1. Ano nga mga kahimtang an gin-atubang han mga Kristiano han siyahan nga siglo?

HA KABUTNGAAN han 62 ngan 64 C.E., hi apostol Pedro nagsurat “ha temporaryo nga mga residente nga nagpatlaag ha Ponto, Galacia, Capadocia, Asia, ngan Bitinia.” (1 Ped. 1:1) Ini nga mga kongregasyon ha Asia Minor nga magkaiba-iba an kultura nagkikinahanglan hin pagdasig ngan giya. Ginkukontra hira ngan ginpapakaraot. Naatubang hira hin “nagkakalayo nga mga pagsari.” Ngan nagkikinabuhi hira ha peligroso nga panahon. Hi Pedro nagsurat: “An kataposan han ngatanan nga butang hirani na.” Oo, ha sulod hin diri maabot napulo ka tuig, mabubungkag an Judio nga sistema. Ano an mahimo makabulig ha mga Kristiano hito nga panahon nga malamposan iton makuri nga mga kahimtang?—1 Ped. 4:4, 7, 12.

2, 3. Kay ano nga ginsagda ni Pedro an mga kabugtoan nga magin maabiabihon? (Kitaa an retrato hini nga pahina.)

² Usa han iginsagda ni Pedro ha mga kabugtoan amo an ‘pagin maabiabihon ha usa kag usa.’ (1 Ped. 4:9) An Griego nga pulong para ha “pagin maabiabihon” literal nga nangangahulogan hin “pagpakita hin gugma, o pagin buotan, ha mga estranghero.” Kondi hinumdumi nga ginsagda ni  Pedro an mga kabugtoan nga magin maabiabihon ha “usa kag usa,” ha mga kakilala na nira ngan agsob nga nakakaupod. Paonan-o makakabulig ha ira an pagin maabiabihon?

³ Makakabulig ito nga magin duok hira ha kada tagsa. Hunahunaa an imo kalugaringon nga eksperyensya. Inabat mo ba an kalipay han may nag-imbitar ha imo ha ira balay? Diri ba nagkaada ka mag-opay nga hinumdoman tungod hito? Han nag-imbitar ka hin kabugtoan ha iyo balay, diri ba nagin mas duok an iyo pagkamagsangkay? Pinaagi ha pagin maabiabihon, mas nakikilala naton an kabugtoan ha paagi nga diri naton mahihimo ha iba nga kahimtang. An mga Kristiano ha panahon ni Pedro kinahanglan magin mas duok gud ha kada tagsa samtang nagtitikaraot an kahimtang. Ito liwat an kinahanglan buhaton han mga Kristiano hinin “kataposan nga mga adlaw.”—2 Tim. 3:1.

4. Ano nga mga pakiana an aton hihisgotan hini nga artikulo?

⁴ Ha ano nga mga higayon mahimo kita magpakita hin pagkamaabiabihon ha “usa kag usa”? Paonan-o naton malalamposan an mga ulang nga mahimo makapugong ha aton ha pagin maabiabihon? Paonan-o kita magigin maopay nga bisita?

5. Paonan-o naton mahimo ipakita an pagin maabiabihon ha aton mga katirok?

⁵ Ha mga katirok: Gin-aabiabi naton an ngatanan nga natambong ha aton mga katirok sugad nga mga igkasi-bisita ha espirituwal nga pangaon. Hi Jehova ngan an iya organisasyon an nag-iimbitar ha aton. (Roma 15:7) Kon may natambong nga mga bag-ohan, sugad hin nagigin kaapi liwat kita ha mga nag-imbitar. Mahimo ka mamiling hin mga paagi ha pag-abiabi hini nga mga bag-ohan, anoman an ira pamado o hitsura. (San. 2:1-4) Kon nakita mo nga nag-uusahan an bisita, puydi mo ba hiya hangyoon nga sumapit ha imo paglingkod? Posible nga apresyaron gud niya an imo bulig basi masundan niya an programa ngan makita an mga teksto nga ginbabasa. Maopay gud ini nga paagi ha ‘pagin maabiabihon.’—Roma 12:13.

