1. Ano nga pagruhaduha an bangin gin-aabat han pipira nga matinumanon nga magsiringba ni Jehova?

 MAKAPASARIG gud hibaroan nga gin-uuyonan ni Jehova an iya katawohan sugad nga grupo! An Biblia nasiring: “Hi Jehova nalilipay ha iya katawohan.” (Sal. 149:4) Pero danay an iba nanluluya gud ngan bangin magpakiana, ‘Gin-uuyonan ba ako ni Jehova sugad nga indibiduwal?’ Ha panahon han Biblia, damu nga matinumanon nga magsiringba ni Jehova an nagkaada sugad hito nga pagruhaduha.—1 Sam. 1:​6-10; Job 29:​2, 4; Sal. 51:11.

2. Hin-o an gin-uuyonan ni Jehova?

² Klaro nga iginpapakita han Biblia nga an diri perpekto nga mga tawo mahimo makakarawat han pag-uyon, o pagkabuotan ni Jehova. Paonan-o? Kinahanglan kita magkaada pagtoo kan Jesu-Kristo ngan magpabawtismo. (Juan 3:16) Salit iginpapakita naton ha publiko nga nagbasol na kita ha aton mga sala ngan nagsaad ha Dios nga bubuhaton an iya kaburut-on. (Buh. 2:38; 3:19) Nalilipay gud hi Jehova kon ginbubuhat naton ito basi magkaada duok nga relasyon ha iya. Kon padayon naton nga ginbubuhat an aton pinakamaopay ha pagtuman han saad han nagdedikar kita, uuyonan kita ni Jehova ngan tatrataron sugad nga iya duok nga mga sangkay.—Sal. 25:14.

3. Ano an aton hihisgotan yana?

³ Pero kay ano nga usahay an iba bangin naabat nga diri hira gin-uuyonan o nalilipayan han Dios? Paonan-o iginpapakita ni Jehova an iya pag-uyon? Ngan paonan-o mapaparig-on han usa nga Kristiano an iya pagsarig nga may-ada hiya han pag-uyon han Dios?

 KON KAY ANO NGA AN IBA BANGIN UMABAT NGA DIRI HIRA GIN-UUYONAN NI JEHOVA

4-5. Bisan kon naabat hin kawaray-pulos, ha ano kita makakasiguro?

⁴ Damu ha aton an naabat hin kawaray-pulos tikang pa han kabata. (Sal. 88:15) Nagsiring an brother nga hi Adrián: “Pirme ako naabat hin kawaray-pulos. Han bata pa ako, nag-aampo ako nga an akon pamilya mahingadto ha Paraiso, bisan kon diri ako sigurado nga mahingangadto ako.” Hi Tony nga waray magdaku ha Kristiano nga pamilya, nagsiring: “An akon mga kag-anak waray gud magsiring ha akon nga hinigugma nira ako o proud hira ha akon. Tungod hito inabat ko nga kulang an akon nahihimo basi mapalipay hira.”

⁵ Kon usahay naabat kita hin kawaray-pulos, mahimo naton hinumdoman nga hi Jehova mismo an nagpahirani ha aton ngadto ha iya. (Juan 6:44) Nakikita niya an maopay ha aton nga bangin diri naton nakikita ha aton kalugaringon, ngan maaram hiya han aton kasingkasing. (1 Sam. 16:7; 2 Cron. 6:30) Salit makakasarig kita ha iya kon nasiring hiya nga presyoso kita.—1 Juan 3:​19, 20.

6. Ano an gin-abat ni apostol Pablo han naglabay niya nga mga sala?

⁶ Antes mahibaro han kamatuoran, an pipira ha aton nakabuhat hin mga butang nga bangin nakakapakonsensya la gihap ha aton. (1 Ped. 4:3) Bisan an matinumanon nga mga Kristiano may gin-aatohan nga mga kaluyahan. Danay ka ba naabat nga diri ka mapapasaylo ni Jehova? Kon oo, nakakaliaw an paghibaro nga an iba nga matinumanon nga mga surugoon ni Jehova naabat hin sugad. Pananglitan, inabat ni apostol Pablo nga miserable hiya kon ginhuhunahuna niya an iya pagin diri perpekto. (Roma 7:24) Syempre, nagbasol na hi Pablo han iya mga sala ngan nagpabawtismo. Bisan pa hito, gintawag niya an iya kalugaringon sugad nga “pinakaubos ha mga apostol” ngan “pinakamakasasala.”—1 Cor. 15:9; 1 Tim. 1:15.

