1-2. Kon diri ka pa andam magpabawtismo, kay ano nga diri ka angay manluya? (Kitaa an piktyur ha kobre.)

 KON karuyag mo magpabawtismo, maopay gud nga tumong an imo ginhimo. Andam ka na ba nga buhaton ito yana? Kon para ha imo andam ka na ngan nauyon an mga tigurang, ayaw pag-alang ha pagbuhat hito ha sunod nga oportunidad. Magkakaada ka makalilipay nga kinabuhi ha pag-alagad kan Jehova.

² Ha luyo nga bahin, ginsidngan ka na ba nga kinahanglan mo pa mag-uswag antes magpabawtismo? O nahuhunahuna mo ba ito mahitungod ha imo kalugaringon? Kon oo, ayaw panluya. Batan-on ka man o lagas, puydi ka mag-uswag ngan makab-ot iton importante nga tumong.

3. Ano an iginpakiana kan Felipe han usa nga opisyal ha palasyo nga taga-Etiopia, ngan ano nga pakiana an nabangon? (Buhat 8:36, 38)

³ Basaha an Buhat 8:36, 38. Usa nga opisyal ha palasyo nga taga-Etiopia an nagpakiana kan Felipe nga ebanghelisador: “Ano man an nakakaulang ha akon ha pagpabawtismo?” Karuyag niya magpabawtismo, pero andam na gud ba hiya nga buhaton ito?

4. Paonan-o iginpakita han taga-Etiopia nga determinado hiya nga padayon nga mahibaro?

⁴ An lalaki nga taga-Etiopia ‘kinadto ha Jerusalem basi magsingba.’ (Buh. 8:27) Salit posible gud nga proselita hiya nga Judio; nakombirte na hiya ha Judaismo. Sigurado nga nahibaro hiya parte kan Jehova tikang ha sagrado nga mga sinurat ha Hebreo nga Kasuratan. Pero karuyag gud niya mahibaro pa. Ngani, han gindaop hiya ni Felipe ha kalsada, ano an nakita ni Felipe nga iya ginbubuhat? May ginbabasa hiya nga linukot nga basahon han  mga sinurat ni propeta Isaias. (Buh. 8:28) Matig-a ito nga espirituwal nga pagkaon. An opisyal ha palasyo diri kontento nga mahibaroan la an pipira nga nangunguna nga katutdoan; karuyag niya nga padayon nga mahibaro.

5. Ano an ginbuhat han taga-Etiopia ha iya nahibaroan?

⁵ Ini nga lalaki hitaas nga opisyal ni Rayna Candace han Etiopia; “tinaporan hiya ha ngatanan nga bahandi han rayna.” (Buh. 8:27) Busy hiya nga tawo nga damu an responsabilidad. Pero naghatag hiya hin panahon ha pagsingba kan Jehova. Diri hiya kontento nga mahibaroan la an kamatuoran; gin-aplikar niya an iya nahibaroan. Salit nagbiyahe hiya hin hirayo tikang ha Etiopia basi magsingba kan Jehova ha templo ha Jerusalem. Sigurado nga maiha ngan magasto ito nga biyahe, pero ginhimo hini nga lalaki an tanan basi singbahon hi Jehova.

6-7. Paonan-o padayon nga naghilarom an gugma han taga-Etiopia kan Jehova?

⁶ An taga-Etiopia nahibaro kan Felipe hin importante nga bag-o nga mga kamatuoran, upod na kon hin-o an Mesias. (Buh. 8:34, 35) Sigurado nga nalipay hiya nga mahibaro han ginbuhat ni Jesus para ha iya. Ano an iya ginhimo? Puydi unta hiya magpabilin sugad nga ginrirespeto nga proselita nga Judio. Lugod, naghilarom an iya gugma kan Jehova ngan ha Iya Anak. Napagios hiya nga himoon an importante nga desisyon nga magpabawtismo sugad nga sumurunod ni Jesu-Kristo. Nakita ni Felipe nga andam na hiya, salit ginbawtismohan niya hiya.

⁷ Kon susundon mo an ehemplo hito nga taga-Etiopia, makakapangandam ka para ha bawtismo. May kompyansa ka liwat nga makakasiring, “Ano man an nakakaulang ha akon ha pagpabawtismo?” Hisgotan ta kon paonan-o mo mahihimo an iya mga ginbuhat: Padayon hiya nga nahibaro, gin-aplikar an iya nahibaroan, ngan padayon nga ginpahilarom an iya gugma ha Dios.

