1. Kumusta an imo kinabuhi han waray ka pa mag-aram han Biblia?

 KUMUSTA an imo kinabuhi han waray ka pa mag-aram han Biblia upod han mga Saksi ni Jehova? Damu ha aton an diri naruruyag paghunahuna mahitungod hito. An aton panhunahuna ngan personalidad posible nga naimpluwensyahan han ginsisiring han kalibotan nga tama ngan sayop. Kon ito an aton kahimtang hadto, ‘waray kita paglaom ngan waray kita Dios ha kalibotan.’ (Efe. 2:12) Tungod han pag-aram ha Biblia, nabag-o ito ngatanan!

2. Ano an imo nahibaroan samtang gin-aadman mo an Biblia?

² Samtang nag-aaram ka han Biblia, nahibaroan mo nga may-ada ka langitnon nga Amay nga nahigugma gud ha imo. Nasantop mo nga kon karuyag mo lipayon hi Jehova ngan magin bahin han iya pamilya han mga magsiringba, kinahanglan mo maghimo hin dagku nga pagbag-o ha imo pagkinabuhi, disposisyon, ngan panhunahuna. Kinahanglan mo mahibaro pagkinabuhi uyon ha iya higtaas nga suruklan.​—Efe. 5:3-5.

3. Sumala ha Colosas 3:9, 10, ano an karuyag ni Jehova nga buhaton naton, ngan ano an hihisgotan naton hini nga artikulo?

³ An aton Maglalarang ngan langitnon nga Amay nga hi Jehova may katungod ha pagdesisyon kon paonan-o dapat gumawi an mga membro han iya pamilya. Ngan gin-oobligar niya nga antes kita mabawtismohan, kinahanglan maningkamot kita nga ‘hukason an daan nga personalidad pati an mga buhat hito.’ * (Basaha an Colosas 3:9, 10.) Adton naruruyag magpabawtismo mabubuligan hini nga artikulo nga mabaton an tulo nga pakiana: (1) Ano “an daan nga personalidad”? (2) Kay ano nga gin-aaghat kita ni Jehova nga hukason ito? (3) Paonan-o naton ito mahihimo? Para  ha mga nabawtismohan na, ini nga pag-aram mabulig ha aton nga diri na maipakita an mga kalidad han daan nga personalidad.

4. Ano an panggawi han usa nga tawo nga kontrolado han “daan nga personalidad”?

⁴ An tawo nga ginkukontrol han “daan nga personalidad” kaurogan na nga naghuhunahuna ngan nagawi ha unudnon nga paagi. Bangin makikalugaringon hiya, madagmit masina, diri mapasalamaton, ngan mapahitas-on. Bangin nag-i-enjoy hiya pagkinita hin pornograpiya ngan imoral o bayolente nga mga pelikula. Sigurado nga may mag-opay hiya nga kalidad, ngan bangin nakukonsensya hiya ha magraot nga butang nga iya nasisiring o nabubuhat. Pero diri sugad kakusog an iya hingyap nga bag-uhon an iya panhunahuna ngan buhat.​—Gal. 5:19-21; 2 Tim. 3:2-5.

5. Bug-os ba nga mahuhukas naton an daan nga personalidad? Isaysay. (Buhat 3:19)

⁵ Diri kita perpekto, salit waray bisan usa ha aton an bug-os nga makakawara han ngatanan nga magraot nga panhunahuna ngan hingyap tikang ha aton kasingkasing ngan hunahuna. Usahay, may mabubuhat kita o mayayakan nga pagbabasolan naton. (Jer. 17:9; San. 3:2) Pero kon ginhuhukas naton an daan nga personalidad, diri na kita ginkukontrol han unudnon nga mga pamatasan ngan buhat. Nagigin iba nga klase na kita hin tawo.​—Isa. 55:7; basaha an Buhat 3:19.

6. Kay ano nga hi Jehova nag-aaghat ha aton nga wad-on an sayop nga panhunahuna ngan magraot nga buhat han daan nga personalidad?

⁶ Gin-aaghat kita ni Jehova nga wad-on an sayop nga panhunahuna ngan magraot nga buhat kay nahigugma gud hiya ha aton ngan karuyag niya nga ma-enjoy naton an kinabuhi. (Isa. 48:17, 18) Maaram hiya nga an mga nagpapadara ha ira sayop nga mga hingyap ginpapasakitan la an ira kalugaringon ngan adton nakapalibot ha ira. Nasasákit hiya kon nakikita kita niya nga ginpapasakitan an aton kalugaringon ngan an iba.

