1. Ano an pipira nga bendisyon nga aton napapahimulosan tungod han pagin bahin han organisasyon ni Jehova?

 BENDISYON gud nga magin bahin han organisasyon ni Jehova ha panahon hinin makuri nga kataposan nga mga adlaw. Samtang nagtitikaraot an mga kahimtang han kalibotan, hi Jehova nagtatagana ha aton hin nagkakaurosa nga espirituwal nga pamilya han kabugtoan. (Sal. 133:1) Ginbubuligan kita niya nga magkaada malipayon nga pamilya. (Efe. 5:33–6:1) Ngan gintatagan kita niya hin kinaadman nga aton ginkikinahanglan basi makaya an kabaraka ngan magkaada kalipay.

2. Ano an dapat naton buhaton, ngan kay ano?

² Pero dapat kita maningkamot nga padayon nga magin matinumanon kan Jehova. Kay ano? Tungod kay bangin may mga panahon nga masakitan kita han pagin diri perpekto han iba. Bangin liwat kita manluya kon nakakahimo kita hin mga sayop, labi na kon pauroutro naton ito nga nahihimo. Kinahanglan naton magpadayon ha pag-alagad kan Jehova (1) kon napapasubo kita han aton igkasi-tumuroo, (2) kon napapasubo kita han aton padis, ngan (3) kon napapasubo kita tungod han aton mga sayop. Hini nga artikulo, hihisgotan naton an tagsa hini nga mga kahimtang. Hihisgotan ta liwat kon ano an aton mahibabaroan tikang ha matinumanon nga karakter ha Biblia nga inatubang hin pariho nga sitwasyon.

MAGPADAYON BISAN KON NAPAPASUBO KA HAN IMO IGKASI-TUMUROO

3. Ano nga problema an gin-aatubang han katawohan ni Jehova?

³ An problema. An pipira han aton igkasi-tumuroo may mga batasan nga nakakapaaringit ha aton. Bangin may buhaton an iba nga makapasubo ha aton o trataron kita nira hin diri maopay. Adton mga nangunguna mahimo makasayop. Ini nga mga sitwasyon mahimo magin hinungdan nga magruhaduha an iba nga organisasyon ini han Dios. Imbes nga padayon nga mag-alagad ha Dios nga  “nagkakaurosa” kaupod an ira kabugtoan, bangin diri na hira makig-upod hadton nakapasubo ha ira o bangin pa ngani diri na tumambong. (Zep. 3:9) Tama ba ito? Pansina kon ano an aton mahibabaroan ha usa nga karakter ha Biblia nga nakaeksperyensya hin pariho nga mga problema.

4. Ano nga mga problema an gin-atubang ni apostol Pablo?

⁴ An ehemplo ha Biblia. Maaram hi apostol Pablo nga diri perpekto an iya Kristiano nga kabugtoan. Pananglitan, waray pag-iha han nagtikang hiya pakig-upod ha kongregasyon, waray tumuod an kabugtoan nga disipulo hiya. (Buh. 9:26) Ha urhi, gintsismis hiya basi dauton an iya reputasyon. (2 Cor. 10:10) Nakita ni Pablo an usa nga tigurang nga nakahimo hin sayop nga desisyon nga bangin makapakdol ha iba. (Gal. 2:​11, 12) Ngan nakapasubo gud kan Pablo an usa han iya duok nga sangkay nga hi Marcos. (Buh. 15:​37, 38) Hain man hito nga sitwasyon, puydi unta hi Pablo magkaada rason nga diri na makig-upod ha mga nakapasubo ha iya. Pero gintipigan niya an positibo nga panhunahuna ha iya kabugtoan ngan nagpabilin nga aktibo ha pag-alagad kan Jehova. Ano an nakabulig kan Pablo nga magpadayon?

