1-2. Ano an agsob nga nahitatabo kon may mga nagpapabawtismo, ngan ano an dapat mo hunahunaon?

 NAGKITA ka na ba hin grupo han mga kandidato ha bawtismo? Nabatian mo an ira pagin kombinsido han ira ginbaton an duha nga pakiana antes hira nagpabawtismo. Nakita mo nga proud gud ha ira an ira mga kapamilya ngan kasangkayan. Paghaw-as nira ha tubig, nabatian mo an pagpakpak ngan nakita an kalipay ha ira nawong. Ha aberids, yinukot kada semana an nagbubuhat hito, nga nagigin dedikado ngan bawtismado nga mga Saksi ni Jehova nga Dios.

² Kumusta ka man? Kon nagpaplano ka pagpabawtismo, espesyal ka gud nga tawo dinhi hinin maraot nga kalibotan kay “namimiling [ka] kan Jehova.” (Sal. 14:1, 2) Para ha imo ini nga artikulo, batan-on ka man o lagas. Pero kita nga bawtismado na naruruyag liwat nga parig-unon an aton determinasyon nga mag-alagad kan Jehova ha kadayonan. Salit hisgotan ta an tulo han damu nga rason kon kay ano nga karuyag naton mag-alagad kan Jehova.

3. Kay ano nga hinigugma han mga surugoon ni Jehova an kamatuoran ngan katadongan? (Salmo 119:128, 163)

³ Ginsugo ni Jehova an iya katawohan nga ‘higugmaon an kamatuoran.’ (Zac. 8:19) Gin-aghat ni Jesus an iya mga sumurunod nga mangalimbasog nga magin matadong. (Mat. 5:6) Nangangahulogan ini nga an usa kinahanglan may marig-on nga hingyap nga buhaton an tama, maopay, ngan limpyo ha pagkita han Dios. Hinigugma mo ba an kamatuoran ngan katadongan? Sigurado nga oo an imo baton. Nangangalas ka ha kabuwaan ngan ha tanan nga sayop ngan maraot. (Basaha an Salmo 119:128, 163.) An kabuwaan nagpapakita han personalidad ni Satanas, an magmarando hini nga kalibotan. (Juan 8:44; 12:31) Usa han karuyag niya buhaton amo an pagpakaraot ha baraan nga ngaran ni Jehova nga Dios. Tikang pa han pagrebelde ha Eden, hi Satanas nagpapasarang na hin  mga buwa parte ha aton Dios. Naghatag hiya hin impresyon nga hi Jehova makikalugaringon ngan diri tangkod nga Magmarando nga may maopay nga diri iginhahatag ha mga tawo. (Gen. 3:1, 4, 5) Tubtob yana, an mga buwa ni Satanas parte kan Jehova may maraot nga impluwensya ha hunahuna ngan kasingkasing han mga tawo. Kon ginpipili nira nga diri ‘higugmaon an kamatuoran,’ puydi hira maimpluwensyahan ni Satanas nga buhaton an tanan nga klase han pagkadiri-matadong ngan karaotan.—Roma 1:25-31.

4. Paonan-o ginpapamatud-an ni Jehova nga hiya “an Dios han kamatuoran”? (Kitaa liwat an piktyur.)

⁴ Hi Jehova “an Dios han kamatuoran,” ngan hura hiya nga nagtututdo han kamatuoran ha mga nahigugma ha iya. (Sal. 31:5) Ha pagbuhat hito, iya hira gintatagan hin kagawasan ha mga buwa ni Satanas. Gintututdoan liwat ni Jehova an iya mga surugoon nga magin tangkod ngan matadong. Nabulig ito ha ira nga magkaada dignidad ngan murayaw nga hunahuna. (Prob. 13:5, 6) Ginbuhat ba niya ito para ha imo han imo gin-adman an Biblia? Nahibaroan mo nga an mga paagi ni Jehova amo an pinakamaopay para ha tanan nga tawo ngan ha imo mismo. (Sal. 77:13) Salit karuyag mo buhaton an matadong ha pagkita han Dios. (Mat. 6:33) Karuyag mo depensahan an kamatuoran ngan pamatud-an nga buwa an pakaraot parte ha aton Dios nga hi Jehova. Paonan-o mo ito mahihimo?

5. Paonan-o mo masusuportahan an kamatuoran ngan katadongan?

⁵ Puydi mo pilion an paagi han pagkinabuhi nga sugad hin nasiring: “Ginsasalikway ko an mga buwa ni Satanas, ngan nasuporta ako ha kamatuoran. Karuyag ko nga hi Jehova an akon magin Soberano, ngan karuyag ko buhaton an ginsisiring niya nga tama.” Paonan-o mo ito mahihimo? Daop kan Jehova ha pag-ampo ngan idedikar an imo kalugaringon ha iya, ngan katapos, pagpabawtismo basi mahibaroan han publiko nga dedikado ka na. An gugma ha kamatuoran ngan katadongan marig-on nga motibo ha pagdesisyon nga magpabawtismo.