7. Ano an dapat naton hinumdoman parte ha aton naglabay nga mga sala?

⁷ An aton langitnon nga Amay nagsasaad nga papasayloon kita kon magbabasol. (Sal. 86:5) Salit kon tinuod kita nga nagbabasol han aton nabuhat nga mga sala, makakasarig kita nga tutumanon ni Jehova an iya ginsiring—ginpasaylo na kita niya.—Col. 2:13.

8-9. Paonan-o naton malalamposan an pag-abat nga diri gud igo an aton nahihimo basi mapalipay hi Jehova?

⁸ Karuyag naton ngatanan nga mag-alagad kan Jehova ha bug-os naton nga mahihimo. Pero an pipira naabat nga bangin diri gud igo an ira nahihimo basi makarawat an iya pag-uyon. An sister nga hi Amanda nagsiring: “Pirme ako naghuhunahuna nga an paghatag kan Jehova han akon pinakamaopay nangangahulogan nga dapat pirme ko buhaton an labaw pa. Salit agsob ako mangalimbasog nga buhaton an labaw pa kay han akon maihahatag. Kon napapakyas ako, ginhuhunahuna ko nga napakyas ko hi Jehova sugad la nga napakyas ko an akon kalugaringon.”

⁹ Paonan-o naton malalamposan an pag-abat nga diri gud igo an aton nahihimo basi mapalipay hi Jehova? Hinumdumi nga hi Jehova makatadunganon. Diri gud hiya nagpipirit nga buhaton naton an labaw kay han aton mahihimo. Gin-aapresyar niya an anoman nga aton ginbubuhat para ha iya basta ito an aton pinakamaopay. Hunahunaa liwat an mga ehemplo ha Biblia nga nag-alagad kan Jehova hin bug-os-kalag. Pananglitan, pansina an ehemplo ni Pablo. Nagin maduruto gud hiya hin damu ka tuig, nagbiyahe hin yinukot ka kilometro ngan nag-establisar hiya hin damu nga kongregasyon. Pero han nalimitahan hiya ha pagsangyaw nga buruhaton tungod han iya mga kahimtang, nawad-an ba hiya han pag-uyon han Dios? Waray. Padayon nga ginbuhat niya an iya mahihimo, ngan  ginbendisyonan hiya ni Jehova. (Buh. 28:​30, 31) Sugad man, an aton naihahatag kan Jehova bangin magbag-o. Pero an importante ha iya amo an aton motibo ha pag-alagad. Hisgotan ta yana an pipira nga paagi nga ginpapakita ni Jehova an iya pag-uyon ha aton.

PAONAN-O IGINPAPAKITA NI JEHOVA AN IYA PAG-UYON?

10. Paonan-o naton “mababatian” an pag-uyon ni Jehova ha aton? (Juan 16:27)

¹⁰ Pinaagi han Biblia. Karuyag ni Jehova nga pirme ipakita an iya sinsero nga pag-uyon hadton iya mga pinalangga. Nakarekord ha Kasuratan an duha nga higayon han ginsidngan Niya hi Jesus nga hiya an Iya hinigugma, nga gin-uuyonan nga Anak. (Mat. 3:17; 17:5) Karuyag mo ba nga sidngan ka ni Jehova nga gin-uuyonan ka niya? Hi Jehova diri nakikiistorya ha aton tikang ha langit, pero nakikiistorya hiya pinaagi ha mga pahina han Biblia. Kon ginbabasa naton an mga pulong ni Jesus ha mga Ebanghelyo, sugad hin “nababatian” naton an tingog ni Jehova nga gin-uuyonan kita niya. (Basaha an Juan 16:27.) Perpekto nga ginsubad ni Jesus an personalidad han iya Amay. Salit kon ginbabasa naton an pag-uyon ni Jesus ha iya diri perpekto pero matinumanon nga mga sumurunod, maiimadyin naton nga hi Jehova an nagyayakan ha aton hito nga mga pulong.—Juan 15:​9, 15.

11. Kay ano nga an pakaeksperyensya hin mga kakurian diri nagpapasabot nga nawara naton an pag-uyon ni Jehova? (Santiago 1:12)

¹¹ Pinaagi han iya mga buhat. Karuyag gud ni Jehova nga buligan kita, sugad han pagtagana han aton materyal nga mga panginahanglan. Danay, bangin gintutugotan ni Jehova nga mag-antos kita hin mga kakurian, sugad han iya pagtugot han matinumanon nga hi Job. (Job 1:​8-11) Kon may mga problema kita, diri ito nagpapasabot nga nawara naton an pag-uyon han Dios. Lugod, naghahatag ito ha aton hin mga higayon nga mapamatud-an an kahilarom han aton gugma ngan pagsarig ha Dios. (Basaha an Santiago 1:12.) Maieksperyensyahan naton an iya mahigugmaon nga pag-ataman ngan suporta samtang iya kita ginbubuligan nga makailob.

