IGINTAGNA ni Jesus nga an iya mga sumurunod magpapahimulos hin hura nga ani hinin panahon han kataposan. (Mat. 9:37; 24:14) Tigamni kon paonan-o ini nga mga pulong ni Jesus nagin totoo ha talagsahon nga paagi ha lugar han Transcarpathia, Ukraine. Ha tulo la nga magsapit nga bungto hito nga lugar, 50 an kongregasyon ngan sobra 5,400 an magwarali. * Makatirigamnan nga 1 ha kada 4 nga tawo han kabug-osan nga populasyon hinin tulo nga bungto Saksi ni Jehova!

Ano an disposisyon han mga tawo hito nga teritoryo? “An mga tawo dinhi may pagtahod ha Biblia, nagpapabili ha hustisya, may marig-on nga relasyon ha pamilya, ngan sinsero nga nangangalimbasog ha pagbulig ha kada tagsa,” siring han usa nga bugto hito nga lugar nga hi Vasile. Hiya nagdugang: “Diri hira pirme nauyon ha aton mga gintotoohan. Pero kon may iginsusumat ka ha ira tikang ha Biblia, atentibo hira nga namamati.”

Syempre, an aton kabugtoan naatubang hin naiiba nga ayat kon nagsasangyaw ha lugar nga damu an magwarali. Pananglitan, ha usa nga kongregasyon, 134 an magwarali pero 50 la an balay ha ira teritoryo! Paonan-o gin-aatubang han mga magwarali an sugad nga kahimtang?

Damu nga kabugtoan an nangangalimbasog nga makagsangyaw ha mga lugar nga daku an panginahanglan hin magwarali. “Ha teritoryo han amon kongregasyon, duha la nga balay an nasasangyawan han kada usa nga magwarali,” siring han 90 anyos nga bugto nga hi Ionash. Hadto, nagbibiyahe hi Ionash hin mga 160 ka kilometro pakadto ha teritoryo nga waray pa nakatoka nga kongregasyon diin nagsasangyaw hiya ha Hungarian nga linggwahe. Pero hinin bag-o la han nagtikaluya an iya kahimsog, ha ira baryo na la hiya nagsasangyaw. An mga magwarali kinahanglan magsakripisyo basi makabulig ha iba nga mga teritoryo. Hi Ionash nagsiring: “Basi makasakay ha tren, namata ako ha alas 4 ha aga ngan nagsasangyaw tubtob ha alas 6 ha gab-i, an oras han pagbiyahe han tren tipabalik ha amon lugar. Duha o tulo ka beses ko ito nga ginbubuhat ha usa ka semana.” Inabat ba niya nga bawi gud an iya mga pangalimbasog? “Nalipay gud ako hini nga klase han pagministeryo,” siring niya. “Nalipay ako nga nakapribilehiyo ako nga mabuligan nga mahibaro han kamatuoran an usa nga pamilya nga naukoy ha lugar nga waray kongregasyon.”

Oo, diri ngatanan nga magwarali hini nga lugar nakakagbiyahe hin hirayo. Pero an ngatanan, pati na an edaran nga mga magwarali, nangangalimbasog nga bug-os nga masangyawan an ira lokal nga teritoryo. Sugad nga resulta, han 2017, an kabug-osan nga kadamu han tinambong han Memoryal hinin tulo nga bungto haros doble han kadamu han mga magwarali​—o katunga han kabug-osan nga populasyon. Matin-aw, diin man kita nag-aalagad, damu pa gihapon an buruhaton ha Ginoo.​—1 Cor. 15:58.