1-2. Sumala ha Salmo 40:5, ano nga mga regalo an iginhatag ha aton ni Jehova, ngan kay ano nga hihisgotan naton ito?

HI Jehova usa nga mahinatagon nga Dios. Hunahunaa an pipira han mga regalo niya ha aton: an aton matahom ngan naiiba gud nga urukyan, an tuna; an aton utok nga maopay gud an pagkadisenyo; ngan an iya presyoso nga Pulong, an Biblia. Pinaagi hinin tulo nga regalo, gintagan kita ni Jehova hin lugar nga mauukyan, gintagan kita hin abilidad ha paghunahuna ngan pakigkomunikar, ngan ginbabaton niya an aton pinakaimportante nga mga pakiana.​—Basaha an Salmo 40:5.

² Hini nga artikulo, hihisgotan naton ito nga tulo nga regalo. Kon mas ginpapamalandong naton ito, mas maaapresyar naton ito ngan magigin mas makusog an aton hingyap nga lipayon an aton mahigugmaon nga Maglalarang nga hi Jehova. (Pah. 4:11) Magigin mas epektibo liwat kita ha pagbulig hadton mga nalimbongan han buwa nga doktrina han ebolusyon.

3. Kay ano nga naiiba gud an tuna?

³ An kinaadman han Dios klaro nga nakikita ha paagi han iya pagkahimo han aton urukyan, an tuna. (Roma 1:20; Heb. 3:4) May iba pa nga planeta nga nalibot liwat ha adlaw, pero an tuna naiiba gud kay an pagkadisenyo hito tama gud para magsustinir han kinabuhi han tawo.

4. Kay ano nga masisiring naton nga an tuna mas maopay gud kay ha bisan ano nga barko nga hinimo han tawo?

⁴ An tuna dida ha uniberso maipapariho naton ha barko nga aada ha haluag nga kadagatan. Pero may importante nga mga kaibahan an hinimo han tawo nga barko nga puno hin tawo ngan an aton tuna. Pananglitan, mationan-o kaiha mabubuhi an mga tawo ha literal nga barko kon hira an maghihimo han ira oxygen, pagkaon, ngan tubig ngan kon diri nira mailalabog ha gawas han barko  an bisan ano nga ira hugaw o basura? An mga tawo hito nga barko diri mag-iiha mamamatay. Ha kabaliktaran, an tuna nagsusustinir han binilyon nga kinabuhi. May kapasidad ito paghimo han oxygen, pagkaon, ngan tubig nga aton ginkikinahanglan, ngan diri kita nauubosan hiton importante nga mga suplay. An mga hugaw o basura hito diri ginlalabog ngadto ha kawanangan; pero an tuna nagpapabilin nga matahom ngan nauukyan. Kay ano nga nagin posible ito? Gindisenyo ni Jehova an tuna nga may abilidad ha pag-recycle han mga butang. Hisgotan naton hin madaliay an duha hini nga mga sikolo nga maopay gud an pagkadisenyo, an sikolo han oxygen ngan an sikolo han tubig.

5. Ano an sikolo han oxygen, ngan ano an ginpapamatud-an hito?

⁵ An Oxygen usa nga gas nga ginkikinahanglan han mga tawo ngan mga hayop basi magpabilin nga buhi. Ginbabanabana nga usa ka gatos ka bilyon nga tonilada han oxygen an ginhihinggot han buhi nga mga linarang kada tuig. Ini gihap nga mga linarang naggagawas hin gas nga gintatawag nga carbon dioxide. Pero diri nauubos hini nga mga linarang an ngatanan nga oxygen, ngan an atmospera diri napupuno han “mahugaw” nga gas, nga carbon dioxide. Kay ano? Kay hi Jehova naghimo liwat hin mga organismo​—tikang ha dagku nga kahoy tubtob ha gudti nga lumot​—nga nahinggot hin carbon dioxide ngan naggagawas hin oxygen. Ha literal nga paagi, an sikolo han oxygen nagpapamatuod han mga pulong nga nakarekord ha Buhat 17:24, 25: “An Dios . . . naghahatag ha ngatanan nga tawo hin kinabuhi ngan gininhawa.”