6. Kan kanay kita siyahan sadang magin maabiabihon?

⁶ Para magmeryenda o mangaon: Ha panahon han Biblia, an pagpakita hin pagkamaabiabihon kasagaran nga nag-uupod ha pag-imbitar ha usa nga indibiduwal ha balay han usa basi mangaon. (Gen. 18:1-8; Huk. 13:15; Luc. 24:28-30) An pag-imbitar para hin pangaon nagpapasabot hin pakigsangkay ngan pakigmurayaw. Kan kanay kita siyahan sadang magin maabiabihon? Ha mga nakakaupod naton pirme, an kabugtoan ha kongregasyon. Kon umabot an magkuri nga panahon, diri ba kita an magbibinuligay? Kinahanglan kita magin maunungon nga sangkay ngan magkaada mamurayawon nga relasyon ha ira ngatanan. Makapainteres, han 2011, ginbag-o han Nagmamando nga Lawas an oras han Pag-aram ha Barantayan han pamilya han Bethel ha Estados Unidos, tikang ha alas 6:45 han gab-i nagin alas 6:15 han gab-i. Kay ano? An pahibaro nasiring nga posible nga mas damu an maaaghat nga kumarawat ngan magpakita hin pagin maabiabihon ha ira mga igkasi-Bethelite kon temprano nga natatapos an katirok. Ito liwat an ginbuhat han iba nga sanga nga opisina. Ini nga kahikayan nakabulig basi magin mas duok pa gud an tagsa nga membro han pamilya han Bethel.

7, 8. Paonan-o naton maipapakita an pagkamaabiabihon ha nabisita nga mga representante han organisasyon ni Jehova?

⁷ An pagbisita han mga mamumulong nga tikang ha iba nga mga kongregasyon, han mga paramangno han sirkito, ngan usahay, han mga representante tikang ha Bethel naghahatag ha aton hin mga higayon ha pagpakita hin pagkamaabiabihon. (Basaha an 3 Juan 5-8.) Usa han maopay nga paagi ha pagbuhat hito amo an pag-imbitar ha ira nga magmeryenda o mangaon. Puydi mo ba ito buhaton?

⁸ Usa nga sister ha Estados Unidos an nagsiring: “Ha sulod hin damu ka tuig, nakapribilehiyo kami han akon bana nga abiabihon ha amon balay an damu nga mamumulong ngan an ira asawa. An tagsa hito nga eksperyensya makaruruyag ngan makalilipay gud, ngan labaw ha ngatanan, makaparig-on ha espirituwal. Waray gud namon ito pagbasuli.”

9, 10. (a) Hin-o an bangin kinahanglan abiabihon ha sulod hin mauruiha nga panahon? (b) Mahimo ba magpaukoy bisan adton gutiay an balay? Paghatag hin ehemplo.

 ⁹ Mga bisita nga nagpapabilin hin mauruiha: Ha panahon han Biblia, an pagin maabiabihon kasagaran nga nag-uupod ha pagtagana hin mauukyan han mga bisita. (Job 31:32; Filem. 22) Yana, ginkikinahanglan liwat ito. An mga paramangno han sirkito kasagaran nga nagkikinahanglan hin mauukyan kon nabisita hira ha kongregasyon. Bangin nagkikinahanglan liwat hin mauukyan an mga estudyante nga natambong ha teokratiko nga mga eskwelahan, pati na an mga boluntaryo ha konstruksyon. An mga biktima hin kalamidad bangin nawad-an hin balay ngan magkinahanglan hin mauukyan tubtob nga matukod utro an ira balay. Diri kita sadang maghunahuna nga adton may daku la nga balay an mahimo makabulig; bangin damu ka beses na nira ito nga ginbuhat. Mahimo ka ba magpaukoy bisan kon gutiay an iyo balay?

¹⁰ Usa nga bugto nga taga-South Korea an nalilipay ha paghinumdom han nagpaukoy hiya hin mga estudyante nga natambong ha teokratiko nga mga eskwelahan. Hiya nagsurat: “Han una, nag-alang ako kay bag-o pa la kami nga mag-asawa ngan gutiay la an amon balay. Pero an amon pagpaukoy hin mga estudyante makalilipay gud nga eksperyensya. Sugad nga bag-o nga mag-asawa, nakita namon an kalipay nga mahimo abaton han mag-asawa kon magkaupod hira nga nag-aalagad kan Jehova ngan nagkakab-ot hin espirituwal nga mga tumong.”

