1. Ano an reyalidad mahitungod ha mga batan-on nga brother?

MGA batan-on nga brother, damu an iyo mahihimo ha kongregasyon. Damu ha iyo an makusog ngan matibaksi. (Prob. 20:29) Daku kamo nga bulig ha iyo kongregasyon. Bangin karuyag niyo magin ministeryal nga surugoon. Pero bangin ginhuhunahuna han iba nga bata pa kamo hinduro o kulang pa hin eksperyensya salit diri pa angay taporan hin importante nga buruhaton. Pero bisan kon batan-on pa kamo, damu an iyo mahihimo yana basi makuha an pagtapod ngan respeto han kabugtoan ha iyo kongregasyon.

2. Ano an aton hihisgotan hini nga artikulo?

² Hini nga artikulo, uusisahon naton an kinabuhi ni Hadi David. Rirepasuhon liwat naton hin madaliay an pipira nga panhitabo ha kinabuhi nira Asa ngan Jehosafat nga mga hadi han Juda. Hihisgotan naton an pipira nga problema nga naeksperyensyahan hinin tulo nga kalalakin-an, kon paonan-o nira ito gin-atubang, ngan kon ano an mahibabaroan han mga batan-on nga brother tikang ha ira ehemplo.

3. Ano an usa nga paagi nga mabubuligan han mga batan-on an mga edaran ha kongregasyon?

³ Han batan-on pa hi David, nahibaro hiya hin mga skill nga ginpabilhan han iba. Makikita naton nga may duok hiya nga relasyon kan Jehova, ngan iya ginpauswag an iya talento sugad nga musikero ngan gin-gamit ito basi makabulig kan Saul nga hadi nga pinili han Dios. (1 Sam. 16:16, 23) Mga batan-on, may-ada  ba kamo skill nga makakabulig ha kabugtoan ha kongregasyon? Damu ha iyo an may-ada. Pananglitan, bangin mapansin niyo nga gin-aapresyar gud han pipira nga edaran kon ginbubuligan hira ha paggamit han ira tablet ngan iba pa nga gadyet para ha ira personal nga pag-aram ngan ha mga katirok. An iyo pagin maaram hito nga mga gadyet daku gud nga bulig ha ira.

4. Pariho kan David, ano nga mga kalidad an kinahanglan kultibaron han mga batan-on nga brother? (Kitaa an retrato ha kobre.)

⁴ Ha adlaw-adlaw nga pagkinabuhi ni David, ginpakita niya nga responsable ngan masasarigan hiya. Pananglitan, han batan-on pa hiya, maduruto nga gin-ataman niya an mga karnero han iya tatay. Delikado adto nga trabaho. Ha urhi, nagsiring hi David kan Hadi Saul: “An imo surugoon nagin paraataman han panon han iya tatay, ngan may inabot nga leon, ngan ha lain nga higayon may inabot nga oso, ngan an tagsa nagtabag hin karnero tikang ha panon. Ginlanat ko ito ngan gin-atake ngan gintalwas an karnero tikang ha baba hito.” (1 Sam. 17:34, 35) Inabat ni David nga responsabilidad niya nga siguruhon nga talwas an mga karnero, ngan maisugon nga nakig-away hiya basi protektaran ito. Yana, masusubad han mga batan-on nga brother hi David pinaagi ha maduruto nga pagtuman han bisan ano nga igintoka ha ira.

5. Sumala ha Salmo 25:14, ano an pinakaimportante nga mahihimo han mga batan-on nga brother?

⁵ Han batan-on hi David, nagkaada na hiya duok gud nga relasyon kan Jehova. Ito nga relasyon mas importante kay han kaisog ni David o han iya talento ha pagtokar hin arpa. Hi Jehova diri la kay Dios ni David kondi iya liwat duok nga Sangkay. (Basaha an Salmo 25:14.) Mga batan-on nga brother, an pinakaimportante nga iyo mahihimo amo an pagparig-on han iyo relasyon ha iyo langitnon nga Amay. Kon bubuhaton niyo ito, mahimo kamo makakarawat hin dugang nga mga pribilehiyo.

6. Ano an negatibo nga panhunahuna han pipira mahitungod kan David?

⁶ An usa nga problema nga gin-atubang ni David amo an negatibo nga panhunahuna han iba mahitungod ha iya. Pananglitan, han nagboluntaryo hiya nga makig-away kan Goliat, gindid-an hiya ni Hadi Saul ngan nagsiring: “Bata ka la.” (1 Sam. 17:31-33) Antes pa hito, gin-akusaran hi David han iya mismo bugto nga iresponsable hiya. (1 Sam. 17:26-30) Pero para kan Jehova, hi David diri kay bata la o iresponsable. Kilala gud niya hin maopay hi David. Ngan pinaagi ha pagsarig ni David ha iya Sangkay nga hi  Jehova nga tatagan hiya hin kusog, nakaya niya nga patayon hi Goliat.​—1 Sam. 17:45, 48-51.

