1. Paonan-o kita nagkakaada kinaadman, ngan paonan-o ito makakabulig ha aton?

HI Jehova an Surok han kinaadman, ngan hura nga gintatagan niya hito an iba. An Santiago 1:5 nasiring: “Kon may bisan hin-o ha iyo nga kulang hin kinaadman, padayon nga mangaro hiya ha Dios, kay hura nga nahatag Hiya ha ngatanan ngan diri nasisina.” Usa nga paagi nga nagkakaada kita kinaadman nga tikang ha Dios amo an pagkarawat han iya disiplina. Ngan ito nga kinaadman makakapanalipod ha aton tikang ha kadaot ha moral ngan espirituwal. (Prob. 2:10-12) Tungod hito, ‘nakakapabilin kita ha gugma han Dios, nga nagriresulta hin kinabuhi nga waray kataposan.’—Jud. 21.

2. Paonan-o kita magkakaada apresasyon ha disiplina han Dios?

² Kondi tungod han aton pagin diri perpekto, han paagi han pagpadaku ha aton, ngan han iba pa nga butang, nagigin makuri para ha aton an pagkarawat hin disiplina o an pagkaada positibo nga panhunahuna mahitungod hito. Nagkakaada kita apresasyon ha disiplina kon naieksperyensyahan naton an mga benepisyo hito, nga nagpapamatuod nga hinigugma kita han Dios. An Proberbios 3:11, 12 nasiring: “Anak ko, ayaw pagtamaya an pagbadlong ni Jehova; . . . Kay kon hin-o an hinihigugma ni Jehova iya sinasaway.” Oo, pirme naton hinumdoman nga karuyag ni Jehova kon ano an makakaopay ha aton. (Basaha an Hebreo 12:5-11.) Tungod kay kilala gud kita han Dios, an iya disiplina pirme angayan ngan makatadunganon.  Hisgotan naton an upat nga butang may kalabotan ha disiplina: (1) disiplina ha kalugaringon, (2) pagdisiplina han mga kag-anak ha ira anak, (3) pagdisiplina ha sulod han kongregasyon, ngan (4) usa nga butang nga mas masakit kay han temporaryo nga kasakit nga resulta han disiplina.

3. Paonan-o an usa nga bata nagkakaada disiplina ha kalugaringon? Iilustrar.

³ An disiplina ha kalugaringon nag-uupod hin pagpugong han aton kalugaringon basi mag-uswag an aton panggawi ngan panhunahuna. Waray kita ig-anak nga may-ada na disiplina ha kalugaringon. Kinahanglan naton ito pag-adman. Ha pag-ilustrar: Kon nag-aaram pa la pagbisikleta an usa nga bata, kasagaran na nga ginkakaptan han kag-anak an bisikleta basi diri hiya matumba. Pero kon nahibabaro na pagbalanse an bata, ha panapanahon ginbubuhian hiya hin madaliay han iya kag-anak. Kon maaram na an bata magbalanse, bug-os na hiya nga bubuhian han iya kag-anak. Ha pariho nga paagi, kon padayon ngan mapailubon nga gintututdoan han mga kag-anak an ira anak “uyon ha disiplina ngan sagdon ni Jehova,” ginbubuligan liwat nira an ira anak nga magkaada disiplina ha kalugaringon ngan kinaadman.—Efe. 6:4.

4, 5. (a) Kay ano nga an disiplina ha kalugaringon importante nga bahin han “bag-o nga personalidad”? (b) Kay ano nga diri kita sadang manluya bisan kon kita ‘mahulog ha makapito,’ siring pa?

⁴ Pariho liwat hito an kahimtang hadton adulto na nga nahibaro mahitungod kan Jehova. Oo, bangin may-ada na hira disiplina ha kalugaringon ha pipira nga sukol. Pero may kalabotan ha espirituwal, an usa nga bag-o nga disipulo diri pa hamtong. Kondi samtang nahibabaro hiya pagsul-ot han “bag-o nga personalidad” ngan padayon nga ginsusubad an Kristo, nag-uuswag hiya ha pagin hamtong. (Efe. 4:23, 24) An disiplina ha kalugaringon importante nga bahin hito nga pag-uswag. Sugad nga resulta, nahibabaro kita nga “isalikway an pagin diri-diosnon ngan an kalibotanon nga mga hingyap, ngan magkinabuhi nga may maopay nga panhunahuna ngan pagkamatadong ngan debosyon ha Dios samtang adi kita hini nga sistema.”—Tito 2:12.

