PRESYOSO gud an maopay nga kasangkayan, ngan an tinuod nga pagkamagsangkay diri kay basta la nga nahitatabo. Paonan-o matitipigan an pagkamagsangkay kon namimeligro ito? Damu an aton mahibabaroan ha mga tawohan ha Biblia nga nagin tinuod nga magsangkay pero ha urhi nameligro an pagkamagsangkay.

Hi David, nga paraataman hin mga karnero nga ha urhi nagin hadi, sigurado nga nagkaada mag-opay nga kasangkayan. Bangin usa hi Jonatan han imo mahunahuna. (1 Sam. 18:1) Pero may iba pa nga sangkay hi David sugad kan propeta Natan. An Biblia waray mag-unabi kon kakan-o nagtikang an ira pagkamagsangkay. Pero makausa, may iginsumat hi David kan Natan sugad la nga bangin nagsusumat ka ha imo sangkay. Hingyap ni David nga magtukod hin balay para kan Jehova. Sigurado nga ginpapabilhan ni David an opinyon ni Natan sugad nga iya sangkay ngan usa nga propeta ni Jehova.—2 Sam. 7:2, 3.

Pero may nahitabo nga nagin hinungdan nga nameligro an ira pagkamagsangkay. Nag-adulteryo hi Hadi David kan Batseba, katapos iginpapatay niya an asawa ni Batseba nga hi Uria. (2 Sam.  11:2-21) Ha sulod hin damu ka tuig, nagin maunungon hi David kan Jehova ngan iginpakita niya an hustisya han Dios. Pero nabuhat niya inin seryoso nga sala! Ano an nahitabo hinin maopay nga hadi? Waray ba niya masantop an pagkaseryoso han iya ginbuhat? Naghunahuna ba hiya nga maitatago niya ito ha Dios?

Ano an bubuhaton ni Natan? Pababay-an na la ba niya nga iba an magsaway ha hadi? Maaram an iba kon paonan-o iginpapatay ni David hi Uria. Salit kay ano nga manginginlabot pa hiya ngan ibubutang ha peligro an ira maiha na nga pagkamagsangkay? Mahimo pa ngani mameligro an kinabuhi ni Natan kon magyayakan hiya. Ngani, nahimo ni David nga ipapatay an inosente nga hi Uria.

Pero hi Natan tagapagyakan han Dios. Maaram hiya nga kon waray hiya bubuhaton, maaapektohan la gihapon an ira pagkamagsangkay ni David ngan makukonsensya hiya. Nakasala an iya sangkay nga hi David salit nawad-an han pag-uyon ni Jehova. An hadi nagkikinahanglan gud hin bulig basi maibalik an iya relasyon kan Jehova. Oo, kinahanglan ni David hin tinuod nga sangkay, ngan sugad hito hi Natan. Gintikangan niya an pakiistorya pinaagi hin ilustrasyon nga makakabantad han kasingkasing han paraataman hin mga karnero hadto. Iginpahayag ni Natan an mensahe han Dios pero ha paagi nga masasantop ni David an pagkaseryoso han iya mga sala ngan magpapagios ha iya nga magbasol.—2 Sam. 12:1-14.

Ano an imo bubuhaton kon an imo sangkay nakahimo hin seryoso nga sala? Bangin maghunahuna ka nga kon susumatan mo hiya hito, maruruba an iyo pagkamagsangkay. O bangin hunahunaon mo nga kon isusumat mo an iya maraot nga buhat ha mga tigurang, nga makakabulig ha iya ha espirituwal, diri ka magmamaunungon ha iyo pagkamagsangkay. Ano an imo bubuhaton?

Hi Gianni nga gin-unabi kanina nagsiring: “Inabat ko nga nag-iba hi Maurizio. Diri na hiya maistoryahon, diri pariho hadto. Nagdesisyon ako nga kaistoryahon hiya, bisan kon makuri gud ito para ha akon. Naghunahuna ako: ‘Ano daw la an akon isisiring ha iya nga diri pa niya hinbabaroan? Posible nga masina gud hiya!’ Pero han ginhinumdom ko an amon mga gin-adman, nagkaada ako kaisog nga kaistoryahon hiya. Ginbuligan niya ako han ako an nanginginahanglan. Diri ko karuyag nga maruba an amon pagkamagsangkay, pero karuyag ko nga buligan hiya kay hinigugma ko hiya.”

Hi Maurizio nagsiring liwat: “Sinsero hi Gianni—ngan husto hiya. Maaram ako nga diri hi Gianni ngan hi Jehova an angay basulon han magraot nga resulta han akon sayop nga desisyon. Salit ginkarawat ko an disiplina, ngan ha urhi naibalik an akon maopay nga espirituwalidad.”

May iba pa nga sangkay hi David nga nagmaunungon gud ha iya bisan ha magkuri nga kahimtang. Usa hito hi Husay, nga gin-unabi ha Biblia sugad nga “sangkay ni David.” (2 Sam. 16:16; 1 Kron. 27:33) Posible nga opisyal hiya han palasyo nga nagin kaupod-upod han hadi, nga usahay gintataporan han kompidensyal nga mga sugo.

Han gin-agaw ni Absalon an trono kan David, damu nga Israelita an dinapig kan Absalon, pero waray dumapig hi Husay. Han pinalagiw hi David, lumanat ha iya hi Husay. Nasakitan gud hi David kay gintraydor hiya han iya kalugaringon nga anak ngan han pipira han iya gintataporan. Pero nagpabilin nga maunungon hi Husay; andam hiya nga isakripisyo an iya kinabuhi ngan tumanon an iya misyon nga pakyason an plano han mga traydor. Ginbuhat ini ni Husay diri la kay may obligasyon hiya sugad nga opisyal han palasyo, kondi ginpamatud-an niya nga maunungon hiya nga sangkay.—2 Sam. 15:13-17, 32-37; 16:15–17:16.

