1. Tikang pa ha tinikangan, ano an nakikita ha mga buhat han Dios?

TIKANG pa han paglarang, nakikita na an kooperasyon. Ginlarang ni Jehova hi Jesus antes an ngatanan nga iba pa nga butang. Katapos, binulig hi Jesus kan Jehova ngan nagin “labaw nga magburuhat.” (Prob. 8:30) An mga surugoon ni Jehova nagbuburublig liwat ha mga buruhaton nga igintoka ha ira. Pananglitan, hi Noe ngan an iya pamilya urosa nga nagtukod han arka. Nagburublig an mga Israelita ha pag-asembol, pagdismantol, ngan pagbalhin han tabernakulo samtang naglalakaton hira ha kamingawan. Urosa nga nagpatunog hira hin musika ngan nagkanta hin pagdayaw kan Jehova ha iya templo. Nagmalampuson an katawohan han Dios ha pagbuhat hini ngatanan tungod han kooperasyon.—Gen. 6:14-16, 22; Num. 4:4-32; 1 Kron. 25:1-8.

2. (a) Ano an makatirigamnan ha mga Kristiano ha siyahan nga siglo? (b) Ano nga mga pakiana an aton hihisgotan?

² An kooperasyon nakita liwat ha Kristiano nga kongregasyon han siyahan nga siglo ilarom han ulo hito nga hi Jesu-Kristo. Iginsaysay ni apostol Pablo nga bisan kon “damu nga klase an mga  regalo” ngan “damu nga klase an sagrado nga buruhaton” han tagsa nga dinihogan nga Kristiano, an ngatanan bahin han “uusa la nga lawas.” (Basaha an 1 Corinto 12:4-6, 12.) Kumusta man yana? Paonan-o kita makakapabilin nga nakooperar ha pagsangyaw nga buruhaton, ha kongregasyon, ngan ha pamilya?

3. Ano nga bisyon an nakita ni apostol Juan?

³ Ha ikatarapos han siyahan nga siglo C.E., nakita ni apostol Juan ha bisyon an pito nga anghel nga an kada tagsa nagpatunog hin trumpeta. Han ginpatunog han ikalima nga anghel an iya trumpeta, nakita ni Juan an “usa nga bitoon” nga nahulog tikang ha langit. An “bitoon” may kapot nga yawi nga iya gin-gamit ha pag-abri han ganggang han kahiladman. Katapos may ginawas nga madakmol nga asó, ngan tikang hito may nagkagawas nga mga duron. Imbes nga dauton an mga tanom, gin-atake hini nga mga duron “an mga tawo . . . nga an ira agtang waray marka han panselyo han Dios.” (Pah. 9:1-4) Sigurado nga maaram hi Juan nga peligroso gud ini nga mga duron. Diri ba gindaot han mga duron an Ehipto ha panahon ni Moises? (Eks. 10:12-15) An mga duron nga nakita ni Juan nagsisimbolo ha dinihogan nga mga Kristiano nga nagpapasamwak han mapwersa nga mensahe han paghukom ni Jehova. Ginbubuligan hira yana han minilyon nga katawohan nga may tunan-on nga paglaom. Diri urusahon nga an aton urosa nga pagsangyaw nagpapaluya ha impluwensya ni Satanas ha imperyo han buwa nga relihiyon nga kontrolado niya.

4. Ano nga toka an kinahanglan buhaton han katawohan han Dios, ngan paonan-o nira ini matutuman?

⁴ Ginsusugo kita ni Jehova nga isangyaw an “maopay nga sumat” ha bug-os nga kalibotan antes umabot an kataposan hini nga sistema. Daku gud ini nga buruhaton! (Mat. 24:14; 28:19, 20) Nag-uupod ini han pag-imbitar ha “bisan hin-o nga nauuhaw” nga uminom han “tubig han kinabuhi nga waray bayad.” (Pah. 22:17) Sugad nga mga membro han Kristiano nga kongregasyon, paonan-o naton ini matutuman? Pinaagi gud la ha ‘urosa nga pagkauruyon ngan pagkooperar.’—Efe. 4:16.

5, 6. Paonan-o kita nagkakaurosa samtang nagsasangyaw han maopay nga sumat?