7. Sumala ha Roma 12:1, 2, ano an aton mapipilian?

⁷ An pipira han aton kasangkayan ngan kapamilya bangin ha siyahan magtamay ha aton tungod han aton paningkamot nga maghimo hin mga pagbag-o ha aton personalidad. (1 Ped. 4:3, 4) Bangin magsiring hira nga may katungod kita ha pagbuhat han bisan ano nga karuyag naton ngan diri kita dapat magpadikta ha iba kon ano an bubuhaton. Pero an mga nagsasalikway  han mga suruklan ni Jehova diri tinuod nga independente, kay ira gintutugotan an kalibotan nga ginmamandoan ni Satanas nga moldehon hira. (Basaha an Roma 12:1, 2.) Kinahanglan kita pumili: Titipigan an aton daan nga personalidad nga impluwensyado han sala ngan kalibotan ni Satanas o tutugotan hi Jehova nga bag-uhon kita ngadto ha pinakamaopay nga pagkatawo nga posible yana.​—Isa. 64:8.

8. Ano an makakabulig ha aton basi malikayan an sayop nga panhunahuna ngan magraot nga buhat?

⁸ Maaram hi Jehova nga nagkikinahanglan kita hin panahon ngan pangalimbasog basi malikayan an sayop nga panhunahuna ngan magraot nga buhat. (Sal. 103:13, 14) Pero pinaagi han iya Pulong, espiritu, ngan organisasyon, gintatagan kita ni Jehova hin kinaadman, kusog, ngan bulig nga aton kinahanglan basi mabag-o an aton pagkatawo. Sigurado nga ginbuligan ka na niya. Hisgotan naton yana an pipira nga praktikal nga pitad nga mahimo mo buhaton basi padayon ka nga mag-uswag ha paghukas han imo daan nga personalidad ngan magin kwalipikado ha bawtismo.

9. An Pulong han Dios makakabulig ha imo nga buhaton an ano?

⁹ Gamita an Biblia basi mausisa hin maopay an imo kalugaringon. An Pulong han Dios pariho hin espiho; makakabulig ito ha imo nga maanalisar an imo panhunahuna, panyakan, ngan buhat. (San. 1:22-25) An nagtututdo ha imo han Biblia ngan an iba nga hamtong nga mga Kristiano makakahatag ha imo hin sagdon. Pananglitan, magagamit nira an Kasuratan basi buligan ka nga makita an imo mag-opay nga kalidad ngan an imo mga kaluyahan. Matututdoan ka nira kon paonan-o mamimiling hin impormasyon nga basado ha Biblia nga naghahatag hin praktikal nga sagdon kon paonan-o malalamposan an magraot nga buhat. Ngan hi Jehova pirme andam ha pagbulig ha imo. Hiya an pinakamaaram kon paonan-o ka mabubuligan; maaram hiya kon ano an aada ha imo kasingkasing. (Prob. 14:10; 15:11) Salit pirme mag-ampo ha iya ngan admi an iya Pulong kada adlaw.

10. Ano an imo nahibaroan ha eksperyensya ni Elie?

¹⁰ Magin kombinsido nga an mga suruklan ni Jehova an pinakamaopay. Makakapahimulos kita ha ngatanan nga iginpapabuhat ha aton ni Jehova. Adton nagkikinabuhi uyon ha iya mga suruklan nagkakaada respeto ha kalugaringon, katuyoan ha kinabuhi, ngan tinuod nga kalipay. (Sal. 19:7-11) Ha kabaliktaran, adton nagbabalewaray han mga suruklan ni Jehova nag-aantos han magraot nga resulta han pagbuhat han mga buhat han unod. Pansina an ginsiring han lalaki nga hi Elie mahitungod han pagsalikway ha mga suruklan han Dios. Ginpadaku hiya hin mga kag-anak nga nahigugma kan Jehova. Pero han tin-edyer hiya, nakig-upod hiya ha maraot nga kasangkayan. Tungod hito, naimpluwensyahan hiya nga magdroga, magin imoral, ngan mangawat. Hi Elie nagsiring nga nagin mas masisinahon hiya ngan bayolente. “Aw, ngatanan nga akon ginbuhat kabaliktaran han igintutdo ha akon sugad nga Kristiano,” siring niya. Pero waray hingalimti ni Elie an nahibaroan niya han batan-on pa hiya. Ha urhi, nagtikang utro hiya pag-aram han Biblia. Nangalimbasog hiya nga bayaan an iya magraot nga buhat, ngan nagpabawtismo hiya han 2000. Paonan-o hiya nagpahimulos ha pagkinabuhi uyon ha mga suruklan ni Jehova? Hi Elie nagsiring: “Yana, murayaw na an akon hunahuna ngan limpyo an akon konsensya.” * Sugad han iginpapakita hini nga eksperyensya, ginpapasakitan hadton nagsasalikway han mga suruklan ni Jehova an ira kalugaringon. Pero karuyag gud ni Jehova nga buligan hira nga magbag-o.

