1, 2. (a) Han gab-i antes han kamatayon ni Jesus, ano an iya iginsumat ha iya mga disipulo? (Kitaa an retrato hini nga pahina.) (b) Kay ano nga importante nga hinumdoman an mga rason kon kay ano nga nagsasangyaw kita? (c) Ano an aton hihisgotan?

HAN ultimo nga gab-i antes han kamatayon ni Jesus, nakiistorya hiya hin maiha ha iya mga apostol diin ginpasarig niya hira nga hinigugma gud niya hira. Ginsumatan liwat niya hira han ilustrasyon mahitungod han puno han ubas, sugad han aton ginhisgotan ha nahiuna nga artikulo. Pinaagi hito nga ilustrasyon, gin-aghat ni Jesus an iya mga disipulo nga ‘padayon nga mamunga hin damu’​—padayon nga isangyaw an mensahe han Ginhadian.​—Juan 15:8.

² Ginsumatan ni Jesus an iya mga disipulo diri la kon ano an ira kinahanglan buhaton kondi pati liwat kon kay ano nga sadang nira ito buhaton. Gintagan niya hira hin mga rason kon kay ano nga kinahanglan nira padayon nga makigbahin ha pagsangyaw nga buruhaton. Kay ano nga importante nga hisgotan naton ito nga mga rason? Kon ginhuhunahuna naton an mga rason kon kay ano nga kinahanglan padayon kita nga magsangyaw, napapagios kita nga magin mapailubon ha ‘pagpamatuod ha ngatanan nga nasud.’ (Mat. 24:13, 14) Salit hisgotan naton an upat nga  Kasuratanhon nga rason kon kay ano nga nagsasangyaw kita. Hihisgotan liwat naton an upat nga regalo ni Jehova nga nabulig ha aton nga padayon nga mamunga.

3. (a) Sumala ha Juan 15:8, ano an usa nga rason kon kay ano nga nagsasangyaw kita? (b) Ano an ginrirepresentaran han bunga han ubas ha ilustrasyon ni Jesus, ngan kay ano nga angayan ito?

³ An nangunguna nga rason kon kay ano nga nagsasangyaw kita amo an pagpasidungog kan Jehova ngan pagbaraan han iya ngaran. (Basaha an Juan 15:1, 8.) Tigamni nga iginpariho ni Jesus an iya Amay nga hi Jehova ha usa nga parauma, nga nagtatanom hin ubas. Iginpariho ni Jesus an iya kalugaringon ha puno han ubas, ngan an iya mga sumurunod ha mga sanga. (Juan 15:5) Salit an bunga han ubas nagrirepresentar ha bunga han Ginhadian nga amo an nagigin bunga han mga sumurunod han Kristo. Hi Jesus nagsiring ha iya mga apostol: “An akon Amay napapasidunggan kon padayon nga namumunga kamo hin damu.” Napapasidunggan an parauma kon namumunga hin maopay an iya tanom nga mga ubas. Ha pariho nga paagi, napapasidunggan naton hi Jehova kon iginpapasamwak naton an mensahe han Ginhadian ha aton bug-os nga mahihimo.​—Mat. 25:20-23.

4. (a) Ha ano nga mga paagi ginbabaraan naton an ngaran han Dios? (b) Ano an imo inaabat ha pagkaada pribilehiyo nga baraanon an ngaran han Dios?

⁴ Paonan-o nababaraan an ngaran han Dios han aton pagsangyaw nga buruhaton? Diri na naton madudugangan an pagkabaraan han ngaran han Dios. Sagrado na ito, o baraan, ha bug-os nga sukol. Pero tigamni nga hi propeta Isaias nagsiring nga sadang naton tagdon nga baraan hi Jehova. (Isa. 8:13) An pipira nga paagi nga ginbabaraan naton an ngaran han Dios amo an pagtagad hito sugad nga naiiba gud ha iba nga ngaran ngan pagbulig ha mga tawo nga tagdon ito sugad nga baraan. (Mat. 6:9) Pananglitan, pinaagi ha pagpasamwak han kamatuoran mahitungod han mag-opay nga kalidad han Dios ngan han iya diri nababag-o nga katuyoan para ha katawohan, gindidepensahan naton an ngaran han Dios kontra ha mga kabuwaan ngan pakaraot ni Satanas. (Gen. 3:1-5) Dugang pa, kon ginbubuligan naton an mga tawo ha aton teritoryo nga hibaroan nga takos hi Jehova ‘kumarawat han himaya, dungog, ngan gahum,’ ginbabaraan naton an ngaran han Dios. (Pah. 4:11) Hi Rune, nga 16 ka tuig na nga payunir, nagsiring: “An paghibaro nga gintagan ako hin oportunidad nga magin saksi han Maglalarang han uniberso nagpapagios ha akon nga magin mapasalamaton. Nagpapakusog ito han akon hingyap nga padayon nga magsangyaw.”

