1. Ano an pipira nga balaud ha Biblia, ngan paonan-o kita nagpapahimulos ha pagsugot hito?

HI Jehova naghatag ha aton hin damu nga espisipiko nga sugo nga aada ha Biblia. Pananglitan, igindidiri niya an seksuwal nga imoralidad, pagsingba ha dios-dios, pangawat, ngan paghubog. (1 Cor. 6:9, 10) Dugang pa, an Anak han Dios nga hi Jesu-Kristo, naghatag ha iya mga sumurunod hin diri masayon pero makalilipay nga sugo: “Kadto kamo ha mga tawo han ngatanan nga nasud ngan tutdui hira basi magin akon mga disipulo, bawtismuhi hira ha ngaran han Amay ngan han Anak ngan han baraan nga espiritu, tutdui hira ha pagtuman han ngatanan nga akon iginsugo ha iyo. Ngan hinumdumi niyo nga kaupod niyo ako ha ngatanan nga adlaw tubtob ha ikatarapos hini nga sistema.” (Mat. 28:19, 20) Proteksyon gud an mga balaud ngan mga sugo han Dios! An pagsunod hito nabulig ha aton nga magkaada mas maopay nga kahimsog, mas malipayon nga pamilya, ngan dugang nga pagtahod ha kalugaringon. Labaw ha ngatanan, kon pirme naton susugton an mga sugo ni Jehova, upod na an pagsangyaw nga buruhaton, makakarawat naton an iya pag-uyon ngan bendisyon.

2, 3. (a) Kay ano nga an Biblia waray maghatag hin mga surundon ha tagsa nga sitwasyon han aton kinabuhi? (b) Ano nga mga pakiana an hihisgotan hini nga artikulo? (Kitaa an retrato hini nga pahina.)

² Kondi, may mga sitwasyon nga an Biblia waray maghatag hin  espisipiko nga sugo. Pananglitan, an Kasuratan waray maghatag hin detalyado nga surundon may kalabotan ha pamado nga angayan ha usa nga Kristiano. Paonan-o ini nagpapakita han kinaadman ni Jehova? Iba-iba an estilo ngan kustomre ha kada nasud, ngan nagbabag-o liwat ito paglabay han mga tuig. Kon an Biblia naghatag hin detalyado nga surundon ha pamado ngan pag-ayos nga inuuyonan han Dios, kadaan na ito yana. Ini liwat an rason nga an giniyahan nga Pulong han Dios waray maghatag hin damu nga surundon basi diktahan an usa nga Kristiano kon ano nga trabaho, pagtambal, ngan kaliawan an sadang niya pilion. Salit, an kada indibiduwal ngan an ulo han pamilya an magdidesisyon may kalabotan hini nga butang.

³ Iginpapasabot ba hini nga diri importante kan Jehova an aton ginhihimo nga mabug-at nga mga desisyon, nga an pipira hito mahimo pa ngani magkaada daku nga epekto ha aton kinabuhi? Uuyonan ba han aton langitnon nga Amay an bisan ano nga desisyon basta waray natatalapas nga balaud ha Biblia? Kon waray espisipiko nga balaud, paonan-o naton hibabaroan nga an aton desisyon makakapalipay kan Jehova?

4, 5. Paonan-o an aton mga desisyon makakaapekto ha aton ngan ha iba?

⁴ An pipira bangin naghuhunahuna nga puydi nira buhaton an anoman nga ira karuyag. Kondi basi makahimo hin maaramon nga desisyon nga makakapalipay kan Jehova, kinahanglan naton tagdon an mga balaud ngan prinsipyo nga aada ha iya Pulong ngan sundon ito. Pananglitan, basi makarawat an pag-uyon han Dios, kinahanglan naton sundon an iya balaud may kalabotan ha dugo. (Gen. 9:4; Buh. 15:28, 29) An pag-ampo mabulig ha aton nga magdesisyon uyon ha mga prinsipyo ngan balaud ha Kasuratan.

⁵ An mabug-at nga personal nga mga desisyon makakaapekto ha aton espirituwalidad. An tagsa naton nga desisyon makakaapekto ha aton relasyon kan Jehova, maopay man ito o maraot. An maaramon nga desisyon magpaparig-on han aton relasyon ha Dios, pero an diri maaramon nga desisyon makakadaot hito. Dugang pa, an sayop nga desisyon mahimo makadaot ha espirituwalidad han iba; mahimo ito magpaluya o makapakdol pa ngani ha ira, o makagwara han pagkaurosa han kongregasyon. Oo, importante gud an aton personal nga mga desisyon.—Basaha an Roma 14:19; Galacia 6:7.