11. Ano nga mga butang an ginkakangalasan ni Jehova?

 ¹¹ Kangalasi an ginkakangalasan ni Jehova. (Sal. 97:10) Iginsusumat han Biblia nga hi Jehova nangangalas ha “mapahitas-on nga mga mata, buwaon nga dila, ngan mga kamot nga nagpapatay hin inosente nga tawo.” (Prob. 6:16, 17) “Nangangalas [liwat hiya] ha madarahog ngan malimbong nga mga tawo.” (Sal. 5:6) Nangangalas gud hi Jehova hini nga mga disposisyon ngan buhat, salit ginpoo niya an ngatanan nga magraot ha panahon ni Noe kay ginpuno nira an tuna hin kamadarahog. (Gen. 6:13) Pansina an usa pa nga ehemplo. Pinaagi kan propeta Malakias, hi Jehova nagsiring nga nangangalas hiya hadton malimbong nga nagpaplano nga idiborsyo an ira inosente nga asawa. Ginsasalikway han Dios an ira pagsingba ngan huhukman hira tungod han ira mga buhat.​—Mal. 2:13-16; Heb. 13:4.

12. Ano an iginpapasabot han “kangalasi an maraot”?

¹² Karuyag ni Jehova nga aton ‘kangalasan an maraot.’ (Roma 12:9) An pulong nga “kangalasi” naghuhulagway hin makusog nga emosyon; nangangahulogan ito nga nadiri ka gud ha usa nga butang ngan nangingil-ad ka hito. Imadyina an imo aabaton kon pakaunon ka hin usa ka plato hin dunot na nga pagkaon. Bisan ha paghunahuna pa la hito bangin maghingasuka ka na. Sugad man, kinahanglan mangil-ad kita bisan ha paghunahuna pa la ha pagbuhat han usa nga butang nga maraot para kan Jehova.

13. Kay ano nga kinahanglan naton bantayan an aton panhunahuna?

¹³ Bantayi an imo panhunahuna. An aton mga panhunahuna nakakaimpluwensya ha aton mga buhat. Salit hi Jesus nagtutdo ha aton nga isalikway an mga panhunahuna nga makakaaghat ha aton ha pagbuhat hin seryoso nga sala. (Mat. 5:21, 22, 28, 29) Karuyag naton mapalipay an aton langitnon nga Amay, diri ba? Salit importante gud nga isalikway dayon naton an bisan ano nga maraot nga aton nahuhunahuna!

14. Ano an iginsusumat han aton panyakan, ngan ano nga mga pakiana an dapat naton batunon?

¹⁴ Kontrola an imo panyakan. Hi Jesus nagsiring: “An anoman nga nagawas ha baba nagtitikang ha kasingkasing.” (Mat. 15:18) Oo, an aton panyakan damu an iginsusumat mahitungod han aton sulod nga pagkatawo. Salit pakianhi an imo kalugaringon: ‘Nadiri ba ako pagbuwa bisan kon magkakaproblema ako kon isusumat ko an kamatuoran? Sugad nga inasaw-an, naghihirot ba ako nga diri magpikat ha diri kapariho an sekso? Ginlilikyan ko ba an imoral nga panyakan pariho hin nakakatapon nga sakit? Nabaton ba ako hin kalmado kon may nakakapasina ha akon?’  Makakabulig ha imo an pagpamalandong hito nga mga pakiana. Sugad la han tahi nga nagtutugkop han mga parte han bado, an maraot nga panyakan nagtutugkop han daan nga personalidad. Salit kon karuyag naton hukason an daan nga personalidad, kinahanglan diri na kita magyakan hin nakakadaot, buwa, ngan imoral.

15. Ano an karuyag sidngon han pagraysang “ha kahoy” han aton daan nga personalidad?

¹⁵ Magin andam ha pagbuhat han anoman nga ginkikinahanglan. Hi apostol Pablo naggamit hin mapwersa nga ilustrasyon basi tutdoan kita nga importante gud nga bag-uhon an paagi han aton pagkinabuhi. Nagsurat hiya nga kinahanglan naton iraysang “ha kahoy” an aton daan nga personalidad. (Roma 6:6) Ha iba nga pagkayakan, karuyag naton sundon an ehemplo han Kristo. Kinahanglan wad-on naton an mga pamatasan ngan buhat nga ginkakangalasan ni Jehova. Magkakaada la kita hin limpyo nga konsensya ngan paglaom nga kinabuhi nga waray kataposan kon bubuhaton naton ini nga mga pitad. (Juan 17:3; 1 Ped. 3:21) Hinumdumi nga diri babag-uhon ni Jehova an iya mga suruklan basi magpahiuyon ha aton. Lugod, kinahanglan bag-uhon naton an aton pagkatawo ngan magpahiuyon ha iya mga suruklan.​—Isa. 1:16-18; 55:9.