6. Ano an sikolo han tubig, ngan ano an ginpapamatud-an hito? (Kitaa liwat an kahon nga “ An Regalo ni Jehova nga Sikolo han Tubig.”)

⁶ May likido nga tubig ha tuna kay eksakto gud an distansya han aton planeta tikang ha adlaw. Kon medyo naghurohirani ito ha adlaw, an ngatanan nga tubig makaladkad ngan mahubas, ngan magigin mapaso gud ito ngan waray mabubuhi. Kon medyo naghurohirayo ito, an ngatanan nga tubig mabagtik, ngan an tuna mapuputos hin yelo. Tungod kay iginbutang ni Jehova an tuna ha tama nga lokasyon, an sikolo han tubig ha tuna nakakasustinir han kinabuhi. Tungod han sirak han adlaw, nagigin mapaso an tubig ha kadagatan ngan ha bawbaw han tuna, ngan naalisngaw an tubig basi magin mga dampog. Kada tuig, haros 500,000 kilometro kubiko nga tubig an naalisngaw. Ini nga tubig nagpapabilin ha atmospera ha sulod hin mga napulo ka adlaw antes ito mahulog sugad nga uran o yelo. Ha urhi, ito nga tubig nabalik ha kadagatan o ha iba pa nga katubigan, ngan nauutro an sikolo. Inin maopay gud ngan nagpapadayon nga sikolo nagpapamatuod nga makinaadmananon ngan gamhanan hi Jehova.​—Job 36:27, 28; Ecles. 1:7.

7. Ano an pipira nga paagi nga aton maipapakita nga gin-aapresyar naton an regalo nga gin-uunabi ha Salmo 115:16?

⁷ Paonan-o naton mapapatubo an aton apresasyon para ha aton urusahon nga planeta ngan ha tanan nga butang nga aada hito? (Basaha an Salmo 115:16.) An usa nga paagi amo an pagpamalandong ha mga butang nga ginhimo ni Jehova. Magpapagios ito ha aton nga pasalamatan hi Jehova kada adlaw tungod han mag-opay nga butang nga iya iginhahatag ha aton. Ngan aton iginpapakita nga gin-aapresyar naton an tuna pinaagi ha paglimpyo pirme ha lugar nga aton gin-uukyan tubtob ha aton mahihimo.

8. Kay ano nga masisiring naton nga urusahon gud an pagkadisenyo han aton utok?

⁸ An utok han tawo urusahon gud an pagkadisenyo. Han nakadto ka pa ha tiyan han imo nanay, naporma an imo utok uyon ha pagkadisenyo hito, ngan yinukot nga bag-o nga mga selyula ha utok an napuporma kada minuto! Ginbabanabana han mga parasaliksik nga an utok han adulto may-ada hirani 100 ka bilyon nga espesyal nga selyula nga tinatawag nga neuron. Ini nga mga selyula napuporma sugad nga aton utok nga mga  1.5 ka kilo an kabug-aton. Tagda an pipira han urusahon nga mga abilidad han utok.

9. Ano an nagpapamatuod ha imo nga an aton abilidad ha pagyakan usa nga regalo tikang ha Dios?

⁹ An aton abilidad ha pagyakan usa nga milagro. Hunahunaa hin madaliay kon ano an nahitatabo kon nagyayakan kita. Ha kada pulong nga imo ginyayakan, ginpapagana han imo utok an mga 100 nga muscle ha imo dila, tutunlan o but-ol, im-im, panga, ngan dughan. Ito nga mga muscle kinahanglan gumios uyon ha espisipiko nga pagkasurunod basi maluwas hin klaro an mga pulong. May kalabotan ha abilidad ha pagyakan hin mga linggwahe, iginpapakita han usa nga pag-aram nga iginpublikar han 2019 nga an bag-o nga igin-anak nga bata nakakasabot ngan nareak ha tagsa nga pulong. Ini nga pag-aram nasuporta ha gintotoohan han damu nga parasaliksik​—nga natawo kita nga may abilidad nga makasabot ngan mahibaro hin mga linggwahe. Regalo gud tikang ha Dios an aton abilidad ha pagyakan.​—Ex. 4:11.