8. Sumala ha Juan 17:3, ano an kinahanglan mo buhaton?

⁸ Basaha an Juan 17:3. Ini ba nga mga pulong ni Jesus nakabulig ha imo nga magdesisyon pag-aram ha Biblia? Damu ha aton an nabuligan hini. Pero ini ba nga mga pulong nag-aaghat liwat ha aton nga padayon nga mahibaro? Oo. Diri gud kita maundang ha “padayon nga pagkilala . . . ha amo la nga tinuod nga Dios.” (Ecles. 3:11) Padayon kita nga mahibabaro ha kadayonan. Samtang mas damu an aton nahibabaroan, magigin mas duok kita kan Jehova.—Sal. 73:28.

9. Ano an kinahanglan ta buhaton katapos hibaroan an nangunguna nga mga katutdoan han Biblia?

⁹ Syempre, an paghibaro mahitungod kan Jehova nagtitikang ha nangunguna nga mga katutdoan han Biblia. Ha surat ni apostol Pablo  ha mga Hebreo, iya gintawag an nangunguna nga mga katutdoan nga “basihan nga mga prinsipyo.” Diri niya ginmiminos an “nangunguna nga doktrina”; ginkukompara la niya ito ha gatas nga naghahatag hin sustansya ha minasus-an. (Heb. 5:12; 6:1) Pero gin-aghat liwat niya an ngatanan nga Kristiano nga diri la kay padayon nga hibaroan an nangunguna nga mga katutdoan kondi hibaroan liwat an mas higlarom nga kamatuoran ha Pulong han Dios. Nakultibar mo na ba an hingyap nga mahibaroan an mas higlarom nga katutdoan han Biblia? Andam ka ba nga padayon nga mag-uswag, padayon nga mahibaro mahitungod kan Jehova ngan ha iya mga katuyoan?

10. Kay ano nga an iba nakukurian pag-aram?

¹⁰ Pero damu ha aton an nakukurian pag-aram. Ano an imo masisiring ha pag-aram? Ha eskwelahan, nahibaro ka ba pagbasa ngan pag-aram hin maopay? Inabat mo ba nga makalilipay ngan sulit an pag-aram? O nahunahuna mo nga diri ka dayon nahibabaro tikang ha mga libro? Kon oo, diri ka nag-uusahan. Pero hi Jehova makakabulig ha imo. Perpekto hiya ngan amo an pinakamaopay nga Magturutdo.

11. Paonan-o iginpapakita ni Jehova nga hiya an “Harangdon nga Instruktor”?

¹¹ Gintatawag ni Jehova an iya kalugaringon nga “imo Harangdon nga Instruktor.” (Isa. 30:20, 21) Pasensyoso hiya, buotan, ngan makonsiderasyon nga Magturutdo. Ginbibiling niya an maopay ha iya mga estudyante. (Sal. 130:3) Ngan diri gud hiya naglalaom hin labaw kay ha aton mahihimo. Hinumdumi nga hiya an nagdisenyo han imo utok, nga maopay gud nga regalo. (Sal. 139:14) May natural kita nga hingyap nga mahibaro. Karuyag han aton Maglalarang nga padayon kita nga mahibaro ha waray kataposan—ngan ma-enjoy ito. Salit maaramon nga “maghingyap” na yana han mga kamatuoran ha Biblia. (1 Ped. 2:2) Paghimo hin mga tumong nga kaya mo kab-uton, ngan regular nga basaha ngan admi an Biblia. (Jos. 1:8) Ha bulig ni Jehova, mas mag-i-enjoy ka pagbasa ngan paghibaro parte ha iya.

12. Kay ano nga dapat naton adman an kinabuhi ngan ministeryo ni Jesus?

¹² Regular nga maghatag hin panahon ha pagpamalandong ha kinabuhi ngan ministeryo ni Jesus. Importante nga sundon ta hin maopay an mga pitad ni Jesus basi makag-alagad kan Jehova, labi na hinin makuri nga mga panahon. (1 Ped. 2:21) Prangka nga nagsiring hi Jesus nga an iya mga disipulo maatubang hin mga problema. (Luc. 14:27, 28) Pero nasarig hiya nga an iya tinuod nga mga sumurunod puydi maglampos, pariho ha iya. (Juan 16:33) Admi an mga detalye han kinabuhi ni Jesus, ngan paghimo hin mga tumong nga subaron hiya ha imo adlaw-adlaw nga pagkinabuhi.

13. Ano an dapat mo padayon nga hangyoon kan Jehova, ngan kay ano?

¹³ Diri gud igo an kahibaro la. An nangunguna nga kapulsanan hito amo an pagbulig ha imo nga mahibaro pa mahitungod kan Jehova ngan makultibar an mga kalidad sugad han gugma ngan pagtoo ha iya. (1 Cor. 8:1-3) Samtang padayon ka nga nahibabaro, padayon nga hangyoa hi Jehova nga buligan ka nga magkaada dugang nga pagtoo. (Luc. 17:5) Ginbabaton gud niya an sugad nga mga pag-ampo. An tinuod nga pagtoo nga iginbase ha husto nga kahibaro parte ha aton Dios mabulig ha imo nga mag-uswag.—San. 2:26.

