1. Ano an karuyag siguruhon han Kristiano nga mga kag-anak antes magpabawtismo an ira anak?

“HA SULOD hin mga bulan, ginsisinidngan ko hira Papa ngan Mama nga karuyag ko na magpabawtismo, ngan kasagaran nga ginkakaistorya nira ako may kalabotan hito. Karuyag nira masiguro nga nasasabtan ko kon ano kaseryoso ito nga akon desisyon. Han Disyembre 31, 1934, inabot ito nga importante nga hitabo ha akon kinabuhi.” Ini an pagkasaysay ni Blossom Brandt ha mga panhitabo han nagdesisyon hiya nga magpabawtismo. Karuyag liwat han Kristiano nga mga kag-anak yana nga buligan an ira anak ha paghimo hin maaramon nga mga desisyon. An paglangan ha pagpabawtismo nga waray makatadunganon nga hinungdan mahimo magresulta hin espirituwal nga kadaot. (San. 4:17) Pero karuyag siguruhon han maaramon nga mga kag-anak nga antes magpabawtismo an ira anak andam na hiya ha pagtuman han responsabilidad han pagin disipulo han Kristo.

2. (a) Kay ano nga nababaraka an pipira nga paramangno han sirkito? (b) Ano an aton hihisgotan hini nga artikulo?

 ² Nababaraka an pipira nga paramangno han sirkito kay may nakikilala hira nga mga batan-on nga hirani na mag-20 anyos o sobra na 20 anyos nga diri pa bawtismado, bisan kon nagdaku hira ha Kristiano nga pamilya. Kasagaran na nga ini nga mga batan-on natambong ha mga katirok ngan nakikigbahin ha ministeryo. Ginhuhunahuna nira nga mga Saksi ni Jehova hira. Pero nag-aalang hira nga magdedikar kan Jehova ngan magpabawtismo. Ano an posible nga hinungdan? Usahay, an ira mga kag-anak an nag-aaghat ha ira nga diri la anay magpabawtismo. Hini nga artikulo, hihisgotan naton an upat nga ginkakabarak-an han pipira nga Kristiano nga kag-anak nga nagpupugong ha ira ha pagbulig ha ira anak nga magin kwalipikado ha bawtismo.

3. Ano an ginkakabarak-an han mga kag-anak ni Blossom?

³ An mga kag-anak ni Blossom, nga gin-unabi ha siyahan nga parapo, matin-aw nga nababaraka kon aada na ba ha husto nga edad an ira anak basi masabtan an kahulogan ngan an pagkaseryoso han bawtismo. Paonan-o mahibabaroan han mga kag-anak kon andam na an ira anak ha pagdedikar han iya kalugaringon kan Jehova?

4. Paonan-o makakabulig ha mga kag-anak an sugo nga mababasa ha Mateo 28:19, 20 samtang gintututdoan nira an ira anak?

⁴ Basaha an Mateo 28:19, 20. Sugad han ginhisgotan ha nauna nga artikulo, an Biblia waray maghatag hin espisipiko nga edad para mabawtismohan an usa nga indibiduwal. Pero makakabulig ha mga kag-anak an pagpamalandong ha ginsisiring han Mateo 28:19. Hini nga teksto, hi Jesus nagsugo nga tutdoan an iba ‘basi magin iya mga disipulo.’ Nagpapasabot ini hin pagtutdo ha usa nga an tumong amo an pagbulig ha iya nga magin estudyante, o disipulo. An usa nga disipulo amo adton nahibabaro ngan nakakasabot han katutdoan ni Jesus ngan determinado ha pagtuman hito. Salit, sadang tutdoan han Kristiano nga mga kag-anak an ira anak tikang ha kabata nga an tumong amo an pagbulig ha iya nga magin bawtismado nga disipulo han Kristo. Oo, an usa nga minasus-an diri magigin kwalipikado ha bawtismo. Pero iginpapakita han Biblia nga bisan an mga bata mahimo makasabot ngan magpabili han mga kamatuoran ha Biblia.

5, 6. (a) Sumala ha rekord han Biblia mahitungod kan Timoteo, ano an aton mahibabaroan may kalabotan han iya bawtismo? (b) Paonan-o mabubuligan ha epektibo nga paagi han maaramon nga mga kag-anak an ira anak?