6. Ano an sadang magin basihan han aton mga desisyon?

⁶ Ano an sadang naton himoon ha mga sitwasyon nga waray direkta nga sugo tikang ha Biblia? Hini nga mga kahimtang, responsabilidad naton nga usisahon an mga detalye ngan magdesisyon diri basado ha aton karuyag, kondi ha kon ano an inuuyonan ngan ginbibendisyonan ni Jehova.—Basaha an Salmo 37:5.

7. Kon waray direkta nga balaud an Biblia, paonan-o naton mahibabaroan an karuyag ni Jehova nga buhaton naton ha usa nga sitwasyon?

⁷ Bangin mahunahuna mo, ‘Paonan-o naton mahibabaroan an inuuyonan ni Jehova kon an iya Pulong waray espisipiko nga sugo mahitungod ha usa nga butang?’ An Efeso 5:17 nasiring: “Padayon nga sabota an kaburut-on ni Jehova.” Kon waray direkta nga balaud an Biblia, paonan-o naton masasabtan an kaburut-on han Dios? Pinaagi ha pag-ampo ha iya ngan pagpagiya ha baraan nga espiritu.

8. Paonan-o ginsabot ni Jesus an karuyag ni Jehova nga buhaton niya? Paghatag hin ehemplo.

⁸ Tagda kon paonan-o ginsabot ni Jesus an karuyag han iya Amay nga buhaton niya. Ha duha nga panhitabo, nag-ampo anay hi Jesus ngan katapos milagroso nga ginpakaon niya an damu nga tawo. (Mat. 14:17-20; 15:34-37) Pero, waray niya himoa nga tinapay an bato han nagutom hiya ngan ginsulay han Demonyo ha kamingawan.  (Basaha an Mateo 4:2-4.) Tungod kay nasabtan ni Jesus an panhunahuna han iya Amay, maaram hiya nga diri niya sadang himoon nga tinapay an bato. Oo, nasantop ni Jesus nga diri kaburut-on han Dios nga gamiton niya an iya gahum para ha iya kalugaringon nga kaopayan. An iya pagdumiri ha pagbuhat hito nagpakita nga nasarig hiya nga gigiyahan ngan tataganahan hiya ni Jehova.

9, 10. Ano an mabulig ha aton basi makahimo hin maaramon nga mga desisyon? Iilustrar.

⁹ Basi makahimo kita hin maaramon nga desisyon pariho kan Jesus, kinahanglan sumarig kita ha giya ni Jehova. Sadang naton sundon ini nga sagdon: “Sarig kan Jehova ha bug-os mo nga kasingkasing, ngan ayaw sandig dida ha imo kalugaringon nga pagsabot. Ha ngatanan mo nga dalan kilalaha hiya, ngan hiya magtututdo han imo mga agianan. Ayaw pagmakinaadmananon ha imo kalugaringon nga mga mata; kahadlok kan Jehova, ngan baya han karaotan.” (Prob. 3:5-7) An paghibaro ha panhunahuna ni Jehova pinaagi ha pag-aram ha Biblia mabulig ha aton nga masabtan an karuyag han Dios nga himoon naton ha partikular nga sitwasyon. Kon mas nasasabtan naton an panhunahuna ni Jehova, mas masayon para ha aton nga sundon an iya giya.—Esek. 11:19.

¹⁰ Ha pag-ilustrar: Handurawa an usa nga inasaw-an nga namamalit. May naruyagan hiya nga sapatos, pero mahal ito hinduro. Salit naghunahuna hiya, ‘Ano daw la an aabaton han akon bana kon gumasto ako hin sugad kadaku nga kwarta?’ Posible nga maaram na hiya han baton bisan kon diri niya upod an iya bana. Kay ano? Tungod kay ha sulod hin pipira ka panahon, maaram na hiya han panhunahuna han iya bana may kalabotan ha paggasto han ira gutiay nga badyet. Salit nasasabtan niya an panhunahuna han iya bana kon papaliton niya ito nga sapatos. Sugad man, samtang mas nahibabaroan naton an panhunahuna ngan mga paagi ni Jehova, naghihilarom an aton pagsabot ha karuyag han aton langitnon nga Amay nga buhaton naton ha iba-iba nga kahimtang.

11. Ano an mahimo naton igpakiana ha aton kalugaringon kon nagbabasa o nag-aaram kita han Biblia? (Kitaa an kahon nga “ Kon Nag-aaram han Pulong han Dios, Pakianhi an Imo Kalugaringon.”)