5. (a) Sumala ha Juan 15:9, 10, ano an usa nga rason kon kay ano nga nagsasangyaw kita? (b) Paonan-o ginpabug-atan ni Jesus an pagkaimportante han pagpailob?

⁵ Basaha an Juan 15:9, 10. An aton hilarom nga gugma kan Jehova ngan kan Jesus usa nga importante nga rason kon kay ano nga nagsasangyaw kita han mensahe han Ginhadian. (Mar. 12:30; Juan 14:15) Ginsidngan ni Jesus an iya mga disipulo nga diri igo an pagin aada la ha iya gugma kondi nga ‘magpabilin hira ha iya gugma.’ Kay ano? Kay an pagkinabuhi kada adlaw sugad nga tinuod nga disipulo han Kristo nagkikinahanglan hin pagpailob. Ginpabug-atan ni Jesus nga kinahanglan an pagpailob pinaagi ha pauroutro nga paggamit han pulong nga “magpabilin” ha halipot nga asoy nga mababasa ha Juan 15:4-10.

6. Paonan-o naton iginpapakita nga karuyag naton magpabilin ha gugma han Kristo?

⁶ Paonan-o naton iginpapakita nga karuyag naton magpabilin ha gugma han Kristo ngan padayon nga makarawat an iya pag-uyon? Pinaagi ha pagtuman han mga sugo ni Jesus. Sugad hin ginsisidngan kita ni Jesus nga, ‘Magin masinugtanon ha akon.’ Pero ginpapabuhat la ni Jesus ha aton kon ano an iya ginbuhat, kay hiya dugang nga nagsiring: “Sugad la nga gintutuman ko an mga sugo han Amay ngan nagpapabilin ha iya gugma.” Iginpakita ni Jesus an maopay nga ehemplo.​—Juan 13:15.

7. Ano an koneksyon han pagin masinugtanon ngan gugma?

⁷ May kalabotan ha koneksyon han pagin masinugtanon  ngan gugma, hi Jesus nagsiring ha iya mga apostol: “An nakarawat han akon mga sugo ngan nagtutuman hito, nahigugma ha akon.” (Juan 14:21) Dugang pa, pinaagi ha pagtuman han sugo ni Jesus nga magsangyaw, iginpapakita liwat naton nga hinigugma naton an Dios kay an mga sugo ni Jesus nagpapakita han panhunahuna han iya Amay. (Mat. 17:5; Juan 8:28) Sugad nga balos ni Jehova ngan ni Jesus ha gugma nga aton iginpapakita ha ira, gintitipigan kita nira ha ira gugma.

8, 9. (a) Ano an usa pa nga rason kon kay ano nga nagsasangyaw kita? (b) Kay ano nga an mga pulong ni Jehova ha Esekiel 3:18, 19 ngan 18:23 nagpapagios ha aton nga padayon nga magsangyaw?

⁸ May usa pa nga rason kon kay ano nga padayon kita nga nakikigbahin ha pagsangyaw nga buruhaton. Nagsasangyaw kita basi magpahamangno. Ha Biblia, iginhuhulagway hi Noe sugad nga “parasangyaw.” (Basaha an 2 Pedro 2:5.) An iya pagsangyaw nga buruhaton antes han Baha sigurado nga nag-uupod hin pahamangno mahitungod han tiarabot nga kabungkagan. Kay ano nga nakasiring kita hito? Tigamni an ginsiring ni Jesus: “Ha mga adlaw antes han Baha, an mga tawo nangangaon, nanginginom, nangangasawa an kalalakin-an ngan ginpapangasawa an kababayin-an, tubtob nga sinulod hi Noe ha arka. Waray hira maghatag hin atensyon tubtob nga inabot an Baha ngan igin-anod hira ngatanan. Magigin sugad liwat hito an presensya han Anak han tawo.” (Mat. 24:38, 39) Bisan kon waray mamati an mga tawo, padayon nga iginsangyaw ni Noe an mensahe han pagpahamangno nga iginsugo ha iya.

