MAHAGKOT adto nga aga ha Brookings, South Dakota, E.U.A. Inaabat ko gud nga hirani na an kathagkot. Pero bangin mahipausa kamo nga hito mismo nga adlaw kaupod ako han gutiay nga grupo nga ginkakadal ha usa nga kamalig nga waray pampapaso. Naninindog kami ha may irimnan han mga hayop nga may matugnaw nga tubig! Iistoryahan ko kamo han akon kinabuhi basi masabtan niyo kon kay ano nga nakada ako.

Natawo ako han Marso 7, 1936; ako an putó ha upat nga magburugto. Naukoy kami ha gutiay nga uma ha este han South Dakota. Bisan kon importante an pag-uma para ha amon pamilya, diri ito an pinakaimportante. An akon mga kag-anak nabawtismohan sugad nga mga Saksi ni Jehova han 1934. Nagdedikar hira ha aton langitnon nga Amay nga hi Jehova, salit prayoridad nira an pagbuhat han iya kaburut-on. An akon tatay nga hi Clarence, ngan ha urhi an akon batâ nga hi Alfred, nag-alagad sugad nga company servant (gintatawag yana nga koordinetor han lawas han mga tigurang) ha amon gutiay nga kongregasyon ha Conde, South Dakota.

An pagtambong ha Kristiano nga mga katirok ngan pagsangyaw ha balay-balay mahitungod han makalilipay nga mga saad han Biblia regular na nga rutina han amon pamilya. An susbaranan han akon mga kag-anak ngan an ira pagbansay ha amon nagkaada gud maopay nga epekto ha amon. Pariho kami ni Ate Dorothy nagin magwarali han Ginhadian han sais anyos kami. Han 1943, nagpaenrol ako ha Teokratiko nga Eskwelahan ha Ministeryo, nga hito nga panahon bag-o la nga igindugang ha aton mga katirok.

Importante ha amon an mga kombensyon ngan asembleya. Ha usa nga kombensyon han 1949 ha Sioux Falls, South Dakota, hi Bugto Grant Suiter an  bisita nga mamumulong. Nahinunumdoman ko pa an iya pahayag nga, “Mas Hirani Na Ito Kay han Imo Ginhuhunahuna!” Ginpabug-atan niya nga kinahanglan gamiton hin bug-os han dedikado nga mga Kristiano an ira kinabuhi ha pagsangyaw han maopay nga sumat han naestablisar na nga Ginhadian han Dios. Ito an nagpagios ha akon nga magdedikar kan Jehova. Salit han sumunod nga sirkito nga asembleya ha Brookings, han Nobyembre 12, 1949, nakada ako hiton mahagkot nga kamalig nga gin-unabi kanina—naghuhulat nga mabawtismohan. Upat kami nga ginbawtismohan ha puthaw nga irimnan han mga hayop.

Nagin tumong ko an pagpayunir. Han Enero 1, 1952, han 15 anyos ako, nagtikang ako pagpayunir. An Biblia nasiring: “Lakat kaupud han mga tawo nga makinaadmanon, ngan ikaw makikinaadmanon.” (Prob. 13:20) Damu an makinaadmananon o maaramon ha akon pamilya nga sumuporta ha akon desisyon nga magpayunir. An akon batâ nga hi Julius, nga 60 anyos an edad, an akon nagin partner pagpayunir. Bisan diri kami magkaedad, malipayon gud kami nga magkaupod ha ministeryo. Damu an akon nahibaroan ha iya mga eksperyensya. Waray pag-iha, nagpayunir liwat hi Ate Dorothy.

Han bata pa ako, damu nga paramangno han sirkito pati an ira asawa an ginpaukoy nira Tatay ha amon balay. Daku gud an naibulig ha akon han mag-asawa nga hira Jesse ngan Lynn Cantwell. An ira mga pagparig-on nakabulig ha akon nga magdesisyon pagpayunir. Naaghat ako nga maghimo hin espirituwal nga mga tumong tungod han ira iginpakita nga personal nga interes. Kon nabisita hira ha mga kongregasyon nga hirani ha amon, usahay gin-iimbitar nira ako nga umupod ha ministeryo. Makalilipay ngan makaparig-on gud ito!

Hi Bud Miller ngan an iya asawa nga hi Joan, an sunod nga nagin paramangno ha amon sirkito. Hito nga panahon, 18 anyos ako ngan ginpatawag ako para magsundalo. Iginlista ako han komite nga nagpipili han magigin mga sundalo ha buruhaton nga para ha akon supak ha iginsugo ni Jesus ha iya mga sumurunod nga magin neutral ha politika. Pero karuyag ko gud magsangyaw han maopay nga sumat han Ginhadian. (Juan 15:19) Salit nag-apela ako hito nga komite nga ilista ako sugad nga ministro.