⁵ Kondi, kita ngatanan makasasala. (Ekles. 7:20) Salit kon nagsasayop kita, diri ito nagpapasabot nga kulang an aton disiplina ha kalugaringon o waray kita hito. An Proberbios 24:16 nasiring: “An tawo nga matadong nahoholog ha makapito, ngan mabangon liwat.” Ano an mabulig ha aton nga ‘makabangon’? Diri an aton kalugaringon nga kusog, kondi an espiritu han Dios. (Basaha an Filipos 4:13.) An bunga hito nga espiritu nag-uupod hin pagpugong ha kalugaringon, nga konektado gud ha disiplina ha kalugaringon.

6. Paonan-o kita magigin mas maopay nga estudyante han Pulong han Dios? (Kitaa an retrato ha tinikangan hini nga artikulo.)

⁶ An kinasingkasing nga pag-ampo, pag-aram ha Biblia, ngan pagpamalandong importante liwat basi magkaada kita disiplina ha kalugaringon. Pero ano man kon nakukurian ka ha pag-aram han Pulong han Dios o bangin diri ka mahilig mag-aram? Hinumdumi nga andam bumulig hi Jehova kon magpapabulig ka ha iya. Mabubuligan ka niya nga ‘hingyapon’ an iya Pulong. (1 Ped. 2:2) Siyahan, pag-ampo kan Jehova nga buligan ka nga magkaada disiplina ha kalugaringon basi makaggahin ka hin panahon ha pag-aram han Biblia. Katapos, gios uyon ha imo pag-ampo. Bangin puydi ka magtikang pinaagi hin halipot nga mga pag-aram. Ha urhi, magigin mas masayon na ha imo an pag-aram ngan magigin mas makalilipay na ito! Ngani, magigin makaruruyag na ha imo an mamingaw nga mga panahon nga imo ginagamit ha pagpamalandong han presyoso nga mga kamatuoran tikang kan Jehova.—1 Tim. 4:15.

7. Paonan-o an disiplina ha kalugaringon makakabulig ha aton ha pagkab-ot hin espirituwal nga tumong?

⁷ An disiplina ha kalugaringon nabulig ha aton nga makab-ot an aton espirituwal nga mga tumong. Hunahunaa an ehemplo han usa nga tatay nga inabat nga nagtitikawara an iya kadasig. Tungod kay nababaraka, ginhimo niya nga tumong nga magin regular payunir ngan nagbasa hiya hin mga artikulo ha aton mga magasin mahitungod ha pagpayunir. An pagbuhat hini, upod an pag-ampo, nagparig-on han  iya determinasyon ngan han iya espirituwalidad. Nag-u-auxiliary payunir liwat hiya kon igintutugot han iya kahimtang. Ano an resulta? Bisan pa han mga ulang, nagpokus hiya ha iya tumong nga magin regular payunir ngan ha urhi, nakab-ot niya ito.

8-10. Ano an mahimo makabulig ha mga kag-anak ha pagpadaku han ira anak nga mag-alagad kan Jehova? Paghatag hin ehemplo.

⁸ An Kristiano nga mga kag-anak may presyoso nga pribilehiyo—an pagpadaku han ira anak “uyon ha disiplina ngan sagdon ni Jehova.” (Efe. 6:4) Makuri gud an pagbuhat hito, labi na ha aton panahon. (2 Tim. 3:1-5) Syempre, an mga bata waray ig-anak nga maaram na han husto ngan sayop. Kondi igin-anak hira nga may-ada konsensya, pero kinahanglan ito tutdoan, o disiplinahon. (Roma 2:14, 15) Sumala ha usa nga reperensya ha Biblia, an Griego nga pulong nga iginhubad nga “disiplina” mahimo liwat magpasabot hin pagpadaku ha anak basi magin responsable nga adulto.