10. Paonan-o naton maipapakita nga gin-aapresyar naton an regalo han Dios nga pagyakan?

¹⁰ An usa nga paagi nga aton maipapakita nga gin-aapresyar naton an regalo ha aton nga pagyakan amo an pag-esplikar ha mga natoo ha ebolusyon kon kay ano nga natoo kita nga ginhimo han Dios an ngatanan nga butang. (Sal. 9:1; 1 Ped. 3:15) Adton nasuporta hito nga doktrina nasiring nga an tuna ngan an ngatanan nga kinabuhi nga aada hito basta na la nga inulpot. Kon gagamiton naton an Biblia ngan an mga punto nga ginhihisgotan hini nga artikulo, madidepensahan naton an aton Amay ha langit ngan maisasaysay ha mga naruruyag mamati kon kay ano nga kombinsido kita nga hi Jehova an Maglalarang han langit ngan tuna.​—Sal. 102:25; Isa. 40:25, 26.

11. Ano an usa nga rason nga urusahon gud an aton utok?

¹¹ An aton abilidad ha paghinumdom urusahon gud. Hadto, usa nga awtor an nagbanabana nga an utok han tawo may abilidad ha paghinumdom hin mga impormasyon nga katugbang ha 20 ka milyon nga libro. Pero, yana ginsisiring nga mas daku pa gud hito an kapasidad han aton memorya. Tungod han aton memorya, ano an naiiba gud nga abilidad han tawo?

12. Paonan-o kita naiiba ha mga hayop may kalabotan han aton abilidad ha paghibaro hin mga leksyon ha moral?

¹² Ha tanan nga linarang ha tuna, an tawo la an may abilidad ha paghibaro hin mga leksyon ha moral pinaagi ha paghinumdom ngan pag-analisar han naglabay nga panhitabo. Sugad nga resulta, mahimo kita mahibaro hin mas mag-opay nga prinsipyo ngan mababag-o naton an paagi han aton paghunahuna ngan pagkinabuhi. (1 Cor. 6:9-11; Col. 3:9, 10) Ngani, mababansay naton an aton konsensya nga mahibaro han kaibahan han tama ngan sayop. (Heb. 5:14) Mahimo kita mahibaro ha pagpakita hin gugma, pagpaid, ngan kalooy. Ngan mahimo naton makopya an hustisya ni Jehova.

13. Uyon ha Salmo 77:11, 12, paonan-o naton angay gamiton an regalo ha aton nga memorya?

¹³ An usa nga paagi nga ginpapakita naton  nga gin-aapresyar naton an regalo nga memorya amo an pangalimbasog nga hinumdoman an ngatanan nga panahon nga ginbuligan ngan ginliaw kita ni Jehova han naglabay. Magpaparig-on ini han aton pagsarig nga bubuligan liwat kita niya ha maabot nga panahon. (Basaha an Salmo 77:11, 12; 78:4, 7) An usa pa nga paagi amo an paghinumdom han mag-opay nga butang nga ginbubuhat ha aton han mga tawo ngan pagin mapasalamaton hito. Naobserbaran han mga parasaliksik nga an mga tawo nga mapasalamaton mas posible nga magin malipayon. Maopay liwat nga subaron naton hi Jehova may kalabotan ha mga butang nga ginpipili niya nga kalimtan. Pananglitan, hi Jehova may perpekto nga memorya, pero kon nagbabasol kita, ginpipili niya nga pasayloon ngan kalimtan an aton mga sayop. (Sal. 25:7; 130:3, 4) Ngan karuyag niya nga buhaton liwat naton ito ha iba kon nagbabasol hira han ira mga sayop nga ira nabuhat nga nakasakit ha aton.​—Mat. 6:14; Luc. 17:3, 4.

