Mapapasaylo an aton mga sala pinaagi la han halad lukat nga iginbayad ni Jesus pinaagi han iya dugo. (Efe. 1:7) Pero an Biblia nasiring: “Tungod han pagpailob han Dios nagpasaylo hiya han mga sala nga nabuhat ha naglabay,” amo ito an mga sala nga nabuhat antes ni Jesus ihatag an lukat. (Roma 3:​25, ftn.) Paonan-o ito mahihimo ni Jehova ngan matitipigan liwat an iya perpekto nga suruklan han hustisya?

Ha panhunahuna ni Jehova, sugad hin iginbayad na an lukat tikang ha panahon nga nagdesisyon hiya nga itagana an “tulin” nga magtatalwas ha mga natoo nga katawohan. (Gen. 3:15; 22:18) Sigurado gud an Dios nga ha iya itinanda nga panahon kinaburut-on nga itatagana han iya bugtong nga Anak ito nga lukat. (Gal. 4:4; Heb. 10:​7-10) Han hi Jesus nakanhi ha tuna sugad nga representante han Dios, may-ada na hiya awtoridad nga magpasaylo hin mga sala antes pa ighalad an lukat. Ginbuhat niya ito kay maaram hiya nga an bili han iya tiarabot nga halad maaplikar liwat ha mga tawo nga may pagtoo.—Mat. 9:​2-6.