11. Kay ano nga bangin kinahanglan abiabihon adton bag-ohan ha iyo kongregasyon?

¹¹ Bag-ohan ha kongregasyon: Bangin may mga indibiduwal ngan pamilya nga binalhin ha iyo lugar. An pipira bangin binalhin basi bumulig ha lugar nga daku an panginahanglan. Bangin may mga payunir nga igintoka basi bumulig ha iyo kongregasyon. Daku ito nga pagbag-o para ha ira. Kinahanglan nira magpahiuyon ha bag-o nga lugar, bag-o nga kongregasyon, ngan bangin ha bag-o nga linggwahe o kultura pa ngani. An pag-imbitar ha ira para magmeryenda, mangaon, o magpahalibway makakabulig ha ira nga magkaada bag-o nga kasangkayan ngan makapahiuyon ha ira bag-o nga kahimtang.

12. Ano nga eksperyensya an nagpapakita nga diri kinahanglan mag-andam hin damu nga butang basi maipakita an pagin maabiabihon?

¹² Diri man kinahanglan mag-andam hin damu nga butang basi maipakita an pagin maabiabihon. (Basaha an Lucas 10:41, 42.) Ha paghinumdom han panahon nga nagtitikang pa la an usa nga bugto ha iya pagmisyonero, hiya nagsiring: “Bata pa kami hadto, kulang pa hin eksperyensya, ngan namimingaw ha amon pamilya. Usa ka gab-i, namimingaw gud an akon asawa, ngan waray epekto an akon pangalimbasog nga liawon hiya. Katapos, han mga alas 7:30 han gab-i, may nabatian kami nga nagtuktok ha purtahan. Pag-abri ko, nakadto an usa nga Bible study nga may dara nga tulo nga aranghita para ha amon. Binisita hiya basi kilalahon an bag-o nga mga misyonero. Ginpasulod namon hiya ngan gintagan hin usa ka baso nga tubig. Katapos nagtimpla kami hin semente ngan mapaso nga tsokolate. Diri pa kami maaram mag-Swahili, ngan diri liwat hiya maaram mag-Ingles. Pero ito nga eksperyensya nakabulig ha amon nga magkaada daku nga kalipay ha pakigsangkay ha kabugtoan hito nga lugar.”

13. Ano an mga benepisyo han pagin maabiabihon?

¹³ Nag-aalang ka ba ha pagpakita hin pagkamaabiabihon? Kon oo, posible nga diri mo maeksperyensyahan an makalilipay nga higayon ha pakig-upod ha iba ngan ha pagkaada tinuod nga kasangkayan. An pagin maabiabihon usa han pinakamaopay nga paagi basi mawara an pag-abat hin kamingaw. Pero bangin mahunahuna mo, ‘Kay ano nga nag-aalang an iba?’ May-ada pipira nga rason.

14. Ano an mahimo naton buhaton kon waray kita panahon ngan kusog ha pagkarawat o pagpakita hin pagin maabiabihon?

¹⁴ Panahon ngan kusog: Sagipo gud an mga surugoon ni Jehova ngan kasagaran nga damu an ira responsabilidad. Bangin inaabat han pipira nga waray hira panahon o kusog ha pagpakita hin pagin  maabiabihon. Kon ito an imo kahimtang, bangin kinahanglan mo usisahon an eskedyol han imo mga buruhaton. Puydi ka ba maghimo hin mga pagbag-o basi magkaada ka panahon ngan kusog ha pagkarawat o pagpakita hin pagin maabiabihon? Ginsasagda han Biblia an mga Kristiano nga magin maabiabihon. (Heb. 13:2) Diri sayop an paghatag hin panahon para hini; ngani, husto an pagbuhat hini. Pero bangin kinahanglan mo limitahan an imo panahon para ha buruhaton nga diri sugad kaimportante.

15. Ano an ginkakabarak-an han pipira mahitungod ha pagpakita hin pagkamaabiabihon?

¹⁵ An imo inaabat mahitungod ha imo kalugaringon: Karuyag mo ba ipakita an pagkamaabiabihon pero inaabat mo nga waray ka kapas ha pagbuhat hito? An iba naaawod o nababaraka nga bangin maubosan hira hin ig-iistorya o mauyam an mga bisita. An iba limitado la an pinansyal salit nababaraka hira nga diri nira maihahatag ha ira bisita an kaya ihatag han iba nga kabugtoan. Tigamni nga diri an pagin magarbo han usa nga balay an importante, kondi an pagin mahapsay hito, pagin malimpyo, ngan an pagin makisangkayon han mga tagbalay.