12. Ano an aton mahibabaroan ha eksperyensya ni Dmitrii?

¹² Pansina an brother ha Asia nga hi Dmitrii. Nawad-an hiya hin trabaho ngan diri hiya nakakabiling hin trabaho ha sulod hin damu ka bulan. Salit nagdesisyon hiya nga dugangan an iya panahon ha ministeryo basi ipakita nga nasarig hiya kan Jehova. Damu ka bulan an naglabay, ngan waray la gihap hiya makabiling hin trabaho.  Katapos, nagkasakit hiya ngan inabot ha punto nga naghihinigda na la hiya. Nagtikang hiya pagruhaduha kon maopay pa ba hiya nga bana ngan tatay, ngan naghunahuna hiya kon gin-uuyonan pa ba hiya ni Jehova. Ngan usa ka gab-i, an iya anak nga babaye nag-print ha papel han mga pulong nga mababasa ha Isaias 30:15: “Magigin makusog kamo kon magpapabilin kamo nga kalmado ngan masarig kamo.” Iginbutang niya ito ha ligid han higdaan han iya Daddy ngan nagsiring, “Daddy, kon diri maopay an imo pag-abat, hinumdumi ini nga teksto.” Nasantop ni Dmitrii nga ha bulig ni Jehova, an iya pamilya may-ada la gihapon ginkakaon, ginsusul-ot, ngan gin-uukyan. “An dapat ko la buhaton,” siring niya, “amo an magpabilin nga kalmado ngan pirme sumarig ha akon Dios.” Kon naatubang ka hin pariho nga problema, makakasarig ka han pag-ataman ni Jehova ngan bubuligan ka niya nga makailob.

13. Hin-o an puydi gamiton ni Jehova basi ipakita an iya pag-uyon ha aton, ngan paonan-o?

¹³ Pinaagi han mga igkasi-tumuroo. Gin-gagamit ni Jehova an aton kabugtoan basi ipakita an iya pag-uyon ha aton. Pananglitan, puydi niya pagiuson an iba nga dasigon kita ha tama nga panahon. Naeksperyensyahan ini han usa nga sister ha Asia ha panahon nga damu an iya problema. Nawad-an hiya hin trabaho ngan nagkaada hin grabe nga sakit. Katapos, an iya bana nakabuhat hin seryoso nga sala ngan gintanggal sugad nga tigurang. “Diri ko masabtan kon kay ano nga nahitatabo ini,” siring niya. “Nahunahuna ko bangin may nabuhat ako nga sayop ngan diri na ako gin-uuyonan ni Jehova.” An aton sister nakimalooy kan Jehova nga pasarigon hiya han iya pag-uyon. Paonan-o hiya ginpasarig ni Jehova? Hiya nagsiring, “Nakiistorya ha akon an mga tigurang ha kongregasyon ngan ginpasarig ako nga hinigugma la gihap ako ni Jehova.” Pero paglabay hin pipira ka panahon, naghangyo hiya utro kan Jehova hin bulig. “Hito mismo nga  adlaw nakakarawat ako hin surat tikang ha grupo han kabugtoan ha kongregasyon,” siring niya. “Samtang ginbabasa ko an ira nakakaliaw nga mga pulong, gin-abat ko nga ginpamatian ako ni Jehova.” Oo, agsob nga iginpapakita ni Jehova an iya pag-uyon pinaagi ha mag-opay nga pulong han iba.—Sal. 10:17.

14. Ano an iba nga paagi nga iginpapakita ni Jehova an iya pag-uyon ha aton?

¹⁴ Iginpapakita liwat ni Jehova an iya pag-uyon ha aton pinaagi han aton mga igkasi-tumuroo basi tagan kita hin sagdon kon ginkikinahanglan naton ito. Pananglitan, ha siyahan nga siglo gin-gamit ni Jehova hi apostol Pablo basi isurat an 14 nga giniyahan nga surat para ha mga igkasi-tumuroo. Ito nga mga surat may prangka pero mahigugmaon nga sagdon. Kay ano nga gin-giyahan ni Jehova hi Pablo nga iupod an sugad hito nga sagdon? Maopay nga Amay hi Jehova, ngan iya gindidisiplina an iya mga anak ‘nga iya nalilipayan.’ (Prob. 3:​11, 12) Salit kon makakarawat kita hin sagdon nga basado ha Biblia, puydi ta hunahunaon ito sugad nga ebidensya nga may-ada kita han pag-uyon han Dios, diri nga nawara ta ito. (Heb. 12:6) Ano an iba pa nga tigaman nga may-ada kita han pag-uyon ni Jehova?

