1. Kay ano nga bangin angayan pasidunggan an pipira nga indibiduwal, ngan ano an aton hihisgotan hini nga artikulo?

AN PAGPASIDUNGOG ha usa nagpapasabot hin paghatag ha iya hin espesyal nga atensyon ngan respeto. Kasagaran na nga ginpapasidunggan ngan ginrirespeto naton an usa kon may ginbuhat hiya nga takos hin pagpasidungog o may importante hiya nga katungdanan. Salit maopay nga pakianhan naton an aton kalugaringon, ‘Hin-o an sadang naton pasidunggan, ngan kay ano nga angayan hira kumarawat hito?’

2, 3. (a) Kay ano nga takos hi Jehova tagan hin espesyal nga pagpasidungog? (Kitaa an retrato hini nga pahina.) (b) Ha Pahayag 5:13, hin-o an Kordero, ngan kay ano nga angayan hiya pasidunggan?

² Iginpapakita han Pahayag 5:13 nga angayan gud pasidunggan ‘an Dios nga nalingkod ha trono ngan an Kordero.’ Mababasa naton ha kapitulo 4 hito mismo nga libro an usa nga rason kon kay ano nga angayan gud pasidunggan hi Jehova. An ginpahitaas nga mga linarang ha langit nagsinggit ha pagdayaw kan Jehova, an “Dios nga . . . nabubuhi ha waray kataposan.” Hira nagsiring: “Jehova nga amon Dios, takos ka ha pagkarawat han himaya, dungog, ngan gahum, kay  ikaw an naghimo han ngatanan nga butang, ngan tungod han imo kaburut-on ineksister hira ngan ginpanhimo.”—Pah. 4:9-11.

³ An Kordero amo hi Jesu-Kristo, “an Kordero han Dios nga nagkukuha han sala han kalibotan.” (Juan 1:29) An Biblia nagsusumat ha aton nga labaw gud hiya ha bisan hin-o nga tawhanon nga hadi. Ito nasiring: “[Hiya] an Hadi han mga nagmamando sugad nga hadi ngan Ginoo han mga nagmamando sugad nga ginoo, an amo la nga imortal, nga nag-uukoy ha diri-nadadaop nga kalamrag, nga waray tawo nga nakakita o makakakita.” (1 Tim. 6:14-16) May iba pa ba nga hadi nga andam mamatay basi magin lukat para ha aton mga sala? Diri ka ba naaaghat nga dumuyog ha minilyon nga linarang ha langit ha pagsiring: “An Kordero nga ginpatay takos ha pagkarawat han gahum, karikohan, kinaadman, kusog, dungog, himaya, ngan pagdayaw.”—Pah. 5:12.

4. Kay ano nga importante gud nga pasidunggan naton hi Jehova ngan an Kristo?

⁴ Importante gud nga pasidunggan naton hi Jehova ngan an Kristo. An aton kinabuhi nga waray kataposan nakadepende ha aton pagpasidungog ha ira. Ginpapabug-atan ito han ginsiring ni Jesus ha Juan 5:22, 23: “An Amay diri naghuhukom ha bisan hin-o, lugod iginhatag niya ha Anak an bug-os nga awtoridad ha paghukom, basi an Anak pasidunggan han ngatanan sugad la nga ginpapasidunggan nira an Amay. An diri nagpapasidungog ha Anak diri nagpapasidungog ha Amay nga nagsugo ha iya.”—Basaha an Salmos 2:11, 12.

5. Kay ano nga an mga tawo takos pasidunggan ngan respetuhon?

⁵ An mga tawo ginlarang “ha ladawan han Dios.” (Gen. 1:27) Salit naipapakita han kadam-an nga tawo an mga kalidad han Dios ha pipira nga sukol. May abilidad hira nga ipakita ha ira igkasi-tawo an gugma, pagkabuotan, ngan pagpaid. Tungod kay an mga tawo ginlarang nga may konsensya—bisan kon usahay sayop o diri husto an igindidikta hito—nahibabaro hira kon ano an husto o sayop, tangkod o diri tangkod, angayan o diri angayan. (Roma 2:14, 15) Kadam-an han mga tawo an nadadani ha mga butang nga malimpyo ngan makaruruyag. Kasagaran na nga karuyag nira nga magkinabuhi nga mamurayawon kaupod an iba. Oo, naipapakita nira ha pipira nga sukol an himaya ni Jehova, nasasantop man nira ito o diri. Tungod hini, takos hira pasidunggan ngan respetuhon.—Sal. 8:5.

6, 7. May kalabotan ha pagpasidungog ha iba, kay ano nga naiiba an mga Saksi ni Jehova ha damu nga tawo?