5. Ano an nakabulig kan Pablo nga magpabilin nga duok ha iya kabugtoan? (Colosas 3:​13, 14) (Kitaa liwat an piktyur.)

⁵ Hinigugma ni Pablo an iya kabugtoan. An gugma ni Pablo ha iba nakabulig ha iya nga magpokus, diri ha ira pagin diri perpekto, kondi ha ira mag-opay nga kalidad. An gugma nakabulig liwat kan Pablo nga buhaton an iya ginsurat, nga nakarekord ha Colosas 3:​13, 14. (Basaha.) Pansina kon paonan-o niya gintratar hi Marcos. Bisan kon ginbayaan ni Marcos hi Pablo han iya siyahan nga pagbiyahe sugad nga misyonero, waray magtipig hi Pablo hin kasina. Ha urhi, han nagpadara hi Pablo hin mahigugmaon nga surat ha kongregasyon han Colosas, gindayaw niya hi Marcos sugad nga importante nga igkasi-magburuhat, nga “naghahatag . . . hin daku nga pagliaw.” (Col. 4:​10, 11) Han priso hi Pablo ha Roma, espisipiko nga ginhangyo niya hi Marcos nga kumadto basi buligan hiya. (2 Tim. 4:11) Klaro nga nagpasaylo hi Pablo ha iya kabugtoan ngan nagpabilin nga duok ha ira. Ano an aton mahibabaroan kan Pablo?

6-7. Paonan-o kita makakapadayon ha pagpakita hin gugma ha aton kabugtoan bisan pa han ira pagin diri perpekto? (1 Juan 4:7)

⁶ An leksyon. Karuyag ni Jehova nga padayon naton nga ipakita an gugma ha aton kabugtoan. (Basaha an 1 Juan 4:7.) Kon may napapakyas ha pagpakita han pipira nga Kristiano nga kalidad, mahimo kita maghunahuna nga karuyag niya sundon an mga prinsipyo ha Biblia ngan waray niya tuyoa nga buhaton ito. (Prob. 12:18) Hinigugma han Dios an iya magtinumanon nga  surugoon bisan pa han ira mga kaluyahan. Bisan kon nakakasayop kita, nagpapabilin hiya nga sangkay naton ngan diri hiya padayon nga nasisina. (Sal. 103:9) Importante gud nga subaron naton an aton mapinasayloon nga Amay!—Efe. 4:32–5:1.

⁷ Tigamni liwat nga samtang nagtitikahirani an kataposan, kinahanglan kita magpabilin nga duok ha aton kabugtoan. Makakalaom kita nga magtitikaduro an pagtimaraot. Bangin pa ngani kita prisuhon tungod han aton pagtoo. Kon mahitabo ito, mas labi nga pagkikinahanglanon naton an aton kabugtoan. (Prob. 17:17) Pansina an nahitabo kan Josep, a nga tigurang ha Spain. Hiya ngan an iba nga mga brother napriso nga magkaupod tungod han ira pagin neutral. Hiya nagsiring: “Tungod kay waray kami privacy ha prisohan, madali gud la nga maaringit ha mga igkasi-tumuroo. Kinahanglan namon magin mapailubon ngan magin mapinasayloon ha usa kag usa. Nakabulig ini ha amon nga magpabilin nga nagkakaurosa ngan maataman an usa kag usa. Napapalibotan kami hin mga priso nga diri nag-aalagad kan Jehova. Usa ka beses, na-injury an akon kamot ngan ginbendahan ito salit diri ko ito nakikiwa, amo nga diri ako nakakahimo han akon mga buruhaton. Pero usa han mga brother an naglaba han akon mga bado ngan gin-ataman niya ako ha iba nga praktikal nga mga paagi. Inabat ko gud an sinsero nga gugma han ginkikinahanglan ko gud ito.” Yana, may mag-opay gud kita nga rason nga sulbaron an mga problema ha usa kag usa!

