1. Ano an nakakaimpres ha damu nga interesado nga tawo nga naatender ha aton mga katirok? (Kitaa liwat an piktyur.)

 IMADYINA an usa nga mag-asawa nga naatender ha siyahan nga higayon ha katirok ha Kingdom Hall han mga Saksi ni Jehova. Naimpres gud hira ha mahigugmaon nga pag-abiabi ha ira ngan ha paghigugmaay han kabugtoan ha kongregasyon. Samtang tipauli tikang ha katirok, an asawa nagsiring ha iya bana, ‘May kakaiba ha mga Saksi ni Jehova, ngan naopayan ako hito.’

2. Kay ano nga napakdol an pipira?

² An gugma nga nakikita ha sulod han Kristiano nga kongregasyon espesyal gud. Syempre, an mga Saksi ni Jehova diri perpekto. (1 Juan 1:8) Salit samtang mas nakikilala ta an kabugtoan ha kongregasyon, mas daku an posibilidad nga makita naton an ira mga kaluyahan. (Roma 3:23) Makasurubo kay gintugotan han pipira nga an mga sayop han iba makapakdol ha ira.

3. Paonan-o makikilala an tinuod nga mga sumurunod ni Jesus? (Juan 13:34, 35)

³ Kitaa utro an tema nga teksto hini nga artikulo. (Basaha an Juan 13:34, 35.) Paonan-o makikilala an tinuod nga mga sumurunod han Kristo? Pinaagi han gugma, diri han pagin perpekto. Tigamni liwat nga waray hi Jesus magsiring: ‘Pinaagi hini mahibabaro kamo nga mga disipulo ko kamo.’ Lugod, nagsiring hiya: “Pinaagi hini an ngatanan mahibabaro nga mga disipulo ko kamo.” Hito nga paagi, iginpakita ni Jesus nga diri la an iya mga sumurunod kondi pati liwat adton diri bahin han Kristiano nga kongregasyon an makakakilala ha iya tinuod nga  mga sumurunod pinaagi han ira diri makikalugaringon nga gugma ha usa kag usa.

4. Ano an bangin karuyag mahibaroan han pipira mahitungod ha tinuod nga mga Kristiano?

⁴ An pipira nga diri Saksi ni Jehova bangin maghunahuna: ‘Paonan-o an gugma nabulig basi makilala an tinuod nga mga sumurunod ni Jesus? Paonan-o nagpakita hi Jesus hin gugma ha iya mga apostol? Ngan paonan-o naton masusubad yana an ehemplo ni Jesus?’ Maopay nga pamalandungon han mga Saksi an mga baton hito nga mga pakiana. An pagbuhat hito makakabulig ha aton nga mas maipakita an gugma, labi na kon nagsasayop an aton kabugtoan.—Efe. 5:2.

5. Isaysay an ginsiring ni Jesus nga mababasa ha Juan 15:12, 13.

⁵ Ginklaro ni Jesus nga makikilala an iya mga sumurunod pinaagi han espesyal nga klase hin gugma. (Basaha an Juan 15:12, 13.) Pansina nga nagsugo hi Jesus ha ira: “Higugmaon niyo an usa kag usa sugad la han paghigugma ko ha iyo.” Ano an karuyag sidngon hito? Sugad han iginsaysay ni Jesus, ito amo an nagsasakripisyo nga gugma—gugma nga nagpapagios ha usa nga Kristiano nga mamatay pa ngani para ha iya igkasi-tumuroo kon kinahanglan. b

6. Paonan-o ginpapabug-atan han Pulong han Dios nga importante gud an gugma?

⁶ Ginpapabug-atan gud han Pulong han Dios an gugma. Para ha damu, ini an pipira han ira paborito nga mga bersikulo ha Biblia: “An Dios gugma.” (1 Juan 4:8) “Higugmaa an imo igkasi-tawo sugad ha imo kalugaringon.” (Mat. 22:39) “An gugma nagtatabon hin damu nga sala.” (1 Ped. 4:8) “An gugma waray gud kataposan.” (1 Cor. 13:8) Klaro nga iginpapakita hini ngan han iba pa nga bersikulo nga importante gud an pagkultibar ngan pagpakita hinin makaruruyag nga kalidad.

