NATAWO ako ha Graz, Austria. Han syete anyos ako, ginpaeskwela ako ha eskwelahan nga nagtututdo mahitungod ha relihiyon. Pero nakita ko an duro nga imoralidad nga ginbubuhat han mga padi ngan madre. Salit waray pa mag-usa ka tuig, gintugotan ako ni Nanay nga bumaya hito nga eskwelahan.

Ha urhi, umiskwela ako ha usa nga eskwelahan nga may dormitoryo. Usa ka gab-i, inabot hi Tatay basi ibalhin ako ha talwas nga lugar kay ginbibinombahan an Graz. Pinalagiw kami ngadto ha bungto han Schladming. Pakatabok gud la namon ha usa nga tulay, ginpabutohan ito ngan nabungkag. Ha usa liwat nga higayon, samtang nakada kami ni Lola ha amon libong, ginpinusil kami hin mga eruplano nga hamubo la an lupad. Katapos han girra, inabat namon nga baga hin ginpabay-an kami han singbahan ngan han gobyerno.

Han 1950, usa han mga Saksi ni Jehova an nabisita kan Nanay ngan nakikiistorya ha iya mahitungod han mensahe han Biblia. Namamati ako ha ira pag-istorya ngan naupod pa ngani ako kan Nanay pagtambong ha pipira nga katirok ha kongregasyon. Tungod kay nakombinse hi Nanay nga an mga Saksi ni Jehova an nagtututdo han kamatuoran, nagpabawtismo hiya han 1952.

Hito nga panahon, ginhuhunahuna ko nga an lokal nga kongregasyon para la ha lagas nga kababayin-an. Pero ha urhi, binisita kami ha usa nga kongregasyon nga damu an batan-on, ngan nasabtan ko nga diri la ngay-an ito para ha lagas nga kababayin-an! Han binalik ako ha Graz, nagtikang ako pagtambong ha ngatanan nga katirok, ngan waray pag-iha, nakombinse liwat ako nga an akon nahibabaroan amo an kamatuoran. Nakilala ko liwat hi Jehova sugad nga Dios nga pirme gud nabulig ha iya mga surugoon. Ginhihimo niya ito bisan kon inaabat naton nga nag-uusahan la kita ha pag-atubang ha makuri gud nga problema.—Sal. 3:5, 6.

Karuyag ko isumat ha iba an kamatuoran. Ginhimo ko ito siyahan ha akon kabugtoan. An akon upat nga ate binaya na ha balay, ngan nagtatrabaho hira  sugad nga mga maestra. Pero ginbibisita ko hira ha ira mga gin-uukyan ngan gindadasig nga mag-aram ha Biblia. Ha urhi, an ngatanan ko nga kabugtoan nag-aram ha Biblia ngan nagin mga Saksi ni Jehova.

Durante han akon ikaduha ka semana nga pakigbahin ha pagsangyaw, may nakaistorya ako nga babaye nga mga 30 anyos na, ngan gindumarahan ko hiya hin pag-aram. Nag-uswag hiya tubtob nga nabawtismohan, ngan ha urhi, nabawtismohan liwat an iya bana ngan duha nga anak. An akon pagdumara hin pag-aram ha iya nagparig-on han akon espirituwalidad. Kay ano? Waray nagdumara ha akon hin pormal nga pag-aram ha Biblia. Kinahanglan ko pag-adman hin maopay an tagsa nga leksyon. Sugad hin gintututdoan ko anay an akon kalugaringon basi may maitutdo ako ha akon estudyante! Nakabulig gud ito nga maghilarom an akon pagsabot ha kamatuoran. Han Abril 1954, ginsimbolohan ko an akon dedikasyon kan Jehova pinaagi han bawtismo ha tubig.

Han 1955, tinambong ako hin internasyonal nga mga kombensyon ha Alemanya, Fransia, ngan Inglatera. Samtang nakadto ako ha London, nakilala ko hi Albert Schroeder. Usa hiya nga instruktor ha Bible School of Gilead, ngan ha urhi nagin membro han Nagmamando nga Lawas. Han binisita kami ha British Museum, may iginpakita ha amon hi Bugto Schroeder nga mga manuskrito han Biblia. Nakasurat dida hito an ngaran han Dios ha Hebreo nga mga letra, ngan iginsaysay niya ha amon an importansya hito. Nagpagios ini ha akon nga mas higugmaon hi Jehova ngan an kamatuoran, nga tungod hito nagin mas determinado ako nga ipasamwak an kamatuoran tikang ha Pulong han Dios.

Nagtikang ako pag-alagad hin bug-os-panahon han Enero 1, 1956. Paglabay hin upat ka bulan, igintoka ako sugad nga espesyal payunir ha Austria. Hito nga panahon, waray pa Saksi ha Mistelbach, an bungto diin ako igintoka. Dugang pa, inatubang ako hin partikular nga problema. Magkaiba gud kami han akon partner nga payunir. Hirani na ako mag-19 anyos ngan nagdaku ha syudad; hiya naman 25 anyos ngan nagdaku ha huron. Karuyag ko magmuok kada aga; hiya naman karuyag bumuhat hin temprano. Kon gab-i, nahiaraan ko nga diri dayon kumaturog; hiya naman karuyag kumaturog hin temprano. Bisan pa hito, nalamposan namon an amon pagkaiba ngan nagmalampuson sugad nga magpartner tungod han amon pag-aplikar han mga sagdon ha Biblia.