MAGPADAYON BISAN KON NAPAPASUBO KA HAN IMO PADIS

8. Ano nga mga problema an gin-aatubang han mga mag-asawa?

⁸ An problema. An ngatanan nga mag-asawa may-ada mga problema. An Biblia prangka nga nasiring nga an mag-asawa magkakaada “kakurian ha ira kinabuhi.” (1 Cor. 7:28) Kay ano? Kay gintatampo han pag-asawa an duha nga diri perpekto nga tawo, nga an kada tagsa may magkaiba nga personalidad, naruruyagan, ngan diri naruruyagan. Bangin magkaiba an ira kultura o gintikangan. Paglabay han panahon, bangin maipakita nira an mga batasan nga waray nira makita antes han ira kasal. An bisan hain hito nga mga butang mahimo magin hinungdan hin mga problema. Imbes nga kilalahon nga an kada tagsa ha ira pariho may sayop ngan paningkamotan nga sulbaron ito, bangin lugod basulon nira an ira asawa. Bangin pa ngani mahunahuna nira nga an pagbulag o an pagdiborsyo amo an solusyon. Pero an pakigbulag ba o pakigdiborsyo an makakasulbad han ira mga problema? b Hisgotan ta an usa nga karakter ha Biblia nga nagpadayon bisan pa han makuri gud nga pag-asawa.

9. Ano nga problema an gin-atubang ni Abigail?

⁹ An ehemplo ha Biblia. Nagin asawa ni Abigail hi Nabal, nga gintatawag han Biblia nga maraugdaog ngan maraot an batasan. (1 Sam. 25:3) Sigurado nga nagin makuri gud kan Abigail nga magkinabuhi kaupod an sugad hito nga tawo. Nagkaada ba higayon hi Abigail nga makagawas hito nga pag-asawa? Oo. Nagkaada hiya higayon han hi David, an masunod nga hadi ha Israel, kinadto basi patayon an iya bana tungod kay gin-insulto ni Nabal hi David ngan an iya mga tawo. (1 Sam. 25:​9-13) Puydi unta pumalagiw hi Abigail basi mabuhat ni David an iya plano. Pero waray niya ito buhata. Lugod, ginkombinse niya hi David nga diri patayon hi Nabal. (1 Sam. 25:​23-27) Kay ano daw la nga ginbuhat niya ito?

10. Ano an posible gud nga nagpagios kan Abigail nga magpadayon ha makuri nga pag-asawa?

¹⁰ Hinigugma ni Abigail hi Jehova ngan ginrirespeto  niya an iya mga suruklan ha pag-asawa. Sigurado nga maaram hiya kon ano an ginsiring han Dios kanda Adan ngan Eva han ginhimo Niya an siyahan nga pag-asawa. (Gen. 2:24) Maaram hi Abigail nga ginhuhunahuna ni Jehova an pag-asawa sugad nga sagrado nga kahikayan. Karuyag niya mapalipay an Dios, ngan ito an nagpagios ha iya nga buhaton an anoman nga iya mahihimo basi matalwas an iya panimalay, upod na an iya bana. Ginios dayon hiya basi pugngan hi David ha pagpatay kan Nabal. Andam liwat hiya mangaro hin pasaylo ha sayop nga diri hiya an nagbuhat. Klaro nga hinigugma ni Jehova inin maisugon ngan diri makikalugaringon nga babaye. Ano an mahibabaroan han mga asawa ngan bana ha ehemplo ni Abigail?

11. (a) Ano an ginlalaoman ni Jehova ha mga inasaw-an? (Efeso 5:33) (b) Ano an imo nahibaroan ha paningkamot ni Carmen nga proteksyonan an ira pag-asawa? (Kitaa liwat an piktyur.)