6. Ano nga mga rason ha paghigugma kan Jesu-Kristo an iginhahatag ha imo han Salmo 45:4?

⁶ Kay ano nga hinigugma mo hi Jesu-Kristo? Pansina an pipira nga mag-opay nga rason nga mababasa ha Salmo 45:4. (Basaha.) Igin-aaghat ni Jesus an kamatuoran, pagkamapainubsanon, ngan katadongan. Kon hinigugma mo an kamatuoran ngan katadongan, natural la nga hinigugma mo liwat hi Jesu-Kristo. Hunahunaa kon paonan-o maisugon nga gindepensahan  niya an kamatuoran ngan katadongan. (Juan 18:37) Pero paonan-o igin-aaghat ni Jesus an pagkamapainubsanon?

7. Ano an imo naruruyagan ha pagkamapainubsanon ni Jesus?

⁷ Igin-aaghat ni Jesus an pagkamapainubsanon pinaagi han iya susbaranan. Pananglitan, pirme niya iginhahatag an tanan nga kadayawan ha iya Amay, diri ha iya kalugaringon. (Mar. 10:17, 18; Juan 5:19) Ano an imo inaabat ha iya pagkamapainubsanon? Diri ba ito nagpapagios ha imo nga higugmaon an Anak han Dios ngan sumunod ha iya? Sigurado nga oo an imo baton. Kay ano nga mapainubsanon hi Jesus? Kay nahigugma hiya ngan nasubad ha iya Amay, nga mapainubsanon. (Sal. 18:35; Heb. 1:3) Diri ka ba naaaghat nga magin duok kan Jesus, nga perpekto nga nagsusubad ha mga kalidad ni Jehova?

8. Kay ano nga hinigugma ta hi Jesus sugad nga aton Hadi?

⁸ Hinigugma ta hi Jesus sugad nga aton Hadi kay hiya an pinakamaopay nga Magmarando. Hi Jehova mismo an nagbansay han iya Anak ngan nagtuin ha iya nga magmando. (Isa. 50:4, 5) Hunahunaa liwat an nagsasakripisyo nga gugma nga iginpakita ni Jesus. (Juan 13:1) Sugad nga imo Hadi, angayan gud hi Jesus han imo gugma. Iginsaysay niya nga adton tinuod nga nahigugma ha iya—adton iya gintatawag nga iya kasangkayan—nagpapakita han ira gugma pinaagi ha pagsugot ha iya mga sugo. (Juan 14:15; 15:14, 15) Kadungganan gud nga magin sangkay han Anak ni Jehova!

9. Ha ano nga paagi an bawtismo han mga Kristiano may kaparihoan ha bawtismo han Kristo?

⁹ Usa han mga sugo ni Jesus ha iya mga sumurunod amo an pagpabawtismo. (Mat. 28:19, 20) Iginpakita niya an susbaranan. Ha pipira nga paagi, an iya bawtismo naiiba ha bawtismo han iya mga sumurunod. (Kitaa an kahon nga “ An Kaibahan han Bawtismo ni Jesus Ngan han Bawtismo han Iya mga Sumurunod.”) Pero ha iba nga mga paagi, may kaparihoan ito. Han nagpabawtismo hi Jesus, iya iginpresenta an iya kalugaringon basi buhaton an kaburut-on han iya Amay. (Heb. 10:7) Ha pariho nga paagi, an pagpabawtismo han mga sumurunod han Kristo nagpapakita ha publiko nga nagdedikar na hira kan Jehova nga Dios. An ira kinabuhi nakapokus na yana ha pagbuhat han iya kaburut-on, diri han ira kalugaringon. Salit nasunod hira ha susbaranan han ira Agaron.

10. Kay ano nga an gugma kan Jesus dapat magpagios ha imo nga magpabawtismo?

¹⁰ Ginkakarawat mo nga hi Jesus an bugtong nga Anak ni Jehova ngan an Hadi nga gintuinan han Dios nga magmando ha aton. Maaram ka nga hi Jesus mapainubsanon ngan perpekto nga nagsusubad ha iya Amay. Nahibaroan mo nga iya ginpakaon an nagugutom, ginliaw an nanluluya, ngan gintambal pa ngani an may sakit. (Mat. 14:14-21) Nakita mo kon paonan-o hiya nangunguna ha iya kongregasyon yana. (Mat. 23:10) Ngan maaram ka nga damu pa gud an iya hihimoon ha tiarabot sugad nga Hadi han Ginhadian han Dios. Paonan-o mo maipapakita nga hinigugma mo hiya? Pinaagi ha pagsunod ha iya susbaranan. (Juan 14:21) Puydi mo tikangan an pagbuhat hito pinaagi ha pagdedikar han imo kalugaringon kan Jehova ngan pagpabawtismo.