¹¹ Basi mahibaroan an panhunahuna ni Jehova, kinahanglan naton magin prayoridad an personal nga pag-aram. Kon nagbabasa o nag-aaram han Pulong han Dios, mahimo naton pakianhan an aton kalugaringon, ‘Ano an iginsusumat hini nga asoy mahitungod kan Jehova, han iya matadong nga mga paagi, ngan han iya panhunahuna?’ Kinahanglan subaron naton an disposisyon ni salmista David, nga nagkanta: “Igtutdo ha akon an imo mga agianan, O Jehova; tutdui ako han imo mga dalan. Mandoi ako ha imo kamatuoran, ngan ako tutdui; kay ikaw an Dios han akon kaluwasan: Ha imo ako nahulat ha bug-os nga adlaw.” (Sal. 25:4, 5) Kon ginpapamalandong mo an usa nga teksto ha Biblia, mahimo mo pakianhan an imo kalugaringon: ‘Paonan-o ko maiaaplikar ini nga teksto ha akon pamilya? Diin ko ini maiaaplikar? Ha balay? Ha trabaho? Ha eskwelahan? Ha ministeryo?’ Kon mahibaroan na naton kon diin iaaplikar an teksto, mas masayon na naton masabtan kon paonan-o ito iaaplikar.

12. Paonan-o an aton mga publikasyon ngan katirok mabulig ha aton nga mahibaroan an panhunahuna ni Jehova ha iba-iba nga butang?

¹² Usa pa nga paagi basi mas mahibaroan naton an panhunahuna ni Jehova amo an pag-usisa hin maopay ha basado ha Biblia nga giya han iya organisasyon. Pananglitan, an Watch Tower Publications Index ngan an Giya ha Pagsaliksik Para ha Mga Saksi ni Jehova iginpublikar basi buligan kita nga mahibaroan an panhunahuna ni Jehova may kalabotan ha mga sitwasyon nga kinahanglan naton maghimo hin personal nga mga desisyon. Nagpapahimulos gud liwat kita pinaagi han pagpamati  hin maopay ha Kristiano nga mga katirok ngan pakigbahin hito. An pagpamalandong ha mga igintututdo ha mga katirok mabulig ha aton nga mas mahibaroan an panhunahuna ni Jehova ngan subaron ito. Kon papahimulosan gud naton an mga tagana ni Jehova ha pagpakaon ha aton ha espirituwal, mas magigin pamilyar pa kita ha iya mga paagi. Salit mas makakahimo kita hin personal nga mga desisyon nga bibendisyonan han aton mahigugmaon nga Dios.

13. Paghatag hin ehemplo kon paonan-o kita makakahimo hin maaramon nga desisyon kon tatagdon naton an panhunahuna ni Jehova.

¹³ Tagda an ehemplo nga nagpapakita kon paonan-o an pagkaada kahibaro ha panhunahuna ni Jehova mabulig ha aton ha paghimo hin maaramon nga mga desisyon. Sugad nga mga magwarali han Ginhadian, bangin karuyag naton nga sumulod ha bug-os-panahon nga ministeryo sugad nga mga regular payunir. Basi mahimo ini, nagtikang kita pagpasimple han aton kinabuhi. Pero bangin nababaraka liwat kita kon magigin malipayon ba kita bisan gutiay la an aton kwarta o panag-iya. Oo, an Biblia waray magsugo nga magpayunir kita; puydi kita padayon nga mag-alagad kan Jehova sugad nga matinumanon nga mga magwarali. Pero, ginpapasarig kita ni Jesus nga an mga nagsasakripisyo para ha Ginhadian makakakarawat hin hura nga bendisyon. (Basaha an Lucas 18:29, 30.) Iginpapakita liwat han Kasuratan nga nalilipay hi Jehova kon naghihimo kita hin ‘hul-os nga paghalad’ ha iya ngan malipayon nga ginbubuhat naton an ngatanan para masuportaran an tinuod nga pagsingba. (Sal. 119:108, Baraan nga Biblia; 2 Cor. 9:7) Basado hini nga mga teksto ngan pinaagi ha pag-ampo para han giya, masasabtan naton an panhunahuna ni Jehova. An pagpamalandong hini nga mga teksto mabulig ha aton nga makahimo hin praktikal nga desisyon, ngan ito nga desisyon bibendisyonan han aton Amay ha langit.

14. Paonan-o mo masasabtan kon an partikular nga estilo han pamado nakakapalipay kan Jehova?

¹⁴ Tagda an usa pa nga ehemplo: Pananglitan may naruyagan ka nga bado nga an estilo posible makapakdol ha pipira nga imo kakongregasyon. Pero maaram ka nga waray espisipiko nga balaud ha Biblia nga nagdidiri hito. Ano an panhunahuna ni Jehova may kalabotan hini nga butang? Hi apostol Pablo naghatag hinin giniyahan nga sagdon: “An mga babaye magpahusay ha ira kalugaringon pinaagi han desente nga pamado, nga may dignidad ngan maopay nga panhunahuna, diri pinaagi han mga estilo ha pagsalapid han buhok ngan pagsul-ot hin mga bulawan o perlas o mahal hinduro nga bado, kondi ha paagi nga angay ha kababayin-an nga nagpapahayag  hin debosyon ha Dios, pinaagi han mag-opay nga buhat.” (1 Tim. 2:9, 10) Ini nga sagdon aplikado liwat ha Kristiano nga kalalakin-an. Sugad nga matinumanon nga mga surugoon ni Jehova, mahunahunaon kita diri la han aton personal nga karuyag kondi pati han epekto ha iba han aton pamado ngan pag-ayos. An pagin makonsiderasyon ngan mahigugmaon magpapagios ha aton nga tagdon an opinyon han aton mga igkasi-tumuroo basi diri hira mahipakdol. (1 Cor. 10:23, 24; Fil. 3:17) An paghinumdom ha ginsisiring han Kasuratan mabulig ha aton nga masabtan an panhunahuna ni Jehova may kalabotan hini nga butang ngan maggigiya ha aton nga maghimo hin mga desisyon nga makakapalipay ha iya.