⁹ An mga anak nga gindidisiplina ha mahigugmaon nga paagi kasagaran nga naabat hin pagin talwas. Nahibabaro hira nga an kagawasan may mga limitasyon ngan an ira mga desisyon ngan ginbubuhat may maopay o maraot nga mga resulta. Salit importante gud nga an Kristiano nga mga kag-anak sumarig ha giya ni Jehova. Hinumdumi nga an mga ideya ngan pamaagi ha pagpadaku hin anak iba-iba ha kada kultura ngan ha kada henerasyon. Kon an mga kag-anak nasarig ha Dios, diri nira kinahanglan magtigo-tigo kon ano an sadang buhaton o dumepende ha eksperyensya o panhunahuna han tawo basi magin malampuson ha pagpadaku han ira anak.

¹⁰ May mahibabaroan kita ha ehemplo ni Noe. Han ginsugo hiya ni Jehova ha paghimo han arka, waray gud hiya eksperyensya ha paghimo hito. Salit kinahanglan niya sumarig kan Jehova, pinaagi ha pagbuhat han ngatanan nga iginsugo ha iya ni Jehova. (Gen. 6:22) Ano an resulta? Bisan kon siyahan pa la niya nga paghimo han arka, nahimo niya ito hin husto. Ngani, kinahanglan gud niya ito buhaton! Nagin malampuson gihap hi Noe sugad nga ulo han pamilya kay sinarig liwat hiya ha kinaadman han Dios. Salit natutdoan niya hin maopay an iya mga anak ngan nagpakita hin maopay nga susbaranan ha ira; makuri gud an pagbuhat hini durante hiton maraot nga panahon antes han Baha.—Gen. 6:5.

11. Kay ano nga kinahanglan mangalimbasog gud an mga kag-anak ha pagtutdo ha ira anak?

¹¹ Sugad nga mga kag-anak, paonan-o niyo matutuman an ngatanan nga sugo han Dios? Pamati kan Jehova. Tuguti hiya nga buligan kamo ha pagpadaku han iyo anak pinaagi han iya Pulong ngan han giya nga aton nakakarawat tikang ha iya organisasyon. Ha urhi, posible gud nga pasalamatan kamo han iyo anak tungod ha pagbuhat hito! Usa nga bugto an nagsurat: “Mapasalamaton gud ako ha paagi han pagpadaku ha akon han akon mga kag-anak. Ginbuhat nira an ngatanan nga ira mahihimo basi maabot an akon kasingkasing. Hira an sadang kumarawat han kadak-an han pagpasidungog han akon espirituwal nga pag-uswag.” Pero bisan pa han duro nga pangalimbasog han mga kag-anak, may mga anak nga nabaya kan Jehova. Bisan pa hito, an mga kag-anak nga nagbubuhat han ngatanan nga ira mahihimo basi maipasilsil ha kasingkasing han ira anak  an kamatuoran may-ada limpyo nga konsensya. Diri liwat hira nawawad-an hin paglaom nga usa ka adlaw mabalik kan Jehova an ira anak.

12, 13. (a) Kon ginpaiwas ha kongregasyon an usa nga anak, paonan-o maipapakita han mga kag-anak nga masinugtanon hira ha Dios? (b) Paonan-o nakabenepisyo an usa nga pamilya tungod han pagin masinugtanon han mga kag-anak kan Jehova?

¹² Usa han pinakamakuri nga pagsari ha pagin masinugtanon han pipira nga kag-anak amo an pagpaiwasa ha kongregasyon han ira anak. Hunahunaa an ehemplo han usa nga nanay nga an anak ginpaiwas ha kongregasyon ngan bumaya ha ira balay. An nanay nagsiring: “Namiling ako hin mga punto ha aton mga publikasyon nga puydi ko gamiton nga rason basi makaupod ko an akon anak ngan apo.” Hiya dugang nga nagsiring: “Pero may pagkabuotan nga ginbuligan ako han akon bana nga masabtan nga an amon anak waray na ha amon mga kamot ngan diri kami sadang manginlabot [ha disiplina ni Jehova ha amon anak].”