7. Ano an imo mahibabaroan tikang ha usa nga istorya mahitungod kan David?

⁷ Ano an imo mahibabaroan ha eksperyensya ni David? Nahibaroan naton nga kinahanglan naton magin mapailubon. Bangin kinahanglan hin panahon basi masantop hadton mga nakilala ha imo tikang pa ha kabata nga adulto ka na. Pero makakasiguro ka nga diri la an imo panggawas nga hitsura an ginkikita ni Jehova. Maaram hiya kon hin-o ka ngan kon ano an kaya mo himoon. (1 Sam. 16:7) Parig-ona an imo relasyon ha Dios. Ginbuhat ito ni David pinaagi ha pag-obserbar hin maopay ha mga linarang ni Jehova. Ginpamalandong niya kon ano an igintututdo hito mahitungod ha Maglalarang. (Sal. 8:3, 4; 139:14; Roma 1:20) An usa pa nga mahimo mo buhaton amo an pangaro kan Jehova hin kusog. Pananglitan, gintatamay ka ba han pipira mo nga kaeskwela tungod kay Saksi ka ni Jehova? Kon oo, pag-ampo kan Jehova nga buligan ka niya nga mailob ito. Ngan iaplikar an praktikal nga sagdon nga imo nahibabaroan tikang ha iya Pulong ngan ha aton mga publikasyon ngan mga video nga iginbase ha Biblia. Ha kada panahon nga nakikita mo nga ginbubuligan ka ni Jehova nga maatubang an usa nga problema, mas magririg-on an imo pagsarig ha iya. Dugang pa, kon nakikita han iba nga nasarig ka kan Jehova, tataporan ka nira.

8-9. Ano an nakabulig kan David nga maghulat hin mapailubon tubtob han nagin hadi hiya, ngan ano an mahibabaroan han mga batan-on nga brother ha iya ehemplo?

⁸ Tagda an usa pa nga problema nga gin-atubang ni David. Katapos hiya dihugi basi magin hadi, kinahanglan niya maghulat hin damu ka tuig antes hiya magtikang pagmando ha Juda. (1 Sam. 16:13; 2 Sam. 2:3, 4) Hito nga panahon, ano an nakabulig ha iya nga maghulat hin mapailubon? Imbes nga manluya gud, nagpokus hi David ha kon ano an iya mahihimo. Pananglitan, samtang naukoy hiya ha teritoryo han mga Filisteo sugad nga puga, ginsalingabot niya an oportunidad nga makig-away ha mga kaaway han Israel. Tungod hito, naproteksyonan niya an mga giutan han teritoryo han Juda.​—1 Sam. 27:1-12.

⁹ Ano an mahibabaroan han mga batan-on nga brother ha ehemplo ni David? Gamita an mga oportunidad nga abrido ha iyo basi magserbi ha kabugtoan. Tagda an eksperyensya han brother nga hi Ricardo. * Bata pa hiya, hingyap na niya nga magin regular payunir. Pero ginsidngan hiya han mga tigurang nga diri pa hiya andam. Imbes nga manluya o masina, gindugangan lugod ni Ricardo an iya panahon ha ministeryo. Hiya nagsiring: “Kon ginhihinumdom ko an naglabay, nahuhunahuna ko nga maopay gud nga ginhimo ko an ginkikinahanglan nga mga pitad basi mag-uswag. Nagpokus ako ha pagbalik-bisita ha mga nagpakita hin interes ngan nangangandam ako ha tagsa hito nga pagbisita. Nakagdumara pa ngani ako han akon siyahan nga Bible study. Samtang nagkakaada ako eksperyensya, nadudugangan an akon kompyansa.” Yana, hi Ricardo usa na nga epektibo nga regular payunir ngan ministeryal nga surugoon.

10. Makausa, ano an ginbuhat ni David antes hiya maghimo hin importante nga desisyon?

¹⁰ Hunahunaa an usa pa nga panhitabo ha kinabuhi ni David. Han puga hiya ngan an iya mga sundalo, ginbayaan nira an ira pamilya para ha usa nga misyon. Samtang waray hira, may mga kaaway nga sinulong ha ira mga balay ngan gindara nga bihag an ira mga pamilya. Puydi unta maghunahuna hi David nga tungod kay eksperyensyado hiya nga girriro, sigurado nga makakahimo hiya hin epektibo nga estratihiya para talwason an mga bihag. Lugod, nangaro  hiya han giya ni Jehova. Ha bulig han saserdote nga hi Abiatar, nagpakiana hi David kan Jehova: “Sadang ko ba lanaton ini nga grupo han mga tikasan?” Ginsidngan ni Jehova hi David nga buhaton ito ngan ginpasarig hiya nga maglalampos hiya. (1 Sam. 30:7-10) Ano an imo mahibabaroan tikang hini nga panhitabo?