⁹ Yana, nagsasangyaw kita han mensahe han Ginhadian basi tagan an mga tawo hin higayon nga mahibaro mahitungod han katuyoan han Dios para ha katawohan. Pariho kan Jehova, karuyag gud naton nga an mga tawo mamati ha aton mensahe ngan “mabuhi.” (Esek. 18:23) Sugad man, kon nagsasangyaw kita ha balay-balay ngan ha panpubliko nga mga lugar, ginpapahamangnoan naton an damu nga tawo tubtob nga posible nga maabot an Ginhadian han Dios ngan bubungkagon inin diri diosnon nga kalibotan.​—Esek. 3:18, 19; Dan. 2:44; Pah. 14:6, 7.

10. (a) Sumala ha Mateo 22:39, ano an usa nga rason kon kay ano nga nagsasangyaw kita? (b) Isaysay kon paonan-o ginbuligan nira Pablo ngan Silas an usa nga tinaporan ha prisohan ha Filipos.

¹⁰ Ini an usa pa nga importante nga rason kon kay ano nga padayon kita nga nagsasangyaw: Nagsasangyaw kita kay hinigugma naton an aton igkasi-tawo. (Mat. 22:39) Tungod hito nga gugma, napapagios kita nga magpadayon hini nga buruhaton kay maaram kita nga mahimo mabag-o an kasingkasing han mga tawo kon nagbabag-o an ira mga kahimtang. Hunahunaa an eksperyensya ni Pablo ngan han iya kaupod nga hi Silas. Ha syudad han Filipos, iginpapriso hira han mga parakontra. Katapos, han katutnga han gab-i, tigda nga nagkaada makusog nga linog ngan naabrihan an mga purtahan han prisohan. An tinaporan ha prisohan nahadlok nga bangin nakapalagiw an mga priso salit mag-uunay na unta hiya. Pero ginuliat hi Pablo: “Ayaw pag-unay!” An nagugupong nga tinaporan ha prisohan nagpakiana: “Ano an kinahanglan ko buhaton basi matalwas?” Ira hiya ginsidngan: “Tumoo ka ha Ginoo nga hi Jesus basi matalwas ka.”​—Buh. 16:25-34.

11, 12. (a) Ano an igintututdo ha aton han asoy mahitungod han tinaporan ha prisohan may kalabotan ha aton ministeryo? (b) Ginsisiguro naton nga andam kita ha pagbuhat han ano?

¹¹ Ano an igintututdo ha aton han asoy mahitungod han tinaporan ha prisohan may kalabotan han aton pagsangyaw nga buruhaton? Tigamni ini: Nabag-o an disposisyon han tinaporan ha prisohan  ngan nangaro hin bulig katapos la han linog. Ha pariho nga paagi, an pipira nga indibiduwal nga diri nakarawat hadto han mensahe han Biblia bangin magbag-o an disposisyon ngan mamiling hin bulig kon tigda nga bay-ugon an ira kinabuhi, siring pa, hin mga problema. Pananglitan, may mga tawo ha aton teritoryo nga bangin tigda nga nawad-an han ira maiha na nga trabaho ngan diri nira ito makarawat. An iba bangin nasasakitan tungod kay ginbulagan hira han ira padis hinin bag-o la. An iba liwat bangin nawuwurok kon ano an ira bubuhaton tungod kay nadayagnos nga may-ada hira grabe nga sakit, o bangin nasusubo gud tungod han kamatyi hin hinigugma. Kon nahitatabo an sugad nga mga butang, an pipira nga nagugupong nga indibiduwal bangin magpakiana mahitungod han katuyoan han kinabuhi nga hadto ira la ginbabalewaray. Bangin magpakiana pa ngani hira, ‘Ano an kinahanglan ko buhaton basi matalwas?’ Kon makaistorya naton hira, bangin maruyag hira nga mamati ha siyahan nga higayon ha aton mensahe nga naghahatag hin paglaom.