⁵ Hi Timoteo usa nga disipulo nga nagkinabuhi uyon ha kamatuoran bisan kon bata pa hiya. Hi apostol Pablo nagsiring nga nahibaro hi Timoteo han mga kamatuoran ha Kasuratan tikang han iya katawo. Bisan kon magkaiba an relihiyon han mga kag-anak ni Timoteo, gintutdoan hiya han iya Judio nga nanay ngan lola nga higugmaon an Pulong han Dios. Sugad nga resulta, nagkaada hiya marig-on nga pagtoo. (2 Tim. 1:5; 3:14, 15) Han mga 20 anyos na hi Timoteo, nagin usa hiya nga Kristiano nga kwalipikado na para ha espesyal nga mga pribilehiyo ha kongregasyon.—Buh. 16:1-3.

⁶ Syempre, iba-iba an tagsa nga bata; diri ngatanan nagigin hamtong ha parapriho nga kalaksihon o ha parapriho nga edad. May mga bata nga nakakasabot na han kamatuoran, nakakahimo na hin maaramon nga desisyon, ngan naruruyag na magpabawtismo. An iba, bangin diri pa andam magpabawtismo tubtob nga magin mas edaran hira. Salit diri ginpipirit han maaramon nga mga kag-anak an ira anak nga magpabawtismo. Lugod, ginbubuligan nira an ira anak nga mag-uswag ha espirituwal uyon ha iya maaakos nga kalaksihon. Nalilipay an mga kag-anak kon igin-aaplikar han ira anak an ginsisiring ha Proberbios 27:11. (Basaha.) Pero, diri nira sadang kalimtan an ira tumong—an pagbulig ha ira anak nga magin disipulo han Kristo. May kalabotan hito, sadang pakianhan han mga kag-anak an ira kalugaringon, ‘May igo na ba nga  kahibaro an akon anak basi magdedikar ha Dios ngan magpabawtismo?’

7. Kinahanglan ba nga maaram han ngatanan nga detalye han katutdoan ha Biblia an usa nga naruruyag magpabawtismo? Isaysay.

⁷ Sugad nga mga magturutdo ha pamilya, karuyag gud han mga kag-anak nga an ira anak magkaada marig-on nga pundasyon han kahibaro. Ito nga kahibaro mabulig ha anak nga maghingyap nga magdedikar ha Dios. Pero diri ini nagpapasabot nga kinahanglan hibaroan han anak an ngatanan nga detalye han mga katutdoan ha Biblia antes hiya magdedikar ha Dios ngan magpabawtismo. Katapos mabawtismohan, an ngatanan nga disipulo sadang magpadayon ha pagkuha hin husto nga kahibaro. (Basaha an Colosas 1:9, 10.) Kon sugad, mationan-o kadamu nga kahibaro an ginkikinahanglan antes mabawtismohan an usa?

8, 9. Ano an aton mahibabaroan ha rekord han Biblia mahitungod kan Pablo ngan ha tinaporan ha prisohan?

⁸ May mahibabaroan an mga kag-anak ha eksperyensya han usa nga pamilya ha siyahan nga siglo. (Buh. 16:25-33) Ha iya ikaduha nga pagbiyahe sugad nga misyonero, han mga 50 C.E., ginbisita ni Pablo an Filipos. Didto, gin-aresto hi Pablo ngan an iya kaupod nga hi Silas tungod hin buwa nga mga akusasyon, ngan ginpriso hira. Pagkagab-i, nagkaada makusog nga linog nga nagbay-og han mga pundasyon han prisohan ngan naabrihan an mga purtahan. Tungod ha kahadlok nga bangin nakaeskapo an mga priso, mag-uunay na unta an tinaporan ha prisohan pero ginpugngan hiya ni Pablo. Nasangyawan nira Pablo ngan Silas an tinaporan ha prisohan ngan an iya pamilya. An apresasyon hini nga pamilya ha kamatuoran nga ira hinbaroan mahitungod kan Jesus nagpagios ha ira nga magpabawtismo dayon. Ano an aton mahibabaroan tikang hini nga eksperyensya?

⁹ Sumala ha nahiaraan, an tinaporan ha prisohan posible nga usa nga retirado nga sundalo. Diri hiya maaram han Kasuratan. Salit basi magkaada marig-on nga pundasyon han kahibaro ha Kasuratan, kinahanglan niya hibaroan an nangunguna nga mga kamatuoran ha Biblia, masabtan kon ano an nahiuupod han pagin surugoon han Dios, ngan magin determinado ha pagsunod han mga katutdoan ni Jesus. Ha halipot la nga panahon, an iya kahibaro ha nangunguna nga mga kamatuoran ha Kasuratan ngan an iya apresasyon hito nagpagios ha iya nga magpabawtismo. Sigurado nga padayon niya nga gindugangan an iya kahibaro katapos han iya bawtismo. Pinaagi hini nga ehemplo, ano an imo mahimo buhaton kon an imo anak nagpapakita hin kinasingkasing nga apresasyon ha nangunguna nga mga katutdoan han Kasuratan, upod na an kahulogan ngan importansya han dedikasyon ngan bawtismo? Bangin mahunahuna han Kristiano nga mga kag-anak nga mahimo na makiistorya an ira anak ha mga tigurang ha kongregasyon basi makita kon kwalipikado na hiya para ha bawtismo. * Pariho han iba nga bawtismado nga disipulo, padayon hiya nga magkukuha hin kahibaro mahitungod han katuyoan ni Jehova ha bug-os niya nga kinabuhi, ngan bisan ha waray kataposan.—Roma 11:33, 34.

