1-2. Hin-o an mahimo makabulig ha estudyante ha Biblia nga mag-uswag ngadto ha pagpabawtismo?

“NARURUYAGAN ko gud an akon nahibabaroan ha akon pag-Bible study,” siring ni Amy nga taga-Fiji. “Maaram ako nga ito an kamatuoran. Pero naghimo la ako hin ginkikinahanglan nga mga pagbag-o ngan nag-uswag ngadto ha pagpabawtismo han nagtikang na ako makig-upod ha kabugtoan.” An eksperyensya ni Amy nagtututdo hinin importante nga kamatuoran: An usa nga estudyante ha Biblia mas posible nga mag-uswag ngadto ha pagpabawtismo kon nakakakarawat hiya hin bulig tikang ha kabugtoan ha kongregasyon.

² An tagsa nga bugto mahimo makabulig nga madugangan an magwarali ha kongregasyon. (Efe. 4:16) An payunir nga hi Leilani nga taga-Vanuatu, nagsiring: “May puplunganon nga nasiring nga ginkikinahanglan an usa nga baryo ha pagpadaku hin bata. Para ha akon, aplikado liwat ito ha panhimo hin disipulo; kasagaran nga ginkikinahanglan an bug-os nga kongregasyon basi an usa mahingada ha kamatuoran.” May papel an mga kapamilya, kasangkayan, ngan mga titser basi mabuligan an usa nga bata nga magin hamtong. Ginbubuhat nira ini pinaagi ha pagdasig ha bata ngan pagtutdo ha iya hin importante nga mga leksyon. Sugad man, an mga magwarali mahimo magsagdon, magdasig, ngan magpakita hin maopay nga ehemplo ha mga estudyante ha Biblia basi mabuligan hira nga mag-uswag ngadto ha pagpabawtismo.​—Prob. 15:22.

3. Ano an imo mahibabaroan ha ginsiring nira Ana, Dorin, and Leilani?

³ Kay ano nga angay malipay an usa nga nagdudumara hin pag-aram  kon ginbubuligan han iba nga magwarali an iya estudyante ha Biblia? Tagda an ginsiring ni Ana nga espesyal payunir ha Moldova, “Kon nag-uuswag na an usa nga estudyante ha Biblia, makuri gud kon usa la nga tawo an naghahatag han ngatanan niya nga panginahanglan.” Hi Dorin nga espesyal payunir ha amo gihap nga nasud, nagsiring, “Kaurogan na nga an iba nga magwarali may ginsisiring nga nakakabantad ha kasingkasing han estudyante, usa nga butang nga waray ko gud mahunahuna.” Hi Leilani nag-unabi hin usa pa nga rason, “An gugma ngan pag-ataman nga iginpapakita ha estudyante makakabulig ha iya nga makilala nga kita gud an katawohan ni Jehova.”​—Juan 13:35.

4. Ano an aton hihisgotan hini nga artikulo?

⁴ Pero bangin maghunahuna ka, ‘Paonan-o ako makakabulig ha usa nga estudyante ha Biblia nga mag-uswag kon diri man ako an nagba-Bible study ha iya?’ Hisgotan naton kon ano an mahimo naton buhaton kon igin-uupod kita ha pag-Bible study ngan kon an usa nga estudyante naatender na ha mga katirok. Hihisgotan liwat naton kon paonan-o makakabulig an mga tigurang basi an mga estudyante mag-uswag ngadto ha pagpabawtismo.

5. Ano an imo papel kon naupod ka ha pag-Bible study?

⁵ Durante han pag-Bible study, an magturutdo an siyahan nga responsable ha pagbulig ha estudyante nga masabtan an Pulong han Dios. Kon paupdon ka han magturutdo ha pag-Bible study, hunahunaa nga partner ka niya. An imo papel amo an pagbulig ha iya. (Ecles. 4:9, 10) Ano an imo maibubulig basi magin epektibo an pag-aram?

