An pipira nga tagna nga gin-unabi hini nga tsart naghuhulagway hin mga panhitabo nga nahitabo ha pariho nga panahon. Ito ngatanan nagpapamatuod nga nagkikinabuhi na kita “ha panahon han kataposan.”​—Dan. 12:4.

• Teksto Pah. 11:7; 12:13, 17; 13:1-8, 12

  Tagna “An mapintas nga hayop” yinukot ka tuig na nga nagmamando ha mga tawo ha tuna. Ha panahon han kataposan, nasamaran an ikapito nga ulo hito. Ha urhi, nag-opay ito nga ulo ngan “an bug-os nga tuna” nasunod ha hayop. Ginagamit ni Satanas ito nga hayop basi “makiggirra ha mga nanhibilin.”

  Katumanan Katapos han Baha, an mga gobyerno nga nakontra kan Jehova nagmando ha mga tawo. Paglabay hin damu ka siglo, han Girra ha Kalibotan I, an Imperyo han Britanya nagluya gud. Nakarekober ito han nakig-alyansa ito ha Estados Unidos. Labi na ha panahon han kataposan, ginagamit ni Satanas an iya bug-os nga politikal nga sistema basi timarauton an katawohan han Dios.

• Teksto Dan. 11:25-45

  Tagna Pag-away han hadi han norte ngan han hadi han sur ha panahon han kataposan.

  Katumanan An Germany ngan an Anglo-Amerika nag-away. Han 1945 an Unyon Sobyet ngan an mga kaalyado hito nagin an hadi han norte. Han 1991, nabungkag an Unyon Sobyet, ngan ha urhi, an Russia ngan an mga kaalyado hito an nagin hadi han norte.

• Teksto Isa. 61:1; Mal. 3:1; Luc. 4:18

  Tagna Iginsugo ni Jehova an iya “mensahero” basi ‘maghawan hin dalan’ antes maestablisar an Mesianiko nga Ginhadian. Ini nga grupo nagtikang “magpasamwak hin maopay nga sumat ha mga maaghop.”

  Katumanan Tikang han 1870, hi C. T. Russell ngan an iya mga kaupod maduruto nga nag-aram han Biblia basi mahibaroan kon ano gud an igintututdo hito. Han 1881, ginpabug-atan nira nga kinahanglan magsangyaw an mga surugoon han Dios. Nagpublikar hira hin mga artikulo sugad han “Nanginginahanglan hin 1,000 ka Magwarali” ngan “Gindihogan ha Pagsangyaw.”

• Teksto Mat. 13:24-30, 36-43

  Tagna Usa nga kaaway an nagsabwag hin mga banwa ha uma hin mga trigo. Gintugotan ito nga tumubo ngan natabonan hito an mga trigo; ha panahon han pangani, an mga banwa iginbulag ha mga trigo.

  Katumanan Tikang han 1870, nagin mas klaro an kaibahan han tinuod nga mga Kristiano ha buwa nga mga Kristiano. Ha panahon han kataposan, gintitirok an tinuod nga mga Kristiano ngan iginbubulag ha buwa nga mga Kristiano.

• Teksto Dan. 2:31-33, 41-43

  Tagna An mga tiil nga puthaw nga may halo nga lapok bahin han estatwa nga hinimo ha iba-iba nga metal.

  Katumanan An lapok nagrirepresentar ha ordinaryo nga mga tawo nga nagrebelde ha nagmamando ha ira nga Anglo-Amerika. Tungod hito nga mga tawo, nagluya an abilidad hini nga gahum ha kalibotan nga gumios nga may sugad-puthaw nga kusog.

• Teksto Mat. 13:30; 24:14, 45; 28:19, 20

  Tagna “An mga trigo” gintitirok ngadto ha “bodega” ngan “an matinumanon ngan maaramon nga uripon” gintokahan ha pagmangno ha “mga surugoon ha panimalay.” An “maopay nga sumat han Ginhadian” nagtikang ipasamwak “ha bug-os nga inuukyan nga tuna.”

  Katumanan Han 1919 an matinumanon nga uripon gintokahan ha pagmangno ha katawohan han Dios. Tikang hito nga panahon, mas ginpauswag han mga Estudyante han Biblia an ira pagsangyaw. Yana, an mga Saksi ni Jehova nagsasangyaw ha sobra 200 nga katunaan ngan nagpupublikar hin mga literatura nga iginbase ha Biblia ha sobra 1,000 nga linggwahe.