⁶ Kinahanglan naton hibaroan kon ano nga klase hin pagpasidungog an sadang naton ihatag ha iba ngan kon ano an mga limitasyon hito. Kadam-an han diri hingpit nga tawo impluwensyado gud han kalibotan ni Satanas. Salit may tendensya hira nga magin idolo an partikular nga mga indibiduwal imbes nga tagan la hira hin angayan nga pagpasidungog ngan respeto. Gindadayaw nira hin sobra an mga lider han relihiyon ngan politika, sikat nga mga atleta, ngan mga artista, nga haros gintatagad na ini nga mga indibiduwal sugad nga mga dios. Salit ginhihimo hira nga susbaranan han mga batan-o ngan lagas; bangin ginsusubad pa ngani an ira mga panggios, panyakan, pamado, o panggawi.

⁷ Ginlilikyan han tinuod nga mga Kristiano iton sayop nga klase hin pagpasidungog ha mga tawo. Ha ngatanan nga tawo nga nabuhi, an Kristo la an hingpit nga susbaranan nga angay naton subaron. (1 Ped. 2:21) Diri malilipay an Dios kon papasidunggan naton an mga tawo labaw han angayan para ha ira. Kinahanglan naton hinumdoman inin importante nga kamatuoran: “An ngatanan nakasala ngan diri nira naipapakita an himaya han Dios.” (Roma 3:23) Matin-aw nga diri gud angay pasidunggan an mga tawo ha paagi nga baga hin ginsisingba na naton hira.

8, 9. (a) Ano an pagtagad han mga Saksi ni Jehova ha mga opisyal han gobyerno? (b) Ano an limitasyon han aton pagpasakop ha mga opisyal han gobyerno?

 ⁸ May mga indibiduwal nga angayan pasidunggan tungod han ira katungdanan. Pananglitan, an mga opisyal han gobyerno daku an naibubulig ha mga tawo. Hira an nag-iimplementar han mga balaud basi magkaada seguridad an ira mga sakop, ngan nag-aasikaso hira ha mga panginahanglan han ira mga tuminungnong. Salit ginsagdonan ni apostol Pablo an mga Kristiano nga hunahunaon an mga gobyerno han tawo sugad nga “higtaas nga awtoridad,” ngan sadang hira magpasakop hito. Ginsugo niya hira: “Ihatag ha ngatanan an angay ha ira, an nagkikinahanglan han buhis, tagi han buhis . . . an kinahanglan pasidunggan, pasidunggi.”—Roma 13:1, 7.

⁹ Salit kinaburut-on nga ginpapasidunggan han mga Saksi ni Jehova an mga opisyal han gobyerno, ginlalaoman man ito hini nga mga opisyal o kustomre ito han nasud. Nakooperar kita samtang gintutuman nira an ira mga responsabilidad. Pero an aton pagpasidungog ngan pagpasakop ha ira may makatadunganon ngan Kasuratanhon nga mga limitasyon. Diri kita nasunod ha ira kon an pagbuhat hito magtatalapas ha balaud han Dios o maikukompromiso naton an aton pagin neutral.—Basaha an 1 Pedro 2:13-17.

10. Paonan-o an mga surugoon ni Jehova hadto nagpakita hin susbaranan kon paonan-o tatagdon an gobyerno ngan an mga opisyal hito?

¹⁰ An mga surugoon ni Jehova hadto nagpakita hin susbaranan kon paonan-o tatagdon an gobyerno ngan an mga opisyal hito. Han nagsugo an Imperyo han Roma nga magparehistro an ngatanan nga tawo, sumugot hira Jose ngan Maria. Nagbiyahe hira pakadto ha Betlehem bisan kon hirani na hi Maria manganak han iya suhag. (Luc. 2:1-5) Ha urhi, han gin-akusaran hi Pablo nga nagbuhat hiya hin maraot, matinalahuron nga gindepensahan niya an iya kalugaringon ngan nagpakita hin angayan nga pagpasidungog kan Hadi Herodes Agripa ngan kan Festo, nga gobernador han Judea nga sakop han Roma.—Buh. 25:1-12; 26:1-3.

11, 12. (a) Kay ano nga magkaiba an aton pagtagad ha mga opisyal han gobyerno ngan ha mga lider han relihiyon? (b) Ano an nagin resulta han ginpasidunggan han Saksi nga taga-Austria an usa nga politiko?