11. Ano an mahimo mo buhaton antes maghimo hin mga desisyon?

¹¹ Pangaro hin sagdon antes ka maghimo hin mga desisyon. Konsultaha an imo mga kag-anak. Makakakuha ka liwat hin maopay nga sagdon pinaagi ha pakiistorya ha eksperyensyado nga mga tigurang. Natapod hi Jehova hinin pinili nga kalalakin-an ngan makakatapod ka liwat ha ira. Ginhuhunahuna hira ni Jehova sugad nga “mga regalo” ha kongregasyon. (Efe. 4:8) Makakapahimulos ka pinaagi ha pagsubad han ira pagtoo ngan pagpamati han ira maaramon nga mga suhestyon. Yana, hisgotan naton kon ano an aton mahibabaroan tikang kan Hadi Asa.

12. Ano nga mga kalidad may-ada hi Hadi Asa han nagtikang hiya pagmando?

¹² Han batan-on pa hi Hadi Asa, mapainubsanon ngan maisugon hiya. Pananglitan, han nagin hadi hiya sugad nga kasaliwan han iya tatay nga hi Abias, gintikangan niya an usa nga kampanya kontra ha idolatriya. Iya liwat “ginsidngan an Juda nga pamilngon hi Jehova, nga Dios han ira mga kaapoy-apoyan ngan sundon an Balaud ngan an mga sugo.” (2 Cron. 14:1-7) Ngan han ginsulong ni Zera nga taga-Etiopia an Juda upod an 1,000,000 nga sundalo, maaramon nga nangaro hi Asa han bulig ni Jehova pinaagi ha pagsiring: “O Jehova, diri problema ha imo kon an imo ginbubuligan damu o waray gahum. Buligi kami, O Jehova nga amon Dios, kay nasarig kami ha imo.” Inin maopay nga mga pulong nagpapakita nga daku gud an pagsarig ni Asa ha abilidad ni Jehova ha pagtalwas ha iya ngan ha iya katawohan. Sinarig hi Asa ha iya langitnon nga Amay, ngan “ginpirde ni Jehova an mga taga-Etiopia.”​—2 Cron. 14:8-12.

13. Ha urhi, ano an nahitabo kan Asa, ngan kay ano?

¹³ Sigurado nga mauyon ka nga an pakig-away ha 1,000,000 nga sundalo daku gud nga problema, pero nalamposan ito ni Asa kay sinarig hiya kan Jehova. Kondi makasurubo, han inatubang hiya hin diri sugad kadaku nga problema, waray hiya sumarig kan Jehova. Han gintarhog hiya han maraot nga hadi han Israel nga  hi Baasa, nagpabulig hi Asa ha hadi han Sirya. Maraot gud an resulta hito nga desisyon! Pinaagi kan propeta Hanani, ginsidngan ni Jehova hi Asa: “Tungod kay sinarig ka ha hadi han Sirya ngan waray ka sumarig kan Jehova nga imo Dios, an kasundalohan han hadi han Sirya nakapalagiw tikang ha imo.” Ngani tikang hito, pirme na may gin-aatubang nga girra hi Asa. (2 Cron. 16:7, 9; 1 Hadi 15:32) Ano an leksyon?

14. Paonan-o mo maipapakita nga nasarig ka kan Jehova, ngan sumala ha 1 Timoteo 4:12, ano an resulta kon bubuhaton mo ito?

¹⁴ Magpabilin nga mapainubsanon ngan padayon nga sumarig kan Jehova. Han nagpabawtismo ka, nagpakita ka hin daku nga pagtoo ngan pagsarig kan Jehova. Ngan malipayon nga gintaporan ka ni Jehova han pribilehiyo nga magin bahin han iya pamilya. An kinahanglan mo buhaton yana amo an padayon nga pagsarig kan Jehova. Bangin masayon la nga sumarig kan Jehova kon kinahanglan mo maghimo hin importante gud nga mga desisyon. Pero kumusta man ha iba nga mga panahon? Importante gud nga sumarig ka kan Jehova kon naghihimo hin mga desisyon, upod na an may kalabotan ha kaliawan, sekular nga trabaho, ngan mga tumong! Ayaw pagsarig ha imo kalugaringon nga kinaadman. Lugod, pamiling hin mga prinsipyo ha Biblia nga naaplikar ha imo sitwasyon, ngan katapos sunda ito nga giya. (Prob. 3:5, 6) Kon bubuhaton mo ito, mapapalipay mo hi Jehova ngan makukuha mo an respeto han kabugtoan ha iyo kongregasyon.​—Basaha an 1 Timoteo 4:12.

