An mga retrato han hitsura ni Pablo nga makikita ha aton mga publikasyon mga representasyon la ngan diri basado ha mga napamatud-an han arkeolohiya.

Pero may pipira nga paghulagway han hitsura ni Pablo. Pananglitan, an Marso 1, 1902 nga Zion’s Watch Tower nag-unabi hin usa nga reperensya. Ito nasiring: “May kalabotan han hitsura ni Pablo: . . . An ‘Acts of Paul and Thecla,’ . . . nga iginsurat han mga A. D. 150, may paghulagway kan Pablo, nga posible amo an pinakamaopay ngan maiha na nga gintotoohan han kadam-an. Hini nga reperensya, iginhuhulagway hiya sugad nga ‘hamubo, dangas, sakang, maskulado, nagtatapo an kiray; posible hitaas an irong.’”

An The Oxford Dictionary of the Christian Church (1997 nga edisyon) nagsiring mahitungod hiton kadaan nga sinurat: “Posible nga an ‘Acts [of Paul and Thecla]’ may mga impormasyon nga husto ha kasaysayan.” An Acts of Paul and Thecla nagin kilala gud ha sulod hin pipira ka siglo katapos ito isurat kay mababasa ito ha 80 nga Griego nga manuskrito, ngan may bersyon ito ha iba nga mga linggwahe. Salit an aton mga retrato han hitsura ni Pablo nauyon ha paghulagway han pipira nga kadaan nga reperensya.

Kondi hinumdumi nga may mas importante kay han hitsura ni Pablo. Bisan kon madasigon hi Pablo ha iya ministeryo, may pipira nga kritiko nga nagsiring nga an “iya presensya maluya ngan an iya ginyayakan waray pulos.” (2 Cor. 10:10) Pero sadang naton hinumdoman nga nagin Kristiano hiya pinaagi han milagroso nga kapahayagan tikang kan Jesus. Mahimo liwat naton hunahunaon kon ano an mga nahimo ni Pablo sugad nga ‘surudlan nga ginpili nga magdara han kan Jesus ngaran ngadto ha mga nasud.’ (Buh. 9:3-5, 15; 22:6-8) Ngan hunahunaa an mga kapulsanan nga aton makukuha ha mga libro han Biblia nga iginpasurat ni Jehova kan Pablo.

Waray ighambog ni Pablo an iya mga nahimo antes hiya magin Kristiano, ngan waray liwat niya ihulagway an iya hitsura. (Buh. 26:4, 5; Fil. 3:4-6) Hiya nagsiring: “Ako an pinakaubos ha mga apostol, ngan diri ako angay tawagon nga apostol.” (1 Cor. 15:9) Ha urhi hiya nagsurat: “Inin diri-matupngan nga pagkabuotan iginhatag ha akon nga ubos pa ha pinakaubos han ngatanan nga baraan, basi maipasamwak ko ha mga nasud an maopay nga sumat mahitungod han diri matugkad nga mga karikohan han Kristo.” (Efe. 3:8) Ito nga mensahe sigurado nga mas importante kay han paghinunahuna kon ano an posible nga hitsura ni Pablo.