¹³ Paglabay hin pipira ka tuig, nakabalik ha kongregasyon an anak. “Yana haros kada adlaw hiya natawag o nateks ha akon!” siring han nanay. “Ngan ginrirespeto gud niya an akon bana ngan ako kay maaram hiya nga nagin masinugtanon kami ha Dios. Maopay an amon relasyon ha kada tagsa.” Kon may anak ka nga ginpaiwas ha kongregasyon, masarig ka ba kan Jehova ha bug-os mo nga kasingkasing imbes nga ha imo kalugaringon nga pagsabot? (Prob. 3:5, 6) Hinumdumi nga an disiplina ni Jehova nagpapakita han iya diri matupngan nga kinaadman ngan gugma. Tigamni nga iya iginhatag an iya Anak para ha ngatanan, pati na ha imo anak. Diri karuyag han Dios nga may-ada mabungkag. (Basaha an 2 Pedro 3:9.) Salit mga kag-anak, sarig ha disiplina ngan giya ni Jehova. Sunda an iya iginsusugo bisan kon masakit an pagbuhat hito. Oo, gios uyon ha disiplina han Dios, ngan ayaw ito kontraha.

14. Paonan-o kita nakakabenepisyo ha mga instruksyon nga igintatagana ni Jehova pinaagi han “matinumanon nga tinaporan”?

¹⁴ Nagsasaad hi Jehova nga iya mamangnoan, papanalipdan, ngan tututdoan an Kristiano nga kongregasyon. Ginbubuhat niya ito ha damu nga paagi. Pananglitan, ginpili niya an iya Anak basi mangnoan an kongregasyon, ngan nagtoka hi Jesus hin “matinumanon nga tinaporan” basi magtagana hin napapanahon nga espirituwal nga pagkaon. (Luc. 12:42) Ito nga pagkaon makukuha ha damu nga paagi, ngan naghahatag ito hin mapulsanon nga instruksyon, o disiplina. Pakianhi an imo kalugaringon, ‘Pira ka beses na ako nabuligan han usa nga pahayag o artikulo ha aton mga publikasyon ha paghimo hin mga pagbag-o ha akon panhunahuna o paggawi?’ Kon ginhimo mo ito nga mga pagbag-o, sadang ka malipay! Gintutugotan mo hi Jehova nga moldehon, o disiplinahon ka para ha imo kaopayan.—Prob. 2:1-5.

15, 16. (a) Paonan-o kita makakapahimulos tikang ha “regalo nga kalalakin-an” ha kongregasyon? (b) Ano an puydi naton himoon basi magin mas makalilipay ha mga tigurang an ira buruhaton?

¹⁵ An Kristo naghatag liwat ha kongregasyon hin “regalo nga kalalakin-an”—mga tigurang nga nag-aataman ha panon han Dios. (Efe. 4:8, 11-13) Paonan-o kita makakapahimulos tikang hiton presyoso nga mga regalo? Usa nga paagi amo an pagsubad han pagtoo ngan maopay nga susbaranan han mga tigurang. An usa pa amo an pagsunod han ira Kasuratanhon nga sagdon. (Basaha an Hebreo 13:7, 17.) Hinumdumi nga hinigugma kita han mga tigurang ngan karuyag nira nga mag-uswag kita ha espirituwal. Pananglitan, kon naoobserbaran nira nga agsob nga waray kita ha mga katirok o nagtitikawara an aton kadasig, sigurado nga mangangalimbasog hira nga buligan dayon kita. Mamamati hira ha aton ngan katapos may pagkabuotan nga paparig-unon kita ngan tatagan hin angayan nga sagdon tikang ha Kasuratan. Ginhuhunahuna mo ba an ira bulig sugad nga kapahayagan han gugma ni Jehova ha imo?