11. Para ha imo, ano an pinakaimportante nga rason ha pagpabawtismo, ngan kay ano?

¹¹ Ano an pinakaimportante nga rason ha pagpabawtismo? Iginsumat ni Jesus kon ano an pinakaimportante nga sugo han Dios pinaagi ha pagsiring: “Higugmaa hi Jehova nga imo Dios ha bug-os mo nga kasingkasing ngan ha bug-os mo nga kalag ngan ha bug-os mo nga hunahuna ngan ha bug-os mo nga kusog.” (Mar. 12:30) Iginpapakita ba hito nga mga pulong an imo gugma ha Dios?

12. Kay ano nga hinigugma mo hi Jehova? (Kitaa liwat an piktyur.)

¹² Damu gud an mga rason nga higugmaon hi  Jehova. Pananglitan, nasabtan mo nga hiya “an gintitikangan han kinabuhi” ngan hiya an Humaratag han ‘tagsa nga maopay nga regalo ngan han tagsa nga perpekto nga hatag.’ (Sal. 36:9; San. 1:17) An tagsa nga maopay nga butang nga imo nai-enjoy nagtitikang ha aton mahinatagon ngan mahigugmaon nga Dios.

13. Kay ano nga maopay gud nga regalo an lukat?

¹³ An lukat maopay gud nga regalo nga iginhatag ni Jehova ha aton. Kay ano nga makakasiring kita hito? Hunahunaa kon ano kaduok hi Jehova ngan an iya Anak. Hi Jesus nagsiring: “Hinigugma ako han Amay” ngan “nahigugma ako ha Amay.” (Juan 10:17; 14:31) Nagin mas duok pa gud hira tungod ha pagin magkaupod hin binilyon ka tuig. (Prob. 8:22, 23, 30) Hunahunaa an duro nga kasakit han Dios han gintugotan niya an iya Anak nga mag-antos ngan mamatay. Hinigugma gud ni Jehova an mga tawo—upod ka na—salit andam hiya nga ihatag an iya hinigugma nga Anak sugad nga halad basi ikaw ngan an iba puydi mabuhi ha waray kataposan. (Juan 3:16; Gal. 2:20) Waray na mas daku pa nga rason nga higugmaon an Dios.

14. Ano an pinakamaopay nga tumong nga imo mapipili?

¹⁴ Naghilarom an imo gugma kan Jehova kay mas damu na an imo nahibaroan parte ha iya. Sigurado nga karuyag mo magin mas duok ha iya yana ngan ha kadayonan. Ngan mahihimo mo ito. Mahigugmaon nga gin-aaghat ka niya nga lipayon an iya kasingkasing. (Prob. 23:15, 16)  Mahihimo mo ito diri la ha pulong kondi ha buhat liwat. Makikita ha paagi han imo pagkinabuhi nga hinigugma mo gud hi Jehova. (1 Juan 5:3) Ito an pinakamaopay nga tumong nga imo mapipili.

15. Paonan-o mo maipapakita an imo gugma kan Jehova?

¹⁵ Paonan-o mo maipapakita an imo gugma kan Jehova? Siyahan, magdidedikar ka ha amo la nga tinuod nga Dios pinaagi hin espesyal nga pag-ampo. (Sal. 40:8) Katapos, magpapabawtismo ka basi ipahibaro ha publiko an imo pribado nga pagdedikar. Sugad han ginhisgotan ta ha tinikangan hini nga artikulo, an imo bawtismo makalilipay ngan importante nga takna ha imo kinabuhi. Magkikinabuhi ka na para kan Jehova, diri para ha imo kalugaringon. (Roma 14:8; 1 Ped. 4:1, 2) Bangin hunahunaon mo nga daku ito nga desisyon nga hihimoon, ngan tinuod ito. Pero naghahatag ito ha imo han oportunidad nga magkaada han pinakamaopay nga kinabuhi. Kay ano?

16. Sugad han iginpapakita han Salmo 41:12, ano an ibabalos ni Jehova hadton nagamit han ira kinabuhi ha pag-alagad ha iya?