7. Kay ano nga diri matututdoan ni Satanas an mga tawo nga maghigugmaay ngan magkaurosa?

 ⁷ Damu an nagpapakiana: ‘Paonan-o ko mahibabaroan kon ano an tinuod nga relihiyon? An ngatanan nga relihiyon nasiring nga igintututdo nira an kamatuoran, pero iba an igintututdo han kada tagsa mahitungod ha Dios.’ Hi Satanas naghimo hin damu nga buwa nga relihiyon salit nawuwurok an mga tawo kon hain an tinuod nga relihiyon. Pero diri gud hiya makakahimo hin bug-os-kalibotan nga pagminagburugto han mga Kristiano nga nahigugma ha usa kag usa. Hi Jehova gud la an makakahimo hito. Maaram kita hito kay Jehova an gintitikangan han gugma. An mga magsiringba la nga may-ada han iya espiritu ngan bendisyon an tinuod nga maghihigugmaay. (1 Juan 4:7) Salit urusahon ba nga nagsiring hi Jesus nga makikilala an iya tinuod nga mga sumurunod pinaagi hiton diri makikalugaringon nga gugma?

8-9. Ano an nagin epekto ha damu tungod han gugma nga ira naobserbaran ha mga Saksi ni Jehova?

⁸ Sugad han igintagna ni Jesus, damu an nakakakilala kon hin-o gud an iya mga sumurunod pinaagi han tinuod nga gugma nga ira iginpapakita ha usa kag usa. Pananglitan, nahinunumdoman han brother nga hi Ian an siyahan nga kombensyon nga iya naatenderan, nga gindumara ha estadyum nga hirani ha iya balay. Pipira ka bulan antes hito, nakakadto na hi Ian hito nga estadyum para magkita hin uyag. Siring niya: “Daku gud an kaibahan hini nga kombensyon. An mga Saksi matinalahuron ngan maopay an pamado, ngan an ira kabataan maopay an pamatasan.” Nagsiring liwat hiya: “Labaw ha ngatanan, ini nga mga tawo baga hin kontento ngan murayaw—usa nga butang nga akon ginhihingyap. Waray ako nahinunumdoman ha bisan ano nga iginpahayag hito nga adlaw, pero tubtob yana nahinunumdoman ko la gihapon an panggawi han mga Saksi.” c Syempre, an sugad nga panggawi resulta han aton tinuod nga gugma ha usa kag usa. Tungod kay hinigugma ta an aton kabugtoan, buotan ngan may respeto an aton pagtratar ha ira.

⁹ Sugad liwat hito an siyahan nga impresyon han brother nga hi John han nagtikang hiya pag-atender ha mga katirok: “Naimpres ako ha pagin makisangkayon . . . han tanan didto—baga hira hin mga santo. An ira tinuod nga gugma nakakombinse ha akon nga naagian ko na an tinuod nga relihiyon.” d Ini ngan an damu pa nga eksperyensya nagpapakita nga an katawohan ni Jehova tinuod nga mga Kristiano.

10. San-o kita labi na nga may oportunidad nga ipakita an Kristiano nga gugma? (Kitaa liwat an footnote.)

¹⁰ Sugad han ginsiring ha tinikangan, an aton mga igkasi-tumuroo diri perpekto. Usahay, may nasisiring o nabubuhat hira nga nakakapasina ha aton. e (San. 3:2) Ha sugad nga mga sitwasyon, labi na nga may oportunidad kita nga ipakita an Kristiano nga gugma pinaagi han aton reaksyon. May kalabotan hito, ano an aton mahibabaroan ha ehemplo nga iginpakita ni Jesus?—Juan 13:15.

11. Ano nga magraot nga disposisyon an iginpakita nira Santiago ngan Juan? (Kitaa liwat an piktyur.)

¹¹ Waray hi Jesus maglaom hin pagin perpekto ha iya mga sumurunod. Lugod, mahigugmaon nga ginbuligan niya hira nga tadungon an ira diri mag-opay nga disposisyon basi mapalipay nira hi Jehova. Makausa, an duha han mga  apostol, hira Santiago ngan Juan, nag-aghat ha ira nanay nga maghangyo kan Jesus nga tagan hira hin prominente nga mga posisyon ha Ginhadian. (Mat. 20:20, 21) Hito nga paagi, iginpakita nira Santiago ngan Juan an pagin mapahitas-on ngan ambisyoso.—Prob. 16:18.