16, 17. Ano an mahimo makabulig ha aton kon nababaraka kita mahitungod ha pagkaada mga bisita?

¹⁶ Kon nababaraka ka mahitungod ha pagkaada mga bisita, diri ka nag-uusahan. Usa nga tigurang nga taga-Britanya an nagsiring: “Usahay, nakakapabaraka an pagpangandam para ha mga bisita. Pero pariho han bisan ano nga butang nga may kalabotan ha pag-alagad kan Jehova, an kaopayan nga aton nakakarawat ngan an kalipay nga resulta hito labaw gud kay han bisan ano nga kabaraka. Nalilipay ako nga magkape kaupod han mga bisita ngan makig-istorya ha ira.” Hinumdumi nga an pagpakita hin personal nga interes ha mga bisita may maopay pirme nga resulta. (Fil. 2:4) Kadam-an an nalilipay ha pag-istorya han ira mga eksperyensya ha kinabuhi. An mga pagturotarampo bangin amo la an mga higayon para ha iba nga magpakiana mahitungod han aton mga eksperyensya. Usa pa nga tigurang an nagsurat: “An pag-imbitar hin mga kabugtoan ha balay nabulig ha akon nga mas mahibaroan an ira inaabat ngan naghahatag ito ha akon hin higayon nga mas makilala hira, labi na kon paonan-o hira nahibaro han kamatuoran.” An pagpakita hin personal nga interes ha mga bisita makakabulig nga magin makalilipay an tagsa nga okasyon.

¹⁷ Usa nga payunir nga sister nga nagpaukoy hin mga estudyante nga natambong ha iba-iba nga teokratiko nga eskwelahan an nagsiring: “Han una, nabaraka ako kay gutiay la an akon urukyan, ngan segunda mano an akon mga muwebles. An ginsiring han asawa han usa nga instruktor nakabulig gud ha akon nga diri na mabaraka. Hiya nagsiring nga kon nag-aalagad hira han iya bana ha sirkito nga buruhaton, an ira pinakamakalilipay nga mga semana amo an pag-ukoy kaupod han espirituwal nga mga tawo nga bangin diri riko ha materyal pero pariho ha ira an tumong—an pag-alagad kan Jehova ngan pagtipig hin simple nga pagkinabuhi. Nagpahinumdom ito ha akon han pirme ginsisiring ni Nanay ha amon nga magburugto: ‘Maoroopay an paniudto han mga utan diin aada an gugma.’” (Prob. 15:17) Tuguti nga gugma an magpagios ha imo nga magin maabiabihon, ngan waray ka sadang kabarak-an.

18, 19. Paonan-o an pagin maabiabihon makakabulig nga mawara an aton negatibo nga pagbati ha iba?

¹⁸ An imo inaabat mahitungod ha iba: May bugto ba ha iyo kongregasyon nga nakakapaaringit ha imo? Bangin negatibo an imo inaabat hito nga indibiduwal ngan bangin diri ito mawara kon waray ka hihimoon. Bangin mapugngan ka ha pagpakita ha iya hin pagkamaabiabihon kon nadiri ka han iya personalidad. O bangin may-ada nakasakit ha imo hadto, ngan diri mo ito nahingangalimtan.