⁵ Basi maipasamwak an mensahe han Ginhadian ha mas damu nga tawo tubtob nga posible, kinahanglan magsangyaw kita ha organisado nga paagi. Salit nakakakarawat kita hin mga instruksyon. An giya nga iginhahatag ha ngatanan nga kongregasyon ha bug-os nga kalibotan nabulig ha aton nga magkaurosa ha pagbuhat hito. Katapos han aton katirok para ha pagsangyaw, iginpapasamwak naton ha mga tawo an mensahe han Ginhadian pinaagi han aton ginyayakan ngan han minilyon nga kopya han mga publikasyon nga basado ha Biblia. Ginsusunod mo gud ba an instruksyon nga makigbahin ha espesyal nga mga kampanya ha pagsangyaw? Kon oo, nakikigkooperar ka ha minilyon nga iba pa nga urosa nga nagpapasamwak han mensahe han “anghel nga nalupad ha kabutngaan han langit ngan tuna,” nga gin-unabi ha Pahayag 14:6.

⁶ Makalilipay gud nga mabasa ha Yearbook an mag-opay nga resulta han aton urosa nga pagsangyaw ha bug-os nga kalibotan! Hunahunaa liwat an aton urosa nga pagpanaltag han mga imbitasyon para ha regional, espesyal, ngan internasyonal nga mga kombensyon. Hini nga mga katirok, nagpapahimulos kita hin parapriho nga makaparig-on nga impormasyon ha mga pahayag, drama, ngan pasundayag nga basado ha Biblia. Kasagaran nga nag-aaghat ini ha aton nga ihatag an aton pinakamaopay ha pag-alagad kan Jehova. An aton pagsaurog han kamatayon ni Jesus naghihiusa liwat ha  aton. Tungod han aton apresasyon ha diri matupngan nga pagkabuotan han Dios ngan ha pagsugot ha instruksyon ni Jesus, nagkakatirok kita kada tuig para hito nga okasyon, katunod han adlaw durante han Nisan 14. (1 Cor. 11:23-26) Diri la bawtismado nga mga Saksi an natambong. Pipira ka semana antes han Memoryal, nangangalimbasog kita pag-imbitar ha ngatanan ha an teritoryo nga tumambong kaupod naton hiton importante nga okasyon.

7. Ano an resulta han aton urosa nga pagbuhat?

⁷ An usa la nga duron waray daku nga mahihimo. Sugad man, an usa la nga indibiduwal diri makakasangyaw ha ngatanan nga tawo. Pero tungod kay urosa kita nga nagsasangyaw, nasusumatan naton an minilyon mahitungod kan Jehova ngan nabubuligan naton an iba nga dayawon ngan pasidunggan hiya. Pero diri la hito nga paagi maipapakita naton an aton pakigkooperar basi magkaurosa an katawohan han Dios.

8, 9. (a) Ano nga ilustrasyon an gin-gamit ni Pablo basi tutdoan an mga Kristiano nga magpabilin nga nagkakaurosa? (b) Paonan-o kita makikigkooperar ha kongregasyon?

⁸ Ha surat ni Pablo ha mga taga-Efeso, iginsaysay niya an pagkaorganisar han kongregasyon ngan an panginahanglan nga an ngatanan nga Kristiano ‘magin hamtong ha ngatanan nga butang.’ (Basaha an Efeso 4:15, 16.) Ano an mabulig ha tagsa ha aton nga magin hamtong ha ngatanan nga butang? Gamit an ilustrasyon mahitungod ha lawas han tawo, nagpokus hi Pablo ha pagkaurosa ilarom han ulo hito nga hi Jesu-Kristo. Nagsiring an apostol nga nakooperar an “tagsa nga kaluluthan.” Paonan-o an tagsa ha aton, batan-on man o lagas, mahimsog man o maluya, makakabulig ha pagparig-on han pagkaurosa ngan espirituwalidad han kongregasyon?