¹¹ Pero sadang ba liwat tagan han mga Saksi ni Jehova hin espesyal nga pagpasidungog an relihiyoso nga mga lider, bisan kon ini nga mga lider bangin naglalaom hito? Sayop an igintututdo han buwa nga relihiyon mahitungod ha Dios ngan ginbabaliko hito an mga katutdoan han iya Pulong. Salit gintatagad naton hira pariho han aton pagtagad ha igkasi-tawo, pero diri naton hira gintatagan hin espesyal nga pagpasidungog. Sadang naton hinumdoman nga ha panahon ni Jesus iya ginkondenar ito nga kalalakin-an sugad nga mga hipokrito ngan buta nga paratugway. (Mat. 23:23, 24) Ha kabaliktaran, an aton paghatag hin angayan nga pagpasidungog ngan respeto ha mga opisyal han gobyerno usahay may positibo nga resulta, bangin diri pa ngani naton ito ginlalaoman.

¹² Hi Leopold Engleitner usa nga madasigon nga Saksi ha Austria nga gin-aresto han mga Nazi ngan iginsakay hin tren pakadto ha prisohan ha Buchenwald. Sakay liwat hito nga tren an usa nga politiko ha Austria nga hi Dr. Heinrich Gleissner, nga diri nauyon ha patakaran han mga Nazi. Samtang nagbibiyahe hira pakadto ha prisohan, matinalahuron nga iginsaysay ni Bugto Engleitner an iya mga gintotoohan kan Gleissner, nga namati hin maopay ha iya. Katapos han Girra ha Kalibotan II, damu ka beses nga gin-gamit ni Gleissner an iya awtoridad basi buligan an mga Saksi ha Austria. Bangin may mahunahuna ka nga iba nga ehemplo may kalabotan han maopay nga resulta kon iginpapakita han mga Saksi an angayan nga respeto ha mga opisyal pinaagi ha pagpasidungog ha ira uyon ha ginsisiring han Biblia nga sadang buhaton han mga Kristiano.

13. Hin-o an labi nga angayan pasidunggan ngan respetuhon, ngan kay ano?

¹³ An aton kabugtoan ha pagtoo angayan gud pasidunggan ngan respetuhon, labi na an mga tigurang nga nangunguna ha kongregasyon. (Basaha an 1 Timoteo 5:17.) Ginpapasidunggan naton hira anoman an ira lahi, edukasyon, o kahimtang ha kinabuhi. Gin-uunabi hira han Biblia sugad nga “regalo nga kalalakin-an,” ngan may importante hira nga papel ha kahikayan han Dios ha pagtagana han mga panginahanglan han iya katawohan. (Efe. 4:8) Hunahunaa an mga tigurang, paramangno han sirkito, membro han Komite han Sanga, ngan an Nagmamando nga Lawas. Pariho ha mga Kristiano han siyahan nga siglo, ginpapasidunggan naton inin pinili nga kalalakin-an nga nangunguna ha buruhaton. Diri naton gin-iidolo inin kilala nga kalalakin-an ha organisasyon o gintatratar hira sugad hin mga anghel kon kaupod naton hira. Pero ginpapasidunggan ngan ginrirespeto naton hira tungod han ira pagin maduruto ngan mapainubsanon.—Basaha an 2 Corinto 1:24; Pahayag 19:10.

14, 15. Kay ano nga naiiba an tinuod nga Kristiano nga mga paraataman ha damu nga lider han relihiyon?

¹⁴ Kilala an mga tigurang sugad nga mapainubsanon nga espirituwal nga mga paraataman. Ngani, diri nira karuyag nga trataron hira sugad hin mga artista. Salit naiiba hira ha damu nga lider han relihiyon yana ngan han siyahan nga siglo nga ginsidngan ni Jesus: “Naruruyag hira lumingkod ha pinakamaopay nga pwesto ha mga panihapon ngan ha prente nga mga lingkoran ha mga sinagoga, ngan tagan hin katalahoran ha mga merkado.”—Mat. 23:6, 7.

¹⁵ An tinuod nga Kristiano nga mga paraataman mapainubsanon nga nasugot ha ginsiring ni Jesus: “Ayaw kamo pagpatawag nga Rabbi, kay usa la an iyo Magturutdo, ngan kamo ngatanan magburugto. Diri liwat niyo tawagon nga amay an bisan hin-o ha tuna, kay usa la an iyo Amay nga aadto ha langit. Ngan ayaw kamo pagpatawag nga mga lider, kay usa la an iyo Lider, an Kristo. Pero an may daku nga awtoridad ha iyo, sadang magin surugoon niyo. An bisan hin-o nga nagpapahitaas pauubson, ngan an bisan hin-o nga nagpapaubos pahihitas-on.” (Mat. 23:8-12) Salit nasasabtan naton kon kay ano nga an mga tigurang ha kongregasyon ha bug-os nga kalibotan ginhihigugma, ginrirespeto, ngan ginpapasidunggan han ira mga igkasi-tumuroo.

16. Kay ano nga sadang kita mangalimbasog nga masabtan ngan iaplikar an sugo han Biblia may kalabotan ha pagpasidungog ha iba?