15, 16. (a) Ano an inaabat ni Jehova kon pirme kita naghihinunahuna hin malaw-ay nga mga butang? (b) Kon nagpipili hin kaliawan, paonan-o naton mahibabaroan kon ano an nakakapalipay kan Jehova? (c) Ano an sadang buhaton kon naghihimo hin magbug-at nga desisyon?

¹⁵ Iginsusumat han Biblia nga nasusubo hi Jehova kon an mga tawo nagbubuhat hin maraot ngan ‘an panhunahuna ngan pamurubuot han ira kasingkasing maraot gud ha kadayonan.’ (Basaha an Genesis 6:5, 6.) Iginpapakita hini nga sayop an paghinunahuna hin malaw-ay kay mahimo ito magresulta ha seryoso nga sala nga igindidiri ha Biblia ngan nasumpaki ha panhunahuna ni Jehova. An disipulo nga hi Santiago nagsurat: “An kinaadman nga tikang ha langit, una ha ngatanan putli, mamurayawon, makatadunganon, andam ha pagsugot, puno hin kalooy ngan mag-opay nga bunga, waray ginpapaurog, ngan diri-hipokrito.” (San. 3:17) An paghibaro hini sadang magpagios ha aton nga isalikway an mga kaliawan nga nag-aaghat hin mahugaw nga panhunahuna ngan mga hingyap. An Kristiano nga nakakasabot han panhunahuna ni Jehova diri na kinahanglan magpakiana kon angay ba hiya mag-enjoy ha mga libro, pelikula, o uyag nga kinangangalasan ni Jehova. An Iya panhunahuna may kalabotan hito nga mga butang matin-aw nga mababasa ha Iya Pulong.

¹⁶ Damu nga butang an may mapipilian ha pagdesisyon, ngan malilipay pa gihapon hi Jehova anoman an aton pilion. Pero may kalabotan ha mabug-at nga mga desisyon, usahay mas maopay nga mangaro hin sagdon ha mga tigurang o ha iba pa nga hamtong nga Kristiano. (Tito 2:3-5; San. 5:13-15) Syempre, diri naton sadang hangyoon an iba nga magdesisyon para ha aton. Kinahanglan bansayon ngan gamiton han mga Kristiano an ira abilidad ha pagsabot. (Heb. 5:14) Kita ngatanan kinahanglan gumios uyon ha giniyahan nga pulong ni Pablo: “An kada tagsa magdadara han iya kalugaringon nga pinas-an.”—Gal. 6:5.

17. Ano an mga kapulsanan kon maghihimo kita hin mga desisyon nga makakapalipay kan Jehova?

¹⁷ Kon iginpapahiuyon naton an aton mga desisyon ha panhunahuna ni Jehova, nagigin mas duok kita ha iya. (San. 4:8) Uuyonan ngan bibendisyonan kita niya. Sugad nga resulta, magpaparig-on ini han aton pagtoo ha aton langitnon nga Amay. Salit magpagiya kita ha mga balaud ngan mga prinsipyo ha Biblia, kay iginpapahayag hito an panhunahuna ni Jehova mahitungod han mga butang. Syempre, may-ada kita pirme bag-o nga mahibabaroan mahitungod kan Jehova. (Job 26:14) Pero pinaagi han maduruto nga pangalimbasog, makakarawat naton yana an kinaadman, kahibaro, ngan pagsabot nga mabulig ha aton ha paghimo hin maaramon nga mga desisyon. (Prob. 2:1-5) An mga ideya ngan plano han diri hingpit nga mga tawo nagbabag-o, salit husto la an pahinumdom ha aton han salmista: “An sagdon ni Jehova natukdaw hin marig-on ha waray kataposan, an mga hunahuna han iya kasingkasing ngadto ha ngatanan nga mga katulinan.” (Sal. 33:11) Matin-aw, makakahimo kita hin pinakamaopay nga personal nga desisyon kon an aton panhunahuna ngan buhat uyon ha panhunahuna han aton maaramon ha ngatanan nga Dios, hi Jehova.