6. Kon maupod ka ha pag-Bible study, paonan-o mo maiaaplikar an prinsipyo ha Proberbios 20:18?

⁶ Pag-andam para ha pag-Bible study. Siyahan, hangyoa an magturutdo nga sumatan ka hin pipira nga impormasyon mahitungod ha estudyante. (Basaha an Proberbios 20:18.) Mahimo ka magpakiana: “Ano an background han estudyante? Ano nga topiko an iyo pag-aadman? Ano an karuyag mo mahibaroan han estudyante hini nga pag-aram? May mga butang ba nga dapat o diri ko dapat buhaton o isiring samtang nag-aaram? Paonan-o ko madadasig an estudyante nga mag-uswag?” Syempre, diri magsusumat an magturutdo hin bisan ano nga kompidensyal nga impormasyon, pero an iya isusumat makakabulig ha imo. Ito an ginbubuhat han misyonero nga hi Joy kon may naupod ha iya ha pag-Bible study. Hiya nagsiring: “An pagsumat hin sugad hini nga mga impormasyon ha akon partner nakakabulig ha iya nga magin interesado ha estudyante ngan mahibaro kon ano an iya isisiring durante han pag-aram.”

7. Kay ano nga kinahanglan mo mangandam kon maupod ka ha pag-Bible study?

⁷ Kon ginpapaupod ka ha pag-Bible study, maopay kon pag-aadman mo an topiko nga paghihisgotan. (Ezra 7:10) An brother nga hi Dorin nga gin-unabi kanina, nagsiring: “Gin-aapresyar ko kon an akon kaupod nag-aandam para ha pag-aram. Pinaagi hito, nakakahatag hiya hin  mag-opay nga komento.” Dugang pa, posible mapansin han estudyante nga kamo nga magpartner nangandam gud, ngan magigin maopay ito nga susbaranan ha iya. Bisan kon diri ka makapangandam hin maopay, paggahin hin panahon nga magin pamilyar ka bisan man la ha nangunguna nga mga punto.

8. Ano an mahimo mo buhaton basi magin mas espisipiko an imo pag-ampo durante han pag-Bible study?

⁸ An pag-ampo importante nga bahin ha pag-Bible study, salit kon hahangyoon ka nga mag-ampo, hunahunaa hin abanse kon ano an imo isisiring. Pinaagi hito, magigin mas espisipiko an imo pag-ampo. (Sal. 141:2) Hi Hanae nga taga-Japan, nahinunumdom pa ha mga pag-ampo han usa nga sister nga igin-upod han nagba-Bible study ha iya. Hiya nagsiring: “Napansin ko nga may marig-on hiya nga relasyon kan Jehova, ngan karuyag ko hiya subaron. Ngan inaabat ko nga hinigugma ako ha kada panahon nga gin-uunabi niya an akon ngaran ha iya mga pag-ampo.”

9. Sumala ha Santiago 1:19, ano an mahimo mo buhaton basi magin maopay ka nga kaupod ha pag-Bible study?

⁹ Buligi an magturutdo durante han pag-aram. “An maopay nga kaupod atentibo durante han pag-aram,” siring ni Omamuyovbi nga espesyal payunir ha Nigeria. “An kaupod naghahatag hin mag-opay nga komento, pero diri damu an ginyiyinakan kay maaram hiya nga an magturutdo an responsable ha pagdumara han pag-aram.” Paonan-o mo hibabaroan kon san-o ka magkukomento ngan kon ano an imo isisiring? (Prob. 25:11) Pamati hin maopay samtang nag-iistorya an magturutdo ngan an estudyante. (Basaha an Santiago 1:19.) Hito nga paagi, magigin andam ka ha pagbulig kon kinahanglan. Syempre, kinahanglan hunahunaon mo anay an imo igyayakan. Pananglitan, diri mo karuyag magyinakan hin damu, sumagbang samtang nagsasaysay pa an magturutdo, o maghisgot hin iba nga topiko. Pero pinaagi hin halipot nga komento, ilustrasyon, o pakiana, makakabulig ka ha pagpatin-aw han punto. Usahay, bangin abaton mo nga waray ka na dugang nga maikukomento. Pero kon kukumendasyonan mo an estudyante ngan magpapakita hin personal nga interes ha iya, daku an imo maibubulig basi mag-uswag hiya.