12. Hira Santiago ngan Juan la ba an nagpakita hin magraot nga disposisyon? Isaysay.

¹² Diri la hira Santiago ngan Juan an nagpakita hin magraot nga disposisyon hito nga higayon. Pansina an reaksyon han iba nga mga apostol: “Han nabatian han napulo nga iba pa an mahitungod hito, nasina hira ha magbugto.” (Mat. 20:24) Maiimadyin naton an mapaso nga pagdiskusyon nira Santiago, Juan, ngan han iba pa nga apostol. Bangin an iba nagsiring hin sugad hini: ‘Kahuna ba niyo mas maopay kamo salit naghangyo kamo hin prominente nga mga posisyon ha Ginhadian? Diri la kamo an maduruto nga nagbubuhat kaupod ni Jesus. Kon kwalipikado kamo ha espesyal nga mga pribilehiyo, kami liwat!’ Anoman an nahitabo, temporaryo nga gintugotan han mga apostol ini nga sitwasyon nga makawara han ira minagburugto nga gugma ha usa kag usa.

13. Ano an nagin reaksyon ni Jesus ha mga kaluyahan han iya mga apostol? (Mateo 20:25-28)

¹³ Ano an ginbuhat ni Jesus? Waray hiya masina. Waray hiya magsiring nga mamimiling hiya hin mas maopay nga mga apostol, mga lalaki nga mas mapainubsanon ngan pirme magigin mahigugmaon an pagtratar ha usa kag  usa. Lugod, pasensyoso nga nakiistorya hi Jesus hinin sinsero nga mga lalaki. (Basaha an Mateo 20:25-28.) Padayon hiya nga nagpakita ha ira hin gugma, bisan kon diri ini an siyahan o an ultimo nga higayon nga nagdiskusyon an mga apostol kon hin-o ha ira an pinakalabaw.—Mar. 9:34; Luc. 22:24.

14. Ha ano nga klase hin kultura nagdaku an mga apostol ni Jesus?

¹⁴ Sigurado nga ginkonsiderar ni Jesus an kultura nga gindak-an han mga apostol. (Juan 2:24, 25) Nagdaku hira ha komunidad diin ginpapabug-atan gud han mga lider han relihiyon an pagin prominente ngan pagkaada hitaas nga posisyon. (Mat. 23:6; ikompara an video nga Pinakamagandang Puwesto sa Sinagoga ha study note han Mateo 23:6.) An Judio nga mga lider han relihiyon naghuhunahuna liwat nga mas matadong hira kay ha iba. f (Luc. 18:9-12) Nasabtan ni Jesus nga ini nga panhunahuna mahimo makaapekto ha panhunahuna han mga apostol ha ira kalugaringon ngan ha iba. (Prob. 19:11) Reyalistiko hiya ha iya ginlalaoman ha iya mga disipulo ngan waray magreak hin sobra han nagsayop hira. Maaram hiya nga maopay an ira kasingkasing, salit pasensyoso nga ginbuligan niya hira nga malamposan an ira pagin mapahitas-on ngan ambisyoso ngan saliwnan ito hin gugma.