Ha totoo la, inatubang kami hin iba pa nga magkuri nga problema. Nakaeksperyensya pa ngani kami hin pagtimaraot, pero ‘waray kami pabay-i.’ (2 Cor. 4:7-9) Makausa, han nagsasangyaw kami ha usa nga baryo, ginbuhian han mga tawo an ira mga ayam. Waray pag-iha, ginpapalibotan na ako ngan an akon partner hin dagku nga ayam nga nag-iinusig ngan nag-iikakaragat ha amon. Nagkapotay kami, ngan nag-ampo pa ngani ako, “Jehova, alayon, kon kagton nira kami, unta mamatay dayon kami!” Han tunga ka dupa na la an mga ayam tikang ha amon, nangundang hira, ginkiwilkiwil an ira ikog, ngan binaya ha amon. Inabat namon nga ginpanalipdan kami ni Jehova. Katapos hito, nagsangyaw kami ha bug-os nga baryo, ngan nalipay kami kay makinarawaton gud an mga tawo. Bangin tungod kay napausa hira nga waray kami labti han mga ayam o tungod kay nagpadayon la gihapon kami bisan pa han makaharadlok nga eksperyensya. Ha urhi, an pipira ha ira nagin mga Saksi.

May usa pa kami nga makaharadlok nga eksperyensya. Usa ka adlaw, inuli nga hubog an tag-iya han  amon gin-uukyan nga balay. Nagtarhog hiya nga papatayon kami ngan nagsiring nga ginsisinamok namon an mga amyaw. Nangalimbasog an iya asawa nga pakalmahon hiya pero waray ito maglampos. Nabatian namon ito ngatanan samtang nakadto kami ha igbaw, ha amon kwarto. Ginbalabgan dayon namon hin mga lingkoran an purtahan ngan nag-impake kami. Pag-abri namon han purtahan, nakita namon an tag-iya nga natindog ha may hagdanan, nga may dara nga daku nga kutsilyo. Salit namalagiw kami pakadto ha luyo nga purtahan ngan ngadto ha libong dara an amon mga gamit, ngan waray na gud kami bumalik.

Kumadto kami ha usa nga hotel ngan nagplete hin kwarto. Waray la namon sabta, haros usa ka tuig na kami nga nag-ukoy didto, ngan nakabulig gud ito ha amon ministeryo. Paonan-o? An hotel nahimumutang ha sentro han bungto, ngan an pipira han amon mga Bible study naruruyag nga didto mag-aram. Waray pag-iha, gindudumara na namon an pag-aram ha libro han kongregasyon ngan an sinemana nga Pag-aram ha Barantayan ha amon kwarto, ngan mga 15 an natambong.

Nagpabilin kami ha Mistelbach hin sobra usa ka tuig. Katapos, igintoka ako ha Feldbach, ha sur-este han Graz. May bag-o ako nga partner nga payunir, ngan waray liwat didto kongregasyon. Nag-ukoy kami ha gutiay nga kwarto ha ikaduha nga andana han usa nga balay nga hinimo ha troso. Nalusot an hangin ha mga guhang ha butnga han troso, salit gintatabonan namon an mga guhang hin dyaryo. Kinahanglan liwat namon mag-alog ha bubon. Pero bawi gud an amon mga sakripisyo. Paglabay la hin pipira ka bulan, naporma an usa nga grupo. Ha urhi, mga 30 nga membro han usa nga pamilya nga amon gindumarahan hin pag-aram an kinarawat han kamatuoran!

An sugad nga mga eksperyensya nagparig-on han akon apresasyon nga pirme gud ginbubuligan ni Jehova adton nangangalimbasog nga unahon an mga buruhaton han Ginhadian. Bisan kon imposible nga makarawat naton an bulig han tawo, hi Jehova pirme aada ha pagbulig ha aton.—Sal. 121:1-3.

Han 1958, hinbaroan ko nga may hihimoon nga internasyonal nga kombensyon ha Yankee Stadium ngan Polo Grounds, ha New York City. Nagpalista ako basi makatambong, ngan ginpakianhan ako han sanga nga opisina ha Austria kon karuyag ko ba umatender ha ika-32 nga klase han Gilead. Hin-o an diri maruruyag hito nga pribilehiyo? Binaton dayon ako, “Oo!”

 Ha klase ha Gilead, magsapit an amon lingkoran ni Martin Poetzinger. Nakaeksperyensya hiya hin makuri nga kahimtang ha prisohan han mga Nazi pero nalamposan niya ito. Ha urhi, nagin membro liwat hiya han Nagmamando nga Lawas. Durante han klase, usahay nahuring ha akon hi Martin, “Erika, ano an karuyag sidngon hito ha Aleman?”