16. Kay ano nga kinahanglan magin determinado ka nga padayon nga atohan an sayop nga mga hingyap?

¹⁶ Padayon nga atohi an sayop nga mga hingyap. Bisan kon bawtismado ka na, kinahanglan padayon mo nga atohan an sayop nga mga hingyap. Hunahunaa an eksperyensya han lalaki nga hi Maurício. Batan-on pa hiya han nagtikang hiya pagkinabuhi sugad nga homoseksuwal. Ha urhi, nakilala niya an katawohan ni Jehova ngan nag-aram hiya han Biblia. Katapos maghimo hin mga pagbag-o ha iya kinabuhi, nabawtismohan hiya han 2002. Bisan kon damu na ka tuig yana nga nag-aalagad hi Maurício kan Jehova, hiya nagsiring: “Gin-aamin ko nga usahay kinahanglan ko atohan an sayop nga mga hingyap.” Waray niya pabay-i nga magpaluya ito ha iya. Lugod, nagsiring hiya: “Napaparig-on ako kay maaram ako nga kon ginpipili ko nga diri buhaton ito nga mga hingyap, napapalipay ko hi Jehova.” *

17. Ano an nakaparig-on ha imo mahitungod ha eksperyensya ni Nabiha?

¹⁷ Pag-ampo para han bulig ni Jehova, ngan sarig ha iya espiritu, diri ha imo kalugaringon nga kusog. (Gal. 5:22; Fil. 4:6) Kinahanglan magin determinado kita kon karuyag naton hukason an  daan nga personalidad ngan diri na gud ito isul-ot. Pansina an eksperyensya han babaye nga hi Nabiha. Gin-abandona hiya han iya tatay han sais anyos pa la hiya. “Nasakitan gud ako hito,” siring niya. Samtang nagtutubo hi Nabiha, nagin putong hiya ngan agresibo. Nagbaligya hiya hin droga, naaresto, ngan napriso hin pipira ka tuig. Gin-Bible study hiya han mga Saksi nga binisita ha prisohan. Nagtikang hi Nabiha paghimo hin dagku nga pagbag-o. “An pipira han akon bisyo, masayon ko la mabayaan,” siring niya. “Pero nakurian ako pag-undang ha pagsigarilyo.” Sobra usa ka tuig nga hi Nabiha naniguro nga iundang an pagsigarilyo, ngan ha urhi nahimo niya ito. Ano an nakabulig ha iya? Hiya nagsiring: “Labaw ha ngatanan, nalamposan ko ito tungod han akon padayon nga pag-ampo kan Jehova.” Yana, ginsisidngan niya an iba: “Sigurado ako nga kon nakagbag-o ako basi mapalipay hi Jehova, mahihimo liwat ito han iba!” *

18. Sumala ha 1 Corinto 6:9-11, ano an nakaya himoon han damu nga surugoon han Dios?

¹⁸ Ha siyahan nga siglo, an pipira han kalalakin-an ngan kababayin-an nga ginpili ni Jehova nga magin igkasi-magmarando han Kristo nagbuhat hadto hin magraot nga butang. Pananglitan, nag-adulteryo hira, mga homoseksuwal, ngan mga kawatan. Pero ha bulig han baraan nga espiritu han Dios, nabag-o nira an ira personalidad. (Basaha an 1 Corinto 6:9-11.) Sugad man yana, nabubuligan han Biblia an minilyon nga tawo nga makahimo hin mga pagbag-o ha ira kinabuhi. * Nakaya nira bayaan an magraot nga buhat nga ira na gud nahiaraan. An ira ehemplo nagpapamatuod nga makakahimo ka liwat hin mga pagbag-o ha imo personalidad ngan malalamposan mo an magraot nga buhat basi magin kwalipikado ha bawtismo.

19. Ano an hihisgotan han sunod nga artikulo?

¹⁹ Labot la han pangalimbasog nga hukason an daan nga personalidad, adton karuyag magpabawtismo kinahanglan mangalimbasog nga isul-ot an bag-o nga personalidad. Hihisgotan han sunod nga artikulo kon paonan-o naton ito mahihimo ngan kon paonan-o kita mabubuligan han iba.