10, 11. (a) Ano an ginhuhunahuna han pipira nga kag-anak? (b) Ano an sadang magin prayoridad han mga kag-anak?

¹⁰ May mga kag-anak nga naghuhunahuna nga mas makakaopay para ha ira anak nga diri la anay magpabawtismo basi magkuha hin hitaas nga edukasyon ngan magkaada maopay nga sekular nga karera. Bangin maopay an motibo hini nga mga kag-anak, pero makakabulig ba ito nga magin tinuod nga malampuson an ira anak? Labaw ha ngatanan, uyon ba ito ha Kasuratan? Ano nga klase hin pagkinabuhi an igin-aaghat han Pulong ni Jehova?—Basaha an Eklesiastes 12:1.

¹¹ Kinahanglan naton hinumdoman nga an kalibotan  ngan an ngatanan nga bahin hito nakontra ha kaburut-on ngan panhunahuna ni Jehova. (San. 4:7, 8; 1 Juan 2:15-17; 5:19) An duok nga relasyon kan Jehova amo an pinakamaopay nga panalipod han imo anak kontra kan Satanas, ha iya kalibotan, ngan han diri diosnon nga panhunahuna hito. Kon tatagan hin prayoridad han mga kag-anak an edukasyon ngan trabaho, posible hunahunaon han ira anak nga mas importante an mga butang ha kalibotan kay han iya relasyon kan Jehova. Maruruyag gud ba an mahigugmaon nga mga kag-anak nga ini nga kalibotan an magmolde ha panhunahuna han ira anak may kalabotan ha kalamposan? Ha pagkamatuod, nagkakaada la kita tinuod nga kalipay ngan kalamposan kon gin-uuna naton hi Jehova ha aton kinabuhi.—Basaha an Salmos 1:2, 3.

12. Kay ano nga karuyag han pipira nga kag-anak nga diri la anay magpabawtismo an ira anak?

¹² Usa nga Kristiano nga nanay an nagsaysay kon kay ano nga diri niya karuyag nga magpabawtismo an iya anak. Hiya nagsiring: “Naaawod ako ha pagsiring nga an nangunguna nga rason amo an kahikayan han pagpaiwas ha kongregasyon.” Pariho hito nga bugto, ginhuhunahuna han pipira nga kag-anak nga mas maopay nga diri la anay magpabawtismo an ira anak tubtob nga kaya na niya atohan an tendensya ha pagbuhat hin diri maaramon, nga komon ha mga bata. (Gen. 8:21; Prob. 22:15) Bangin maghunahuna hira, ‘Samtang diri pa bawtismado an akon anak, diri hiya puydi paiwason ha kongregasyon.’ Kay ano nga malimbungon ini nga pangatadongan?—San. 1:22.

13. Kon diri pa bawtismado an usa, nagpapasabot ba ito nga waray hiya baratunon kan Jehova? Isaysay.

¹³ Syempre, diri maruruyag an Kristiano nga mga kag-anak nga magpabawtismo an ira anak samtang diri pa hiya hamtong ha pagdesisyon nga idedikar an iya kalugaringon kan Jehova. Pero sayop an panhunahuna nga kon diri pa bawtismado an bata, waray pa hiya baratunon kan Jehova. Kay ano? An pagkaada baratunon kan Jehova diri la nagtitikang katapos han bawtismo. Lugod, an usa nga bata may baratunon na ha Dios kon maaram na hiya kon ano an husto ngan sayop ha paniplatan ni Jehova. (Basaha an Santiago 4:17.) Salit imbes nga pugngan an anak nga magpabawtismo, an maaramon nga mga kag-anak nangangalimbasog ha pagpakita hin maopay nga ehemplo. Karuyag nira nga tikang ha kabata magkaada kinasingkasing nga apresasyon an ira anak ha hitaas nga mga suruklan ni Jehova ha moral. (Luc. 6:40) An sugad nga apresasyon amo an pinakamaopay nga panalipod, kay mapapagios hito an imo anak nga sundon an matadong nga mga paagi ni Jehova.—Isa. 35:8.