Nalipay gud ako han gin-updan ako ni Bugto Miller ha pag-atubang ha komite. Makisangkayon gud hiya  ngan diri hadlukon. Nagkaada gud ako kompyansa kay may kaupod ako nga bugto nga may hilarom nga pagsabot ha Kasuratan! Sugad nga resulta hito nga pagbista, iginlista ako han komite sugad nga ministro han 1954. Naghatag ito ha akon hin higayon nga makab-ot an usa pa nga espirituwal nga tumong.

Hito nga panahon, nakakarawat ako hin imbitasyon nga mag-alagad ha Bethel, ha gintatawag hadto nga Watchtower Farm, ha Staten Island, New York. Nakapribilehiyo ako nga mag-alagad didto hin tulo ka tuig. Nagkaada ako makalilipay nga mga eksperyensya kay damu nga maaramon an akon nakilala ngan nakatrabaho didto.

Nahimumutang liwat ha farm ha Staten Island an estasyon han radyo nga WBBR. Gindumara ito han mga Saksi ni Jehova tikang han 1924 tubtob 1957. Kinse tubtob 20 la an igintutoka nga Bethelite ha farm. Kadam-an ha amon mga batan-on ngan waray pa damu nga eksperyensya. Pero kaupod namon an edaran nga dinihogan nga hi Bugto Eldon Woodworth. Maaramon gud hiya. An iya pagtratar ha amon nga pariho hin mga anak nagparig-on ha amon ha espirituwal. Kon may nabangon nga diri pagsinabtanay, ginsisidngan niya kami, “Urusahon gud an ginhihimo han Ginoo bisan pa han pagin diri perpekto han iya mga surugoon.”

Nakapribilehiyo liwat kami nga makaupod hi Bugto Frederick W. Franz. An iya kinaadman ngan hilarom nga kahibaro ha Kasuratan nakabulig gud ha amon; nagpakita liwat hiya hin personal nga interes ha amon. Hi Harry Peterson an amon paraluto; mas masayon namon luwason an Peterson kay han iya tinuod nga apelyido nga Papargyropoulos. Usa liwat hiya nga dinihogan ngan madasigon gud ha ministeryo. Maduruto hi Bugto Peterson ha iya trabaho ha Bethel pero diri gud niya ginpapabay-an an pagministeryo. Ginatos han aton mga magasin an iya naipapanaltag kada bulan. Damu gud an iya nahibabaroan ha Kasuratan, salit nababaton niya an damu han amon mga pakiana.

Ha farm mismo ginhihimo an proseso han pagpreserba ha mga inani. Kada tuig, mga 45,000 ka garapon nga prutas ngan utanon an ginpipreserba para ha bug-os nga pamilya han Bethel. Nakapribilehiyo ako nga makatrabaho an maaramon nga sister nga hi Etta Huth. Hiya an nanginginano ha paghimo han mga resipe ha pagpreserba han mga inani. Kon  ginpipreserba na an mga inani, may nabulig nga mga sister tikang ha kahigrani nga mga kongregasyon, ngan hi Etta an nabulig pag-organisar han ira mga buruhaton. Bisan kon daku an papel ni Etta hini nga buruhaton, maopay hiya nga ehemplo ha pagpakita hin respeto ha mga paramangno ha farm. Para ha akon, usa gud hiya nga maopay nga susbaranan ha pagin mapinasakupon ha pagkaulo.

Usa hi Angela Romano han mga batan-on nga nabulig ha pagpreserba han mga inani. Hi Etta an binulig ha iya han nahibaro hiya han kamatuoran. Salit han nag-aalagad ako ha Bethel, nakilala ko an usa pa nga maaramon nga kaupod ko yana ha sulod hin 58 ka tuig na. Ginkasal kami ni Angie han Abril 1958, ngan nagkaada kami damu ngan makalilipay nga eksperyensya ha pag-alagad. An pagin maunungon ni Angie kan Jehova nakabulig gud nga matipigan nga marig-on an amon pag-asawa. Makakasarig gud ako ha iya, anoman nga problema an amon atubangon.

Han iginbaligya an pasilidad han WBBR han 1957, nag-alagad ako ha Bethel ha Brooklyn ha sulod hin pipira ka panahon. Katapos nagpakasal kami ni Angie, salit binaya ako ha Bethel ngan nagpayunir kami ha Staten Island ha sulod hin mga tulo ka tuig. Nagtrabaho ako hin madaliay ha estasyon han radyo nga gintatawag nga WPOW nga nakapalit han WBBR.