⁹ An usa nga paagi amo an pagpasakop ngan pagtahod ha mga tigurang nga ginpili ni Jesus nga maghatag hin giya ha kongregasyon. (Heb. 13:7, 17) Bangin diri pirme masayon an pagbuhat hini. Pero mahimo kita mangaro hin bulig kan Jehova. An iya baraan nga espiritu makakabulig ha aton nga kinasingkasing nga suportaran an mga kahikayan ha kongregasyon. Salit kon nakukurian kita pagsunod ha giya, sadang naton pamalandungon nga an aton mapainubsanon nga pagkooperar mabulig ha pagkaurosa han kongregasyon. Mabulig liwat ini ha aton ngatanan para maghilarom an aton gugma ha kabugtoan.

10. Paonan-o nabulig an mga ministeryal nga surugoon basi magkaurosa an kongregasyon? (Kitaa an retrato ha tinikangan hini nga artikulo.)

¹⁰ Daku an naibubulig han mga ministeryal nga surugoon ha pagkaurosa han kongregasyon. Anoman an ira edad, kinaburut-on nga nag-aalagad hira basi magpahimulos an ngatanan. Pananglitan, nabulig hira ha mga tigurang pinaagi ha pagsiguro nga may igo nga suplay han mga literatura nga magagamit naton ha ministeryo. Kasagaran nga hira an nanginginano ha regular nga paglimpyo ngan pagmintinar han Kingdom Hall, ngan gin-aabiabi nira an mga bisita nga natambong ha aton mga katirok. Kon nakooperar kita hini nga kabugtoan, nabulig kita nga magin organisado an mga buruhaton ha kongregasyon.—Itanding an Buhat 6:3-6.

11. Paonan-o makakabulig an burobata nga mga brother basi magkaurosa an kongregasyon?

¹¹ Damu nga tigurang an maiha na nga nag-aalagad ha kongregasyon. Pero tungod kay nagtitikalagas na hira, bangin limitado na an ira nabubuhat salit kinahanglan an mga pagbag-o. Daku an maibubulig han burobata nga mga brother. Bisan kon diri pa hira eksperyensyado, mahihimo nira an dugang nga mga  responsabilidad kon babansayon hira. Makalilipay gud kon an mga ministeryal nangangalimbasog nga magin kwalipikado nga tigurang! (1 Tim. 3:1, 10) May pipira nga burobata nga tigurang nga nagin kwalipikado pa ngani nga magin paramangno han sirkito, nga nag-aalagad ha mga kabugtoan ha damu nga kongregasyon. Diri ba mapasalamaton gud kita ha kinaburut-on nga bulig han burobata nga mga brother?—Basaha an Salmo 110:3; Eklesiastes 12:1.

12, 13. Ano an mabulig ha ngatanan nga membro han pamilya nga magkooperar ha usa kag usa?

¹² Yana hisgotan naton kon paonan-o kita makakabulig ha pagkaurosa han aton pamilya. Napamatud-an han damu nga an pagkaada mapulsanon nga Pagsingba han Pamilya kada semana nabulig basi maparig-on an relasyon han mga batan-on ngan lagas. Hini nga mga higayon, nakapokus kita ha espirituwal nga mga butang, salit nabulig ini nga magkaurosa an pamilya. An pagpraktis han ira presentasyon ha ministeryo mabulig ha pamilya nga magin mas epektibo ha pagsangyaw. Ngan kon ira nababatian an ira kapamilya nga nagyayakan mahitungod han kamatuoran ngan nasasantop nira nga an kada tagsa nahigugma kan Jehova ngan naruruyag nga lipayon hiya, nagigin mas duok hira ha usa kag usa.

¹³ Paonan-o maipapakita han mag-asawa nga nakooperar hira ha usa kag usa basi madayaw hi Jehova? Kon an mag-asawa pariho matinumanon nga surugoon ni Jehova, magigin malipayon hira ngan magkakahiusa. Hira Abraham ngan Sarah, Isaac ngan Rebeca, Elkana ngan Hana nagpahayag han ira gugma ha ira padis. Sadang liwat ini buhaton han mag-asawa. (Gen. 26:8; 1 Sam. 1:5, 8; 1 Ped. 3:5, 6) Mabulig ini ha ira nga magkahiusa ngan magin mas duok kan Jehova.—Basaha an Eklesiastes 4:12.