14. Paonan-o ginpabug-atan ni apostol Pedro an pagkaimportante han pag-aplikar han aton nahibabaroan? (Kitaa liwat an piktyur.)

¹⁴ Ginpabug-atan ni apostol Pedro nga importante gud nga padayon nga iaplikar han mga sumurunod han Kristo an ira nahibabaroan. Gin-unabi  niya an rekord han Biblia mahitungod kan Noe. Ginsidngan ni Jehova hi Noe nga bubungkagon Niya an magraot nga tawo hito nga panahon pinaagi hin baha. An basta paghibaro la nga magkakaada baha diri igo para matalwas hi Noe ngan an iya pamilya. Tigamni nga an gin-unabi ni Pedro amo an panahon antes an Baha “samtang ginhihimo an arka.” (1 Ped. 3:20) Oo, gin-aplikar ni Noe ngan han iya pamilya an ira nahibaroan tikang ha Dios pinaagi ha paghimo hin arka, nga daku gud nga sakayan. (Heb. 11:7) Katapos, an ginbuhat ni Noe iginpariho ni Pedro ha bawtismo. Nagsurat hiya: “An bawtismo, nga katugbang hini, nagtatalwas liwat yana ha iyo.” (1 Ped. 3:21) Salit an imo ginbubuhat yana ha pagpangandam para ha bawtismo maipapariho ha ginbuhat ni Noe ngan han iya pamilya ha sulod hin damu ka tuig ha paghimo han arka. Ano an dapat mo buhaton basi makapangandam para ha bawtismo?

15. Ano an nahiuupod ha tinuod nga pagbasol?

¹⁵ Usa han siyahan nga dapat ta buhaton amo an sinsero nga pagbasol han aton mga sala. (Buh. 2:37, 38) An tinuod nga pagbasol nagriresulta hin tinuod nga pagbag-o. Ginbayaan mo na ba an mga buhat nga nakakapasubo kan Jehova, sugad han imoralidad, pagsigarilyo, o pagyakan hin maraot o nakakasakit nga mga pulong? (1 Cor. 6:9, 10; 2 Cor. 7:1; Efe. 4:29) Kon waray pa, padayon nga paningkamuti nga maghimo hin mga pagbag-o. Pakiistorya ha nagba-Bible study ha imo, o hangyoa an mga tigurang ha kongregasyon nga buligan ka ngan giyahan. Kon batan-on ka ngan nalungon pa ha imo mga kag-anak, padayon nga hangyoa hira nga buligan ka nga bayaan an magraot nga buhat nga makakaulang ha imo ha pagpabawtismo.

16. Ano an nahiuupod ha pagkaada maopay nga espirituwal nga rutina?

¹⁶ Importante liwat nga magkaada maopay nga espirituwal nga rutina. Upod hito an pag-atender ngan pakigbahin ha mga katirok. (Heb. 10:24, 25) Ngan kon kwalipikado ka na makigbahin ha ministeryo, iapi liwat ito ha imo rutina. Samtang mas nakikigbahin ka hiton nagtatalwas han kinabuhi nga buruhaton, mas mai-enjoy mo ito. (2 Tim. 4:5) Kon batan-on ka ngan nalungon pa ha imo mga kag-anak, pakianhi an imo kalugaringon: ‘Kinahanglan ba ako pahinumdoman han akon mga kag-anak nga  umatender ha mga katirok o makigbahin ha ministeryo? O naglulugaring na ako pagbuhat hito?’ Kon naglulugaring ka na pagbuhat hito, iginpapakita mo an imo pagtoo ngan an imo gugma ngan pagkamapasalamaton kan Jehova nga Dios. Mga “buhat [ini] han debosyon ha Dios,” mga regalo nga imo iginhahatag kan Jehova. (2 Ped. 3:11; Heb. 13:15) An tanan nga regalo nga iginhahatag ta hin kinaburut-on ngan diri napipiritan nakakapalipay ha aton Dios. (Ikompara an 2 Corinto 9:7.) Ginbubuhat ta ito kay nalilipay kita paghatag kan Jehova han aton pinakamaopay.