10. Paonan-o an imo eksperyensya mahimo makabulig ha usa nga estudyante ha Biblia?

¹⁰ Pagsumat hin imo eksperyensya. Kon angayan, mahimo mo isumat hin madaliay ha estudyante kon paonan-o mo nahibaroan an kamatuoran, kon paonan-o mo nalamposan an usa nga problema, o kon paonan-o ka ginbubuligan ni Jehova. (Sal. 78:4, 7) An imo eksperyensya bangin amo gud an kinahanglan mabatian han estudyante. Mahimo ito magparig-on han iya pagtoo o makadasig ha iya nga padayon nga mag-uswag ngadto ha pagpabawtismo. Ngan pinaagi hito, mahimo niya mahibaroan kon paonan-o niya malalamposan an iya problema. (1 Ped. 5:9) Nahinunumdoman ni Gabriel, nga taga-Brazil nga payunir na yana, kon ano an nakabulig ha iya han nagba-Bible study pa hiya. Hiya nagsiring: “Han nabatian ko an mga eksperyensya han kabugtoan, nahibaroan  ko nga maaram hi Jehova han aton mga problema. Ngan kon nakaya nira ito, makakaya ko liwat ito.”

11-12. Kay ano nga dapat abiabihon naton an estudyante ha Biblia kon naatender hiya ha mga katirok?

¹¹ Basi mag-uswag ngadto ha pagpabawtismo an estudyante ha Biblia, kinahanglan regular hiya nga umatender ha mga katirok ha kongregasyon ngan magpahimulos tikang hito. (Heb. 10:24, 25) Posible nga an magturutdo an mag-iimbitar ha iya ha siyahan niya nga pag-atender. Kon umatender hiya, kita ngatanan makakadasig ha iya nga padayon nga umatender ha Kingdom Hall. Paonan-o naton ito mahihimo?

¹² Mahigugmaon nga abiabiha an estudyante. (Roma 15:7) Kon inaabat han estudyante nga nalilipay kita ha iya pag-atender, posible gud nga maruyag hiya nga padayon nga umatender ha Kingdom Hall. Kumustaha hiya ngan ipakilala hiya ha iba, pero ayaw ito buhata ha paagi nga diri hiya magigin komportable. Ayaw paghunahuna nga may nag-aasikaso na ha iya kay bangin nadelatar o may ginpapanginano an nagba-Bible study ha iya. Pamati hin maopay ha ginsisiring han estudyante, ngan ipakita ha iya an personal nga interes. Ano an magigin epekto ha estudyante han imo mahigugmaon nga pag-abiabi? Tagda an eksperyensya ni Dmitrii nga pipira pa la ka tuig nga nabawtismohan, ngan yana ministeryal nga surugoon na. May kalabotan ha iya siyahan nga pag-atender, hiya nagsiring: “May brother nga nakakita ha akon samtang ginkukulba ako nga naghuhulat ha gawas han Kingdom Hall ngan may pagkabuotan nga gin-updan niya ako pagsulod. Damu an nangumusta ha akon, ngan waray ko gud ito laumi. Naruyagan ko gud ito ngan ginhingyap ko nga unta kada adlaw may katirok. Waray ko gud ito maeksperyensyahi hadto.”

13. Paonan-o an imo maopay nga ehemplo makakabulig ha usa nga estudyante ha Biblia?

¹³ Pagpakita hin maopay nga ehemplo. An imo panggawi mahimo makabulig ha estudyante ha Biblia nga makombinse nga nabilngan na niya an kamatuoran. (Mat. 5:16) Hi Vitalii nga payunir na yana ha Moldova, nagsiring: “Nakita ko kon paonan-o nagkikinabuhi, naghuhunahuna, ngan nagawi an kabugtoan ha kongregasyon. Nakombinse ako hito nga an mga Saksi ni Jehova naglalakat gud kaupod han Dios.”

