1-2. Ano an kinahanglan buhaton han usa antes magpabawtismo?

 HAN naglabay nga lima ka tuig, sobra usa ka milyon an nagpabawtismo sugad nga mga Saksi ni Jehova. Damu ha ira an pariho kan Timoteo nga disipulo han siyahan nga siglo, nga natutdoan han kamatuoran “tikang [pa] han minasus-an.” (2 Tim. 3:​14, 15) An iba nahibaro parte kan Jehova han mga adulto na, an pipira han lagas na hira. Hinin bag-o la, an usa nga babaye nga nagpa-Bible study ha mga Saksi ni Jehova nabawtismohan ha edad nga 97!

² Kon usa ka nga Bible study o ginpadaku han Saksi nga mga kag-anak, naghuhunahuna ka ba magpabawtismo? Maopay gud ito nga tumong! Pero antes magpabawtismo, kinahanglan mo anay igdedikar an imo kalugaringon kan Jehova. Ini nga artikulo magsasaysay kon ano an kahulogan han pagdedikar han imo kinabuhi ha Dios. Mabulig liwat ito ha imo nga makita kon kay ano nga waray rason nga mag-alang ha pagbuhat hito nga pitad ngan magpabawtismo kon andam ka na.

ANO AN DEDIKASYON?

3. Paghatag hin ehemplo nga mga tawo ha Biblia nga dedikado kan Jehova.

³ Ha Biblia, an dedikasyon nangangahulogan nga ginpili an usa para ha sagrado nga katuyoan. An mga Israelita usa nga nasud nga dedikado kan Jehova. Pero an pipira nga indibiduwal hito nga nasud dedikado kan Jehova ha espesyal nga paagi. Pananglitan, hi Aaron nagsul-ot hin “baraan nga tigaman han dedikasyon”—mainggat nga bulawan nga plaka ha atubangan han iya putos ha ulo. Ito nga bulawan nga plaka nagpapasabot nga ginpili hiya nga mag-alagad ha espesyal nga paagi—sugad nga hitaas nga saserdote han Israel. (Lev. 8:9) An mga Nazareo liwat  dedikado kan Jehova ha espesyal nga paagi. An pulong nga “Nazareo,” nga tikang ha Hebreo nga pulong nga nazirʹ, nangangahulogan hin “Ginpili,” o “Dedikado.” An mga Nazareo kinahanglan sumugot ha espesyal nga mga sugo nga iginsurat ha Mosaiko nga Balaud para ha ira.—Num. 6:​2-8.

4. (a) Kon igdedikar mo an imo kinabuhi kan Jehova, ano an imo magigin espesyal nga katuyoan? (b) Ano an karuyag sidngon han “isalikway” an imo kalugaringon? (Kitaa liwat an piktyur.)

⁴ Kon igdedikar mo an imo kalugaringon kan Jehova, ginpipili mo nga magin disipulo ni Jesu-Kristo ngan buhaton an kaburut-on han Dios, an pinakaimportante nga butang ha imo kinabuhi. Ano an nahiuupod han Kristiano nga dedikasyon? Hi Jesus nagsiring: “Kon may bisan hin-o nga naruruyag sumunod ha akon, isalikway niya an iya kalugaringon.” (Mat. 16:24) An Griego nga mga pulong nga ginhubad nga “isalikway niya an iya kalugaringon” mahimo liwat mangahulogan nga “ayaw na pagkinabuhi para ha imo kalugaringon.” Sugad nga dedikado nga alagad ni Jehova kinahanglan mo magdumiri ha bisan ano nga diri uyon ha iya kaburut-on. (2 Cor. 5:​14, 15) Nag-uupod ito ha pagdumiri ha “mga buhat han unod,” sugad han seksuwal nga imoralidad. (Gal. 5:​19-21; 1 Cor. 6:18) Ito ba nga mga restriksyon magpapakuri han imo kinabuhi? Diri, kon hinigugma mo hi Jehova ngan kombinsido ka nga an iya mga balaud para ha imo kaopayan. (Sal. 119:97; Isa. 48:​17, 18) An brother nga hi Nicholas nagsiring, “Mahimo mo hunahunaon an mga suruklan ni Jehova sugad nga mga rehas han prisohan nga nagpupugong ha imo ha pagbuhat han imo karuyag o sugad hin mga rehas han kulongan han leon nga nagpapanalipod ha imo tikang ha peligro.”