¹⁹ Basi magin maopay an aton relasyon ha iba, bisan ha aton mga kaaway, gin-aaghat kita han Biblia nga magin maabiabihon. (Basaha an Proberbios 25:21, 22.) An pagpakita hin pagkamaabiabihon ha usa mahimo makasulbad han diri pagsinabtanay ngan makagwara han negatibo nga mga pagbati. Maghahatag ito ha aton hin higayon nga makita an mag-opay nga kalidad han aton bisita, mga kalidad nga nakita ni Jehova han iginpahirani Niya hiya ha kamatuoran. (Juan 6:44) Kon gugma an nagpapagios ha aton nga imbitaron an usa nga diri naglalaom han aton imbitasyon, mahimo ito magin  tinikangan hin maopay nga pagkamagsangkay. Paonan-o mo masisiguro nga gugma an nagpapagios ha imo? Usa nga paagi amo an pag-aplikar han Filipos 2:3: “Mapainubsanon nga tagda nga mas labaw ha iyo an iba.” An paghunahuna kon ha ano nga mga paagi mas labaw ha aton an kabugtoan—ha ira man pagtoo, pagpailob, kaisog, o iba pa nga mag-opay nga kalidad—magpapahilarom han aton gugma ha ira ngan makakabulig ha aton nga magin mas masayon an pagpakita hin pagkamaabiabihon ha ira.

20. Kay ano nga sadang naton tagan hin importansya an imbitasyon nga aton ginkarawat, ngan paonan-o naton ito sadang ipakita?

²⁰ An salmista nga hi David nagpakiana: “Jehova, hin-o ba an [puydi magin bisita] dida ha imo tabernakulo?” (Sal. 15:1) Katapos hito nga pakiana, ginhisgotan ni David an mag-opay nga kalidad nga ginbibiling ni Jehova ha iya mga bisita. Usa hito an pagtuman han aton ginsisiring: “Hiya nga nanumpa ha iya kalugaringon nga pagkahibang, ngan diri nabalhin.” (Sal. 15:4) Kon kumarawat kita hin imbitasyon, diri naton ito sadang nga basta na la ikansela. Bangin nangandam na an nag-imbitar ha aton, ngan kon ikansela naton an imbitasyon, bangin makarag an iya mga pangalimbasog. (Mat. 5:37) Usahay, ginkakansela han iba an nahiuna nga imbitasyon basi kumarawat hin imbitasyon nga ginhuhunahuna nira nga mas maopay. Nagpapakita ba ito hin gugma ngan respeto? Kon kumarawat kita hin imbitasyon, sadang naton ipakita an tinuod nga apresasyon ha anoman nga igin-andam han tagbalay para ha aton. (Luc. 10:7) Ngan kon kinahanglan naton ikansela an imbitasyon tungod han diri ginlalaoman nga mga kahimtang, maipapakita naton an gugma ngan konsiderasyon kon papahibaroon dayon naton an nag-imbitar ha aton.

21. Paonan-o an pagrespeto han lokal nga mga kustomre makakabulig ha aton nga magin maopay nga bisita?

²¹ Importante liwat nga respetuhon naton an lokal nga mga kustomre. Ha pipira nga kultura, ginkakarawat an diri ginlalaoman nga mga bisita; ha iba naman, kinahanglan magpahibaro anay antes bumisita. Ha iba nga lugar, iginhahatag han tagbalay an pinakamaopay para ha ira bisita, ikaduha la an ira pamilya; pero ha iba, an pamilya ngan bisita pariho nagpapahimulos han pinakamaopay. Ha pipira nga lugar, kasagaran nga may gindadara an bisita para ha okasyon; pero ha iba, mas nalilipay an tagbalay kon an ira bisita diri magdadara hin bisan ano. Ngan ha pipira nga kultura, natural la nga an gin-iimbitar matinalahuron nga magdumiri ha siyahan o ikaduha nga imbitasyon; samtang ha iba, kawaray-apresasyon an diri pagkarawat han imbitasyon. Hinaot buhaton naton an ngatanan basi malipay an nag-imbitar ha aton.

22. Kay ano nga importante gud nga ‘magin maabiabihon ha usa kag usa’?

²² Hi Pedro nagsiring: “An kataposan han ngatanan nga butang hirani na.” (1 Ped. 4:7) Yana, mas hirani na gud ito. Hirani na naton maeksperyensyahan an pinakadaku nga kasakitan nga mahitatabo ha kalibotan. Samtang nagtitikaraot an mga kahimtang, kinahanglan gud naton magkaada hilarom nga gugma ha aton kabugtoan. Salit mas aplikado gud yana an sagdon ni Pedro ha mga Kristiano: “Magin maabiabihon kamo ha usa kag usa.” (1 Ped. 4:9) Oo, an pagin maabiabihon usa nga makalilipay ngan importante gud nga bahin han aton kinabuhi yana, ngan ha waray kataposan.