¹² Salit, pinaagi ha padayon nga pagin matinumanon ha aton pagsangyaw nga buruhaton, ginsisiguro naton nga andam kita ha paghatag hin pagliaw ha mga tawo ha panahon nga andam na hira ha pagkarawat hito. (Isa. 61:1) Hi Charlotte, nga 38 ka tuig na ha bug-os-panahon nga pag-alagad, nagsiring: “Waray direksyon an kinabuhi han mga tawo yana. Kinahanglan nira mabatian an maopay nga sumat.” Hi Ejvor, nga 34 ka tuig na nga payunir, nagsiring: “Yana mas damu na gud nga tawo an nasusubo. Karuyag ko gud hira buligan. Ito an nagpapagios ha akon nga magsangyaw.” Oo, an gugma ha igkasi-tawo maopay gud nga rason kon kay ano nga nagpapadayon kita ha aton ministeryo!

13, 14. (a) Ano nga regalo an gin-uunabi ha Juan 15:11? (b) Paonan-o kita magkakaada han kalipay ni Jesus? (c) Paonan-o an kalipay nakakaapekto ha aton ministeryo?

¹³ Han ultimo nga gab-i antes han kamatayon ni Jesus, iya liwat gin-unabi ha iya mga disipulo an pipira nga regalo nga mabulig ha ira nga padayon nga mamunga. Ano ito nga mga regalo, ngan paonan-o kita magpapahimulos hito?

¹⁴ An regalo nga kalipay. Nakakapabug-at ba an pagsugot han sugo ni Jesus nga magsangyaw? Diri. Katapos ni Jesus unabihon an ilustrasyon mahitungod han puno han ubas, hiya nagsiring nga adton nagsasangyaw han mensahe han Ginhadian magigin malipayon. (Basaha an Juan 15:11.) Ngani, ginpasarig kita niya nga magkakaada kita han iya kalipay. Paonan-o? Sugad han gin-unabi kanina, iginpariho ni Jesus an iya kalugaringon ha usa nga puno hin ubas ngan an iya mga disipulo ha mga sanga. An puno han ubas an nagsusustinir han mga sanga. Samtang nagpapabilin ha puno an mga sanga, makakakuha ito hin tubig ngan pagkaon tikang ha puno. Ha pariho nga paagi, samtang nagpapabilin kita nga kahiusa han Kristo pinaagi ha pagsunod hin maopay han iya mga pitad, naieksperyensyahan naton an kalipay nga iya naeksperyensyahan ha pagbuhat han kaburut-on han iya Amay. (Juan 4:34; 17:13; 1 Ped. 2:21) Hi Hanne, nga sobra 40 ka tuig na nga payunir, nagsiring, “An kalipay nga akon pirme inaabat katapos han akon pagministeryo nag-aaghat ha akon nga padayon nga mag-alagad kan Jehova.” Oo, an tinuod nga kalipay naghahatag ha aton hin kusog basi padayon nga magsangyaw bisan ha magkuri nga mga teritoryo.​—Mat. 5:10-12.

15. (a) Ano nga regalo an gin-uunabi ha Juan 14:27? (b) Kay ano nga an kamurayawan nabulig ha aton nga padayon nga mamunga?

¹⁵ An regalo nga kamurayawan. (Basaha an Juan 14:27.) Han ultimo nga gab-i antes han kamatayon ni Jesus, ginsidngan niya an iya mga apostol nga ihahatag niya ha ira an iya kamurayawan. Paonan-o ito nga regalo​—an iya kamurayawan—​nabulig ha aton nga mamunga? Samtang padayon kita nga nagsasangyaw, inaabat naton an nagpapadayon nga kamurayawan tungod kay maaram kita nga gin-uuyonan kita ni Jehova ngan ni Jesus. (Sal. 149:4; Roma 5:3, 4; Col. 3:15) Hi Ulf, nga 45 ka tuig na ha bug-os-panahon nga pag-alagad, nagsiring, “Nakakapoy ako ha pagsangyaw, pero naghahatag ito  ha akon hin tinuod nga katagbaw ngan katuyoan ha akon kinabuhi.” Mapasalamaton gud kita nga gintagan kita hin nagpapadayon nga kamurayawan ha hunahuna!