¹⁶ Hinumdumi nga bangin diri masayon para ha mga tigurang an pakiistorya ha aton basi maghatag hin ginkikinahanglan nga sagdon. Pananglitan, hunahunaa la kon mationan-o kakuri para kan propeta Natan nga makiistorya kan Hadi David katapos itago han hadi an iya seryoso nga sala. (2 Sam. 12: 1-14) Sugad man, sigurado nga nagkinahanglan gud hi apostol Pablo hin kaisog basi tadungon hi Pedro, nga usa han 12 nga apostol, han iginpakita ni Pedro nga mas pinaurog niya an Judio nga kabugtoan. (Gal. 2:11-14) Salit ano an puydi mo himoon basi magin mas masayon para ha mga tigurang an paghatag ha imo hin sagdon? Magin mapainubsanon, masayon madaop, ngan mapasalamaton. Hunahunaa an ira bulig sugad nga kapahayagan han gugma han Dios ha imo. Diri la ini makakaopay ha imo, kondi makakadugang liwat han ira kalipay ha pagtuman han ira mga buruhaton.

17. Paonan-o nagpahimulos an usa nga sister ha mahigugmaon nga bulig han mga tigurang ha kongregasyon?

¹⁷ Usa nga sister an nakukurian hadto ha paghigugma kan Jehova tungod han mga nahitabo ha iya. Hiya nagsiring: “Kon nadidepres ako tungod han akon naglabay ngan han iba pa nga problema, maaram ako nga kinahanglan ko makiistorya ha mga tigurang. Diri nira ako ginbubusaan o gintatamay, lugod gindadasig ngan ginpaparig-on nira ako. Kahuman han kada katirok, bisan kon sagipo gud hira, may usa ha ira nga nangungumusta ha akon. Tungod han akon naglabay, inabat ko nga diri ako takos higugmaon han Dios. Kondi pauroutro nga gin-gamit ni Jehova an kongregasyon ngan an mga tigurang basi ipakita nga hinigugma gud niya ako. Igin-aampo ko nga diri ko gud unta tugotan nga mawara hiya ha akon.”

18, 19. Ano an mas masakit kay han kasakit nga posible magin resulta han disiplina? Paghatag hin ehemplo.

¹⁸ Bisan kon bangin masakit an disiplina, may usa pa nga butang nga mas masakit—an kadaot nga posible magin resulta han diri pagkarawat han disiplina. (Heb. 12:11) Hunahunaa an ehemplo nira Cain ngan Hadi Sedekia. Han nakita han Dios nga nasisina hi Cain kan Abel ngan nagpaplano pagpatay ha iya, an Dios nagpahamangno kan Cain: “Ano in imo kasina? Ngan kay ano nga an imo dagway nabalhin? Kon ikaw nagbuhat hin maopay diri ada ikaw pagkakarawton? Ngan kon waray mo buhata an maopay, an sala aada ha ganghaan; ngan ha imo aada an iya karuyag; kondi paghadi mo ito.” (Gen. 4:6, 7) Waray mamati hi Cain, salit nadaog hiya han sala. Tungod hito, naeksperyensyahan niya an duro nga kasakit ngan pag-antos ha bug-os niya nga kinabuhi! (Gen. 4:11, 12) Kon namati hi Cain ha Dios, waray unta niya maeksperyensyahi an sugad nga kasakit ngan pag-antos.

¹⁹ Hi Sedekia, nga usa nga waray kapas ngan maraot nga hadi, nagmando durante han makuri nga mga panahon ha Jerusalem. An propeta nga hi Jeremias pauroutro nga nagsagda kan Sedekia nga bumaya ha iya maraot nga binuhatan, pero waray karawata han hadi an disiplina. Makausa pa, maraot gud an nagin mga resulta. (Jer. 52:8-11) Karuyag gud ni Jehova nga malikyan naton an sugad nga mga pag-antos!—Basaha an Isaias 48:17, 18.

20. Ano an mahitatabo hadton nakarawat han disiplina han Dios ngan hadton diri nakarawat hito?

²⁰ Ha kalibotan yana, an disiplina, pati na an disiplina ha kalugaringon kasagaran nga ginmiminos ngan ginbabalewaray. Pero diri na mag-iiha, an magraot nga tawo nga may sugad nga disposisyon mag-aantos han masakit nga mga resulta hito. (Prob. 1:24-31) Salit “pamati han pagtutdo [o, disiplina], ngan magmakinaadmanon.” An Proberbios 4:13 nasiring: “Kapti hin maopay an pagtutdo [o, disiplina]; ayaw hiya palakta, tipigi hiya; kay hiya an imo kinabuhi.”