¹¹ An leksyon. Ginsusugo ni Jehova an mga inasaw-an nga respetuhon an kahikayan ha pag-asawa bisan kon an ira padis makuri pakibagayan. Sigurado nga nalilipay an Dios kon nakikita niya an mga inasaw-an nga naniningkamot nga sulbaron an mga problema ngan nagpapakita ha kada tagsa han diri makikalugaringon nga gugma ngan respeto. (Basaha an Efeso 5:33.) Pansina an ehemplo ni Carmen. Mga unom ka tuig katapos ni Carmen ikasal, nagpa-Bible study hiya ha mga Saksi ni Jehova ngan ha urhi nagpabawtismo. “Waray maruyagi han akon bana an akon desisyon,” siring ni Carmen. “Nagselos hiya kan Jehova. Gin-iinsulto niya ako ngan gintatarhog nga iya ako babayaan.” Bisan pa hito, nagpadayon hi Carmen ha ira pag-asawa. Ha sulod hin 50 ka tuig, nangalimbasog hiya nga higugmaon ngan respetuhon an iya bana. “Samtang nalabay an mga tuig, nahibaro ako nga magin mas masinabuton ngan magyakan hin mataktika ha akon bana. Tungod kay maaram ako nga an pag-asawa sagrado kan Jehova, ginbuhat ko an tanan nga akon mahihimo basi panalipdan ito. Waray gud ako maghunahuna nga bayaan an akon bana tungod kay hinigugma ko hi Jehova.” c Kon magkaada mga problema ha iyo pag-asawa, makakasarig ka nga susuportaran ngan bubuligan ka ni Jehova nga makapadayon.

MAGPADAYON BISAN KON NAPAPASUBO KITA TUNGOD HAN ATON MGA SAYOP

12. Ano nga problema an bangin naton atubangon kon makabuhat kita hin seryoso nga sala?

¹² An problema. Bangin manluya gud kita kon makahimo kita hin seryoso nga sala. An Biblia nasiring nga tungod han aton mga sala mahimo kita umabat nga sugad hin ‘naruba ngan narumok’ kita. (Sal. 51:17) An usa nga brother nga hi Robert naningkamot gud hin damu ka tuig basi magin kwalipikado nga ministeryal nga surugoon. Pero nakahimo hiya hin seryoso nga sala  nga tungod hito nahunahuna niya nga gintraydor niya hi Jehova. “Han nasantop ko an akon ginbuhat, nakonsensya gud ako,” siring niya. “Katapos, malain gud an akon gin-abat. Nagtinangis gud ako ngan nag-ampo kan Jehova. Nahunahuna ko nga diri na gud ako pamamatian han Dios. Kay ano? Kay napasubo ko hiya.” Kon makabuhat kita hin seryoso nga sala, bangin umabat kita nga pariho hin narumok gud an aton kasingkasing ngan maghunahuna nga ginsalikway na kita ni Jehova ngan waray na kita rason nga mag-alagad pa ha iya. (Sal. 38:4) Kon umabat ka hin sugad hito, hunahunaa an matinumanon nga karakter ha Biblia nga nagpadayon ha pag-alagad kan Jehova bisan pa kon nakabuhat hiya hin seryoso nga sala.

13. Ano nga seryoso nga sala an nabuhat ni apostol Pedro, ngan ano pa nga iba nga sayop an iya nabuhat antes hito?

¹³ An ehemplo ha Biblia. Han gab-i antes patayon hi Jesus, hi apostol Pedro nakahimo hin sunod-sunod nga sayop, salit nakabuhat hiya hin seryoso gud nga sala. Siyahan, hi Pedro sobra nga nagkompyansa, naghambog hiya nga magigin matinumanon hiya bisan kon bayaan han iba nga mga apostol hi Jesus. (Mar. 14:​27-29) Sunod, samtang nakadto ha garden han Getsemani, hi Pedro pauroutro nga napakyas ha padayon nga pagbantay. (Mar. 14:​32, 37-41) Katapos, ginbayaan ni Pedro hi Jesus ha bayolente nga grupo. (Mar. 14:50) Ha urhi, iginnigar ni Pedro hi Jesus hin tulo ka beses, ngan nanumpa pa ngani nga diri hiya nagbubuwa. (Mar. 14:​66-71) Ano an nagin reaksyon ni Pedro han nasantop niya nga seryoso an iya nabuhat nga sala? Waray niya mapugngi an iya emosyon ngan nagtinangis gud hiya, posible tungod han kakonsensya. (Mar. 14:72) Imadyina la an duro nga kasubo ni Pedro paglabay hin pipira ka oras han an iya sangkay nga hi Jesus ginpatay. Sigurado gud nga inabat hi Pedro hin kawaray-pulos!