14. Paonan-o makakabulig an mga tigurang ha mga kag-anak nga nangangalimbasog pagbulig ha ira anak nga magin kwalipikado ha bawtismo?

¹⁴ Sugad nga espirituwal nga mga paraataman, an mga tigurang ha kongregasyon makakabulig ha mga kag-anak pinaagi ha pagin positibo kon nag-iistorya mahitungod ha espirituwal nga mga tumong. Nahinumdoman han usa nga sister, nga nag-alagad sugad nga payunir hin sobra 70 ka tuig, an epekto han ira pag-istorya ni Bugto Charles T. Russell han sais anyos pa la hiya. Hiya nagsiring: “Naggahin hiya hin 15 minutos basi kaistoryahon ako mahitungod han akon espirituwal nga mga tumong.” Oo, an positibo nga mga pulong ngan pagdasig mahimo makaapekto ha bug-os nga kinabuhi han usa. (Prob. 25:11) Mahimo liwat pabuligon han mga tigurang an mga kag-anak ngan an ira mga anak ha mga buruhaton ha Kingdom Hall. Mahimo nira tagan an mga bata hin toka uyon ha ira edad ngan mga abilidad.

15. Ano an pipira nga paagi nga mahimo madasig han mga membro han kongregasyon an mga batan-on?

¹⁵ An mga membro han kongregasyon makakabulig pinaagi ha pagpakita hin angayan nga personal nga interes ha mga batan-on. Nag-uupod ini ha pagin maobserbaron ha mga tigaman han espirituwal nga pag-uswag. Naghatag ba an usa nga batan-on hin kinasingkasing ngan inandam hin maopay  nga komento o nagkaada bahin ha midweek nga katirok? Nalamposan ba han usa nga batan-on an usa nga pagsari ha iya integridad o nangalimbasog nga makagsangyaw ha eskwelahan? Ayaw pag-alang ha paghatag hin sinsero nga kumendasyon. Puydi mo ba liwat himoon nga tumong nga makiistorya ha usa nga batan-on—antes o katapos han katirok—sugad nga pagpakita nga interesado ka gud ha iya? Kon bubuhaton naton ini ngan an iba pa nga paagi, aabaton han mga batan-on nga bahin hira han “daku nga katiguban [o, kongregasyon].”—Sal. 35:18.

16, 17. (a) Ano an koneksyon han bawtismo ha paglaom han usa nga magkaada kinabuhi nga waray kataposan? (b) Ano nga kalipay an karuyag maeksperyensyahan han ngatanan nga Kristiano nga kag-anak? (Kitaa an retrato ha tinikangan hini nga artikulo.)

¹⁶ An pagpadaku hin anak “uyon ha disiplina ngan sagdon ni Jehova” usa han pinakadaku nga pribilehiyo han Kristiano nga mga kag-anak. (Efe. 6:4; Sal. 127:3) Diri pariho han mga anak han mga Israelita hadto, an mga anak han mga Kristiano yana waray matawo nga bahin na han katawohan nga dedikado kan Jehova. Dugang pa, an gugma ha Dios ngan ha kamatuoran diri napapanunod. Tikang ha katawo han ira anak, sadang magin tumong han mga kag-anak nga buligan an ira anak nga magin disipulo, magdedikar ha Dios, ngan magpabawtismo. May mas importante pa ba hito? Aw, an dedikasyon han tagsa nga indibiduwal, an iya bawtismo, ngan an iya matinumanon nga pag-alagad ha Dios amo an mabulig ha iya nga makakarawat han tigaman para ha katalwasan ha tiarabot nga daku nga kasakitan.—Mat. 24:13.

¹⁷ Han nagdesisyon hi Blossom Brandt nga magpabawtismo, karuyag siguruhon han iya mahadlukon ha Dios nga mga kag-anak nga andam na hiya para ha pinakaimportante nga pitad ha iya kinabuhi. Han nasiguro nira nga andam na hiya, ginsuportaran nira an iya desisyon. Ha gab-i antes han iya bawtismo, may maopay nga ginbuhat an iya tatay. Hi Blossom nagsiring: “Ginpaluhod niya kami ngatanan, ngan nag-ampo hiya. Iginsumat niya kan Jehova nga malipayon gud hiya ha desisyon han iya bata pa nga anak nga babaye nga idedikar an iya kinabuhi ha Iya.” Paglabay hin sobra 60 ka tuig, hi Blossom nagsiring: “Sigurado, diri ko gud hingangalimtan ito nga gab-i, bisan ha maabot nga katuigan!” Mga kag-anak, hinaot abaton niyo an kalipay ngan katagbaw kon makita niyo an iyo anak nga magin dedikado ngan bawtismado nga surugoon ni Jehova.