14. Paonan-o naton maipapakita nga gin-aapresyar naton an makaruruyag nga regalo ha aton nga utok?

¹⁴ Maipapakita naton an apresasyon hini nga makaruruyag nga regalo ha aton nga utok pinaagi ha paggamit hito ha pagpasidungog ha Dios nga naghatag hito ha aton. Ginpipili han iba nga gamiton an ira utok para ha pankalugaringon nga mga katuyoan​—ha paghimo hin kalugaringon nga mga suruklan ha kon ano an tama ngan sayop. Pero tungod kay ginhimo kita ni Jehova, angayan la nga laoman naton nga an iya mga suruklan mas maopay gud kay ha bisan ano nga suruklan nga mahihimo naton para ha aton kalugaringon. (Roma 12:1, 2) Kon nagkikinabuhi kita uyon ha iya mga suruklan, murayaw an aton kinabuhi. (Isa. 48:17, 18) Ngan nahibabaro kita kon ano an karuyag ni Jehova nga buhaton naton samtang buhi kita​—an pagpasidungog ha aton Maglalarang ngan Amay, ngan lipayon hiya.​—Prob. 27:11.

15. Paonan-o an regalo nga Biblia nagpapakita han gugma ni Jehova ha katawohan?

¹⁵ An Biblia usa nga regalo han Dios tungod han iya gugma. An aton Amay ha langit naggiya hin kalalakin-an basi isurat ito kay hinigugma  gud niya an iya mga anak ha tuna. Pinaagi han Biblia, kan Jehova ginbabaton an pinakaimportante nga mga pakiana nga bangin naton maipakiana, sugad han: Diin kita nagtikang? Ano an katuyoan han kinabuhi? Ngan ano an aton kabubuwason? Karuyag ni Jehova nga mahibaroan han tanan niya nga anak an baton hito nga mga pakiana, salit tikang pa hadto tubtob yana ginpapagios niya an mga tawo nga ihubad an Biblia ha damu nga linggwahe. Yana, an bug-os nga Biblia o mga bahin hito mababasa na ha sobra 3,000 nga linggwahe! An Biblia an pinakadamu nga naihubad ngan naipanaltag nga libro ha kasaysayan. Diin man naukoy an mga tawo o anoman an ira linggwahe, an kadam-an ha ira may oportunidad nga mahibaroan an mensahe han Biblia ha ira kalugaringon nga linggwahe.​—Kitaa an kahon nga “ Paghubad han Biblia ha mga Linggwahe ha Aprika.”

16. Sumala ha Mateo 28:19, 20, paonan-o naton maipapakita nga gin-aapresyar naton an Biblia?

¹⁶ Maipapakita naton nga gin-aapresyar naton an Biblia pinaagi ha pagbasa hito kada adlaw, pagpamalandong han igintututdo hito, ngan pagbuhat han aton gimaopayi basi iaplikar an aton nahibabaroan. Iginpapakita liwat naton nga nagpapasalamat kita ha Dios pinaagi ha pagbuhat han aton bug-os nga mahihimo basi isumat an mensahe hito ha damu nga tawo tubtob nga posible.​—Sal. 1:1-3; Mat. 24:14; basaha an Mateo 28:19, 20.

17. Ano nga klase hin mga regalo an ginhisgotan naton hini nga artikulo, ngan ano an hihisgotan ha sunod nga artikulo?

¹⁷ Hini nga artikulo, nahisgotan naton an mga regalo han Dios ha aton, sugad han tuna nga aton urukyan; an aton utok nga urusahon gud an pagkadisenyo; ngan an giniyahan nga Pulong han Dios, an Biblia. Pero may iba pa nga mga regalo hi Jehova ha aton nga diri nakikita han aton mga mata. Ini nga diri nakikita nga mga bahandi hihisgotan ha sunod nga artikulo.