14. Ano an nakabulig kan Pedro nga padayon nga mag-alagad kan Jehova? (Kitaa an piktyur.)

¹⁴ Nakapadayon hi Pedro ha pag-alagad kan Jehova tungod han pipira nga rason. Waray niya igbulag an iya kalugaringon; kinadto hiya ha iya espirituwal nga kabugtoan ngan sigurado nga ira ginliaw hiya. (Luc. 24:33) Dugang pa, an binanhaw nga hi Jesus nagpakita kan Pedro, posible gud basi dasigon hiya. (Luc. 24:34; 1 Cor. 15:5) Ha urhi, imbes nga masina hi Jesus ha mga sayop ni Pedro, ginsidngan ni Jesus an iya sangkay nga makarawat hiya hin mas dagku nga responsabilidad. (Juan 21:​15-17) Maaram hi Pedro nga nakabuhat hiya hin seryoso nga sala, pero padayon hiya nga nangalimbasog nga buhaton an tama. Kay ano? Kay kombinsido hiya nga waray hiya isalikway han iya Agaron nga hi Jesus. Ngan padayon nga ginsuportahan hi Pedro han iya espirituwal nga kabugtoan. Ano an aton mahibabaroan ha ehemplo ni Pedro?

15. Karuyag ni Jehova nga magin kombinsido kita ha ano? (Salmo 86:5; Roma 8:​38, 39) (Kitaa liwat an piktyur.)

 ¹⁵ An leksyon. Karuyag ni Jehova nga magin kombinsido kita nga hinigugma kita niya ngan andam hiya magpasaylo. (Basaha an Salmo 86:5; Roma 8:​38, 39.) Kon nakakasala kita, nakukonsensya kita. Normal la ito ngan angayan. Pero diri kita dapat maghunahuna nga diri na kita angay higugmaon o pasayloon. Lugod, dapat kita magpabulig dayon. Hi Robert nga gin-unabi na, nagsiring: “Nakasala ako tungod kay sinarig la ako ha akon kalugaringon nga kusog nga atohan an pagsulay.” Nasantop niya nga kinahanglan niya makiistorya ha mga tigurang. Hiya nagsiring: “Han ginbuhat ko ito, inabat ko dayon an gugma ni Jehova pinaagi han mga tigurang. Ngan inabat ko nga hinigugma liwat ako han mga tigurang. Ginbuligan nira ako nga tumoo nga waray ako bayai ni Jehova.” Magigin kombinsido liwat kita nga hinigugma gud kita ni Jehova ngan ginpapasaylo kon nagbabasol kita, nangangaro han ginkikinahanglan nga bulig, ngan naniningkamot nga diri na utruhon an aton mga sayop. (1 Juan 1:​8, 9) Kon kombinsido kita hito, diri kita maundang ha pag-alagad kan Jehova bisan pa kon makasayop kita.

16. Kay ano nga determinado ka nga magpadayon ha pag-alagad kan Jehova?

¹⁶ Gin-aapresyar gud ni Jehova an aton mga paningkamot nga mag-alagad ha iya hinin makuri nga panahon han kataposan nga mga adlaw. Ha bulig ni Jehova, mahimo kita makapadayon bisan pa kon may mga nakakapasubo ha aton. Makukultibar naton an gugma ha aton kabugtoan ngan mapapasaylo hira bisan pa kon makasala hira ha aton. Maipapakita naton an kahilarom han aton gugma ha Dios ngan an aton respeto ha iya mga kahikayan pinaagi ha pagbuhat han anoman nga aton mahihimo basi sulbaron an mga problema nga bangin bumangon ha aton pag-asawa. Ngan kon makasala kita, puydi naton aroon an bulig ni Jehova, karawaton an iya gugma ngan pagpasaylo, ngan magpadayon ha pag-alagad ha iya. Makakasiguro kita nga hi Jehova hura nga magbibendisyon kon diri ‘kita umundang ha pagbuhat han maopay.’—Gal. 6:9.