5. (a) Paonan-o mo igindidedikar an imo kalugaringon kan Jehova? (b) Ano an kaibahan han dedikasyon ngan bawtismo? (Kitaa liwat an piktyur.)

⁵ Paonan-o mo igindidedikar an imo kalugaringon kan Jehova? Pinaagi ha pag-ampo nagsasaad ka ha iya nga hiya la an imo sisingbahon  ngan uunahon an iya kaburut-on. Katapos, nagsasaad ka kan Jehova nga padayon mo hiya nga hihigugmaon “ha bug-os mo nga kasingkasing ngan ha bug-os mo nga kalag ngan ha bug-os mo nga hunahuna ngan ha bug-os mo nga kusog.” (Mar. 12:30) An imo dedikasyon ginhihimo ha pribado, ikaw ngan hi Jehova la. Ha kabaliktaran, an bawtismo ginhihimo ha publiko; iginpapakita hito ha iba nga nagdedikar ka na. An imo dedikasyon usa nga sagrado nga saad, ngan naglalaom hi Jehova nga magkikinabuhi ka uyon hito, sugad han imo ginlalaoman ha imo kalugaringon.—Ecles. 5:​4, 5.

KAY ANO NGA IGINDIDEDIKAR MO AN IMO KALUGARINGON KAN JEHOVA?

6. Ano an nagpapagios ha usa nga igdedikar an iya kalugaringon kan Jehova?

⁶ An nangunguna nga rason nga igindidedikar mo an imo kalugaringon kan Jehova kay hinigugma mo hiya. An imo gugma diri kay iginbasar ha emosyon la. Lugod, tungod ito han “husto nga kahibaro” ngan ha “pagsabot ha espirituwal nga mga butang”—an mga butang nga imo nahibaroan parte kan Jehova nga nagin hinungdan nga magtubo an imo gugma ha iya. (Col. 1:9) An imo pag-aram ha Kasuratan nagkombinse ha imo nga (1) tinuod hi Jehova, (2) an Biblia iya giniyahan nga Pulong, ngan (3) iya ginagamit an iya organisasyon ha pagtuman han iya kaburut-on.

7. Ano an kinahanglan ta buhaton antes igdedikar an aton kalugaringon ha Dios?

⁷ Adton mga nagdedikar kan Jehova dapat maaram han nangunguna nga mga katutdoan nga mababasa ha Pulong han Dios ngan nagkikinabuhi uyon ha mga suruklan hito. Ginbubuhat nira an ira pinakamaopay basi isumat ha iba kon ano ira nahibaroan. (Mat. 28:​19, 20) Nagtubo an ira gugma kan Jehova, ngan an ira kinasingkasing  nga hingyap amo an paghatag ha iya hin eksklusibo nga debosyon. Sugad ka ba hito? Kon hinigugma mo hi Jehova ha bug-os mo nga kasingkasing, diri ka magdidedikar ngan magpapabawtismo basi la mapalipay an nagba-Bible study ha imo o an imo mga kag-anak, o tungod kay ito an ginbubuhat han ngatanan mo nga kasangkayan.

8. Paonan-o an pagin mapasalamaton nabulig ha imo nga magdesisyon nga igdedikar an imo kalugaringon kan Jehova? (Salmo 116:​12-14)

⁸ Natural la nga magdesisyon nga igdedikar an imo kalugaringon kan Jehova kon huhunahunaon mo an ngatanan nga ginbuhat niya para ha imo. (Basaha an Salmo 116:​12-14.) Husto la nga gintawag han Biblia hi Jehova nga Parahatag han “tagsa nga maopay nga regalo ngan an tagsa nga perpekto nga hatag.” (San. 1:17) An pinakalabaw hito nga mga regalo amo an halad han iya Anak, nga hi Jesus. Hunahunaa la! Pinaagi han lukat nagin posible para ha imo an pagkaada duok nga relasyon kan Jehova. Ngan gintagan ka niya hin paglaom nga mabuhi ha waray kataposan. (1 Juan 4:​9, 10, 19) An pagdedikar han imo kalugaringon kan Jehova usa han pinakamaopay nga paagi han pagpakita nga mapasalamaton ka ha pinakadaku nga kapahayagan han gugma, upod na an ngatanan nga bendisyon ni Jehova nga iginhatag ha imo. (Deut. 16:17; 2 Cor. 5:15) An sugad nga apresasyon ginpabug-atan ha leksyon 46 punto 4, ha Mabuhi hin Malipayon ha Waray Kataposan! nga libro, nga may tulo ka minuto nga video nga Ihatag an Imo mga Regalo ha Dios.