14. Paonan-o an imo ehemplo mahimo makabulig ha usa nga padayon nga mag-uswag?

¹⁴ Basi magin kwalipikado ha bawtismo, kinahanglan iaplikar han estudyante an iya nahibabaroan. Kasagaran na nga diri ini masayon. Pero kon nakikita han estudyante kon paonan-o ka nagpapahimulos ha pag-aplikar han mga prinsipyo ha Biblia, bangin mapagios hiya ha pagsubad ha imo. (1 Cor. 11:1) Tagda an eksperyensya ni Hanae nga gin-unabi kanina. Hiya nagsiring: “Nakita ko nga igin-aaplikar han kabugtoan an mga butang nga akon gin-aadman. Nakita ko kon paonan-o ako magigin makapadasig ngan mapinasayloon ngan kon paonan-o ako magpapakita  hin gugma. Pirme positibo an ira ginyayakan mahitungod ha iba. Karuyag ko hira subaron.”

15. Uyon ha Proberbios 27:17, kay ano nga kinahanglan naton makigsangkay ha estudyante ha Biblia nga padayon nga naatender ha mga katirok?

¹⁵ Pakigsangkay ha estudyante. Samtang an estudyante padayon nga naatender ha mga katirok, pirme ipakita an personal nga interes ha iya. (Fil. 2:4) Puydi mo hiya kilalahon hin mas maopay. Puydi mo hiya kumendasyonan tungod han mga pagbag-o nga iya ginhihimo, ngan kumustahon an iya pag-Bible study, an iya pamilya, ngan an iya trabaho. Pero paghirot nga diri magin sobra kapersonal an imo mga pakiana. Pinaagi hini nga imo mga pakiistorya, mahimo nga magin magsangkay kamo. Kon nakikigsangkay ka ha estudyante, ginbubuligan mo hiya nga mag-uswag ngadto ha pagpabawtismo. (Basaha an Proberbios 27:17.) Hi Hanae regular payunir na yana. Ha paghinumdom han bag-o pa la hiya nga nag-iinatender ha mga katirok, hiya nagsiring: “Han nagkaada na ako kasangkayan ha kongregasyon, eksayted na ako ha mga katirok, ngan natambong ako bisan kon kapoy ako. Nag-i-enjoy ako pakig-upod ha akon bag-o nga kasangkayan, ngan nakabulig ini ha akon nga diri na makigsangkay hadton diri pariho ha akon an gintotoohan. Karuyag ko magin mas duok kan Jehova ngan ha kabugtoan. Salit nagdesisyon ako nga magpabawtismo.”

16. Ano pa an puydi mo buhaton basi abaton han estudyante ha Biblia nga parte hiya han kongregasyon?

¹⁶ Samtang an estudyante padayon nga nag-uuswag ngan naghihimo hin mga pagbag-o, buligi hiya nga abaton niya nga parte hiya han kongregasyon. Mahimo mo ini buhaton pinaagi ha pagin maabiabihon. (Heb. 13:2) Nahinunumdoman ni Denis nga taga-Moldova han nagba-Bible study pa hiya. Hiya nagsiring: “Damu ka beses nga gin-imbitar kami nga mag-asawa para ha pagturotarampo han kabugtoan. Nahibaroan namon kon paonan-o hira ginbubuligan ni Jehova. Nakadasig gud ito ha amon. Ini nga mga okasyon nakabulig ha amon nga magin kombinsido nga karuyag gud namon mag-alagad kan Jehova ngan may paglaom kami nga magkaada makalilipay nga kinabuhi.” Kon an estudyante ha Biblia kwalipikado na nga magin magwarali, mahimo mo liwat hiya paupdon ha imo pagministeryo. Hi Diego nga magwarali ha Brazil, nagsiring: “Damu nga kabugtoan an nag-imbitar ha akon nga umupod ha ira pagministeryo. Ini an pinakamaopay nga paagi basi mas makilala ko hira. Han nag-inupod ako ha ira, damu an akon nahibaroan, ngan inabat ko nga nagin mas duok ako kan Jehova ngan kan Jesus.”

