginsaad, labi na an aton saad kan Jehova nga Dios! (Mat. 5:33) Pero paonan-o mo maipapakita nga iginsalikway mo na gud an imo kalugaringon ngan hi Jehova na an tag-iya han imo kinabuhi?—Roma 14:8.

16, 17. (a) Iilustrar an iginpapasabot han pagsalikway han imo kalugaringon. (b) Ano an baga hin ginsisiring han usa nga nagdedikar kan Jehova?

¹⁶ Ha pag-ilustrar, hunahunaa nga ginregalohan ka han imo sangkay hin kotse. Iginhatag niya ha imo an mga papeles hito, ngan nagsiring: “Imo ini nga kotse.” Pero ano man kon nagsiring hiya: “Ako an magtitipig han yawi. Ngan ako an magdadrayb, diri ikaw.” Ano an imo aabaton hini nga “regalo” ngan ha naghatag hito?

¹⁷ Yana hunahunaa an ginlalaoman ni Jehova ha usa nga nagdedikar ha iya, ngan nagsiring: “Iginhahatag ko ha imo an akon kinabuhi. Ikaw na an tag-iya ha akon.” Ano man kon ito nga indibiduwal nagkikinabuhi hin doble, bangin sekreto nga nakikig-date ha diri tumuroo? Ano man kon karawaton niya an trabaho nga nakakaulang ha iya pagministeryo ngan pagtambong ha mga katirok? Diri ba pariho ito ha pagtipig ha yawi han kotse? An nagdedikar kan Jehova baga hin nasiring: “Ikaw na an tag-iya han akon kinabuhi, diri na ako. Kon nagkakasumpaki an imo karuyag ngan an akon karuyag, an imo karuyag an pirme ko susundon.” Pariho ito han disposisyon ni Jesus. Han nakanhi hiya ha tuna, hiya nagsiring: “Linusad ako tikang ha langit diri ha pagbuhat han akon kaburut-on, kondi ha pagbuhat han kaburut-on han nagsugo ha akon.”—Juan 6:38.

18, 19. (a) Kay ano nga an ginsiring nira Rose ngan Christopher nagpapakita nga an pagpabawtismo usa nga pribilehiyo nga nagriresulta hin bendisyon? (b) Ano an imo inaabat mahitungod ha pribilehiyo nga magin bawtismado?

¹⁸ Matin-aw, seryoso nga desisyon an pagpabawtismo. Pero, daku nga pribilehiyo an pagin dedikado ngan bawtismado. An mga batan-on nga nahigugma kan Jehova ngan maaram han kahulogan han ira dedikasyon diri nag-aalang pagpabawtismo; diri liwat nira ginbabasolan an ira desisyon. Hi Rose nga usa nga bawtismado nga tin-edyer nagsiring: “Hinigugma ko hi Jehova, ngan waray iba nga mas makakapalipay ha akon kondi an pag-alagad ha iya. An akon desisyon nga magpabawtismo amo an pinakamaopay nga desisyon nga akon nahimo.”

¹⁹ Kumusta man hi Christopher nga gin-unabi ha tinikangan hini nga artikulo? Ano an iya inabat ha iya desisyon nga magpabawtismo han 12 anyos hiya? Nagsiring hiya nga malipayon hiya hinduro nga ginbuhat niya ito. Nag-regular payunir hiya han 17 anyos ngan nagin ministeryal nga surugoon han 18 anyos. Yana, Bethelite na hiya. Hiya nagsiring: “An pagpabawtismo amo an husto nga desisyon. An akon kinabuhi puno hin makapatagbaw nga buruhaton para kan Jehova ngan ha iya organisasyon.” Kon karuyag mo magpabawtismo, paonan-o ka mangangandam para hito? Hihisgotan ini ha masunod nga artikulo.