ANDAM KA NA BA MAGDEDIKAR NGAN MAGPABAWTISMO?

9. Kay ano nga diri dapat mapresyur an usa nga magdedikar?

⁹ Bangin umabat ka nga diri ka pa andam magdedikar ngan magpabawtismo. Bangin kinahanglan mo maghimo hin mga pagbag-o ha imo kinabuhi basi masunod an ngatanan nga suruklan ni Jehova, o bangin kinahanglan mo pa hin panahon basi maparig-on an imo pagtoo. (Col. 2:​6, 7) Diri ngatanan nga estudyante parapriho an kalaksihon ha pag-uswag, ngan diri ngatanan nga batan-on andam na nga magdedikar ngan magpabawtismo ha pariho nga edad. Usisaha an imo espirituwal nga pag-uswag ha kon ano an imo makakaya ngan ayaw ikompara an imo kalugaringon ha iba.—Gal. 6:​4, 5.

10. Ano an puydi mo buhaton kon naghuhunahuna ka nga diri ka pa andam nga magdedikar ngan magpabawtismo? (Kitaa liwat an kahon nga “ Para Hadton Ginpadaku ha Kamatuoran.”)

¹⁰ Bisan kon ginhuhunahuna mo nga diri ka pa andam nga magdedikar kan Jehova, padayon nga buhata ito sugad nga imo tumong. Pag-ampo kan Jehova nga bendisyonan an imo mga pangalimbasog ha paghimo hin anoman nga ginkikinahanglan nga mga pagbag-o. (Fil. 2:13; 3:16) Makakasiguro ka nga pamamatian ngan babatunon niya an imo mga pag-ampo.—1 Juan 5:14.

KON KAY ANO NGA NAG-AALANG AN IBA

11. Paonan-o hi Jehova mabulig ha aton nga magpabilin nga matinumanon ha iya?

¹¹ An pipira nga andam na magdedikar ngan magpabawtismo nag-aalang la gihapon. Bangin maghunahuna hira, ‘Ano man kon katapos, makabuhat ako hin seryoso nga sala ngan ma-disfellowship?’ Kon may-ada ka hito nga kahadlok, makakasiguro ka nga ihahatag ni Jehova an ngatanan mo nga kinahanglan ‘basi maglakat nga takos ha iya para bug-os nga mapalipay hiya.’ (Col. 1:10) Tatagan ka liwat niya hin kusog nga mabuhat an tama. Damu na an iya ginbuligan nga mabuhat an tama. (1 Cor. 10:13) Ito an usa nga rason kon kay ano nga gutiay la an napapaiwas ha Kristiano nga kongregasyon. Ginbubuligan ni Jehova an iya katawohan nga magpabilin nga matinumanon.

12. Paonan-o kita makakalikay nga makabuhat hin seryoso nga sala?

 ¹² An ngatanan nga diri perpekto nga tawo nasusulay nga magbuhat hin sayop nga mga butang. (San. 1:14) Pero kinahanglan ka magpili kon ano an imo bubuhaton kon ginsusulay. An kamatuoran ikaw gud la an may kontrol kon paonan-o ka magkikinabuhi. Bisan kon an pipira nga tawo bangin diri umuyon hito, mahimo ka mahibaro nga kontrolon an imo sayop nga mga hingyap. Ngan bisan kon nasusulay ka, mahimo mo malikyan an pagbuhat hito. Salit pag-ampo kada adlaw. Tipigi an maopay nga rutina han personal nga pag-aram ha Pulong han Dios. Tambong ha Kristiano nga mga katirok. Isumat ha iba an imo pagtoo. An padayon nga pagbuhat hito maghahatag ha imo hin kusog nga magkinabuhi uyon ha imo saad han nagdedikar ka. Ngan ayaw gud kalimti nga hi Jehova mabulig ha imo nga buhaton ito.—Gal. 5:16.

13. Ano nga maopay nga ehemplo an iginpakita ni Jose para ha aton?

¹³ Mas magigin masayon ha imo nga magkinabuhi uyon ha imo dedikasyon kon nagdesisyon ka na kon ano an imo bubuhaton antes pa umatubang hin pagsulay. An Biblia nagsusumat ha aton hin damu nga tawo nga nakabuhat gud hito, bisan kon hira liwat diri perpekto. Pananglitan, ginsinulay han asawa ni Potipar hi Jose nga makig-sex ha iya. Pero maaram na hi Jose kon ano an iya bubuhaton. An Biblia nagsusumat ha aton nga “diniri hiya,” ngan hiya nagsiring: “Paonan-o ko mabubuhat inin daku nga karaotan ngan makasala kontra ha Dios?” (Gen. 39:​8-10) Klaro nga maaram hi Jose kon ano an iya bubuhaton bisan antes pa hiya sulayon. Nagin mas masayon ito para ha iya han umatubang na gud hiya hin pagsulay.