16. (a) Ano nga regalo an gin-uunabi ha Juan 15:15? (b) Paonan-o an mga apostol magpapabilin nga kasangkayan ni Jesus?

¹⁶ An regalo nga pagin sangkay ni Jesus. Katapos sumatan ni Jesus an iya mga apostol nga hingyap niya nga “bug-os nga abaton” nira an kalipay, iginsaysay niya ha ira an pagkaimportante han pagpakita hin nagsasakripisyo nga gugma. (Juan 15:11-13) Katapos, hiya nagsiring: “Gintatawag ko kamo nga kasangkayan.” Presyoso gud nga regalo an pagin sangkay ni Jesus! Ano an sadang buhaton han mga apostol basi magpabilin hira nga sangkay ni Jesus? Kinahanglan nira sugton an sugo nga padayon nga mamunga. (Basaha an Juan 15:14-16.) Mga duha ka tuig antes hito, ginsugo ni Jesus an iya mga apostol: “Ha paglakat niyo, pagsangyaw kamo: ‘An Ginhadian han langit hirani na.’” (Mat. 10:7) Salit hiton ultimo nga gab-i, gindasig niya hira nga magpadayon ha buruhaton nga ira gintikangan. (Mat. 24:13; Mar. 3:14) Diri masayon an pagtuman han sugo ni Jesus, pero mahimo hira maglampos, ngan tungod hito magpapabilin hira nga iya kasangkayan. Paonan-o? Ha bulig han usa pa nga regalo.

17, 18. (a) Ano nga regalo an gin-uunabi ha Juan 15:16? (b) Paonan-o ito nga regalo mabulig ha mga disipulo ni Jesus? (c) Ano nga mga regalo an nagpaparig-on ha aton yana?

¹⁷ An regalo nga ginbabaton nga mga pag-ampo. Hi Jesus nagsiring: “Bisan ano an iyo aroon ha Amay ha akon ngaran, ihahatag niya ito ha iyo.” (Juan 15:16) Sigurado nga naparig-on gud an mga apostol hini nga saad! * Waray bug-os nga masabti han mga apostol nga diri na mag-iiha, papatayon an ira Lider nga hi Jesus. Pero an iya kamatayon diri nagpapasabot nga waray na mabulig ha ira. Andam hi Jehova nga pamatian an ira mga pag-ampo para han ira ginkikinahanglan nga bulig basi matuman nira an sugo nga pagsangyaw han mensahe han Ginhadian. Ngani, waray pag-iha, nakita nira kon paonan-o ginbaton ni Jehova an ira mga pag-ampo para hin bulig.​—Buh. 4:29, 31.

¹⁸ Nahitatabo liwat ito yana. Samtang padayon kita nga namumunga, nagpapabilin kita nga sangkay ni Jesus. Dugang pa, makakasarig kita nga andam hi Jehova nga batunon an aton mga pag-ampo para hin bulig ha paglampos han mga ulang ha aton pagsangyaw han maopay nga sumat han Ginhadian. (Fil. 4:13) Mapasalamaton gud kita nga ginbabaton ni Jehova an aton mga pag-ampo ngan sangkay kita ni Jesus! Ini nga mga regalo ni Jehova nagpaparig-on ha aton nga padayon nga mamunga.​—San. 1:17.

19. (a) Kay ano nga padayon kita nga nakikigbahin ha pagsangyaw nga buruhaton? (b) Ano an nabulig ha aton nga matapos an buruhaton han Dios?

¹⁹ Sugad han aton ginhisgotan hini nga artikulo, padayon kita nga nakikigbahin ha pagsangyaw basi mapasidunggan naton hi Jehova ngan mabaraan an iya ngaran, maipakita an aton gugma kan Jehova ngan kan Jesus, maghatag hin pahamangno, ngan maipakita an aton gugma ha igkasi-tawo. Dugang pa, an regalo nga kalipay, kamurayawan, pagin sangkay ni Jesus, ngan ginbabaton nga mga pag-ampo nagpaparig-on ha aton nga tapuson an buruhaton han Dios. Malilipay gud hi Jehova samtang nakikita niya nga ginbubuhat naton an ngatanan nga aton mahihimo basi ‘padayon nga mamunga kita hin damu’!