Ha kabutngaan han amon pag-eskwela, iginpahibaro ni Bugto Nathan Knorr an amon mga toka. Igintoka ako ha Paraguay. Tungod kay bata pa ako, kinahanglan ko an pagtugot ni Tatay basi makasulod hito nga nasud. Han nakuha ko ito, inabot ako ha Paraguay han Marso 1959. Igintoka ako ha usa nga missionary home ha Asunción, kaupod an akon bag-o nga partner.

Waray pag-iha, nakilala ko hi Walter Bright, usa nga misyonero nga naggradwar ha ika-30 nga klase han Gilead. Ha urhi, nagpakasal kami ngan nagin magkaupod ha pag-atubang han mga problema ha kinabuhi. Kon nakakaeksperyensya kami hin makuri nga problema, ginbabasa namon an saad ni Jehova ha Isaias 41:10: “Diri ka mahadluk, kay ako upud ha imo; ayaw kaholop, kay ako an imo Dios; ako magpaparig-on ha imo.” Nagpapasarig ini ha amon nga kon mangangalimbasog kami nga magpabilin nga matinumanon ha Dios ngan uunahon an iya Ginhadian, diri gud niya kami papabay-an.

Ha urhi, igintoka kami ha lugar nga hirani ha giutan han Brazil. Didto, ginsagda han mga klero an mga batan-on nga labayon hin bato an amon urukyan, nga diri na sugad karig-on. Katapos, nagin Bible study ni Walter an hepe han pulis. Ginsiguro han hepe nga may mga pulis nga magbabantay hirani ha amon gin-uukyan ha sulod hin usa ka semana, salit waray na kami pagsinamoka han mga nakontra. Waray pag-iha katapos hito, iginbalhin kami ha mas maopay nga urukyan ha sulod han giutan han Brazil. Bentaha ito kay nakakagdumara kami hin mga katirok ha Paraguay ngan ha Brazil. Antes kami bumaya hito nga amon toka, may-ada na duha nga gutiay nga kongregasyon.

Ginsidngan ako han akon mga doktor nga diri ako magkakaanak, salit nasurprisa ako han hinbaroan ko han 1962 nga burod ako! Nag-ukoy kami ha Hollywood, Florida, hirani ha pamilya ni Walter. Ha damu ka tuig, an amon kahimtang ni Walter waray magtugot ha amon nga makagpayunir. Kinahanglan namon atamanon an amon pamilya. Bisan pa hito, padayon namon nga gin-una an mga buruhaton han Ginhadian.—Mat. 6:33.

Pag-abot namon ha Florida han Nobyembre 1962, diri kami makatoo nga an itom nga kabugtoan bulag nga nagkakatirok ha busag nga kabugtoan ngan nagsasangyaw hira ha magkaiba nga lugar kay nadiri an mga tawo didto nga nagtatarampo an busag ngan itom. Pero hi Jehova waray pinaurog nga lahi. Waray pag-iha, nagkaurosa na an kongregasyon. Nakita gud an bulig ni Jehova hini nga kahikayan nga pagtarampo han magkaiba nga lahi, kay yana damu na an kongregasyon hito nga lugar.

Makasurubo, namatay hi Walter tungod han kanser ha utok han 2015. Nagin maopay gud hiya nga bana ha sulod hin 55 ka tuig. Hinigugma niya hi Jehova, ngan damu nga kabugtoan an iya nabuligan. Ginpapamulat ko gud nga makita hiya utro nga mahimsog na kon banhawon na hiya.—Buh. 24:15.

Mapasalamaton ako nga sobra 40 ka tuig na ako nga nag-aalagad hin bug-os-panahon, diin naieksperyensyahan ko an damu nga kalipay ngan bendisyon. Pananglitan, nakita namon ni Walter an bawtismo han 136 nga amon gindumarahan hin pag-aram ha Biblia. Syempre, nakaeksperyensya kami hin mga problema. Pero waray gud namon ito himoa nga rason basi umundang ha pag-alagad ha aton matinumanon nga Dios. Lugod, nagin mas duok kami ha iya, nasarig nga susulbaron niya an amon mga problema ha iya itinanda nga panahon ngan uyon ha iya paagi. Ngan ito gud an iya ginhihimo!—2 Tim. 4:16, 17.

Namimingaw gud ako kan Walter, pero an pagpayunir nabulig ha akon nga maibanan ito nga kamingaw. Daku an naibubulig ha akon han pakigbahin ha pagtutdo ha iba, pati liwat an pagsumat ha ira mahitungod han paglaom han pagkabanhaw. Oo, ha damu nga kahimtang ha akon kinabuhi, waray gud ako pabay-i ni Jehova. Gintutuman gud niya an iya saad, pirme niya ako ginbubuligan, ginpaparig-on, ngan ginkakaptan han iya ‘too nga kamot han pagkamatadong.’—Isa. 41:10.