14. Paonan-o kita mahibabaro ha pagsalikway han magraot nga buhat?

¹⁴ Paonan-o mo masusubad an determinasyon nga iginpakita ni Jose? Makakagdesisyon ka yana han imo bubuhaton kon ginsusulay. Mahibaro dayon ha pagsalikway han mga butang nga ginkakangalasan ni Jehova, bisan ha paghunahuna la hito. (Sal. 97:10; 119:165) Hito nga paagi, diri ka makakasala kon ginsusulay. Maaram ka na kon paonan-o ka magios. Maaram ka na kon ano an imo bubuhaton.

15. Paonan-o maipapakita han usa nga “sinsero nga namimiling” hiya kan Jehova? (Hebreo 11:6)

¹⁵ Bangin maaram ka na han kamatuoran ngan karuyag mo mag-alagad kan Jehova ha bug-os mo nga kasingkasing, pero nag-aalang ka nga magdedikar ngan magpabawtismo. Mahimo mo  subaron an ehemplo ni Hadi David. Puydi ka makimalooy kan Jehova: “O Dios, usisaha ako, ngan hibaroi an sulod han akon kasingkasing. Usisaha ako, ngan hibaroi an akon nababaraka nga mga panhunahuna. Kitaa kon may-ada ha akon bisan ano nga magigin hinungdan nga maglakat ako ha peligroso nga dalan, ngan tugwayi ako ha dalan han kadayonan.” (Sal. 139:​23, 24) Ginbibendisyonan ni Jehova adton “sinsero nga namimiling ha iya.” Iginpapakita mo ha iya nga sugad hito an imo ginbubuhat kon nangangalimbasog ka ha pagdedikar ngan pagpabawtismo.—Basaha an Hebreo 11:6.

MAGPABILIN NGA DUOK KAN JEHOVA

16-17. Paonan-o iginpapahirani ni Jehova adton mga ginpadaku ha kamatuoran? (Juan 6:44)

¹⁶ Hi Jesus nagsiring nga an iya mga disipulo iginpahirani ni Jehova. (Basaha an Juan 6:44.) Hunahunaa la kon ano ito kaopay ngan an kahulogan hito para ha imo. May nakikita hi Jehova nga maopay ha kada tagsa nga iya iginpapahirani ha iya. Para ha iya, an kada tagsa “espesyal nga propyedad,” o “ginpapabilhan gud nga panag-iya.” (Deut. 7:6; ftn.) Ito liwat an iya pagkita ha imo.

¹⁷ Pero bangin usa ka nga batan-on nga ginpadaku ha kamatuoran. Bangin abaton mo nga nag-aalagad ka la kan Jehova tungod han imo mga kag-anak ngan diri tungod kay iginpahirani ka ni Jehova ha iya. Bisan pa hito, an Biblia nasiring: “Magin duok ha Dios, ngan magigin duok hiya ha iyo.” (San. 4:8; 1 Cron. 28:9) Kon ikaw an mag-uuna nga magin duok kan Jehova, magigin duok liwat hiya ha imo. Diri ka ginkikita ni Jehova sugad nga bahin la han usa nga grupo. Iginpapahirani niya an kada tagsa—upod na an mga indibiduwal nga ginpadaku ha kamatuoran. Kon an usa nag-uuna nga magin duok kan Jehova, nagigin duok liwat Hiya, sugad han aton nahibaroan ha Santiago 4:8.—Ikompara an 2 Tesalonica 2:13.

18. Ano an aton hihisgotan ha sunod nga artikulo? (Salmo 40:8)

¹⁸ Kon igdedikar mo an imo kalugaringon kan Jehova ngan magpabawtismo, iginpapakita mo an disposisyon ni Jesus. Kinaburut-on nga iginpresentar niya an iya kalugaringon ha iya Amay basi buhaton an anoman nga iginsugo ha iya. (Basaha an Salmo 40:8; Heb. 10:7) Ha sunod nga artikulo, aton hihisgotan kon ano an mabulig ha imo nga padayon nga makag-alagad kan Jehova hin matinumanon katapos han imo bawtismo.