17-18. Ano nga importante gud nga kalidad an mabulig ha imo nga mag-uswag ngadto ha pagpabawtismo, ngan kay ano? (Proberbios 3:3-6)

¹⁷ Samtang padayon ka nga nag-uuswag ngadto ha pagpabawtismo, maatubang ka hin mga problema. Bangin tamayon ka han iba tungod han imo bag-o nga pagtoo; bangin kontrahon o pagtimarauton ka pa ngani nira. (2 Tim. 3:12) Samtang nangangalimbasog ka nga iundang an usa nga maraot nga buhat, may mga panahon nga bangin mautro mo la gihap ito. O bangin maubosan ka hin pasensya ngan maaringit kay baga hin makuri makab-ot an imo tumong. Ano an mabulig ha imo nga makailob? Usa nga importante gud nga kalidad—gugma kan Jehova.

¹⁸ An imo gugma kan Jehova makaruruyag nga kalidad, an pinakamaopay nga may-ada ka. (Basaha an Proberbios 3:3-6.) An marig-on nga gugma ha Dios makakabulig ha imo nga makaya an mga problema. Agsob unabihon han Biblia an maunungon nga gugma ni Jehova ha iya mga surugoon. Nagpapasabot ito nga diri gud hiya mabaya o maundang paghigugma ha ira. (Sal. 100:5) Ginhimo ka uyon ha dagway han Dios. (Gen. 1:26) Paonan-o mo maipapakita ito nga klase han gugma?

19. Paonan-o ka magigin mas mapasalamaton ha ngatanan nga ginbuhat ni Jehova para ha imo? (Galacia 2:20)

¹⁹ Pagtikang pinaagi ha pagin mapasalamaton. (1 Tes. 5:18) Kada adlaw, pakianhi an imo kalugaringon, ‘Paonan-o hi Jehova nagpakita hin gugma ha akon?’ Katapos, siguroha nga mapasalamatan mo hi Jehova ha imo mga pag-ampo, nga gin-uunabi an espisipiko nga mga butang nga iya ginbuhat para ha imo. Hunahunaa nga para ha imo mismo an iya mahigugmaon nga mga buhat, sugad han nasantop ni apostol Pablo mahitungod kan Jehova. (Basaha an Galacia 2:20.) Pakianhi an imo kalugaringon, ‘Karuyag ko ba ipakita ha iya an akon gugma sugad nga balos?’ An gugma kan Jehova mabulig  ha imo nga padayon nga atohan an mga pagsulay ngan ilubon an mga problema. Magpapagios ini ha imo nga ipadayon an imo espirituwal nga rutina, nga nagpapakita han imo gugma ha imo Amay kada adlaw.

20. Ano an nahiuupod ha pagdedikar han imo kalugaringon kan Jehova, ngan ano kaimportante ini nga desisyon?

²⁰ Paglabay han panahon, an imo gugma kan Jehova magpapagios ha imo nga maghimo hin espesyal nga pag-ampo. Igdidedikar mo an imo kalugaringon ha Dios. Hinumdumi nga kon dedikado ka na kan Jehova, may-ada ka hinin makalilipay nga paglaom: Puydi ka magin panag-iya ni Jehova ha kadayonan. An saad han pagdedikar kan Jehova nagpapadayon ha makalilipay man o makasurubo nga mga panahon. Diri gud ito kinahanglan utruhon. Syempre, an pagdedikar seryoso nga desisyon. Pero hunahunaa ini: Damu nga desisyon an imo hihimoon ha imo kinabuhi, ngan an iba hito maopay gud, pero an pagdedikar han imo kinabuhi kan Jehova amo an pinakamaopay nga desisyon nga imo hihimoon. (Sal. 50:14) Mangangalimbasog hi Satanas nga paluyahon an imo gugma ha imo Amay, kay naglalaom hiya nga isasalikway mo an imo integridad. Ayaw gud padaoga hi Satanas! (Job 27:5) An imo marig-on nga gugma kan Jehova mabulig ha imo nga tumanon an imo dedikasyon ngan magin mas duok pa gud ha imo langitnon nga Amay.

21. Kay ano nga makakasiring kita nga an bawtismo diri an kataposan kondi an tinikangan?

²¹ Katapos mo magdedikar kan Jehova, pakiistorya ha mga tigurang ha iyo kongregasyon mahitungod han pagbuhat han sunod nga importante nga pitad. Pero hinumdumi pirme nga an bawtismo diri an kataposan kondi an tinikangan. Tinikangan ito han waray kataposan nga pagkinabuhi nga nag-aalagad kan Jehova. Salit parig-ona yana an imo gugma ha imo Amay. Paghimo hin mga tumong basi an imo gugma magtikarig-on kada adlaw. An pagbuhat hito magpapagios ha imo nga magpabawtismo. Makalilipay gud ito nga adlaw. Pero tinikangan pa la ito. Hinaot an imo gugma kan Jehova ngan ha iya Anak padayon nga maghilarom ha kadayonan!