¹⁶ Hi Jehova an pinakamahinatagon nga Persona. Anoman an imo ihatag ha iya, pirme mas damu gud an iya ibabalos ha imo. (Mar. 10:29, 30) Ihahatag niya ha imo an pinakamakapainteres, pinakamakapatagbaw, ngan pinakamapulsanon nga kinabuhi nga posible, bisan hinin maraot nga kalibotan nga hirani na mawara. Ngan tinikangan pa la ito. An pagkinabuhi nga magtitikang ha imo bawtismo diri kinahanglan matapos. Puydi ka magpadayon ha pag-alagad ha imo hinigugma nga Amay ha waray kataposan. An iyo paghigugmaay han imo Amay padayon nga maghihilarom, ngan magpapabilin ka nga buhi tubtob nga buhi hiya, ha kadayonan.—Basaha an Salmo 41:12.

17. Ano an puydi mo ihatag kan Jehova nga waray pa ha iya?

¹⁷ Kon magdedikar ka ngan magpabawtismo, may pribilehiyo ka nga ihatag an usa nga butang nga presyoso gud ha imo Amay. Gintagan ka niya han tanan nga mag-opay nga butang ngan han tanan nga makalilipay nga takna nga imo na-enjoy. Sugad nga balos, puydi mo ihatag ha Tag-iya han langit ngan tuna an usa nga butang nga waray pa ha iya—an imo kinaburut-on ngan  maunungon nga pag-alagad. (Job 1:8; 41:11; Prob. 27:11) May-ada pa ba mas maopay nga paagi ha paggamit han imo kinabuhi? Sigurado nga an imo gugma kan Jehova an pinakamaopay nga rason ha pagpabawtismo.

18. Ano an puydi mo ipakiana ha imo kalugaringon?

¹⁸ Kon sugad, ano an imo baton hini, Magpapabawtismo ka ba? Ikaw la an makakabaton. Pero bangin makabulig kon pakianhan mo an imo kalugaringon, ‘Ano pa an akon ginhuhulat?’ (Buh. 8:36) Hinumdumi an tulo nga rason nga ginhisgotan ta. Siyahan, hinigugma mo an kamatuoran ngan katadongan. Pakianhi an imo kalugaringon, ‘Karuyag ko ba makita an adlaw nga an ngatanan magyayakan na han kamatuoran ngan magbubuhat han tama?’ Ikaduha, hinigugma mo hi Jesu-Kristo. Pakianhi an imo kalugaringon, ‘Karuyag ko ba nga an Anak han Dios an magin akon Hadi, ngan karuyag ko ba sundon an iya susbaranan?’ Ikatulo, labaw ha ngatanan, hinigugma mo hi Jehova. Pakianhi an imo kalugaringon, ‘Karuyag ko ba lipayon an kasingkasing ni Jehova pinaagi ha pag-alagad ha iya sugad nga akon Dios?’ Kon oo an imo baton hito nga mga pakiana, kay ano nga diri pa magpabawtismo? Ano pa an imo ginhuhulat?—Buh. 16:33.

19. Kay ano nga diri ka dapat mag-alang pagpabawtismo? Iilustrar. (Juan 4:34)

¹⁹ Kon nag-aalang ka pagpabawtismo, hunahunaa an usa nga ilustrasyon ni Jesus. (Basaha an Juan 4:34.) Pansina nga ginkompara niya ha pagkaon an pagbuhat han kaburut-on han iya Amay. Kay ano? An pagkaon makakaopay ha aton. Maaram hi Jesus nga an tanan nga iginpapabuhat ha aton ni Jehova makakaopay ha aton. Diri karuyag ni Jehova nga buhaton ta an bisan ano nga makakadaot ha aton. Kaburut-on ba niya nga magpabawtismo ka? Oo. (Buh. 2:38) Salit makakasarig ka nga magigin mapulsanon ha imo an pagsugot ha sugo nga magpabawtismo. Kon diri ka mag-aalang nga kaunon an pinakamarasa nga pagkaon, kay ano man nga mag-aalang ka pagpabawtismo?

20. Ano an aton hihisgotan ha sunod nga artikulo?

²⁰ Kay ano nga an iba nag-aalang pagpabawtismo? Bangin damu an bumaton hin sugad hini, “Diri pa ako andam.” Ha tinuod la, an desisyon nga magdedikar kan Jehova ngan magpabawtismo amo an pinakaimportante nga desisyon nga imo hihimoon. Salit an pagpangandam nagkikinahanglan hin panahon, pamurubuot, ngan maduruto nga pangalimbasog. Pero kon hingyap mo gud magpabawtismo, ano an mahihimo mo yana basi maiandam an imo kalugaringon? Hihisgotan ta an baton ha sunod nga artikulo.