14. Kon an imo padis diri nag-aalagad kan Jehova, ano an imo bubuhaton basi maparig-on an iyo pag-asawa?

¹⁴ Sadang likyan han mga Kristiano nga magpas-an hin yugo upod han mga diri tumuroo. (2 Cor. 6:14) Kumusta man an kabugtoan nga may diri tumuroo nga mga kapamilya? An iba nga nag-aalagad ha Dios yana may asawa na han nahibaro hira han kamatuoran, ngan diri Saksi an ira padis. Bisan pa hito, an pag-aplikar han mga prinsipyo ha Biblia nabulig nga magkahiusa an ira pamilya. Tubtob nga posible, nakooperar hira pero diri nagkukompromiso. Bangin diri ini masayon, pero hunahunaa la an posible nga balos. An pag-aplikar han mga prinsipyo ha Biblia bangin makuri liwat kon an padis umundang ha pag-alagad. Nahitabo ini kan Mary. Hiya ngan an iya bana nga hi David magkaupod nga nag-alagad kan Jehova, pero hi David inundang pagtambong ha mga katirok ha sulod hin mga 25 ka tuig. Hi Mary padayon nga tinambong ha mga katirok ngan kombensyon ngan nangalimbasog pag-aplikar han mga prinsipyo ha Biblia ha ira pamilya, upod na an pagtutdo ha ira unom nga anak. Han nagin adulto na an ira mga anak ngan binaya ha ira balay, inabat ni Mary nga nag-uusahan na la hiya. Katapos, hi David nagtikang pagbasa han mga magasin nga ginbibilin ni Mary para ha iya. Ha urhi, hi David binalik pagtambong ha Kingdom Hall. An iya sais anyos nga apo nagrireserba hin lingkoran para ha iya, ngan kon diri hiya natambong, an bata nasiring, “Lo, waray ko ikaw makita kanina ha Kingdom Hall.” Yana, hira David ngan Mary malipayon ngan magkaupod nga nag-aalagad kan Jehova.

15. Paonan-o mabubuligan han edaran nga mga mag-asawa an burobata nga mga mag-asawa?

¹⁵ Ginpupuntirya ni Satanas an mga pamilya yana. Salit importante gud nga magkahiusa an mag-asawa ha pag-alagad kan Jehova. Mationan-o  man kaiha na an iyo pag-asawa, hunahunaa hin maopay kon ano an imo isisiring o bubuhaton basi maparig-on ito. May kalabotan hini, an edaran nga mga mag-asawa makakabulig ha burobata nga mga mag-asawa ha kongregasyon. Ha panapanahon, mahimo kamo mag-imbitar hin burobata nga mag-asawa ha iyo Pagsingba han Pamilya. Makikita nira nga importante pa gihapon an pagpahayag hin gugma ngan pagkahiusa bisan kon maiha na nga mag-asawa.—Tito 2:3-7.

16, 17. Ano an ginpapamulat han nagkakaurosa nga mga surugoon han Dios?

¹⁶ Handurawa an mga Israelita ha panahon han Biblia nga nagdadayaw kan Jehova durante han piyesta ha templo ha Jerusalem. Nag-aandam hira ha pagbiyahe, ginbubuligan an kada tagsa samtang nagbibiyahe, ngan urosa nga nagsisingba kan Jehova ha templo. Basi mahimo ini, kinahanglan nira magkooperar. (Luc. 2:41-44) Samtang nagbibiyahe kita tipakadto ha bag-o nga kalibotan, kinahanglan liwat naton magkaurosa ngan magkooperar. Para mahimo ini, importante an padayon ngan duro nga pangalimbasog. May kinahanglan ka ba pauswagon hini nga bahin?

¹⁷ Hunahunaa la an mga bendisyon nga aton mapapahimulosan! Ginsalikway na naton inin nagkakabahin-bahin ngan masamok nga sistema. Nakikita na naton an katumanan han tagna nira Isaias ngan Mika—an katawohan han Dios urosa nga nasagka ha “bukid ni Jehova.” (Isa. 2:2-4; basaha an Mika 4:2-4.) Oo, mas nagkakaurosa ha pagsingba an katawohan han Dios hinin kataposan nga mga adlaw. Pero mas malilipay pa gud kita kon an ngatanan nga tawo ha tuna nagkakaurosa ngan nakooperar na ha pag-alagad kan Jehova!