¹⁶ Oo, bangin kinahanglan naton hin panahon basi magin timbang ha pagpasidungog ha iba. Ito liwat an kahimtang han mga Kristiano ha siyahan nga siglo. (Buh. 10:22-26; 3 Juan 9, 10) Pero damu nga kapulsanan an aton makakarawat  kon aton bubuhaton an sugo han Biblia may kalabotan ha pagin timbang ha pagpasidungog ha iba.

17. Ano an pipira nga kapulsanan kon ginpapasidunggan naton adton may mga awtoridad?

¹⁷ Kon aton ginrirespeto ngan ginpapasidunggan adton may mga awtoridad ha komunidad, posible gud nga depensahan nira an aton katungod ha pagsangyaw. Kasagaran na nga nagkakaada hira positibo nga panhunahuna ha aton pagsangyaw nga buruhaton. Mga pipira ka tuig na an naglabay, hi Birgit nga payunir ha Alemanya, inatender ha gradwasyon han iya anak. Ginsidngan hiya han mga titser nga nalilipay gud hira nga may-ada hira pirme mga Saksi nga kabataan nga estudyante. Nagsiring hira nga an pagkaada mga Saksi nga estudyante nakabulig nga magin mas maopay an ira eskwelahan. Hi Birgit nagsiring, “Gintututdoan namon an amon mga anak nga sundon an mga suruklan han Dios may kalabotan ha panggawi, upod na hito an pagrespeto ngan pagpasidungog ha mga titser.” Usa nga maestra an nagsiring, “Kon ngatanan nga kabataan pariho han iyo mga anak, magigin makalilipay gud an pagtutdo.” Paglabay hin pipira ka semana, usa han mga titser an tinambong ha kombensyon ha Leipzig.

18, 19. Kay ano nga importante nga ihatag naton ha mga tigurang an angayan nga pagpasidungog?

¹⁸ Syempre, an pagpasidungog ha mga tigurang ha kongregasyon kinahanglan ipahiuyon ha maaramon nga mga prinsipyo ha Pulong han Dios. (Basaha an Hebreo 13:7, 17.) Puydi naton hira kumendasyonan, ngan sadang naton ito buhaton tungod han ira pagin maduruto. Sadang liwat kita sumunod ha mga giya nga ira iginhahatag. Kon bubuhaton naton ito, mahimo naton hira mabuligan nga padayon nga magin malipayon ha pagtuman han ira mga responsabilidad. Pero diri ini nagpapasabot nga mangangalimbasog kita nga subaron an usa nga “kilala” nga tigurang ha iya pamado ngan pag-ayos, estilo han pagdumara hin pahayag publiko, o bisan ha iya paagi han pakiistorya. Kon bubuhaton naton ini, maghahatag ini hin sayop nga impresyon nga tawo an aton ginsusunod, diri an Kristo. Sadang naton hinumdoman nga diri liwat hingpit ito nga tigurang.

¹⁹ Kon ihahatag naton ha mga tigurang an angayan nga pagpasidungog ngan respeto imbes nga tagdon hira sugad hin mga artista, makakabulig kita ha ira. Ha ano nga paagi? Makakabulig ito ha ira nga diri magpahitaas ngan diri maghunahuna nga labaw hira ha iba o pirme hira husto.

20. Paonan-o kita nagpapahimulos kon ginpapasidunggan naton an iba?

²⁰ Kita mismo nagpapahimulos liwat kon ginpapasidunggan naton adton angayan kumarawat hito. Nabulig ini ha aton nga diri magin makikalugaringon ngan malikyan an pagpahitaas kon ginpapasidunggan kita han iba. Nabulig liwat ini ha aton nga magpabilin nga kahiusa ha organisasyon ni Jehova ngan diri maghatag hin sobra nga pagpasidungog ha mga tawo—tumuroo man o diri. Dugang pa, maaramon gud ito kay malilikyan naton an kahipakdol kon an usa nga aton ginpapasidunggan nakabuhat hin sayop.

21. Ano an pinakaimportante nga kapulsanan han paghatag hin angayan nga pagpasidungog ha mga takos kumarawat hito?

²¹ An paghatag hin angayan nga pagpasidungog ha mga takos kumarawat hito nakakapalipay gud ha Dios, ngan ini an pinakaimportante nga kapulsanan ha pagbuhat hito. Gintutuman naton an iya karuyag ngan iginpapakita naton nga maunungon kita ha iya. Nabulig ito nga mabaton ni Jehova an bisan hin-o nga nagtatamay ha iya. (Prob. 27:11) An kadam-an han mga tawo ha kalibotan sayop an panhunahuna mahitungod ha pagpasidungog ha iba. Mapasalamaton gud kita nga hinbaroan naton kon paonan-o papasidunggan an iba uyon ha paagi ni Jehova.