Determinado kami ni Angie nga magkinabuhi hin simple basi magin andam pirme ha pag-alagad kon diin may panginahanglan. Salit han 1961, nakapribilehiyo kami nga magin espesyal payunir ha Falls City, Nebraska. Katapos gud la namon makapahiuyon hiton bag-o nga toka, gin-imbitar kami nga umatender ha usa ka bulan nga klase han Kingdom Ministry School ha South Lansing, New York. Nalipay gud kami han pagbansay nga amon nakarawat, ngan naghunahuna kami nga magagamit namon ito pagbalik ha Nebraska. Salit waray kami makatoo han gintagan kami hin bag-o nga toka—sugad nga misyonero ha Cambodia! Inin makaruruyag nga nasud ha Sur-este han Asia naghatag ha amon hin higayon nga maeksperyensyahan an urusahon nga mga kiritaon, huni, ngan amyon nga bag-o gud ha amon. Determinado kami nga ipasamwak an maopay nga sumat dida hito nga lugar.

Pero nagbag-o an kahimtang han politika, salit kinahanglan namon bumalhin ha Sur han Vietnam. Makasurubo nga paglabay hin duha ka tuig nagkaada ako grabe nga sakit, salit napiritan kami pag-uli ha amon nasud. Kinahanglan ko magpaopay. Pero han natambal na ako, binalik dayon kami pagpayunir.

Han Marso 1965, nakapribilehiyo kami nga mag-alagad sugad nga nagbibiyahe nga paramangno. Ha sulod hin 33 ka tuig, malipayon kami nga nag-alagad ha sirkito ngan distrito nga buruhaton upod na an pagpanginano ngan pag-organisar hin mga kombensyon. Ginpapamulat ko gud an mga kombensyon salit nalilipay ako pagbulig ha pag-organisar hito. Ha sulod hin pipira ka panahon, igintoka kami ha mga lugar han New York City, ngan damu nga kombensyon an gindumara ha Yankee Stadium.

Pariho ha damu nga aada ha espesyal nga bug-os-panahon nga pag-alagad, nakakarawat liwat kami ni Angie hin makalilipay ngan magkuri nga mga toka. Pananglitan, han 1995, gintokahan ako nga magin instruktor han Ministerial Training School. Paglabay hin tulo ka tuig, gintawag kami ha Bethel. Makalilipay  gud nga paglabay hin sobra 40 ka tuig, nakabalik ako ha Bethel, diin nagtikang an akon espesyal nga bug-os-panahon nga pag-alagad. Ha sulod hin pipira ka panahon, nagtrabaho ako ha Service Department ngan nagin instruktor ha pipira nga teokratiko nga eskwelahan. Han 2007, ginporma han Nagmamando nga Lawas an Theocratic Schools Department basi manginano ha mga eskwelahan nga gindudumara ha Bethel, ngan nakapribilehiyo ako nga magin paramangno hito ha sulod hin pipira ka tuig.

Hinin bag-o la, nakita namon an makatirigamnan nga mga pagbag-o may kalabotan ha teokratiko nga edukasyon. Gintikangan an School for Congregation Elders han 2008. Paglabay hin duha ka tuig, sobra 12,000 nga tigurang an nabansay ha Bethel ha Patterson ngan ha Brooklyn. Padayon nga gindudumara ito nga eskwelahan ha iba-iba nga lugar, ngan may mga instruktor nga ginbansay para hito. Han 2010, an Ministerial Training School ginsaliwnan han ngaran nga Bible School for Single Brothers, ngan nagporma hin bag-o nga eskwelahan nga gintatawag nga Bible School for Christian Couples.

Tikang han 2015 nga tuig han pag-alagad, ito nga duha nga eskwelahan gintampo ngan nagin School for Kingdom Evangelizers. An puydi magin estudyante hito mga inasaw-an o solo nga mga brother o sister. Damu nga kabugtoan ha bug-os nga kalibotan an nalipay gud han hinbaroan nira nga ini nga eskwelahan pagdudumarahon ha iba-iba nga sanga nga opisina. Makalilipay makita nga damu an nakakapribilehiyo nga makaeskwela hini, ngan nagpapasalamat gud ako nga makilala an damu nga naghimo hin mga pagbag-o basi makakarawat hini nga pagbansay.

Kon ginhihinumdom ko an akon kinabuhi antes ako mabawtismohan didto hito nga irimnan han mga hayop tubtob yana, nagpapasalamat ako kan Jehova tungod han mga maaramon nga binulig ha akon nga magkinabuhi uyon ha kamatuoran. Diri ko hira mga kaedad o kapariho han gindak-an nga kultura, pero mga hamtong hira ha espirituwal. An ira hilarom nga gugma kan Jehova makikita ha ira mga buhat ngan panggawi. Ha organisasyon ni Jehova, damu an maaramon nga puydi naton makaupod. Ngan nagpahimulos gud ako ha pakig-upod ha ira.