• Teksto Dan. 12:11; Pah. 13:11, 14, 15

  Tagna Usa nga mapintas nga hayop nga may duha nga sungay an nangunguna ha paghimo “hin imahen han mapintas nga hayop” ngan naghahatag hin “gininhawa ha imahen.”

  Katumanan An Anglo-Amerikano nga Gahum ha Kalibotan nanguna ha pag-establisar han League of Nations. Ini nga organisasyon ginsuportaran han iba pa nga mga nasud. Ha urhi, an hadi han norte inapi liwat ha League of Nations​—pero tikang han 1926 tubtob 1933 la. Pariho han United Nations (UN) nga naestablisar katapos hito, an League of Nations gintagan hin pagdayaw nga angayan la para ha Ginhadian han Dios.

• Teksto Dan. 8:23, 24

  Tagna An mapintas pagkit-on nga hadi ‘nagpapahinabo hin kadaot ha diri ordinaryo nga paagi.’

  Katumanan An Anglo-Amerikano nga Gahum ha Kalibotan nagpahinabo hin daku gud nga kadaot. Pananglitan, han Girra ha Kalibotan II, an Estados Unidos naghulog hin duha nga atomic bomb ha usa nga nasud nga kaaway han Britanya ngan Estados Unidos. Nagresulta ito hin daku gud nga kadaot nga waray pa mahitabo hadto.

• Teksto Dan. 11:31; Pah. 17:3, 7-11

  Tagna An hayop nga an “kolor malamrag an kapula” nga may napulo nga sungay nagawas tikang ha kahiladman ngan amo an ikawalo nga hadi. Gin-uunabi han libro han Daniel ini nga hadi sugad nga “mangil-ad nga butang nga hinungdan han kabungkagan.”

  Katumanan An League of Nations natapos han Girra ha Kalibotan II. Kahuman han girra, an UN ‘iginpahamutang.’ An UN, pariho han League of Nations nga gin-establisar antes hito, gintagan hin dungog nga angayan para ha Ginhadian han Dios. Aatakehon han UN an relihiyon.

• Teksto 1 Tes. 5:3; Pah. 17:16

  Tagna An mga nasud magpuproklamar hin “kamurayawan ngan kasigurohan,” ngan “an napulo nga sungay” ngan “an mapintas nga hayop” maatake ha “hostes” ngan bubungkagon hiya. Katapos, bubungkagon an mga nasud.

  Katumanan Bangin magsiring an mga nasud nga napahinabo nira nga magkaada kamurayawan ngan kasigurohan ha kalibotan. Katapos, bubungkagon han mga nasud nga nasuporta ha UN an mga institusyon han buwa nga relihiyon. Ito an magigin tinikangan han daku nga kasakitan. Ito nga kasakitan matatapos kon bungkagon na ha Armagedon an bug-os nga sistema han kalibotan ni Satanas.

• Teksto Ezek. 38:11, 14-17; Mat. 24:31

  Tagna Susulungon ni Gog an tuna han katawohan han Dios. Katapos, titirukon han mga anghel an “mga pinili.”

  Katumanan An hadi han norte maatake ha katawohan han Dios kaupod an iba pa nga mga gobyerno ha kalibotan. Kahuman magtikang ini nga pag-atake, an nabibilin pa nga mga dinihogan titirukon ha langit.

• Teksto Ezek. 38:18-23; Dan. 2:34, 35, 44, 45; Pah. 6:2; 16:14, 16; 17:14; 19:20

  Tagna Magigin bug-os an “kadaogan” han “nasakay” ha “kabayo nga busag” pinaagi ha pagbungkag kan Gog ngan han iya kasundalohan. “An mapintas nga hayop” ‘iglalabog ha linaw nga kalayo,’ ngan bubungkagon an daku gud nga estatwa.

  Katumanan Hi Jesus, an nagmamando nga Hadi han Ginhadian han Dios, maabot basi talwason an katawohan han Dios. Kaupod an 144,000 nga iya mga igkasi-magmarando ngan an mga anghel, iya bubungkagon an alyansa han mga nasud, an bug-os nga politikal nga sistema ni Satanas.