17. Paonan-o mabubuligan han mga tigurang an mga estudyante ha Biblia?

¹⁷ Paghatag hin panahon ha mga estudyante ha Biblia. Mga tigurang, an iyo gugma ngan personal nga interes ha mga estudyante ha Biblia makakabulig ha ira nga mag-uswag ngadto ha pagpabawtismo. Puydi ba kamo makiistorya ha ira  hin regular kon natambong hira ha mga katirok? Aabaton nira nga interesado kamo ha ira kon nahinunumdoman niyo an ira ngaran, labi na kon nakomento na hira. Puydi ba niyo i-adjust an iyo eskedyol basi makaupod kamo ha usa nga magwarali ha pag-Bible study? Posible gud nga mas daku an iyo maibubulig ha estudyante kay han iyo nahuhunahuna. An payunir nga hi Jackie nga taga-Nigeria, nagsiring: “Damu nga estudyante an diri makatoo kon nahibabaro hira nga usa nga tigurang an akon kaupod ha pag-Bible study ha ira. Usa nga estudyante ha Biblia an nagsiring: ‘Diri gud ito hihimoon han amon pastor. An iya la ginbibisita an mga riko, ngan kon nagbabayad la hira ha iya!’” Ito nga estudyante naatender na yana ha mga katirok.

18. Paonan-o maiaaplikar han mga tigurang an Buhat 20:28?

¹⁸ Bansaya ngan dasiga an mga magturutdo ha Biblia. Mga tigurang, may daku kamo nga responsabilidad ha pagbulig ha mga magwarali nga magin epektibo ha ira ministeryo, pati na ha ira pagdumara hin pag-aram. (Basaha an Buhat 20:28.) Kon an usa naaawod ha pagdumara hin pag-aram kon aada ka, puydi ka magsiring nga ikaw an magdudumara. Hi Jackie nga gin-unabi kanina, nagsiring: “Pirme ginkukumusta han mga tigurang an akon mga estudyante ha Biblia. Kon naatubang ako hin mga ayat ha pagdumara hin pag-aram, naghahatag hira hin mapulsanon nga mga sagdon.” Daku an mahihimo han mga tigurang basi madasig ngan mapagios an mga magturutdo nga magpadayon. (1 Tes. 5:11) Hi Jackie nagsiring pa: “Nalilipay ako kon gindadasig ako han mga tigurang ngan ginsisidngan nga gin-aapresyar nira an akon mga paningkamot. Ito nga mga pulong nakakarepresko ha akon pariho hin matugnaw nga tubig ha mapaso nga panahon. An ira kumendasyon nakakadugang han akon kompyansa ngan kalipay ha akon mga pag-Bible study.”​—Prob. 25:25.

19. Kay ano nga kita ngatanan mahimo umabat hin daku nga kalipay?

¹⁹ Bisan kon waray kita yana gindudumarahan nga pag-aram ha Biblia, mahimo la gihapon kita makabulig ha usa nga estudyante nga mag-uswag ha espirituwal. Mahimo kita makabulig ha magturutdo durante han pag-aram pinaagi han aton inandam hin maopay nga mga komento, pero diri kita magyinakan hin damu. Mahimo kita makigsangkay ha mga estudyante kon naatender na hira ha Kingdom Hall, ngan mahimo kita magin maopay nga susbaranan para ha ira. Ngan madadasig han mga tigurang an mga estudyante pinaagi ha paghatag ha ira hin panahon, ngan madadasig liwat nira an mga magturutdo pinaagi ha pagbansay ngan paghatag ha ira hin kumendasyon. Daku gud an aton kalipay nga may nahihimo kita, bisan kon gutiay la, ha pagbulig ha usa nga higugmaon hi Jehova ngan mag-alagad ha iya!