Kay ano nga an paratubos nagsiring nga ‘mawawara’ an iya panurundon kon pangangasaw-on niya hi Ruth? (Ruth 4:1, 6)

Kon an usa nga inasaw-an nga lalaki ha panahon han Biblia namatay nga waray anak, may mga pakiana nga kinahanglan mabaton: Ano an mahitatabo ha iya tuna? Mawawara ba ha kadayonan an ngaran han iya pamilya? An Mosaiko nga Balaud nakabulig ha pagbaton hito nga mga pakiana.

Ano an mahitatabo ha tuna han usa nga lalaki nga namatay o nagin pobre ngan nagbaligya han iya tuna? Puydi tubuson han usa niya nga bugto nga lalaki o duok nga paryente ito nga tuna. Salit magpapabilin ito ha pamilya.—Lev. 25:23-28; Num. 27:8-11.

Paonan-o matitipigan an ngaran han pamilya han namatay nga lalaki? Pinaagi han kahikayan nga pag-asawa ha bayaw, nga gin-gamit ha kahimtang ni Ruth. Pangangasaw-on han usa nga lalaki an balo han iya bugto basi mahatagan hiya hin anak nga magdadara han ngaran han namatay nga lalaki ngan magigin eredero han iya propyedad. Tungod hinin mahigugmaon nga kahikayan, nasiguro liwat nga maaataman an balo.—Deut. 25:5-7; Mat. 22:23-28.

Pansina an kahimtang ni Noemi. Asawa hiya ni Elimelec. Han namatay hi Elimelec ngan an ira duha nga anak nga lalaki, waray na hiya kapamilya nga mag-aataman ha iya. (Ruth 1:1-5) Pagbalik ni Noemi ha Juda, iya ginsugo an iya umagad nga hi Ruth nga hangyoon hi Boaz nga tubuson an ira tuna. Hi Boaz duok nga paryente ni Elimelec. (Ruth 2:1, 19, 20; 3:1-4) Pero maaram hi Boaz nga may usa pa nga lalaki nga mas duok nga paryente. Salit hiya an siyahan nga may katungod nga magin paratubos.—Ruth 3:9, 12, 13.

Ha siyahan, andam bumulig ito nga lalaki. (Ruth 4:1-4) Bisan pa kon gumasto hiya ha pagtubos han tuna, maaram hiya nga lagas na hi Noemi salit diri na magkakaada anak nga magigin eredero han tuna ni Elimelec. Makukuha han lalaki an tuna ngan magigin bahin ito han iya panurundon, salit baga hin makakabenepisyo gud hiya hito.

Pero nagbag-o an hunahuna hito nga lalaki han nahibaroan niya nga kinahanglan niya pangasaw-on hi Ruth. Nagsiring hiya: “Diri ko ito matutubos, kay bangin mawara ko an akon kalugaringon nga panurundon.” (Ruth 4:5, 6) Kay ano nga nagbag-o an iya hunahuna?

Kon hi Ruth pangasaw-on niya o han iba, ngan magkaanak hi Ruth hin lalaki, ito nga anak an magigin eredero han tuna ni Elimelec. Paonan-o ini ‘makakawara’ han iya “panurundon”? Waray ginsisiring an Biblia, pero aadi an pipira nga posible nga paagi.

• Siyahan, baga hin makakarag la an kwarta nga iya magagasto, kay ha urhi an tuna ni Elimelec diri magigin iya. Mahingangadto ito ha anak ni Ruth.

• Ikaduha, magigin responsabilidad niya nga pakaunon ngan atamanon hira Noemi ngan Ruth.

• Ikatulo, kon magkaada hi Ruth iba pa nga anak ha iya, magkakaada hira bahín ha panurundon han iya mga anak.

• Ikaupat, kon waray hiya iba nga anak, an anak nga lalaki ni Ruth magkakaada katungod ha tuna ni Elimelec ngan ha iya tuna. Salit kamatay niya, an iya tuna magigin panag-iya han anak nga nagdadara han ngaran ni Elimelec, diri han iya ngaran. Diri hiya andam bumulig kan Noemi kay maninelikado nga mawara an iya panurundon. Mas karuyag niya nga ito nga responsabilidad saluhon han sunod nga may katungod ha pagtubos, hi Boaz. Ginbuhat ito ni Boaz kay karuyag niya nga “an ngaran han tawo nga namatay mahibalik ha iya panurundon.”—Ruth 4:10.

Klaro nga an mas duok nga paryente mas interesado nga matipigan an iya kalugaringon nga ngaran ngan panurundon. Makikalugaringon hiya. Pero imbes nga matipigan an iya ngaran, yana diri ngani kita maaram kon hin-o hiya. Waray liwat niya makarawat an espesyal nga pribilehiyo nga nakarawat ni Boaz, nga magin usa han mga kaapoy-apoyan han Mesias, hi Jesu-Kristo. Makasurubo gud ito nga resulta para ha mas duok nga paryente, kay tungod han iya pagin makikalugaringon ginlikyan niya an oportunidad nga buligan an usa nga nanginginahanglan!—Mat. 1:5; Luc. 3:23, 32.