IBA PA NGA EBIDENSYA NGA GIN-UUYONAN KITA NI JEHOVA

15. Kan kanay iginhahatag ni Jehova an iya baraan nga espiritu, ngan kay ano nga nagpapasarig ini ha aton?

¹⁵ Iginhahatag ni Jehova an iya baraan nga espiritu hadton iya gin-uuyonan. (Mat. 12:18) Mahimo naton pakianhan an aton kalugaringon, ‘Naipapakita ko ba an pipira nga bahin han bunga han espiritu han Dios ha akon kinabuhi?’ Napapansin mo ba nga mas pasensyoso ka kay han diri mo pa kilala hi Jehova? Ha pagkamatuod, kon mas nahibabaro ka nga ipakita an bunga han espiritu han Dios, mas nagigin klaro ha imo nga may-ada ka han pag-uyon ni Jehova!—Kitaa an kahon nga “ An Bunga han Espiritu Amo an . . .”

16. Hin-o an gin-gagamit ni Jehova ha pagsangyaw han maopay nga sumat, ngan ano an imo inaabat hito? (1 Tesalonica 2:4)

¹⁶ Nalilipay hi Jehova nga itapod an maopay nga sumat hadton iya gin-uuyonan. (Basaha an 1 Tesalonica 2:4.) Pansina kon paonan-o nagpahimulos an sister nga hi Jocelyn ha pagsangyaw han maopay nga sumat. Usa ka adlaw, nagmata hi Jocelyn nga nadidepres. “Inabat ko nga baga hin waray ako naihahatag,” hiya nagsiring. “Pero payunir ako, ngan hito nga adlaw eskedyol ko para ha ministeryo. Salit nag-ampo ako  ngan ginawas.” Hito nga aga nakilala ni Jocelyn hi Mary, nga buotan ngan naruyag pagpa-Bible study. Paglabay hin pipira ka bulan, nagsumat hi Mary nga nag-iinampo na hiya ha Dios para hin bulig han nagtuktok hi Jocelyn ha iya purtahan. Tungod hini nga eksperyensya, hi Jocelyn nagsiring, “Inabat ko nga sugad hin nasiring ha akon hi Jehova, ‘Gin-uuyonan ko ikaw.’” Syempre, diri ngatanan mamamati han mensahe han aton pagsangyaw. Pero makakasiguro kita nga hi Jehova nalilipay kon nangangalimbasog kita nga ihatag an aton pinakamaopay basi isangyaw an maopay nga sumat.

17. Ano an imo mahibabaroan han ginsiring ni Vicky parte ha lukat? (Salmo 5:12)

¹⁷ An bili han lukat ginagamit ni Jehova hadton iya gin-uuyonan. (1 Tim. 2:​5, 6) Pero ano man kon naabat la gihapon kita nga diri kita gin-uuyonan ni Jehova bisan kon may-ada kita pagtoo ha lukat ngan bawtismado na? Hinumdumi diri kita pirme makakasarig ha aton kalugaringon nga pag-abat pero makakasarig kita kan Jehova. Para ha iya, matadong adton may pagtoo ha lukat ngan nagsasaad hiya nga bibendisyonan hira. (Basaha an Salmo 5:12; Roma 3:26) Nakabulig kan Vicky an pagpamalandong han lukat. Usa ka adlaw, katapos pamalandungon hin maopay an lukat, hiya nagsiring: “Maiha na nga nagpapailob ha akon hi Jehova. . . . Pero, sugad hin ginsisidngan ko hiya: ‘Mationan-o man kadaku an imo gugma, kulang pa gihapon ito basi higugmaon ako. An halad han imo Anak diri igo basi matabonan an akon mga sala.’” Pinaagi ha pagpamalandong hini nga regalo nga lukat, inabat niya nga hinigugma hiya ni Jehova. Kon papamalandungon naton an lukat, aabaton ta liwat nga hinigugma kita niya ngan gin-uuyonan.

18. Ha ano kita makakasiguro kon padayon naton nga hihigugmaon an aton langitnon nga Amay?

¹⁸ Bisan kon nangangalimbasog kita nga iaplikar an aton nahibaroan hini nga artikulo, may mga panahon nga bangin manluya kita ngan maghunahuna kon gin-uuyonan ba kita ni Jehova. Kon ito an mahitabo, hinumdumi nga iya gin-uuyonan adton “padayon nga nahigugma ha Iya.” (San. 1:12) Salit padayon nga magin duok kan Jehova ngan kitaa an ngatanan nga paagi nga iya iginpapakita nga gin-uuyonan ka niya. Pirme hinumdumi nga hi Jehova “diri . . . hirayo ha tagsa ha aton.”—Buh. 17:27.