15. Ano an mahibabaroan ta ha sitwasyon diin nahidabi hira Santiago ngan Juan?

¹⁵ Damu an mahibabaroan ta ha sitwasyon diin nahidabi hira Santiago ngan Juan. Sayop hira ha paghangyo hin prominente nga mga posisyon ha Ginhadian. Pero sayop liwat an iba nga mga apostol kay gintugotan nira ito nga sitwasyon nga makawara han ira pagkaurosa. Pero hi Jesus buotan ngan mahigugmaon ha ngatanan nga 12 nga apostol. Ano an leksyon para ha aton? Diri la an ginbubuhat han iba an importante kondi pati liwat an aton nagigin reaksyon ha ira mga sayop ngan kaluyahan. Ano an makakabulig ha aton? Kon nasisina kita ha usa nga bugto, puydi ta pakianhan an aton kalugaringon: ‘Kay ano nga nasisina gud ako ha iya ginbuhat? Nagpapakita ba ito nga may-ada ako kaluyahan nga angay ko tadungon? Posible ba nga may problema ito nga bugto? Bisan kon inaabat ko nga may rason ako nga masina, puydi ko ba ipakita an gugma pinaagi ha pagpalabay na la hito nga sayop?’ Kon mas mahigugmaon an aton pagtratar ha iba, mas iginpapakita naton nga tinuod kita nga mga sumurunod ni Jesus.

16. Ano pa an aton mahibabaroan ha ehemplo ni Jesus?

¹⁶ An ehemplo ni Jesus nagtututdo liwat ha aton nga mangalimbasog nga sabuton an aton kabugtoan. (Prob. 20:5) Syempre, nakakabasa hi Jesus han mga kasingkasing; kita diri. Pero puydi kita magin pasensyoso ha mga kaluyahan han aton kabugtoan. (Efe. 4:1, 2; 1 Ped. 3:8) Mas masayon an pagbuhat hito kon mas kikilalahon naton hira. Pansina an usa nga ehemplo.

17. Paonan-o nagpahimulos an usa nga paramangno han sirkito han mas ginkilala niya an usa nga bugto?

¹⁷ Usa nga paramangno han sirkito nga nag-alagad ha East Africa an nahinunumdom ha usa nga brother nga ginhunahuna niya nga makuri pakiangayan. Ano an ginbuhat hini nga paramangno han sirkito? Siring niya: “Imbes nga likayan an brother, nagdesisyon ako nga mas kilalahon hiya.” Tungod hito, nahibaroan  niya an gindak-an han brother nga nakaimpluwensya han iya personalidad. Nagsiring liwat an paramangno han sirkito: “Han nahibaroan ko nga diri harumamay an iya pangalimbasog nga bayaan an iya gindak-an nga batasan ngan kon ano na kadaku an iya ginbag-o, naimpres ako. Nagin maopay kami nga magsangkay.” Oo, kon nangangalimbasog kita nga sabton an aton kabugtoan, agsob nga mas masayon para ha aton nga magpakita hin gugma ha ira.

18. Ano an puydi ta igpakiana ha aton kalugaringon kon may nakasakit ha aton nga bugto? (Proberbios 26:20)

¹⁸ Bangin may mga panahon nga abaton naton nga kinahanglan ta kaistoryahon an usa nga bugto nga nakasakit ha aton. Pero maopay nga pakianhan ta anay an aton kalugaringon han sugad hini nga mga pakiana: ‘Bug-os ko ba nga nasasabtan an nahitabo?’ (Prob. 18:13) ‘Posible ba nga diri niya ito tinuyo?’ (Ecles. 7:20) ‘Nakabuhat na ba ako hin puropariho nga sayop?’ (Ecles. 7:21, 22) ‘Kon kaistoryahon ko hiya, mas madaku ba lugod an isyu?’ (Basaha an Proberbios 26:20.) Kon naghahatag kita hin panahon ha paghunahuna hito nga mga pakiana, bangin masantop ta nga an aton gugma ha aton bugto makakapagios ha aton nga palabyon na la an iya sayop.

19. Ano an imo determinasyon?

¹⁹ Sugad nga grupo, ginpapamatud-an han mga Saksi ni Jehova nga hira an tinuod nga mga disipulo ni Jesus. Sugad nga indibiduwal, ginpapamatud-an naton nga tinuod kita nga mga sumurunod ni Jesus kon iginpapakita naton an diri makikalugaringon nga gugma ha aton kabugtoan bisan pa han ira mga kaluyahan. Ha pagbuhat hito, puydi ta mabuligan an iba nga makilala an tinuod nga relihiyon ngan umupod ha aton ha pagsingba kan Jehova, an Dios han gugma. Magin determinado kita nga padayon nga ipakita an gugma nga nagpapakilala han tinuod nga mga Kristiano.