AN BARANTAYAN—ARADMAN NGA EDISYON Marso 2017
Ini nga gowa nagsusulod han aradman nga mga artikulo para ha Mayo 1-28, 2017.
ISTORYA HAN KINABUHI
Nagpahimulos Ako ha Pakig-upod ha mga Maaramon
Durante han damu ka tuig nga pag-alagad ha bug-os-panahon ni William Samuelson, nakakarawat hiya hin makalilipay ngan magkuri nga toka.
Pasidunggi Adton Angayan Kumarawat Hito
Hin-o an angayan pasidunggan, ngan kay ano? Paonan-o ka magpapahimulos kon papasidunggan mo an iba?
Ipakita an Pagtoo—Pagdesisyon hin Maaramon!
An pipira nga desisyon nga imo ginhihimo magkakaada gud daku nga epekto ha imo kinabuhi. Ano an makakabulig ha imo ha paghimo hin maaramon nga mga desisyon?
Mag-alagad kan Jehova ha Hingpit nga Kasingkasing!
An mga hadi han Juda nga hira Asa, Jehosapat, Hesekia, ngan Josia nakahimo hin sayop. Bisan pa hito, gintagad hira han Dios nga nag-alagad ha iya ha hingpit nga kasingkasing. Kay ano?
Andam ba an Imo Kasingkasing ha Pagsunod ha mga Iginsurat?
Mahibabaro ka hin birilhon nga mga leksyon tikang ha mga sayop han iba, upod na an mga sayop han mga tawohan ha Biblia.
Maopay nga Sangkay Bisan Kon Namimeligro an Pagkamagsangkay
Bangin may panahon nga kinahanglan mo gud buligan an imo sangkay basi maitadong an iya sayop. Ano an mahimo mo buhaton?
Ngaran ha Biblia ha Kadaan nga Tibod
Han 2012, may naukab nga mga tipak hin seramik nga tibod nga hinimo 3,000 ka tuig na an naglabay, ngan nagin interesado hito an mga parasaliksik. Kay ano?