15. Sumala ha 2 Cronicas 18:1-3; 19:2, ano nga mga sayop an nahimo ni Hadi Jehosafat?

¹⁵ Syempre, pariho ha aton ngatanan, diri ka perpekto, salit may mga panahon nga makakasayop ka. Pero diri ito dapat makapugong ha imo ha pagbuhat han ngatanan nga imo mahihimo ha pag-alagad kan Jehova. Tagda an ehemplo hi Hadi Jehosafat. Damu an iya mag-opay nga kalidad. Sugad nga batan-on, “ginbiling niya an Dios han iya tatay ngan ginsunod an iya sugo.” Nagpadara liwat hiya hin mga prinsipe ngadto ha mga syudad han Juda basi magtutdo ha mga tawo mahitungod kan Jehova. (2 Cron. 17:4, 7) Pero may mga panahon nga nakahimo hi Jehosafat hin maraot nga mga desisyon. Sugad nga resulta han usa hito nga mga desisyon, ginsagdonan hiya han usa han mga representante ni Jehova. (Basaha an 2 Cronicas 18:1-3; 19:2.) Ano nga leksyon an imo mahibabaroan tikang hito nga asoy?

16. Ano an imo mahibabaroan ha eksperyensya ni Rajeev?

 ¹⁶ Karawata an sagdon ngan iaplikar ito. Pariho han damu nga batan-on nga kalalakin-an, bangin nakukurian ka nga iprayoridad an pag-alagad kan Jehova. Ayaw panluya. Tagda an eksperyensya han batan-on nga hi Rajeev. Nagsiring hiya mahitungod han panahon nga tin-edyer pa hiya: “Usahay, diri ako maaram kon ano an karuyag ko buhaton ha akon kinabuhi. Pariho ha damu nga batan-on, mas interesado ako ha isport ngan ha karisyohan kay ha pag-atender ha mga katirok o ha pagministeryo.” Ano an nakabulig kan Rajeev? May buotan nga tigurang nga nagsagdon ha iya. Hi Rajeev nagsiring: “Ginbuligan niya ako nga pamalandungon an prinsipyo ha 1 Timoteo 4:8.” Mapainubsanon nga ginkarawat ni Rajeev an sagdon ngan gin-usisa an iya mga prayoridad. Hiya nagsiring: “Nagdesisyon ako nga iprayoridad an espirituwal nga mga tumong.” Ano an resulta? “Paglabay hin pipira ka tuig tikang han ginsagdonan ako,” siring ni Rajeev, “nagin kwalipikado ako nga magin ministeryal nga surugoon.”

17. Ano an inaabat han mga edaran ha batan-on nga kalalakin-an nga nag-aalagad kan Jehova?

¹⁷ Gin-aapresyar gud han mga edaran kamo nga batan-on nga kalalakin-an nga nag-aalagad kan Jehova ‘kaurosa’ nira! (Zep. 3:9) Naoopayan gud hira han iyo pagin madasigon ha pagtuman han mga igintoka ha iyo. Nalilipay gud hira ha iyo.​—1 Juan 2:14.

18. Uyon ha Proberbios 27:11, ano an inaabat ni Jehova ha batan-on nga kalalakin-an nga nag-aalagad ha iya?

¹⁸ Mga batan-on nga brother, ayaw gud hingalimti nga hinigugma kamo ni Jehova ngan natapod hiya ha iyo. Iya igintagna nga ha kataposan nga mga adlaw, damu gud nga batan-on nga kalalakin-an an kinaburut-on nga magpipresentar han ira kalugaringon. (Sal. 110:1-3) Maaram hiya nga hinigugma niyo hiya ngan karuyag niyo nga mag-alagad ha iya ha bug-os niyo nga mahihimo. Salit magin mapailubon ha iba ngan ha iyo kalugaringon. Kon makasayop kamo, karawata an pagtutdo ngan disiplina ha iyo, ngan hunahunaa nga tikang ito kan Jehova. (Heb. 12:6) Magin maduruto ha pagtuman han bisan ano nga igintutoka ha iyo. Ngan an pinakaimportante, lipaya an iyo langitnon nga Amay ha ngatanan niyo nga ginbubuhat.​—Basaha an Proberbios 27:11.