Makalilipay nga an hinungdan han pagkaurosa han kabugtoan yana diri la an ira mga toka o responsabilidad ha kongregasyon. Makikita ha ira mga buhat nga baga hin nasiring hira, “Magsangkay kita diri tungod kay kinahanglan, pero tungod kay importante ka ha akon.”

 Ito an naeksperyensyahan ni Federico. Ha bulig han iya duok nga sangkay nga hi Antonio, nalamposan niya an makuri nga problema. Hi Federico nagsiring: “Han binalhin hi Antonio ha amon kongregasyon, nagkasangkay dayon kami. Pariho kami ministeryal nga surugoon, ngan nalilipay kami ha pagbuhat nga magkaupod. Waray pag-iha, ginpili hiya sugad nga tigurang. Labot la han pagin sangkay, maopay liwat hiya nga susbaranan para ha akon.” Ha urhi, nakasala hi Federico. Nangaro dayon hiya hin bulig ha mga tigurang, pero natanggal hiya ha pagin payunir ngan ministeryal. Ano an ginbuhat ni Antonio?

Hi Federico nagsiring: “Nakita ko gud nga inabat ni Antonio an akon kasakit. Nangalimbasog hiya ha pagbulig ha akon basi maliaw ako. Karuyag gud niya nga magin marig-on utro an akon espirituwalidad ngan waray niya ako pabay-i. Gindasig niya ako nga mangalimbasog nga maibalik an akon maopay nga espirituwalidad ngan diri mawad-an hin paglaom.” Hi Antonio nagsiring: “Naghatag ako hin mas daku nga panahon kan Federico. Karuyag ko ipaabat ha iya nga andam ako mamati ha iya, pati na han iya mga kasakit.” Makalilipay nga naibalik ni Federico an iya maopay nga espirituwalidad ngan ha urhi nagin payunir ngan ministeryal hiya utro. Ha kataposan, hi Antonio nagsiring: “Yana, bisan kon diri na kami magkakongregasyon, mas nagin duok kami ha kada tagsa.”

Ano an imo aabaton kon ginbayaan ka han imo duok nga sangkay ha panahon nga ginkikinahanglan mo gud hiya? Masakit gud ito. Mapapasaylo mo ba hiya? Magbabag-o ba an iyo marig-on nga pagkamagsangkay?

Hunahunaa an nahitabo kan Jesus han hirani na hiya mamatay. Naghatag hiya hin daku nga panahon ha iya matinumanon nga mga apostol, ngan duok gud hira ha kada tagsa. Husto la nga gintawag hira ni Jesus nga iya kasangkayan. (Juan 15:15) Pero ano an nahitabo han gin-aresto hiya? Ginbayaan nira hiya. Prangka nga nagsiring hi Pedro nga diri gud niya babayaan an iya  Agaron, pero hito mismo nga gab-i iginnigar niya hi Jesus!—Mat. 26:31-33, 56, 69-75.

Maaram hi Jesus nga mag-uusahan la hiya ha pag-atubang han iya ultimo nga pagsari. Bisan pa hito, may rason gud hiya nga umabat nga ginpakyas hiya han iya kasangkayan ngan masakitan pa ngani. Pero ha iya pakiistorya ha ira katapos hiya banhawon, makikita nga waray gud hiya pagdumot ha ira, o pagbasol nga ginpili niya hira. Waray na ni Jesus unabiha an mga sayop han mga disipulo, pati an ira ginbuhat han gab-i nga gin-aresto hiya.

Lugod, ginparig-on ni Jesus hi Pedro ngan an iba pa nga apostol. Ginpamatud-an niya nga nasarig hiya ha ira pinaagi ha paghatag ha ira hin instruksyon mahitungod ha pinakaimportante nga buruhaton nga pagpanutdo. Para kan Jesus, kasangkayan pa gihapon niya an mga apostol. Waray gud makalimti han mga apostol an iya gugma ha ira. Nangalimbasog gud hira nga diri na nira utro mapasubo an ira Agaron. Ngani, malampuson nira nga gintuman an toka nga iya iginhatag ha iya mga sumurunod.—Buh. 1:8; Col. 1:23.

An duok nga magsangkay nga hi Elvira ngan hi Giuliana nagkaada liwat diri pagsinabtanay. Hi Elvira nagsiring: “Han ginsidngan niya ako nga nasakitan hiya han akon ginbuhat, inabat ko nga diri ako maopay nga sangkay. May rason gud hiya nga masina ha akon. Pero nabantad gud ako kay inabat ko nga mas nababaraka hiya ha akon ngan ha magigin resulta han akon panggawi. Gin-aapresyar ko gud nga waray hiya magpokus ha akon sayop nga nahimo ha iya, kondi ha maraot nga magigin epekto hito ha akon kalugaringon. Nagpapasalamat ako kan Jehova nga may-ada ako sangkay nga mahunahunaon han akon kaopayan imbes nga unahon an iya kalugaringon nga pagbati.”

Salit, ano an ginhihimo han usa nga maopay nga sangkay kon namimeligro an ira pagkamagsangkay? Andam hiya nga makiistorya ha iya ha buotan pero marig-on nga paagi. Sugad hito nga sangkay hira Natan ngan Husay, nga nagpabilin nga maunungon bisan pa ha magkuri nga kahimtang; sugad liwat hito hi Jesus, nga andam magpasaylo. Sugad ka ba hito nga klase hin sangkay?